ಮೋಹನ್ಲಾಲ್ ಅಸಲಿ ಮುಖ ಬಯಲು ಮಾಡ್ತೀನಿ, ಅವರ ಕುಕೃತ್ಯ ಬಯಲು ಮಾಡುವ ಪುಸ್ತಕ ಬರೀತೀನಿ: ಮಲಯಾಳಂ ನಟ
ಮಲಯಾಳಂ ಸ್ಟಾರ್ ನಟ ಮೋಹನ್ಲಾಲ್ ಬಗ್ಗೆ ಅದೇ ಚಿತ್ರರಂಗದ ಹಿರಿಯ ನಟ ಶ್ರೀನಿವಾಸನ್ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ಮೋಹನ್ಲಾಲ್ ಒಬ್ಬ ಬೂಟಾಟಿಕೆ ವ್ಯಕ್ತಿತ್ವವುಳ್ಳ ವ್ಯಕ್ತಿ, ಪುಸ್ತಕ ಬರೆದು ಆತನ ಕುಕೃತ್ಯಗಳನ್ನು ಬಹಿರಂಗಪಡಿಸುತ್ತೇನೆ ಎಂದಿದ್ದಾರೆ.
Updated on: Apr 03, 2023 | 6:58 PM
ಮಲಯಾಳಂ (Malayalam) ಸ್ಟಾರ್ ನಟ ಮೋಹನ್ಲಾಲ್ಗೆ (Mohanlal) ದೊಡ್ಡ ಅಭಿಮಾನಿ ವರ್ಗವಿದೆ. ಮಲಯಾಳಂ ಮಾತ್ರವೇ ಅಲ್ಲದೆ ಇತರೆ ಚಿತ್ರರಂಗಗಳಲ್ಲಿಯೂ ಮೋಹನ್ಲಾಲ್ ಅವರಿಗೆ ಗೌರವ, ಆದರಗಳಿವೆ. ಆದರೆ ಮಲಯಾಳಂ ನಟರೊಬ್ಬರು ಮೋಹನ್ಲಾಲ್ ದುಷ್ಟ ವ್ಯಕ್ತಿ, ಅವರ ನಿಜಬಣ್ಣ ಬಯಲು ಮಾಡುತ್ತೇನೆ. ಸಾಯುವುದರೊಳಗೆ ಪುಸ್ತಕವೊಂದನ್ನು ಬರೆದು ಅದರಲ್ಲಿ ಮೋಹನ್ಲಾಲ್ ಮಾಡಿರುವ ಕುಕೃತ್ಯಗಳನ್ನೆಲ್ಲ ಬಯಲು ಮಾಡುತ್ತೇನೆ ಎಂದಿದ್ದಾರೆ.
ಮಲಯಾಳಂ ಚಿತ್ರರಂಗದ ನಟ ಶ್ರೀನಿವಾಸನ್ (Sreenivasan) ಆಗಾಗ್ಗೆ ಮೋಹನ್ಲಾಲ್ ಬಗ್ಗೆ ಕಿಡಿ ಕಾರುತ್ತಲೇ ಇರುತ್ತಾರೆ. ಹಲವು ಸಿನಿಮಾಗಳಲ್ಲಿ ಈ ಇಬ್ಬರೂ ಒಟ್ಟಿಗೆ ನಟಿಸಿದ್ದಾರಾದರೂ ಇಬ್ಬರೂ ದೂರ-ದೂರ. ಇತ್ತೀಚೆಗೆ ಮಾಧ್ಯಮಗಳೊಟ್ಟಿಗೆ ಮಾತನಾಡುತ್ತಾ, ಮೋಹನ್ಲಾಲ್ ಬೂಟಾಟಿಕೆಯುಳ್ಳ ವ್ಯಕ್ತಿ. ಆತನದ್ದು ಒಳಗೊಂಡು-ಹೊರಗೊಂದು ವ್ಯಕ್ತಿತ್ವ. ಸಾಯುವುದರ ಒಳಗೆ ಪುಸ್ತಕ ಬರೆದು ಆತನ ಕುಕೃತ್ಯಗಳನ್ನು ಬಯಲು ಮಾಡುತ್ತೇನೆ ಎಂದಿದ್ದಾರೆ.
”ಪ್ರೇಮ್ ನಜೀರ್, ತಾವು ನಿರ್ದೇಶನ ಮಾಡುವ ಸಿನಿಮಾದಲ್ಲಿ ನಟಿಸುವಂತೆ ಮೋಹನ್ಲಾಲ್ ಅನ್ನು ಕೇಳಿದ್ದರು. ಕಡತ್ತನಂದನ್ ಅಂಬಾಡಿ ಸಿನಿಮಾ ಚಿತ್ರೀಕರಣದ ವೇಳೆ ಪ್ರೇಮ್ ನಜೀರ್, ಮೋಹನ್ಲಾಲ್ಗೆ ಕತೆ ಹೇಳಿದ್ದರು. ಆದರೆ ಮೋಹನ್ಲಾಲ್ ಅದರಲ್ಲಿ ಆಸಕ್ತಿ ತೋರಿಸಿರಲಿಲ್ಲ. ಬಳಿಕ ನಾನು ನಟರಾಜನ್ ಹೆಸರಿನ ಮಧ್ಯವರ್ತಿ ಮೂಲಕ ಮೋಹನ್ಲಾಲ್ಗೆ ಕತೆ ಹೇಳಿಸಿದೆ. ಕತೆ ಕೇಳಿ ಮೋಹನ್ಲಾಲ್ ಆತನನ್ನು ಬೈದು ಬಿಟ್ಟ ಆ ನಂತರ ಅದೇ ಕತೆಯನ್ನು ಸಂದೇಸಮ್ ಹೆಸರಿನ ಸಿನಿಮಾ ಮಾಡಿದೆವು ಅದೂ ಸೂಪರ್ ಹಿಟ್ ಆಯಿತು” ಎಂದಿದ್ದಾರೆ ಶ್ರೀನಿವಾಸನ್.
