ಜಾಕಿ ಚಾನ್ ನಿಧನ ಸುದ್ದಿ ನಿಜವೇ? ಇಲ್ಲಿದೆ ಅಸಲಿ ವಿಷಯ

ಜಾಗತಿಕವಾಗಿ ಅಪಾರ ಅಭಿಮಾನಿ ಬಳಗ ಹೊಂದಿರುವ ಆ್ಯಕ್ಷನ್ ಹೀರೋ ಜಾಕಿ ಚಾನ್ ಹಠಾತ್ ನಿಧನರಾಗಿದ್ದಾರೆ ಎಂಬ ಸುದ್ದಿ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ಹರಡಿ ಅಭಿಮಾನಿಗಳಲ್ಲಿ ತೀವ್ರ ಆತಂಕ ಮೂಡಿಸಿತ್ತು. ಆದರೆ ಈ ವರದಿಗಳು ಸಂಪೂರ್ಣ ಸುಳ್ಳು ಮತ್ತು ಕೇವಲ ವದಂತಿ. 72 ವರ್ಷ ವಯಸ್ಸಿನ ನಟ ಜಾಕಿ ಚಾನ್ ಸಂಪೂರ್ಣ ಆರೋಗ್ಯವಾಗಿದ್ದು, ಜಾಲತಾಣಗಳಲ್ಲಿ ಹರಡುತ್ತಿರುವ ಸಾವು-ನೋವಿನ ಸುದ್ದಿಗಳು ಸುಳ್ಳು ವದಂತಿಯಷ್ಟೇ (ಡೆತ್ ಹಾಕ್ಸ್) ಎಂದು ಸ್ಪಷ್ಟನೆ ಸಿಕ್ಕಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಜಾಕಿ ಚಾನ್ ಅವರ ಕಪ್ಪು ಬಿಳುಪು ಫೋಟೋ ಒಂದನ್ನು ಹಂಚಿಕೊಳ್ಳಲಾಗಿದೆ. ಅದರಲ್ಲಿ ‘ಜಾಕಿ ಚಾನ್ 1954-2026’ ಎಂದು ಬರೆಯಲಾಗಿತ್ತು. ಈ ಪೋಸ್ಟ್‌ಗಳು ಜಾಲತಾಣಗಳಲ್ಲಿ ಕೋಟ್ಯಂತರ ವೀಕ್ಷಣೆ ಪಡೆದುಕೊಂಡಿವೆ. ಅಬ್ದುಲ್ ಎಂಬ ಬಳಕೆದಾರ ಹಂಚಿಕೊಂಡ ಪೋಸ್ಟ್ ಒಂದೇ ಕೇವಲ ಐದು ಗಂಟೆಗಳಲ್ಲಿ 3.8 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆ ಪಡೆದಿತ್ತು. ಇದು ಸುಳ್ಳು ಸುದ್ದಿ ಎಷ್ಟು ವೇಗವಾಗಿ ಹರಡಿತು ಎಂಬುದಕ್ಕೆ ಸಾಕ್ಷಿಯಾಗಿದೆ.

ಜಾಕಿ ಚಾನ್ ಅವರು ಕೊನೆಯದಾಗಿ ಸಿಂಗಾಪುರದಲ್ಲಿ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದರು. ಅವರು ಅಲ್ಲಿದ್ದ ಶಾಲೆಯೊಂದಕ್ಕೆ ದಿಢೀರ್ ಭೇಟಿ ನೀಡಿ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರೊಂದಿಗೆ ಸಂವಾದ ನಡೆಸಿದ್ದರು. ಅಲ್ಲಿ ತಮ್ಮ ಪ್ರಸಿದ್ಧ ‘ಹಾರ್ಡ್ ಟು ಸೇ ಗುಡ್‌ಬೈ’ ಹಾಡನ್ನು ಹಾಡಿ ಎಲ್ಲರಿಗೂ ಅಚ್ಚರಿ ಮೂಡಿಸಿದ್ದರು. ಈ ಭೇಟಿಯ ನಂತರ ಅವರು ಬಹಿರಂಗವಾಗಿ ಎಲ್ಲೂ ಕಾಣಿಸಿಕೊಂಡಿರಲಿಲ್ಲ.

Jacki Chan had passed the age of 71 now he’s 72, kung-fu legend. ❤️‍🩹 pic.twitter.com/0WZGhSXl0F

— Abdul (@kayoflagos001) September 28, 2026

ಸುಮಾರು ಮೂರು ತಿಂಗಳಿನಿಂದ ಅವರು ಯಾವುದೇ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿರಲಿಲ್ಲ. ಈ ಸುದೀರ್ಘ ಅಂತರವೇ ಇಂತಹ ಕಪೋಲಕಲ್ಪಿತ ವದಂತಿಗಳಿಗೆ ಪ್ರಮುಖ ಕಾರಣವಾಯಿತು. ಕೆಲ ಕಿಡಿಗೇಡಿಗಳು ಈ ಸಮಯವನ್ನು ಬಳಸಿಕೊಂಡು ಅವರ ಸಾವಿನ ಸುಳ್ಳು ಸುದ್ದಿಯನ್ನು ಸೃಷ್ಟಿಸಿ ಹರಡಿದರು.

ಇದನ್ನೂ ಓದಿ: ಶಾರುಖ್​ಗೆ ಕೊಟ್ಟ ಮಾತನ್ನು ಉಳಿಸಿಕೊಳ್ಳಲೇ ಇಲ್ಲ ಜಾಕಿ ಚಾನ್; ನಟನಿಗೆ ಇದೆ ಬೇಸರ

ಜಾಕಿ ಚಾನ್ ವಿಶ್ವದ ಅತ್ಯಂತ ಜನಪ್ರಿಯ ಸಮರಕಲೆ ಹಾಗೂ ಆಕ್ಷನ್ ನಟರಾಗಿದ್ದಾರೆ. ಪ್ರಪಂಚದಾದ್ಯಂತ ಇರುವ ಅವರ ಅಪಾರ ಅಭಿಮಾನಿ ಬಳಗದಿಂದಾಗಿ ಈ ಸುಳ್ಳು ಸುದ್ದಿ ಕ್ಷಣಾರ್ಧದಲ್ಲಿ ಜಾಗತಿಕ ಮಟ್ಟದಲ್ಲಿ ವೈರಲ್ ಆಯಿತು. ಆದರೆ ಇವೆಲ್ಲವೂ ಭ್ರಮೆ ಹಾಗೂ ಸುಳ್ಳು ಎಂಬ ಸತ್ಯ ಹೊರಬಿದ್ದಿರುವುದು ಅವರ ಕೋಟ್ಯಂತರ ಅಭಿಮಾನಿಗಳಿಗೆ ದೊಡ್ಡ ಸಮಾಧಾನ ತಂದಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.