ವೇದಿಕೆ ಮೇಲೆ ವಿದೇಶಿ ಮಹಿಳೆಯ ಎತ್ತಿಕೊಂಡು ಮುತ್ತಿಟ್ಟ ನಟ ವರುಣ್ ಧವನ್, ತೀವ್ರ ಟೀಕೆ

ನೀತಾ ಮುಕೇಶ್ ಅಂಬಾನಿ ಕಲ್ಚರಲ್ ಸೆಂಟರ್ (NMACC) ಉದ್ಘಾಟನೆ ಕಾರ್ಯಕ್ರಮ ಭಾರಿ ಅದ್ಧೂರಿಯಾಗಿತ್ತು. ಬಾಲಿವುಡ್​ನ (Bollywood) ಹಲವು ದಿಗ್ಗಜರ ಜೊತೆಗೆ ಹಾಲಿವುಡ್​ನ (Hollywood) ಸ್ಟಾರ್ ನಟ-ನಟಿಯರು ಸಹ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಉದ್ಘಾಟನಾ ಕಾರ್ಯಕ್ರಮದ ವೇದಿಕೆ ಮೇಲೆ ಹಲವು ಬಾಲಿವುಡ್ ನಟರು ನೃತ್ಯ ಮಾಡಿ ಅತಿಥಿಗಳನ್ನು ರಂಜಿಸಿದರು. ಆದರೆ ನೃತ್ಯ ಕಾರ್ಯಕ್ರಮದ ವೇಳೆ ನಟ ವರುಣ್ ಧವನ್ (Varun Dhawan) ನಡೆದುಕೊಂಡಿರುವ ರೀತಿ ಟೀಕೆಗೆ ಗುರಿಯಾಗಿದೆ.

ಕಾರ್ಯಕ್ರಮದಲ್ಲಿ ವೇದಿಕೆ ಮೇಲೆ ಕುಣಿದ ನಟ ವರುಣ್ ಧವನ್ ಅಮೆರಿಕದ ಸೂಪರ್ ಮಾಡೆಲ್ ಗೀಗಿ ಹದೀದ್ ಅನ್ನು ಎತ್ತಿಕೊಂಡು ವೇದಿಕೆ ಮೇಲೆಯೇ ಮುತ್ತು ಕೊಟ್ಟಿದ್ದಾರೆ. ವರುಣ್​ರ ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ವರುಣ್ ಧವನ್​ರ ಈ ನಡೆಗೆ ನೆಟ್ಟಿಗರಿಂದ ಟೀಕೆ ವ್ಯಕ್ತವಾಗಿದೆ. ವರುಣ್ ಧವನ್, ಗೀಗಿಯನ್ನು ಎತ್ತಿಕೊಂಡಿದ್ದು ನೃತ್ಯದ ಭಾಗವಾಗಿರಲಿಲ್ಲ, ಬದಲಿಗೆ ಗೀಗಿಯನ್ನು ವೇದಿಕೆಗೆ ಆಹ್ವಾನಿಸಿ ಆಕೆಯನ್ನು ಎತ್ತಿಕೊಂಡು ಮುತ್ತುಕೊಟ್ಟಿದ್ದಾರೆ ವರುಣ್, ಹಾಗಾಗಿ ಟೀಕೆ ವ್ಯಕ್ತವಾಗುತ್ತಿದೆ.

ಗೀಗಿ ಹದೀದಿಯ ಒಪ್ಪಿಗೆ ಇಲ್ಲದೆ ವರುಣ್ ಧವನ್ ಹೀಗೆ ಮುತ್ತುಕೊಟ್ಟಿರುವುದು ಸರಿಯಲ್ಲ ಎಂದು ಹಲವರು ಹೇಳಿದ್ದಾರೆ. ಮಹಿಳೆ ಎಲ್ಲಿಯೂ ಸುರಕ್ಷಿತಳಲ್ಲ, ವರುಣ್ ಧವನ್ ತಮ್ಮ ಹೀರೋತನ ತೋರಿಸಲು ಮಹಿಳೆಯನ್ನು ಹೀಗೆ ಕೀಳಾಗಿ ಬಳಸಿಕೊಂಡಿರುವುದು ಸರಿಯಲ್ಲವೆಂದು ಕೆಲವರು ಟೀಕಿಸಿದ್ದಾರೆ. ವರುಣ್ ಧವನ್ ತಮ್ಮನ್ನು ತಾವು ನಿಯಂತ್ರದಲ್ಲಿಟ್ಟುಕೊಳ್ಳಬೇಕು, ಆನ್​ಸ್ಕ್ರೀನ್ ಹೀಗೆ ಮಾಡಿದರೆ ಸರಿ ಎನ್ನಬಹುದು, ಆದರೆ ವೇದಿಕೆಯ ಮೇಲೆ ಹೀಗೆ ಮಾಡುವುದು ಸರಿಯಲ್ಲ ಎಂದಿರುವ ನೆಟ್ಟಿಗರೊಬ್ಬರು ಈ ಹಿಂದೆ ಇದೇ ವರುಣ್ ಧವನ್, ಪತ್ರಿಕಾಗೋಷ್ಠಿಯೊಂದರಲ್ಲಿ ಆಲಿಯಾ ಭಟ್​ರ ಅನುಮತಿ ಇಲ್ಲದೆ ಅವರ ಸೊಂಟ ಹಿಚುಕಿದ್ದ ಘಟನೆಯನ್ನು ನೆನಪಿಸಿದ್ದಾರೆ.

