‘ಕನ್ನಡತಿ’ ತಂಡಕ್ಕೆ ಭಯಾನಕ ಅನುಭವ; ವಿಡಿಯೋ ಸಮೇತ ವಿವರಿಸಿದ ಭುವಿ

ಕನ್ನಡ ಕಿರುತೆರೆಯ ಜನಪ್ರಿಯ ಧಾರಾವಾಹಿಗಳಲ್ಲಿ ಒಂದಾದ ‘ಕನ್ನಡತಿ’ ಸೀರಿಯಲ್​ ಶೂಟಿಂಗ್​ ಹೈದರಾಬಾದ್​ನಲ್ಲಿ ನಡೆಯುತ್ತಿದೆ. ಲಾಕ್​ಡೌನ್​ ಇರುವ ಕಾರಣ ಕರ್ನಾಟಕದಲ್ಲಿ ಚಿತ್ರೀಕರಣಕ್ಕೆ ಅವಕಾಶ ಇಲ್ಲ. ಹಾಗಾಗಿ ಪರರಾಜ್ಯದ ರಾಮೋಜಿ ಫಿಲ್ಮ್​ ಸಿಟಿಗೆ ತೆರಳಿ ನಟಿ ರಂಜನಿ ರಾಘವನ್​, ಕಿರಣ್​ ರಾಜ್​ ಮುಂತಾದವರು ಚಿತ್ರೀಕರಣದಲ್ಲಿ ಭಾಗಿ ಆಗಿದ್ದಾರೆ. ರಾತ್ರಿ ಶೂಟಿಂಗ್​ ಮುಗಿಸಿ ಹೋಟೆಲ್​ಗೆ ವಾಪಸ್​ ಬರುವಾಗ ರಂಜನಿ ಮತ್ತು ಕಿರಣ್​ಗೆ ಭಯಾನಕ ಅನುಭವ ಆಗಿದೆ. ಕೂಡಲೇ ಅವರು ವಿಡಿಯೋ ಚಿತ್ರಿಸಿಕೊಂಡು ಸೋಶಿಯಲ್​ ಮೀಡಿಯಾದಲ್ಲಿ ಅಪ್​ಲೋಡ್​ ಮಾಡಿದ್ದಾರೆ.

ಅಷ್ಟಕ್ಕೂ ಅಲ್ಲಿ ಏನಾಯ್ತು ಎಂಬುದನ್ನು ರಂಜನಿ ರಾಘವನ್​ ಎಳೆಎಳೆಯಾಗಿ ವಿವರಿಸಿದ್ದಾರೆ. ‘ಇದು ನೈಜ ಘಟನೆ ಆಧಾರಿತ ಥ್ರಿಲ್ಲರ್​ ಕಥೆ. ಇದರಲ್ಲಿ ಬರುವ ಎಲ್ಲ ಪಾತ್ರಗಳು ಕಾಲ್ಪನಿಕವಲ್ಲ. ವಿಡಿಯೋ ಸಾಕ್ಷಿಯ ಸಮೇತ ಇದು ನಮ್ಮ ಅನುಭವ’ ಎಂಬ ಕ್ಯಾಪ್ಷನ್​ನೊಂದಿಗೆ ರಂಜನಿ ಒಂದು ವಿಡಿಯೋ ಹಂಚಿಕೊಂಡಿದ್ದಾರೆ. ಗೊತ್ತಿಲ್ಲದ ದಾರಿಯಲ್ಲಿ, ಗೊತ್ತಿಲ್ಲದವರ ವಾಹನದಲ್ಲಿ, ರಾತ್ರಿ ವೇಳೆ ಪ್ರಯಾಣ ಮಾಡುತ್ತಿದ್ದ ಅವರಿಗೆ ಸಖತ್​ ಭಯವಾಗಿತ್ತು. ಆ ಕಾರಣಕ್ಕಾಗಿ ಅವರು ಈ ವಿಡಿಯೋ ಮಾಡಿದ್ದಾರೆ. ‘ನನಗೆ ಒಳಗಡೆ ತುಂಬ ಭಯ ಆಗುತ್ತಿದೆ. ಆದರೆ ಹೊರಗಿಂದ ನಗುತ್ತಿದ್ದೇನೆ ಅಷ್ಟೇ’ ಎಂದು ಇಂಗ್ಲಿಷ್​ನಲ್ಲಿ ಹೇಳುವ ಮೂಲಕ ಅಸಲಿ ಘಟನೆಯನ್ನು ಅವರು ವಿವರಿಸಿದ್ದಾರೆ.

