TV9kannada Web Team | Edited By: shivaprasad.hs
Aug 18, 2021 | 12:41 PM
ಮಾಲಿವುಡ್ನ ಖ್ಯಾತ ನಟ ಮೋಹನ್ಲಾಲ್ ತಮ್ಮ ಮುಂದಿನ ಚಿತ್ರವನ್ನು ಘೋಷಿಸಿದ್ದಾರೆ. ದೃಶ್ಯಂ 1 ಹಾಗೂ ದೃಶ್ಯಂ 2ರ ಸೂಪರ್ಹಿಟ್ ನಿರ್ದೇಶಕ ಜೀತು ಜೋಸೆಫ್ ನಿರ್ದೇಶನದಲ್ಲಿ ಚಿತ್ರ ಸೆಟ್ಟೇರಿದೆ. ಮೋಹನ್ಲಾಲ್ ಟ್ವೀಟ್ ಮೂಲಕ ಹೊಸ ಚಿತ್ರದ ಪೂಜೆಯ ಸಂದರ್ಭದ ಚಿತ್ರಗಳನ್ನು ಹಂಚಿಕೊಂಡಿದ್ದಾರೆ. ಈ ಚಿತ್ರ ಮೋಹನ್ಲಾಲ್ ಹಾಗೂ ಜೀತು ಜೋಸೆಫ್ ಜೋಡಿಯ ನಾಲ್ಕನೇ ಚಿತ್ರವಾಗಿದೆ. ‘ಚಿಂಗಮ್’ ಮಾಸದ ಮೊದಲನೆಯ ದಿನ ಪೂಜೆ ನಡೆದಿದ್ದು, ಅಭಿಮಾನಿಗಳು ಪುಳಕಿತಗೊಂಡಿದ್ದಾರೆ. ಹೊಸ ಚಿತ್ರಕ್ಕೆ ’12th ಮ್ಯಾನ್’ ಎಂದು ಹೆಸರಿಡಲಾಗಿದೆ. ಮಲಯಾಳಂನ ಖ್ಯಾತ ನಿರ್ಮಾಪಕ ಆಂಟೊನಿ ಪೆರುವಾಂಬೂರ್ ಆಶೀರ್ವಾದ್ ಸಿನಿಮಾಸ್ ಮೂಲಕ ಈ ಚಿತ್ರವನ್ನು ನಿರ್ಮಿಸಲಿದ್ದಾರೆ. ಪೂಜೆಯ ಸಂದರ್ಭದಲ್ಲಿ ಆಂಟೊನಿ ಹಾಗೂ ನಟ ಉನ್ನಿ ಮುಕುಂದನ್ ಸೇರಿದಂತೆ ಹಲವು ತಾರೆಯರು ಉಪಸ್ಥಿತರಿದ್ದರು.
ಈ ಮೊದಲು ಜೀತು ಜೋಸೆಫ್ ನಿರ್ದೇಶನದ ದೃಶ್ಯಂ ಚಿತ್ರವು ಕನ್ನಡ ಸೇರಿದಂತೆ, ನಾಲ್ಕು ಭಾಷೆಗಳಲ್ಲಿ ರಿಮೇಕ್ ಆಗಿತ್ತು. ಕನ್ನಡದಲ್ಲಿ ನಟ ರವಿಚಂದ್ರನ್ ನಟಿಸಿದ್ದರು. ಇತ್ತೀಚೆಗೆ ದೃಶ್ಯಂ 2 ತೆರೆಕಂಡಿದ್ದು, ಅಪಾರ ಜನಮೆಚ್ಚುಗೆ ಗಳಿಸಿತ್ತು. ದೃಶ್ಯಂನ ಮುಂದುವರೆದ ಭಾಗವಾದ ದೃಶ್ಯಂ 2 ಒಟಿಟಿ ಮುಖಾಂತರ ನೇರವಾಗಿ ತೆರೆಕಂಡಿತ್ತು. ದೃಶ್ಯಂ 2ಗೂ ಮೊದಲು ಜೀತು ಹಾಗೂ ಮೋಹನ್ಲಾಲ್ ಕಾಂಬಿನೇಷನ್ನಲ್ಲಿ ಆಕ್ಷನ್ ಥ್ರಿಲ್ಲರ್ ಚಿತ್ರವಾದ ‘ರಾಮ್’ ಸೆಟ್ಟೇರಿತ್ತು. ಆದರೆ ಕೊರೊನಾದ ನಿಯಮಾವಳಿಗಳಿಂದ ಚಿತ್ರವು ಅರ್ಧಕ್ಕೆ ನಿಂತಿದೆ.
