ರವೀನಾ ಟಂಡನ್ ಜನ್ಮದಿನ: ‘ಕೆಜಿಎಫ್ 2’ ರಮಿಕಾ ಆಸ್ತಿ ಎಷ್ಟು ಕೋಟಿ ರೂಪಾಯಿ?
Raveena Tandon Birthday: 1999ರಲ್ಲಿ ರಿಲೀಸ್ ಆದ ‘ಉಪೇಂದ್ರ’ ಸಿನಿಮಾದಲ್ಲಿ ರವೀನಾ ನಟಿಸಿದರು. ಈ ಚಿತ್ರಕ್ಕೆ ಉಪೇಂದ್ರ ಅವರೇ ನಿರ್ದೇಶನ ಮಾಡಿದ್ದರು. ಅವರೇ ಮುಖ್ಯಭೂಮಿಕೆಯನ್ನೂ ನಿರ್ವಹಿಸಿದ್ದರು. ಇದು ರವೀನಾ ನಟಿಸಿದ ಮೊದಲ ಕನ್ನಡ ಸಿನಿಮಾ.
Updated on:Oct 26, 2023 | 8:07 AM
ನಟಿ ರವೀನಾ ಟಂಡನ್ (Raveena Tondon) ಅವರಿಗೆ ಇಂದು (ಅಕ್ಟೋಬರ್ 26) ಜನ್ಮದಿನ. ಅವರಿಗೆ ಸೋಶಿಯಲ್ ಮೀಡಿಯಾದಲ್ಲಿ ಸೆಲೆಬ್ರಿಟಿಗಳು ಹಾಗು ಫ್ಯಾನ್ಸ್ ಶುಭಾಶಯ ತಿಳಿಸುತ್ತಿದ್ದಾರೆ. ಅವರಿಗೆ ಈಗ 49 ವರ್ಷ ವಯಸ್ಸು. ಈ ವಯಸ್ಸಿನಲ್ಲೂ ಅವರು ಸಖತ್ ಯಂಗ್ ಆಗಿದ್ದಾರೆ. ಸಿನಿಮಾ ಆಯ್ಕೆಯಲ್ಲಿ ಅವರು ಸಖತ್ ಚ್ಯೂಸಿ ಆಗಿದ್ದಾರೆ. ದಕ್ಷಿಣ ಭಾರತ ಹಾಗೂ ಬಾಲಿವುಡ್ ಎರಡರಲ್ಲೂ ಬ್ಯುಸಿ ಇರುವ ಅವರ ಒಟ್ಟಾರೆ ಆಸ್ತಿ ಎಷ್ಟು? ಅವರ ವರ್ಷದ ವೇತನ ಎಷ್ಟು ಎಂಬಿತ್ಯಾದಿ ವಿಚಾರಗಳ ಬಗ್ಗೆ ಇಲ್ಲಿದೆ ಮಾಹಿತಿ.
ರವೀನಾ ಟಂಡನ್ ಅವರು ಚಿತ್ರರಂಗಕ್ಕೆ ಕಾಲಿಟ್ಟಿದ್ದು 1991ರಲ್ಲಿ. ‘ಪತ್ತರ್ ಕೆ ಫೂಲ್’ ಅವರ ನಟನೆಯ ಮೊದಲ ಸಿನಿಮಾ. ಈ ಚಿತ್ರದ ನಟನೆಗೆ ಅವರು ಫಿಲ್ಮ್ಫೇರ್ ಅವಾರ್ಡ್ ಗೆದ್ದರು. ‘ನ್ಯೂ ಫೇಸ್ ಆಫ್ ದಿ ಇಯರ್’ ವಿಭಾಗದಲ್ಲಿ ಅವರಿಗೆ ಪ್ರಶಸ್ತಿ ದೊರೆತಿತು. ಆ ಬಳಿಕ ಅವರು ಹಲವು ಸಿನಿಮಾಗಳಲ್ಲಿ ನಟಿಸಿದರು.
1999ರಲ್ಲಿ ರಿಲೀಸ್ ಆದ ‘ಉಪೇಂದ್ರ’ ಸಿನಿಮಾದಲ್ಲಿ ರವೀನಾ ನಟಿಸಿದರು. ಈ ಚಿತ್ರಕ್ಕೆ ಉಪೇಂದ್ರ ಅವರೇ ನಿರ್ದೇಶನ ಮಾಡಿದ್ದರು. ಅವರೇ ಮುಖ್ಯಭೂಮಿಕೆಯನ್ನೂ ನಿರ್ವಹಿಸಿದ್ದರು. ಇದು ರವೀನಾ ನಟಿಸಿದ ಮೊದಲ ಕನ್ನಡ ಸಿನಿಮಾ. ನಂತರ ಅವರು ತೆಲುಗು, ತಮಿಳು ಚಿತ್ರಗಳಲ್ಲಿ ಆಗಾಗ ನಟಿಸಿದ್ದಿದೆ. ಆದರೆ, ಅವರು ಹೆಚ್ಚು ಆ್ಯಕ್ಟೀವ್ ಆಗಿದ್ದು ಬಾಲಿವುಡ್ನಲ್ಲಿಯೇ.
