ಇನ್​ಸ್ಟಾಗ್ರಾಂನಲ್ಲಿ ರೀಲ್ಸ್ ಮಾಡುತ್ತಿದ್ದಾಕೆ ಈಗ ಪ್ರಭಾಸ್ ಸಿನಿಮಾಕ್ಕೆ ನಾಯಕಿ

ಪ್ರಭಾಸ್ ಸಿನಿಮಾದಲ್ಲಿ ನಾಯಕಿಯಾಗಲು ದೇಶದ ಟಾಪ್ ನಾಯಕ ನಟಿಯರೇ ತುದಿಗಾಲಲ್ಲಿ ನಿಂತಿದ್ದಾರೆ. ಪ್ರಭಾಸ್ ನಟಿಸಿರುವ ಇತ್ತೀಚೆಗಿನ ಎಲ್ಲ ಸಿನಿಮಾಗಳಿಗೂ ದೇಶದ ಟಾಪ್ ನಟಿಯರೇ ನಾಯಕಿಯರು. ದೀಪಿಕಾ ಪಡುಕೋಣೆ, ಕೃತಿ ಸನೊನ್, ಶ್ರದ್ಧಾ ಕಪೂರ್, ದಿಶಾ ಪಟಾನಿ, ಪೂಜಾ ಹೆಗ್ಡೆ ಹೀಗೆ ದೊಡ್ಡ ನಟಿಯರು ಪ್ರಭಾಸ್ ಜೊತೆ ನಟಿಸಲು ಸುಲಭವಾಗಿ ಒಪ್ಪಿಕೊಳ್ಳುವ ಪರಿಸ್ಥಿತಿ ಇದ್ದಾಗಲೂ ಸಹ ಪ್ರಭಾಸ್​ರ ಹೊಸ ಸಿನಿಮಾಕ್ಕೆ ಇನ್​ಸ್ಟಾಗ್ರಾಂನಲ್ಲಿ ರೀಲ್ಸ್ ಮಾಡುತ್ತಿದ್ದ ಯುವತಿಯನ್ನು ನಾಯಕಿಯನ್ನಾಗಿ ಹಾಕಿಕೊಳ್ಳಲಾಗಿದೆ. ಅಂದಹಾಗೆ ಯಾರು ಈ ಯುವತಿ? ಈಕೆಯನ್ನು ಸಿನಿಮಾಕ್ಕೆ ಆಯ್ಕೆ ಮಾಡಿಕೊಳ್ಳಲು ಕಾರಣವೇನು?

‘ಸೀತಾ ರಾಮಂ’ ಅಂಥಹಾ ಸುಂದರ ಸಿನಿಮಾ ನಿರ್ದೇಶಿಸಿರುವ ರಘು ಹನುಪುಡಿ ಇದೀಗ ಪ್ರಭಾಸ್ ಜೊತೆಗೆ ಹೊಸ ಸಿನಿಮಾ ಪ್ರಾರಂಭ ಮಾಡುತ್ತಿದ್ದಾರೆ. ಈ ಸಿನಿಮಾದ ಮುಹೂರ್ತ ಇತ್ತೀಚೆಗಷ್ಟೆ ಅದ್ಧೂರಿಯಾಗಿ ನೆರವೇರಿದೆ. ಮುಹೂರ್ತ ಸಮಾರಂಭಕ್ಕೆ ನಿರ್ದೇಶಕ ಪ್ರಶಾಂತ್ ನೀಲ್ ಸೇರಿದಂತೆ ಹಲವು ಗಣ್ಯರು ಆಗಮಿಸಿದ್ದರು. ಮುಹೂರ್ತದಲ್ಲಿ ಗಮನ ಸೆಳೆದಿದ್ದು ಸಿನಿಮಾದ ನಾಯಕಿ. ಹೌದು, ಸಿನಿಮಾದ ಮುಹೂರ್ತದ ಚಿತ್ರಗಳು ಹೊರಬಿದ್ದಾಗ ಪ್ರಭಾಸ್ ಪಕ್ಕ ನಿಂತಿದ್ದ ನಾಯಕಿ ಯಾರೆಂಬುದು ಸಹ ಹಲವರಿಗೆ ಗೊತ್ತಾಗಿರಲಿಲ್ಲ.

ಪ್ರಭಾಸ್​ರ ಹೊಸ ಸಿನಿಮಾದ ನಾಯಕಿಯ ಹೆಸರು ಇಮಾನ್ ಇಸ್ಮಾಯಿಲ್ ಇನ್​ಸ್ಟಾಗ್ರಾಂನಲ್ಲಿ ಇಮಾನ್ವಿ ಎಂದೇ ಪರಿಚಿತರು. ಇಮಾನ್ವಿ ಈ ವರೆಗೆ ಯಾವುದೇ ಸಿನಿಮಾದಲ್ಲಿ ನಟಿಸಿಲ್ಲ. ಬಹಳ ಒಳ್ಳೆಯ ಡ್ಯಾನ್ಸರ್ ಆಗಿರುವ ಇಮಾನ್ವಿ, ಇನ್​ಸ್ಟಾಗ್ರಾಂ, ಯೂಟ್ಯೂಬ್​ಗಳಲ್ಲಿ ತಮ್ಮ ಡ್ಯಾನ್ಸ್ ವಿಡಿಯೋಗಳನ್ನು ಅಪ್​ಲೋಡ್ ಮಾಡುತ್ತಿರುತ್ತಾರೆ. ಸಿನಿಮಾದ ಮುಹೂರ್ತಕ್ಕೆ ಮುಂಚೆ ಇಮಾನ್ವಿಗೆ ಇನ್​ಸ್ಟಾಗ್ರಾಂನಲ್ಲಿ ಸುಮಾರು ಏಳು ಲಕ್ಷ ಫಾಲೋವರ್​ಗಳಿದ್ದರು. ಈಗ ಸಂಖ್ಯೆ ಹೆಚ್ಚಾಗಿದೆ. ಯೂಟ್ಯೂಬ್​ನಲ್ಲಿ 16 ಲಕ್ಷ ಸಬ್​ಸ್ಕ್ರೈಬರ್​ಗಳಿದ್ದರು. ಆ ಸಂಖ್ಯೆಯೂ ಈಗ ಹೆಚ್ಚಾಗಿದೆ.

