ಚಿತ್ರೀಕರಣದ ವೇಳೆ ಶೂಟ್​ ಮಾಡಿದ ನಟ; ಛಾಯಾಗ್ರಾಹಕಿ​ ನಿಧನ; ನಿರ್ದೇಶಕನಿಗೆ ಗಂಭೀರ ಗಾಯ

ಸಾಹಸ ದೃಶ್ಯಗಳ ಶೂಟಿಂಗ್​ ಸಂದರ್ಭದಲ್ಲಿ ಎಷ್ಟು ಎಚ್ಚರಿಕೆ ವಹಿಸಿದರೂ ಸಾಲದು. ಕೊಂಚ ಮೈ ಮರೆತಿದ್ದಕ್ಕೆ ಪ್ರಾಣ ಹಾನಿ ಆದ ಉದಾಹರಣೆ ಕನ್ನಡ ಚಿತ್ರರಂಗದಲ್ಲೂ ಇದೆ. ಹಾಲಿವುಡ್​ ಸಿನಿಮಾ ಶೂಟಿಂಗ್​ ವೇಳೆ ಇಂಥದ್ದೊಂದು ಅಚಾತುರ್ಯ ನಡೆದಿದೆ. ನಟ ಅಲೆಕ್​ ಬಾಲ್ಡ್​ವಿನ್​ ಅವರು ಕಣ್ತಪ್ಪಿನಿಂದಾಗಿ ಶೂಟ್​ ಮಾಡಿದ್ದು, ಬಂದೂಕಿಂದ ಗುಂಡು ಸಿಡಿದಿದೆ. ಪರಿಣಾಮವಾಗಿ ಸಿನಿಮಾದ ಛಾಯಾಗ್ರಾಹಕಿ ಹಲೀನಾ ಹಚಿನ್ಸ್​ ನಿಧನರಾಗಿದ್ದು, ನಿರ್ದೇಶಕ ಜೌಲ್​ ಸೋಜಾ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಈ ಸಂಬಂಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.

‘ರಸ್ಟ್​’ ಸಿನಿಮಾದ ಚಿತ್ರೀಕರಣ ನ್ಯೂ ಮೆಕ್ಸಿಕೋದಲ್ಲಿ ನಡೆಯುತ್ತಿತ್ತು. ಶೂಟಿಂಗ್​ ಸಲುವಾಗಿ ಗನ್​ ಬಳಸಲಾಗುತ್ತಿತ್ತು. ಈ ಸಂದರ್ಭದಲ್ಲಿ ನಟ ಅಲೆಕ್​ ಬಾಲ್ಡ್​ವಿನ್​ ಅವರು ಶೂಟ್​ ಮಾಡಿದ್ದಾರೆ. ಇದರಿಂದ 42ರ ಪ್ರಾಯದ ಸಿನಿಮಾಟೋಗ್ರಾಫರ್​ ಹಲೀನಾ ಹಚಿನ್ಸ್​ ಮತ್ತು 48ರ ಪ್ರಾಯದ ನಿರ್ದೇಶಕ ಜೌಲ್​ ಸೋಜಾ ಅವರಿಗೆ ಬುಲೆಟ್​ ತಗುಲಿತು. ಕೂಡಲೇ ಹಲೀನಾ ಹಚಿನ್ಸ್ ಅವರನ್ನು ಹೆಲಿಕಾಪ್ಟರ್​ ಮೂಲಕ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಯಿತು. ಆಸ್ಪತ್ರೆ ತಲುಪುವ ವೇಳೆಗಾಗಲೇ ಹಲೀನಾ ಹಚಿನ್ಸ್​ ನಿಧನ ಹೊಂದಿದ್ದರು. ಪ್ರಸ್ತುತ ಜೌಲ್​ ಸೋಜಾ ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

