Adipurush: ಅಷ್ಟಕ್ಕೂ ‘ಆದಿಪುರುಷ್’ ಮುಂದೂಡಲು ಕಾರಣವೇನು ಗೊತ್ತಾ? ಹೊರಬಿತ್ತು ಅಸಲಿ ವಿಚಾರ

ಪ್ರಭಾಸ್ (Prabhas) ನಟನೆಯ ‘ಆದಿಪುರುಷ್’ (Adipurush) ಘೋಷಣೆಯಾದ ನಂತರ ತೀವ್ರ ಕುತೂಹಲ ಹುಟ್ಟುಹಾಕಿರುವ ಸಿನಿಮಾಗಳಲ್ಲೊಂದು. ಓಂ ರಾವುತ್ ನಿರ್ದೇಶನದ ಚಿತ್ರದ ಶೂಟಿಂಗ್ ಈಗಾಗಲೇ ಮುಕ್ತಾಯವಾಗಿದೆ. ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ ‘ಆದಿಪುರುಷ್’ ಆಗಸ್ಟ್ 11ರಂದು ತೆರೆಗೆ ಬರಬೇಕಿತ್ತು. ಪ್ರಭಾಸ್- ಓಂ ರಾವುತ್ ಕಾಂಬಿನೇಷನ್​ನಲ್ಲಿ ಮೂಡಿಬರುತ್ತಿರುವ ಈ ಚಿತ್ರದ ಕುರಿತು ನಿರೀಕ್ಷೆ ಹೆಚ್ಚಿದೆ. ಇತ್ತೀಚೆಗೆ ಚಿತ್ರತಂಡ ಹೊಸ ಅಪ್ಡೇಟ್ ನೀಡುವುದಾಗಿ ಘೋಷಿಸಿತ್ತು. ಅಂತೆಯೇ ಶಿವರಾತ್ರಿಯಂದು ಅಪ್ಡೇಟ್ ಘೋಷಿಸಿ, ಅಭಿಮಾನಿಗಳಿಗೆ ಅಚ್ಚರಿ ನೀಡಿತ್ತು. ಕಾರಣ, ಚಿತ್ರದ ಪೋಸ್ಟರ್ ರಿಲೀಸ್ ಆಗಬಹುದು ಎಂದು ಭಾವಿಸಿದ್ದ ಅಭಿಮಾನಿಗಳಿಗೆ ಸಿಕ್ಕಿದ್ದು ಚಿತ್ರದ ಬಿಡುಗಡೆ ಮುಂದೂಡಲ್ಪಟ್ಟಿದೆ ಎಂಬ ಅನಿರೀಕ್ಷಿತ ಸುದ್ದಿ. ಆಗಸ್ಟ್ 11ರ ಬದಲಾಗಿ ಮುಂದಿನ ವರ್ಷದ ಸಂಕ್ರಾಂತಿ ಸಂದರ್ಭದಲ್ಲಿ ಅಂದರೆ 2023ರ ಜನವರಿ 12ರಂದು ತೆರೆಗೆ ಬರಲಿದೆ ಎಂದು ಚಿತ್ರತಮಡ ತಿಳಿಸಿತ್ತು. ಈ ನಿರ್ಧಾರದ ಬಗ್ಗೆ ಸದ್ಯ ದೊಡ್ಡ ಮಟ್ಟದಲ್ಲಿ ಚರ್ಚೆಯಾಗುತ್ತಿದೆ. ಇದೀಗ ‘ಆದಿಪುರುಷ್’ ಮುಂದೂಡಲು ಕಾರಣವೇನು ಎಂಬುದರ ಬಗ್ಗೆ ಮಾಹಿತಿ ಹೊರಬಿದ್ದಿದೆ.

