Rajpal Yadav: 26,000 ರೂ. ನೀಡಿ ಹೇರ್​ಕಟ್​ ಮಾಡಿಸಿಕೊಂಡಿದ್ದ ರಾಜ್​ಪಾಲ್​ ಯಾದವ್​; ಹಾಸ್ಯ ನಟನ ಪ್ರಯತ್ನವೆಲ್ಲ ನೀರಲ್ಲಿ ಹೋಮ

ಬಾಲಿವುಡ್​ನಲ್ಲಿ ನಟ ರಾಜ್​ಪಾಲ್​ (Rajpal Yadav) ಯಾದವ್​ ಅವರು ಬಹುಬೇಡಿಕೆಯ ಕಾಮಿಡಿಯನ್​ ಆಗಿ ಗುರುತಿಸಿಕೊಂಡಿದ್ದಾರೆ. ಅವರ ಹಾಸ್ಯಕ್ಕೆ ನಗದೇ ಇರುವ ಪ್ರೇಕ್ಷಕರೇ ಇಲ್ಲ. ಹಲವಾರು ಸಿನಿಮಾಗಳಲ್ಲಿ ಕಾಮಿಡಿ ಪಾತ್ರ ಮಾಡುವ ಮೂಲಕ ರಾಜ್​ಪಾಲ್​ ಯಾದವ್​ ಅವರು ಮನರಂಜನೆ ನೀಡಿದ್ದಾರೆ. ಅನೇಕ ಸ್ಟಾರ್​ ಕಲಾವಿದರ ಜೊತೆ ಅವರು ತೆರೆಹಂಚಿಕೊಂಡಿದ್ದಾರೆ. 2006ರಲ್ಲಿ ತೆರೆಕಂಡ ‘ಚುಪ್​ ಚುಪ್​ ಕೆ’ (Chup Chup Ke) ಸಿನಿಮಾವನ್ನು ಪ್ರೇಕ್ಷಕರು ಈಗಲೂ ನೋಡಿ ಎಂಜಾಯ್​ ಮಾಡುತ್ತಾರೆ. ಅಷ್ಟರಮಟ್ಟಿಗೆ ಹಾಸ್ಯಮಯವಾಗಿ ಮೂಡಿಬಂದಿತ್ತು ರಾಜ್​ಪಾಲ್​ ಯಾದವ್​ ಅವರ ಪಾತ್ರ. ಅಚ್ಚರಿ ಎಂದರೆ ಈ ಚಿತ್ರದ ಶೂಟಿಂಗ್​ ಶುರುವಾಗುವುದಕ್ಕೂ ಮುನ್ನ ಅವರು ಬರೋಬ್ಬರಿ 26 ಸಾವಿರ ರೂಪಾಯಿ ನೀಡಿ ಹೇರ್​ಕಟ್​ (Haircut) ಮಾಡಿಸಿಕೊಂಡಿದ್ದರು!

ಆಲಿಮ್​ ಹಕೀಂ ಅವರು ಮುಂಬೈನಲ್ಲಿ ಸೆಲೆಬ್ರಿಟಿ ಹೇರ್​ ಸ್ಟೈಲಿಸ್ಟ್​ ಆಗಿ ಫೇಮಸ್​. ಯಶ್​ ಕೂಡ ಅವರ ಬಳಿ ಹೇರ್​ ಕಟ್​ ಮಾಡಿಸಿಕೊಂಡು ಸುದ್ದಿ ಆಗಿದ್ದರು. ಹಲವು ವರ್ಷಗಳ ಹಿಂದೆ ರಾಜ್​ಪಾಲ್​ ಯಾದವ್​ ಅವರು ಆಲಿಮ್​ ಹಕೀಂ ಅವರ ಸಲೂನ್​ಗೆ ಭೇಟಿ ನೀಡಿದ್ದರು. 26 ಸಾವಿರ ರೂಪಾಯಿ ನೀಡಿ ಅವರು ಸ್ಟೈಲಿಶ್​ ಆಗಿ ಹೇರ್​ಕಟ್​ ಮಾಡಿಸಿದ್ದರು. ಆ ಸಂದರ್ಭದಲ್ಲಿ ‘ಚುಪ್ ಚುಪ್​ ಕೆ’ ಸಿನಿಮಾದಲ್ಲಿ ನಟಿಸುವ ಆಫರ್​ ಬಂತು. ಕೂಡಲೇ ನಿರ್ದೇಶಕ ಪ್ರಿಯದರ್ಶನ್​ ಅವರನ್ನು ಭೇಟಿ ಮಾಡಲು ರಾಜ್​ಪಾಲ್​ ಯಾದವ್​ ತೆರಳಿದರು. ಆದರೆ ಅಲ್ಲಿ ಆಗಿದ್ದೇ ಬೇರೆ.