ಇದನ್ನೂ ಓದಿ:ಪ್ರಭಾಸ್ ನಟನೆಯ ಎರಡು ಸಿನಿಮಾಗಳ ಮರು ಬಿಡುಗಡೆ

ಇಮಾನ್ವಿ, ಇನ್​ಸ್ಟಾಗ್ರಾಂನಲ್ಲಿ ಅಪ್​ಲೋಡ್ ಮಾಡಿದ್ದ ‘ತಾಲ್’ ಸಿನಿಮಾದ ರಮ್ತಾ ಜೋಗಿ ಹಾಡಿಗೆ ಡ್ಯಾನ್ಸ್ ಮಾಡಿದ್ದ ಅವರ ವಿಡಿಯೋ ಬಹಳ ವೈರಲ್ ಆಯ್ತು. ತಮ್ಮ ಡ್ಯಾನ್ಸ್​ ವಿಡಿಯೋಗಳಿಗೆ ಸ್ವತಃ ಇಮಾನ್ವಿ ಅವರೇ ಕೊರಿಯೋಗ್ರಫಿ ಮಾಡಿಕೊಳ್ಳುತ್ತಾರೆ. ಇತ್ತೀಚೆಗೆ ಇವರ ತುಮ್-ತುಮ್ ಹಾಡಿನ ಡ್ಯಾನ್ಸ್ ಸಹ ಸಖತ್ ವೈರಲ್ ಆಗತ್ತು. 29 ವರ್ಷ ವಯಸ್ಸಿನ ಇಮಾನ್ವಿ ಜನಿಸಿದ್ದು ಭಾರತದಲ್ಲೇ ಆದರು ನೆಲೆಸಿರುವುದು ಅಮೆರಿಕದ ಲಾಸ್ ಏಂಜಲ್ಸ್​ನಲ್ಲಿ. ಅಲ್ಲಿ ಒಂದು ಡ್ಯಾನ್ಸ್ ಶಾಲೆ ಹಾಗೂ ಟ್ರೂಪ್​ ಅನ್ನು ಹೊಂದಿರುವ ಇಮಾನ್ವಿ, ಅಮೆರಿಕದ ಹಲವೆಡೆ ಡ್ಯಾನ್ಸ್ ಕಾರ್ಯಕ್ರಮಗಳನ್ನು ನೀಡುತ್ತಿರುತ್ತಾರೆ.

ಇಮಾನ್ವಿ, ಭರತ ನಾಟ್ಯ, ಕುಚುಪುಡಿ ಸೇರಿದಂತೆ ಹಲವು ಮಾದರಿಯ ನೃತ್ಯ ಪ್ರಾಕಾರಗಳಲ್ಲಿ ಪರಿಣಿತಿ ಹೊಂದಿದ್ದಾರೆ. ರಘು ಹನುಪುಡಿ ನಿರ್ದೇಶನ ಮಾಡುತ್ತಿರುವ ಪ್ರಭಾಸ್​ರ ಸಿನಿಮಾದಲ್ಲಿ ನಾಯಕಿಯ ನೃತ್ಯಗಾರ್ತಿ ಆಗಿರುತ್ತಾರೆ, ಹಾಗೂ ಸಿನಿಮಾದಲ್ಲಿ ನೃತ್ಯದ ಸಾಕಷ್ಟು ದೃಶ್ಯಗಳು ಇವೆ ಎನ್ನಲಾಗುತ್ತಿದೆ. ಅಲ್ಲದೆ ಇಮಾನ್ವಿಯ ಮುಖ ಸಹ ಮೃದು ಸ್ವಭಾವದ ಮುಗ್ಧ ಹುಡುಗಿಯ ಮುಖದಂತೆ ಇದೆ. ಹಾಗಾಗಿ ಇಮಾನ್ವಿಯನ್ನು ನಾಯಕಿಯಾಗಿ ಆಯ್ಕೆ ಮಾಡಲಾಗಿದೆ. ನಾಯಕಿಯಾಗಿ ಆಯ್ಕೆ ಮಾಡುವ ಮುನ್ನ ಹಲವು ಬಾರಿ ಸ್ಕ್ರೀನ್ ಟೆಸ್ಟ್, ಆಡಿಷನ್​ಗಳನ್ನು ಮಾಡಲಾಗಿದೆಯಂತೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