Varun ?? pic.twitter.com/ne5zd1TfhK

— sinja (@lonelystt_) April 1, 2023

ತಮ್ಮ ವಿಡಿಯೋಕ್ಕೆ ವಿರೋಧ ವ್ಯಕ್ತವಾಗುತ್ತಲೆ ಘಟನೆ ಬಗ್ಗೆ ಟ್ವೀಟ್ ಮೂಲಕ ಸ್ಪಷ್ಟನೆ ನೀಡಿರುವ ನಟ ವರುಣ್ ಧವನ್, ”ಬಹುಷಃ ಇಂದು ಬೆಳಿಗ್ಗೆ ನೀವು ಎದ್ದ ಕೂಡಲೇ ಜಾಗೃತಗೊಳ್ಳಲು ನಿರ್ಧರಿಸಿದಂತಿದೆ” ಎಂದು ಟ್ರೋಲರ್​ಗಳ ಕಾಲೆಳೆದಿರುವ ವರುಣ್, ”ನಿಮ್ಮ ತಪ್ಪು ಕಲ್ಪನೆಯ ನೀರಿನ ಗುಳ್ಳೆಗೆ ನಾನೀಗ ಸೂಜಿ ಚುಚ್ಚಲಿದ್ದೇನೆ, ಗೀಗಿ ಹದೀದ್ ವೇದಿಕೆ ಮೇಲೆ ಬರಬೇಕೆಂಬುದು ಮೊದಲೇ ನಿಶ್ಚಿತವಾಗಿತ್ತು, ಆ ಕಾರ್ಯ ಯೋಜನೆಯಂತೆಯೇ ನಡೆದಿದೆ. ಹಾಗಾಗಿ ನಿಮ್ಮ ಮೂಗು ತೂರಿಸಲು ಬೇರೆ ಯಾವುದಾದರೂ ವಿಷಯವನ್ನು ಹುಡುಕಿಕೊಳ್ಳಿ, ಹೊರಗೆ ಹೋಗಿ ನಿಜವಾದ ಕೆಲಸ ಮಾಡದೆ ಇಂಥಹುದರಲ್ಲೇ ಸಮಯ ವ್ಯರ್ಥ ಮಾಡಿಕೊಂಡಿರಿ” ಎಂದು ಖಾರವಾಗಿಯೇ ಪ್ರತಿಕ್ರಯಿಸಿದ್ದಾರೆ.

ನೀತಾ ಮುಕೇಶ್ ಅಂಬಾನಿ ಕಲ್ಚರಲ್ ಸೆಂಟರ್ ಉದ್ಘಾಟನೆ ಕಾರ್ಯಕ್ರಮದಲ್ಲಿ ವರುಣ್ ಧವನ್ ಮಾತ್ರವೇ ಅಲ್ಲದೆ ಹಲವರು ವೇದಿಕೆ ಮೇಲೆ ನೃತ್ಯ ಪ್ರದರ್ಶನ ನೀಡಿ ರಂಜಿಸಿದರು. ಸ್ವತಃ ನೀತಾ ಅಂಬಾನಿ ಮೊದಲಿಗೆ ನೃತ್ಯ ಪ್ರದರ್ಶನ ನೀಡಿದರು. ಅದಾದ ಬಳಿಕ ಶಾರುಖ್ ಖಾನ್, ರಣ್ವೀರ್ ಸಿಂಗ್, ವರುಣ್ ಧವನ್ ಇನ್ನೂ ಹಲವರು ತಾರೆಯರು ವೇದಿಕೆ ಏರಿದರು. ಶಾರುಖ್ ಖಾನ್ ತಮ್ಮ ಇತ್ತೀಚೆಗಿನ ಪಠಾಣ್ ಸಿನಿಮಾದ ಸ್ಟೆಪ್ ಹಾಕಿದರು ಅವರ ಜೊತೆಗೆ ವರುಣ್ ಧವನ್ ಹಾಗೂ ರಣ್ವೀರ್ ಸಿಂಗ್ ಸಹ ಸೇರಿಕೊಂಡರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 5:07 pm, Sun, 2 April 23