‘ಆದಿಪುರುಷ್’ ದೊಡ್ಡ ಬಜೆಟ್​ನಲ್ಲಿ ತಯಾರಾಗುತ್ತಿರುವ ಚಿತ್ರ. ಸುಮಾರು 350 ರಿಂದ 400 ಕೋಟಿ ರೂ ಬಜೆಟ್​ನಲ್ಲಿ ಚಿತ್ರವನ್ನು ರೂಪಿಸಲಾಗುತ್ತಿದೆ. ಪ್ರಭಾಸ್ ರಾಮನಾಗಿ ಬಣ್ಣಹಚ್ಚುತ್ತಿರುವ ಈ ಚಿತ್ರದಲ್ಲಿ ಕೃತಿ ಸನೋನ್ ನಾಯಕಿ. ಅವರು ಸೀತೆಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಸೈಫ್ ಅಲಿ ಖಾನ್ ರಾವಣನಾಗಿ ಪ್ರಭಾಸ್ ಎದುರು ತೊಡೆ ತಟ್ಟಲಿದ್ದಾರೆ. ಈ ಪೌರಾಣಿಕ ಚಿತ್ರದ ಚಿತ್ರೀಕರಣ ಮುಗಿದಿದ್ದರೂ ಕೂಡ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ಜಾಸ್ತಿ ಇವೆ.

ಚಿತ್ರವನ್ನು ವಿಶೇಷವಾಗಿ ತೆರೆಯ ಮೇಲೆ ತರಲು ಯೋಜನೆ ರೂಪಿಸಿರುವ ಚಿತ್ರತಂಡಕ್ಕೆ ವಿಎಫ್​ಎಕ್ಸ್ ಕೆಲಸಗಳನ್ನು ಲಗುಬಗೆಯಲ್ಲಿ ಮುಗಿಸಲು ಮನಸ್ಸಿಲ್ಲ. ನಿಧಾನವಾಗಿ ಸಮಯ ತೆಗೆದುಕೊಂಡು ಅಚ್ಚುಕಟ್ಟಾಗಿ ಮುಗಿಸಲು ಚಿತ್ರತಂಡ ಯೋಜಿಸಿದೆ. ಚಿತ್ರೀಕರಣವಾಗಿರುವ ಭಾಗಗಳು ಅತ್ಯುತ್ತಮವಾಗಿ ಮೂಡಿಬಂದಿರುವಾಗ ಬೇಗ ರಿಲೀಸ್ ಮಾಡಬೇಕೆಂಬ ಕಾರಣದಿಂದ ವಿಎಫ್​ಎಕ್ಸ್ ಕೆಲಸಗಳಲ್ಲಿ ಎಡವಬಾರದು. ನಿಧಾನವಾದರೂ ಜನರಿಗೆ ಉತ್ತಮವಾದದ್ದನ್ನೇ ನೀಡಬೇಕು ಎಂದು ಯೋಚಿಸಿದೆ. ಈ ಕಾರಣದಿಂದ ಚಿತ್ರದ ರಿಲೀಸ್ ಮುಂದೂಡಲ್ಪಟ್ಟಿದೆ ಎಂದು ಇಟೈಮ್ಸ್ ವರದಿ ಮಾಡಿದೆ. ಈ ಹಿಂದೆಯೂ ಕೂಡ ಹಲವು ಚಿತ್ರಗಳು ವಿಎಫ್​ಎಕ್ಸ್ ಕೆಲಸಗಳಿಗೆ ಸಮಯ ಹಿಡಿದ ಕಾರಣ ಮುಂದೂಡಿದ್ದನ್ನು ಇಲ್ಲಿ ಸ್ಮರಿಸಬಹುದು.

‘ಆದಿಪುರುಷ್’ ಚಿತ್ರತಂಡ ಇನ್ನೂ ಮೊದಲ ಲುಕ್ ಕೂಡ ರಿವೀಲ್ ಮಾಡಿಲ್ಲ. ಆಗಸ್ಟ್​​ನಲ್ಲಿ ಚಿತ್ರ ರಿಲೀಸ್ ಆಗುವುದಿದ್ದರೆ ಪ್ರಚಾರ ಕಾರ್ಯಗಳಿಗೆ ತೊಡಕಾಬಹುದು. ಪ್ರಚಾರಕ್ಕೂ ದೀರ್ಘಾವಧಿ ಬೇಕಿದೆ. ಈ ಕಾರಣದಿಂದಲೂ ಚಿತ್ರದ ರಿಲೀಸ್ ಮುಂದೂಡಲ್ಪಟ್ಟಿದೆ ಎಂದು ಹಲವು ವರದಿಗಳು ಹೇಳಿವೆ.