‘ಈ ಘಟನೆಯಿಂದ ಇಡೀ ತಂಡ ಆಘಾತಕ್ಕೆ ಒಳಗಾಗಿದೆ. ಹಲೀನಾ ಹಚಿನ್ಸ್​ ನಿಧನಕ್ಕೆ ನಾವು ತೀವ್ರ ಸಂತಾಪ ಸೂಚಿಸುತ್ತೇವೆ’ ಎಂದು ನಿರ್ಮಾಣ ಸಂಸ್ಥೆಯ ವಕ್ತಾರರು ಹೇಳಿಕೆ ನೀಡಿದ್ದಾರೆ. ಈ ದುರ್ಘಟನೆ ಹೇಗೆ ನಡೆಯಿತು ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ. ಪೊಲೀಸರು ನಟ ಅಲೆಕ್​ ಬಾಲ್ಡ್​ವಿನ್​ಗೆ ಅನೇಕ ಪ್ರಶ್ನೆಗಳನ್ನು ಕೇಳಿದ್ದಾರೆ. ಅವರ ಹೇಳಿಕೆಯನ್ನು ದಾಖಲಿಸಿಕೊಳ್ಳಲಾಗಿದೆ. ಸದ್ಯ ಅವರ ಮೇಲೆ ಯಾವುದೇ ಕೇಸ್​ ದಾಖಲಿಸಿಲ್ಲ ಎಂದು ತಿಳಿದುಬಂದಿದೆ. ಸೂಕ್ತ ತನಿಖೆ ನಡೆದ ನಂತರವೇ ಈ ಘಟನೆಯ ಅಸಲಿಯತ್ತು ಹೊರಬರಲಿದೆ.

ಶೂಟಿಂಗ್​ ಸಂದರ್ಭದಲ್ಲಿ ದೃಶ್ಯಗಳು ನೈಜವಾಗಿ ಬರಲಿ ಎಂಬ ಕಾರಣ ಕೆಲವೊಮ್ಮೆ ಅಸಲಿ ಗನ್​ಗಳನ್ನು ಬಳಸಲಾಗುತ್ತದೆ. ಅದಕ್ಕೆ ಸೂಕ್ತ ನಿಯಮಾವಳಿಗಳನ್ನು ಅನುಸರಿಸಬೇಕು. ಆದರೂ ಕೂಡ ಕೆಲವೊಮ್ಮೆ ಇಂಥ ಅಚಾತುರ್ಯಗಳು ನಡೆದುಬಿಡುತ್ತವೆ. ಅದರಿಂದ ಜೀವಕ್ಕೆ ಕುತ್ತು ಬರುತ್ತದೆ. 1993ರಲ್ಲಿ ಖ್ಯಾತ ನಟ ಬ್ರೂಸ್​ ಲೀ ಅವರ ಪುತ್ರ ಬ್ರಾಂಡನ್​ ಬ್ರೂಸ್​ ಲೀ ಕೂಡ ಇದೇ ರೀತಿ ಅವಘಡದಿಂದ ನಿಧನರಾದರು. ಶೂಟಿಂಗ್​ ವೇಳೆ ಬುಲೆಟ್​ ಸಿಡಿದು ಅವರು ಕೊನೆಯುಸಿರು ಎಳೆದರು.

ಇದನ್ನೂ ಓದಿ:

Upendra: ನಟ ಉಪೇಂದ್ರ ತಲೆಗೆ ರಾಡ್​ನಿಂದ ಪೆಟ್ಟು! ಕಬ್ಜ ಸಿನಿಮಾ ಶೂಟಿಂಗ್​ ವೇಳೆ ಅವಘಡ

Fighter Vivek Death: ರಚಿತಾ ರಾಮ್​ ಸಿನಿಮಾ ಶೂಟಿಂಗ್ ವೇಳೆ ಫೈಟರ್ ವಿವೇಕ್ ಸಾವು; ವಿದ್ಯುತ್ ತಂತಿ ಸ್ಪರ್ಶಿಸಿ ಅವಘಡ