2022ರಲ್ಲಿ ರಿಲೀಸ್ ಆದ ‘ಕೆಜಿಎಫ್ 2’ ಚಿತ್ರದಲ್ಲಿ ರವೀನಾ ಅವರು ಬಣ್ಣ ಹಚ್ಚಿದರು. ಇದು ಅವರು ನಟಿಸಿದ ಎರಡನೇ ಕನ್ನಡ ಚಿತ್ರ. ಈ ಸಿನಿಮಾದಲ್ಲಿ ರಮಿಕಾ ಸೇನ್ ಹೆಸರಿನ ಪಾತ್ರ ಮಾಡಿದರು. ಈ ಪಾತ್ರ ಸಖತ್ ಪವರ್ಫುಲ್ ಆಗಿತ್ತು. ಈ ಮೂಲಕ ಅವರು ಮತ್ತೆ ಕನ್ನಡ ಚಿತ್ರರಂಗಕ್ಕೆ ಕಂಬ್ಯಾಕ್ ಮಾಡಿದರು. ಇದು ಪ್ಯಾನ್ ಇಂಡಿಯಾ ಸಿನಿಮಾ ಆಗಿದ್ದರಿಂದ ಅವರಿಗೆ ಸಾಕಷ್ಟು ಜನಪ್ರಿಯತೆ ಸಿಕ್ಕಿತು. ಈ ಪಾತ್ರವನ್ನು ಜನರು ಸಾಕಷ್ಟು ಇಷ್ಟಪಟ್ಟರು. ಇದಾದ ಬಳಿಕ ಹಲವು ಆಫರ್ಗಳು ಅವರು ಹುಡುಕಿ ಬಂದವು. ಆದರೆ, ಎಲ್ಲಿಯೂ ಅವರು ತರಾತುರಿ ಮಾಡಿಲ್ಲ.
ರವೀನಾ ಅವರ ಒಟ್ಟೂ ಆಸ್ತಿ 84 ಕೋಟಿ ರೂಪಾಯಿ ಎನ್ನಲಾಗಿದೆ. ವರ್ಷಕ್ಕೆ ಅವರಿಗೆ ಬ್ರ್ಯಾಂಡ್ ಪ್ರಚಾರ, ಸಿನಿಮಾ ಸಂಭಾವನೆ ಸೇರಿ 10 ಕೋಟಿ ರೂಪಾಯಿಗೂ ಅಧಿಕ ಆದಾಯ ಬರುತ್ತಿದೆಯಂತೆ. ಅವರು ಹಲವು ಬ್ರ್ಯಾಂಡ್ಗಳ ಪ್ರಚಾರ ರಾಯಭಾರಿ ಆಗಿದ್ದಾರೆ. ಇದರ ಜೊತೆಗೆ ಅವರು ಹಲವು ಸಾಮಾಜಿಕ ಕೆಲಸಗಳನ್ನು ಕೂಡ ಮಾಡುತ್ತಿದ್ದಾರೆ.
ಇದನ್ನೂ ಓದಿ: ದಕ್ಷಿಣ ಭಾರತ ಚಿತ್ರರಂಗವನ್ನು ಮತ್ತೆ ಕೊಂಡಾಡಿದ ರವೀನಾ ಟಂಡನ್
ರವೀನಾ ಜನಿಸಿದ್ದು 1974ರಲ್ಲಿ. ಅವರಿಗೆ ಈಗ ವಯಸ್ಸು 49. ಈ ವಯಸ್ಸಿನಲ್ಲೂ ಅವರು ಸಖತ್ ಆಗಿ ಫಿಟ್ನೆಸ್ ಕಾಯ್ದುಕೊಂಡಿದ್ದಾರೆ. ಯುವತಿಯರನ್ನೂ ನಾಚಿಸುವಂಥ ಗ್ಲಾಮರ್ ಕಾಪಾಡಿಕೊಂಡಿದ್ದಾರೆ. ಅವರ ತಂದೆ ರವಿ ಟಂಡನ್ ನಿರ್ದೇಶಕರು. ಅವರ ತಾಯಿ ವೀಣಾ ಟಂಡನ್ ನಿರ್ಮಾಪಕಿ. ಸಿನಿಮಾ ಡಿಸ್ಟ್ರಿಬ್ಯೂಟರ್ ಅನಿಲ್ ತಡಾನಿ ಅವರನ್ನು ರವೀನಾ ಮದುವೆ ಆಗಿದ್ದಾರೆ. ಈ ದಂಪತಿಗೆ ನಾಲ್ಕು ಮಕ್ಕಳಿದ್ದಾರೆ. ಇಬ್ಬರು ದಂಪತಿಗೆ ಜನಿಸಿದರೆ, ಇನ್ನಿಬ್ಬರನ್ನು ಅವರು ದತ್ತು ಪಡೆದಿದ್ದಾರೆ. ಮಗಳು ರಾಶಾ ಚಿತ್ರರಂಗಕ್ಕೆ ಕಾಲಿಡುತ್ತಾರೆ ಎನ್ನಲಾಗಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 8:01 am, Thu, 26 October 23