‘ಜೊತೆಗಿದ್ದವರಿಗೆ ಗೊತ್ತಾಗದೇ ಇರಲಿ ಎಂದು ಇಂಗ್ಲಿಷ್​ನಲ್ಲಿ ಮಾತಾಡಿದ್ದು. ಬೈಕೋಬೇಡಿ. ಇವತ್ತು ರಾಮೋಜಿ ಫಿಲ್ಮ್​ ಸಿಟಿಯಲ್ಲಿ ಶೂಟಿಂಗ್ ಬೇಗ ಮುಗಿದಿತ್ತು. ಆದರೆ ಪ್ಯಾಕ್​ಅಪ್​ ಆಗಿರಲಿಲ್ಲ. ಎಲ್ಲರೂ ಬರೋದಕ್ಕೆ ಇನ್ನೂ ಸಮಯ ಇತ್ತು. ಒಟ್ಟಿಗೆ ವಾಪಸ್ ಹೋಟೆಲ್​ಗೆ ಹೋಗೋಕೆ ಕಾಯುತ್ತಿರುವಾಗ, ಹಾಗೇ ಏನೋ ಮಾತಾಡ್ತಾ ಕೂತಿದ್ದೆ. ಗಾಡಿ ಇದೆ ಬರ್ತೀರಾ ಎಂದು ಕಿರಣ್​ ರಾಜ್​ ಕೇಳಿದ್ರು. ನೋಡಿದ್ರೆ ಒಂದು ಲಗೇಜ್ ಗಾಡಿ ನಿಂತಿತ್ತು. ಇದ್ರಲ್ಲಿ ಹೋಗೋಣ ಮಜಾ ಇರುತ್ತೆ ಅಂತ ನಾನು ಏನೂ ಯೋಚನೆ ಮಾಡದೇ ಗಾಡಿ ಹತ್ತಿದೆ. ನಟಿ ಸಾರಾ ಕೂಡ ಅದಾಗಲೇ ಆ ಗಾಡಿ ಹತ್ತಿದ್ರು’ ಎಂದಿದ್ದಾರೆ ರಂಜನಿ.

‘ಬೇಗ ರೂಮ್ ತಲುಪಬಹುದು. ಸುತ್ತ ಮುತ್ತ ಜಾಗವನ್ನು ಓಪನ್ ಗಾಡೀಲಿ ನೋಡಬಹುದು ಅಂತ ಜೋಶ್​ನಲ್ಲಿ ಹೊರಟ್ವಿ. ಗಾಡಿ ಗಡಗಡ ಅಂತ ಶಬ್ದ ಮಾಡ್ತಾ ಸೆಟ್ ಇಂದ 2-3 ಕಿ.ಮೀ. ದೂರ ಬಂತು. ‘ಇವ್ರು ಎಲ್ಲಿಗೆ ಕರ್ಕೊಂಡ್ ಹೋಗ್ತಿದ್ದಾರೆ? ನನ್ ಮೈಮೇಲೇ ಮಿನಿಮಮ್ ಮೂರು ಲಕ್ಷ ಚಿನ್ನ ಇದೆ’ ಎಂದು ಕಿರಣ್ ಗುಟ್ಟಾಗಿ ಹೇಳಿದ ತಕ್ಷಣ ನನ್ನ ಎದೆ ಧಸಕ್ ಎಂದಿತು. ನೋಡಿದ್ರೆ ಗಾಡಿ ಎಲ್ಲೋ ಆಫ್​ರೋಡ್ ಹೋಗ್ತಿದೆ’ ಎಂದು ಭಯಾನಕ ಘಟನೆಯ ಬಗ್ಗೆ ರಂಜನಿ ಬರೆದುಕೊಂಡಿದ್ದಾರೆ.

