ಈಗಲೇ ಸಿಕ್ಕಿದೆ ‘ಶೈತಾನ್​’ ಅಬ್ಬರಿಸುವ ಸೂಚನೆ; ಜೋರಾಗಿದೆ ಅಡ್ವಾನ್ಸ್​ ಬುಕಿಂಗ್​

ಜನಪ್ರಿಯ ಕಲಾವಿದರಾದ ಆರ್​. ಮಾಧವನ್​, ಅಜಯ್​ ದೇವಗನ್​, ಜ್ಯೋತಿಕಾ ಅವರು ನಟಿಸಿರುವ ‘ಶೈತಾನ್’ (Shaitaan) ಸಿನಿಮಾದ ಮೇಲೆ ಅಭಿಮಾನಿಗಳಿಗೆ ನಿರೀಕ್ಷೆ ಹೆಚ್ಚಾಗಿದೆ. ಕೆಲವೇ ದಿನಗಳ ಹಿಂದೆ ಈ ಸಿನಿಮಾದ ಟ್ರೇಲರ್​ (Shaitaan Movie Trailer) ಬಿಡುಗಡೆ ಆಗಿತ್ತು. ಹಾರರ್​ ಕಥಾಹಂದರ ಹೊಂದಿರುವ ಈ ಚಿತ್ರವನ್ನು ನೋಡಲು ಪ್ರೇಕ್ಷಕರು ಕಾತರರಾಗಿದ್ದಾರೆ. ಅದಕ್ಕೆ ಸಾಕ್ಷಿ ಎಂಬಂತೆ ಅಡ್ವಾನ್ಸ್​ ಟಿಕೆಟ್​ ಬುಕಿಂಗ್​ನಲ್ಲಿ (Shaitaan Ticket Booking) ಪಾಸಿಟಿವ್​ ಬೆಳವಣಿಗೆ ಕಾಣಿಸಿದೆ. ಮಾರ್ಚ್​ 8ರಂದು ‘ಶೈತಾನ್’ ಬಿಡುಗಡೆ ಆಗಲಿದೆ. ಈಗಾಗಲೇ 7 ಸಾವಿರಕ್ಕೂ ಅಧಿಕ ಟಿಕೆಟ್​ಗಳು ಬುಕ್​ ಆಗಿವೆ.

ಮೊದಲ ದಿನ ಸಿನಿಮಾ ಉತ್ತಮ ಓಪನಿಂಗ್​ ಪಡೆದುಕೊಂಡರೆ ನಂತರದ ದಿನಗಳ ಬಾಕ್ಸ್​ ಆಫೀಸ್​ ಕಲೆಕ್ಷನ್​ಗೆ ತುಂಬ ಅನುಕೂಲ ಆಗಲಿದೆ. ಈ ವಿಚಾರದಲ್ಲಿ ‘ಶೈತಾನ್’ ಸಿನಿಮಾಗೆ ಪ್ರೇಕ್ಷಕರಿಂದ ಪ್ರೋತ್ಸಾಹ ಸಿಗುತ್ತಿದೆ. ಬಿಡುಗಡೆಗಿಂತ ಮೂರು ದಿನ ಮೊದಲು ಈ ಸಿನಿಮಾದ ಟಿಕೆಟ್​ ಬುಕಿಂಗ್​ ಓಪನ್​ ಮಾಡಲಾಗಿದೆ. ಪಿವಿಆರ್​, ಐನಾಕ್ಸ್​ ಹಾಗೂ ಸಿನಿಪೊಲಿಸ್​ ಮಲ್ಟಿಪ್ಲೆಕ್ಸ್​ಗಳಲ್ಲಿ ಒಂದೇ ದಿನದಲ್ಲಿ 7,700 ಟಿಕೆಟ್​ಗಳು ಸೋಲ್ಡ್​ ಔಟ್​ ಆಗಿವೆ.