ಚಿತ್ರದ ರಿಲೀಸ್ ಬಗ್ಗೆ ಪ್ರಭಾಸ್ ಪೋಸ್ಟ್:

‘ಆದಿಪುರುಷ್’ 3ಡಿಯಲ್ಲಿ ತೆರೆಕಾಣಲಿರುವ ಚಿತ್ರವಾಗಿದ್ದು, ತೆಲುಗು, ತಮಿಳು ಹಾಗೂ ಹಿಂದಿಯಲ್ಲಿ ಏಕಕಾಲಕ್ಕೆ ತಯಾರಾಗುತ್ತಿದೆ. ದಕ್ಷಿಣದಲ್ಲಿ ಸಂಕ್ರಾಂತಿ ವಿಶೇಷವಾಗಿದ್ದು. ಹಾಗಾಗಿ ಈ ಸಂದರ್ಭದಲ್ಲಿ ಚಿತ್ರಗಳು ತೆರೆಕಾಣುವುದನ್ನು ಜನರು ಸ್ವಾಗತಿಸುತ್ತಾರೆ. ಈ ಹಿನ್ನೆಲೆಯಲ್ಲಿ ಬಹಳ ಮೊದಲೇ, ಮುಂದಿನ ವರ್ಷದ ಸಂಕ್ರಾಂತಿಗೆ ತನ್ನ ಆಗಮನವನ್ನು ‘ಆದಿಪುರುಷ್’ ಘೋಷಿಸಿದೆ. ಟಿ- ಸೀರೀಸ್ ಹಾಗೂ ರೆಟ್ರೋಫೈಲ್ಸ್ ಸಂಸ್ಥೆ ಜಂಟಿಯಾಗಿ ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿವೆ.

ಆಮಿರ್ ಖಾನ್ ನಟನೆಯ ‘ಲಾಲ್ ಸಿಂಗ್ ಛಡ್ಡಾ’ ಆಗಸ್ಟ್ 11ರಂದು ತೆರೆಗೆ ಬರಲಿದೆ ಎನ್ನಲಾಗುದೆ. ಈ ಹಿಂದೆ ಏಪ್ರಿಲ್ 14ರಂದು ‘ಕೆಜಿಎಫ್ 2’ ಜತೆ ‘ಲಾಲ್ ಸಿಂಗ್ ಛಡ್ಡಾ’ ರಿಲೀಸ್ ಆಗುವುದಾಗಿ ಘೊಷಿಸಿತ್ತು. ನಂತರದಲ್ಲಿ ಚಿತ್ರದ ಬಿಡುಗಡೆ ಮುಂದೂಡಲಾಗಿತ್ತು. ‘ಆದಿಪುರುಷ್’ ಮುಂದೂಡಲ್ಪಟ್ಟಿರುವುದರಿಂದ ಆಗಸ್ಟ್ 11ರಂದು ‘ಲಾಲ್ ಸಿಂಗ್ ಛಡ್ಡಾ’ ತೆರೆಕಾಣಲಿದೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ:

Adipurush: ‘ಆದಿಪುರುಷ್’ ಚಿತ್ರತಂಡದಿಂದ ಬಿಗ್ ಅಪ್ಡೇಟ್; ₹ 400 ಕೋಟಿ ಬಜೆಟ್​​ನ ಚಿತ್ರ ತೆರೆಗೆ ಬರೋದು ಯಾವಾಗ?

Amulya: ಅಮೂಲ್ಯ- ಜಗದೀಶ್; ತಾರಾ ದಂಪತಿಯ ಮುದ್ದಾದ ಫೋಟೋಗಳು ಇಲ್ಲಿವೆ