‘ಗಾಡಿಯಲ್ಲಿ ಒಬ್ಬ ಕನ್ನಡ ಮಾತಾಡೋನಿದ್ದ ಅಂತ ಅವನ ಹತ್ತಿರ ಮಾತಾಡಿಕೊಂಡು ಹೊರಟಿದ್ವಿ. ಸ್ವಲ್ಪ ಹೊತ್ತಿನ ಮೇಲೆ ಗೊತ್ತಾಯ್ತು ಅವನು ಕುಡಿದಿದ್ದ ಅಂತ. ರಾಮೋಜಿ ಫಿಲ್ಮ್​ ಸಿಟಿಯ ಮಾಮೂಲಿ ರೋಡ್ ಬಿಟ್ಟು ಕತ್ತಲೇಲಿ ನಮ್ಮನ್ನ ಎಲ್ಲಿಗೆ ಕರ್ಕೊಂಡು ಹೋಗ್ತಿದ್ದಾರೆ? ಮುಂದೆ ಕೂತಿರೋ ಡ್ರೈವರ್ ಗೊತ್ತಿರೋದಿರ್ಲಿ, ಅವರ ಮುಖಾನೂ ನೋಡಿಲ್ಲ! ನಮಗೇನಾದರು ಮಾಡಿಬಿಡ್ತಾರಾ? ಹೊರ ರಾಜ್ಯದಲ್ಲಿ, ಗೊತ್ತಿಲ್ಲದವರ ಗಾಡಿಯಲ್ಲಿ, ಗೊತ್ತೂ ಗುರಿ ಇಲ್ಲದೇ ಹೊರಟಿದ್ದೀವಿ. ಏನಪ್ಪಾ ಗತಿ ಅಂತ ಹೆದರಿಕೊಂಡು ಈ ವಿಡಿಯೋ ಮಾಡಿದ್ದು. ಕ್ರೈಮ್ ಇನ್ವೆಸ್ಟಿಗೇಶನ್ ನಡೆಯುವಾಗ ಸಾಕ್ಷಿಗೆ ಅಂತ ವಿಡಿಯೋ ಸಿಗುತ್ತಲ್ಲ ಆತರ’ ಎಂದು ರಂಜನಿ ಬರೆದುಕೊಂಡಿದ್ದಾರೆ.

ಕೊನೆಗೆ ರಂಜನಿ ಸೇಫ್​ ಆಗಿ ಹೋಟೆಲ್​ ರೂಮ್​ ತಲುಪಿದ್ರಾ? ‘ಮುಂದೇನಾಯ್ತು? ಭಾಗ ಎರಡರಲ್ಲಿ ನಿರೀಕ್ಷಿಸಿ’ ಎಂದು ಅವರು ಘಟನೆ ವಿವರಿಸೋದನ್ನು ನಿಲ್ಲಿಸಿದ್ದಾರೆ.

ಇದನ್ನೂ ಓದಿ:

Ranjani Raghavan: ‘ಕನ್ನಡತಿ’ ಧಾರಾವಾಹಿ ನಟಿ ರಂಜನಿ ರಾಘವನ್​ ಫೇಸ್​ಬುಕ್​ ಹ್ಯಾಕ್​; ಯಾರ ಮೇಲಿದೆ ಅನುಮಾನ?

Ranjani Raghavan: ಕೆಟ್ಟ ಕಾಲ ಶಾಶ್ವತವಲ್ಲ, ಯಾರೂ ಕುಗ್ಗಬೇಕಿಲ್ಲ; ಲಾಕ್​ಡೌನ್ ಸಂಕಷ್ಟದಲ್ಲಿ ರಂಜನಿ ರಾಘವನ್ ಸ್ಫೂರ್ತಿ ಮಾತು