ಇದನ್ನೂ ಓದಿ: ಕಾಮಿಡಿ ಕಿಲಾಡಿಗಳ ‘ಆನ್​ಲೈನ್ ಮದುವೆ, ಆಫ್​ಲೈನ್ ಶೋಭನ’

‘ಶೂಟಿಂಗ್​ಗಾಗಿ ನಾನು ಗೋವಾಗೆ ತೆರಳಿದೆ. ನನ್ನ ಹೇರ್​ಕಟ್​ ಬಗ್ಗೆ ನನಗೆ ಬಹಳ ಆತ್ಮವಿಶ್ವಾಸ ಇತ್ತು. ಆದರೆ ನಿರ್ದೇಶಕ ಪ್ರಿಯದರ್ಶನ್​ ಅವರಿಗೆ ಅದು ಕಿಂಚಿತ್ತೂ ಇಷ್ಟ ಆಗಲಿಲ್ಲ. ಸಹಾಯಕರನ್ನು ಕರೆದು ನನ್ನ ಕೂದಲು ಕಟ್​ ಮಾಡಿಸಿದರು’ ಎಂದಿದ್ದಾರೆ ರಾಜ್​ಪಾಲ್​ ಯಾದವ್​. ಅಲ್ಲಿಗೆ ಆಲಿಮ್​ ಹಕೀಂ ಮಾಡಿದ್ದ ಹೇರ್​ ಕಟ್ ಪೂರ್ತಿ​ ನೀರಲ್ಲಿ ಹೋಮ ಮಾಡಿದಂತೆ ಆಯಿತು. ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು ಈ ವಿಚಾರವನ್ನು ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಕಾಮಿಡಿ ಕಿಲಾಡಿಗಳು ಖ್ಯಾತಿಯ ಸಂಜು ಬಸಯ್ಯ

‘ಚುಪ್​ ಚುಪ್​ ಕೆ’ ಸಿನಿಮಾದಲ್ಲಿ ರಾಜ್​ಪಾಲ್​ ಯಾದವ್​ ಅವರನ್ನು ನೋಡಿದ ಬಳಿಕ ಆಲಿಮ್​ ಹಕೀಂ ಅವರಿಗೆ ಶಾಕ್​ ಆಯಿತು. ಹಾಗಾಗಿ ಅವರು 26 ಸಾವಿರ ರೂಪಾಯಿ ತೆಗೆದುಕೊಳ್ಳಲು ನಿರಾಕರಿಸಿದರು. ರಾಜ್​​ಪಾಲ್​ ಯಾದವ್​ ಅವರು ಅನೇಕ ಬಾರಿ ಒತ್ತಾಯಿಸಿದರೂ ಕೂಡ ಆಲಿಮ್​ ಹಕೀಂ ಅವರು ಹಣ ಪಡೆದುಕೊಳ್ಳಲಿಲ್ಲ. ಆ ಫನ್ನಿ ಘಟನೆಯನ್ನು ರಾಜ್​ಪಾಲ್​ ಯಾವದ್​ ಅವರು ನೆನಪಿಸಿಕೊಂಡಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.