ಮೋಹನ್ಲಾಲ್ ಹಂಚಿಕೊಂಡಿರುವ ಟ್ವೀಟ್:
#12ThMan Pooja Photos#JeethuJoseph @antonypbvr @aashirvadcine pic.twitter.com/KuK8kg0UaE
— Mohanlal (@Mohanlal) August 17, 2021
ಪ್ರಸ್ತುತ ಮೋಹನ್ಲಾಲ್ ಮಲಯಾಳಂನ ಮತ್ತೊಬ್ಬ ಖ್ಯಾತ ನಟ ಪೃಥ್ವಿರಾಜ್ ಸುಕುಮಾರ್ ಅವರೊಂದಿಗೆ ‘ಬ್ರೊ ಡ್ಯಾಡಿ’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರವನ್ನು ಸ್ವತಃ ಪೃಥ್ವಿರಾಜ್ ನಿರ್ದೇಶಿಸುತ್ತಿದ್ದು, ‘ಲೂಸಿಫರ್’ ನಂತರ ಈ ಜೋಡಿ ಮತ್ತೆ ಒಂದಾಗಿದೆ. ಈ ಚಿತ್ರದಲ್ಲಿ ಬಹುದೊಡ್ಡ ತಾರಾಗಣವಿದ್ದು, ಮೀನಾ, ಕಲ್ಯಾಣಿ ಪ್ರಿಯದರ್ಶನ್, ಲಾಲು ಅಲೆಕ್ಸ್, ಮುರಳಿ ಗೋಪಿ, ಸೌಬಿನ್ ಶಾಹಿರ್ ಮೊದಲಾದವರು ಕಾಣಿಸಿಕೊಳ್ಳುತ್ತಿದ್ದಾರೆ.
ನಟನೆಯಲ್ಲದೇ ಮೋಹನ್ಲಾಲ್ ಸದ್ಯ ನಿರ್ದೇಶನದ ಕ್ಯಾಪ್ ಸಹ ತೊಟ್ಟಿದ್ದಾರೆ. ಅವರ ಚೊಚ್ಚಲ ನಿರ್ದೇಶನದಲ್ಲಿ ‘ಬರ್ರೋಸ್’ ಚಿತ್ರ ಮೂಡಿಬರಲಿದ್ದು, ಆ ಚಿತ್ರದಲ್ಲೂ ಮೋಹನ್ಲಾಲ್ ಹಾಗೂ ಪೃಥ್ವಿ ಕಾಣಿಸಿಕೊಳ್ಳಲಿದ್ದಾರೆ. ಮೋಹನ್ಲಾಲ್ ನಟಿಸಿರುವ ಎರಡು ಚಿತ್ರಗಳು ಬಿಡುಗಡೆಗೆ ತಯಾರಾಗಿವೆ. ಅದರಲ್ಲಿ ‘ಮರಕ್ಕರ್: ಅರಬಿಕಡಲಿಂಟೆ ಸಿಂಹಮ್’ ಚಿತ್ರ ಈಗಾಗಲೇ ಎಲ್ಲರ ಗಮನ ಸೆಳೆದಿದ್ದು, ಮತ್ತೊಂದು ಚಿತ್ರ ‘ಆರಟ್ಟು’ ಕೂಡಾ ನಿರೀಕ್ಷೆ ಹುಟ್ಟಿಸಿದೆ.
ಇದನ್ನೂ ಓದಿ:
ಬಾಲಿವುಡ್ಗೆ ಶಾರುಖ್ ಖಾನ್ ಮಗಳ ಬ್ಯಾಂಗ್ ಎಂಟ್ರಿ; ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ ಸ್ಟಾರ್ ನಿರ್ದೇಶಕಿ
Kamal Haasan: ಕಮಲ್ ಹಾಸನ್, ಚಾರುಹಾಸನ್, ಮಣಿರತ್ನಂ, ಸುಹಾಸಿನಿ ಎಲ್ಲರೂ ಒಂದೇ ಚಿತ್ರದಲ್ಲಿ; ಏನು ವಿಶೇಷ?
(Jeethu Joseph and Mohanlal again collaborated for 12th Man after Drishyam series hit)