ಇದನ್ನೂ ಓದಿ: ನೋಡುಗರಿಗೆ ನಡುಕ ಹುಟ್ಟಿಸಿದ ‘ಶೈತಾನ್​’ ಟ್ರೇಲರ್​; ಕ್ರೂರಿಯಾದ ಮಾಧವನ್​

ವಿಕಾಸ್​ ಬಹ್ಲ್​ ಅವರು ‘ಶೈತಾನ್​’ ಸಿನಿಮಾಗೆ ನಿರ್ದೇಶನ ಮಾಡಿದ್ದಾರೆ. ಆರಂಭದಲ್ಲಿ ಈ ಸಿನಿಮಾ ಮೇಲೆ ಇಷ್ಟೆಲ್ಲ ಕ್ರೇಜ್​ ಇರಲಿಲ್ಲ. ಆದರೆ ಟ್ರೇಲರ್​ ಬಿಡುಗಡೆ ಆದ ಬಳಿಕ ಹೈಪ್​ ಹೆಚ್ಚಾಗಿದೆ. ಯಾಕೆಂದರೆ, ಈ ಸಿನಿಮಾದ ಟ್ರೇಲರ್​ ಅಷ್ಟು ಭಯಂಕರವಾಗಿದೆ. ವಶೀಕರಣದ ಕುರಿತ ಕಥಾಹಂದರ ಈ ಸಿನಿಮಾದಲ್ಲಿ ಇದೆ. ಟ್ರೇಲರ್​ ನೋಡಿದ ಪ್ರೇಕ್ಷಕರು ಒಂದು ಕ್ಷಣ ಹೆದರಿಕೊಂಡಿದ್ದಾರೆ. ಚಿತ್ರಮಂದಿರದಲ್ಲಿ ಹಾರರ್​ ಫೀಲ್​ ಪಡೆಯಲು ಉತ್ಸುಕರಾಗಿರುವ ಸಿನಿಪ್ರಿಯರು ‘ಶೈತಾನ್​’ ಚಿತ್ರದ ಟಿಕೆಟ್​ಗಳನ್ನು ಮುಗಿಬಿದ್ದು ಬುಕ್​ ಮಾಡುತ್ತಿದ್ದಾರೆ.

ಇದನ್ನೂ ಓದಿ: ‘ನನಗೂ ದೆವ್ವದ​ ಅನುಭವ ಆಗಿದೆ, ಆದರೆ ನಾನು ಮಾತಾಡಲ್ಲ’: ಅಜಯ್​ ದೇವಗನ್​

ಅಡ್ವಾನ್ಸ್​ ಟಿಕೆಟ್​ ಬುಕಿಂಗ್​ ಟ್ರೆಂಡ್​ ಇದೇ ರೀತಿ ಮುಂದುವರಿದರೆ ಮೊದಲ ದಿನ ‘ಶೈತಾನ್​’ ಸಿನಿಮಾ 10 ಕೋಟಿ ರೂಪಾಯಿಗಿಂತಲೂ ಅಧಿಕ ಕಲೆಕ್ಷನ್​ ಮಾಡುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗುತ್ತಿದೆ. ಬಿಡುಗಡೆ ಆದ ಬಳಿಕ ಬಾಯಿ ಮಾತಿನ ಪ್ರಚಾರ ಉತ್ತಮವಾಗಿ ಸಿಕ್ಕರೆ ಚಿತ್ರಕ್ಕೆ ಅನುಕೂಲ ಆಗಲಿದೆ. ಅಜಯ್​ ದೇವಗನ್​ ಹಾಗೂ ಜ್ಯೋತಿಕಾ ಅವರು ಈ ಸಿನಿಮಾದಲ್ಲಿ ದಂಪತಿಯಾಗಿ ನಟಿಸಿದ್ದಾರೆ. ಮಗಳ ಪಾತ್ರದಲ್ಲಿ ಜಾನಕಿ ಬೋಡಿವಾಲಾ ಅಭಿನಯಿಸಿದ್ದಾರೆ. ಜಾನಕಿ ಬೋಡಿವಾಲಾ ಅವರಿಗೆ ಈ ಸಿನಿಮಾದಿಂದ ಸಖತ್​ ಜನಪ್ರಿಯತೆ ಸಿಗುವ ನಿರೀಕ್ಷೆ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.