ಪ್ರೇಮ್ ನಜೀರ್ ಸಾಯುವ ಮುನ್ನ ಮೋಹನ್ಲಾಲ್ಗೆ ಅಡ್ವಾನ್ಸ್ ಕೊಟ್ಟಿದ್ದರು. ಆದರೆ ಕೆಲವು ದಿನಗಳ ಬಳಿಕ ಅವರು ನಿಧನ ಹೊಂದಿದರು. ಆಗ ಮೋಹನ್ಲಾಲ್, ಪ್ರೇಮ್ ನಜೀರ್ ಅವರ ಸಿನಿಮಾದಲ್ಲಿ ನಟಿಸುವ ಆಸೆ ನನಗಿತ್ತು ಎಂದು ಮಾಧ್ಯಮಗಳ ಮುಂದೆ ಹೇಳಿದ್ದು ಕೇಳಿ ನನಗೆ ರೇಜಿಗೆ ಹುಟ್ಟಿತು ಎಂದಿದ್ದಾರೆ ಶ್ರೀನಿವಾಸನ್.
ಪ್ರೇಮ್ ನಜೀರ್ ಶಾನವಾಜ್ ಸಹ ಈ ಬಗ್ಗೆ ಮಾತನಾಡಿದ್ದು, ‘ಪ್ರೇಮ್ ನಜೀರ್ ಅವರಿಗೆ ಮೋಹನ್ಲಾಲ್ ಜೊತೆ ಸಿನಿಮಾ ಮಾಡುವ ಆಸೆಯಿತ್ತು. ಆದರೆ ಯಾವ ಸಮಸ್ಯೆಗಳಿಂದ ಅದು ಸೆಟ್ಟೇರಲಿಲ್ಲ ಎಂಬುದು ಗೊತ್ತಿಲ್ಲ. ಮೋಹನ್ಲಾಲ್ ಆಗೆಲ್ಲ ಪ್ರಿಯದರ್ಶನ್ ಜೊತೆಗೆ ಚಿತ್ರಕತೆ ಚರ್ಚೆಗೆ ಬರುತ್ತಿದ್ದರು, ಆದರೆ ಆ ಸಿನಿಮಾ ಯಾಕೆ ಪ್ರಾರಂಭವಾಗಲಿಲ್ಲ ಎಂಬುದು ಗೊತ್ತಿಲ್ಲ” ಎಂದಿದ್ದಾರೆ. ಶ್ರೀನಿವಾಸನ್ ಮಾಡುತ್ತಿರುವ ಆರೋಪಗಳು ನಿಜವೇ ಎಂಬ ಪ್ರಶ್ನೆಗೆ, ಸತ್ಯ ಏನೆಂಬುದು ನನಗೆ ಗೊತ್ತಿಲ್ಲ ಆದರೆ ಶ್ರೀನಿವಾಸನ್ ಅವರು ಹೇಳಿದ ಮೇಲೆ ನಂಬದೇ ಇರಲಾಗುತ್ತಿಲ್ಲ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Mohanlal Birthday: ಕುಸ್ತಿಯಲ್ಲಿ ಸ್ಟೇಟ್ ಚಾಂಪಿಯನ್ ಆಗಿದ್ದ ಮೋಹನ್ಲಾಲ್ ನಂತರ ನಟನಾಗಿದ್ದು ಹೇಗೆ?
ಮೋಹನ್ಲಾಲ್ ಬ್ಯುಸಿ ಸ್ಟಾರ್ ನಟರಲ್ಲಿ ಒಬ್ಬರು. ಮಲಯಾಳಂ ಮಾತ್ರವೇ ಅಲ್ಲದೆ ಹಲವು ಭಾಷೆಗಳಲ್ಲಿ ನಟಿಸುತ್ತಿದ್ದಾರೆ. ರಜನೀಕಾಂತ್ ನಟನೆಯ ಜೈಲರ್ ಸಿನಿಮಾದಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸಿರುವ ಮೋಹನ್ಲಾಲ್, ಲಿಜೊ ಜೋಸ್ ನಿರ್ದೇಶನದ ಮಲೈಕೋಟ್ಟೈ ವಾಲಿಬಾನ್ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಜೊತೆಗೆ ದೃಶ್ಯಂ ನಿರ್ದೇಶಕ ಜೀತು ಜೋಸೆಫ್ ನಿರ್ದೇಶನದ ರಾಮ್ ಹೆಸರಿನ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಪೃಥ್ವಿರಾಜ್ ಸುಕುಮಾರನ್ ನಿರ್ದೇಶನದ ಸೂಪರ್ ಹಿಟ್ ಸಿನಿಮಾ ಲುಸಿಫರ್ನ ಎರಡನೇ ಭಾಗದಲ್ಲಿ ನಟಿಸಲು ಒಪ್ಪಿಕೊಂಡಿದ್ದಾರೆ. ಇದರ ಜೊತೆಗೆ ಮೋಹನ್ಲಾಲ್ ಮೊದಲ ಬಾರಿಗೆ ನಿರ್ದೇಶನ ಮಾಡಿರುವ ಬಾರೋಜ್ ಸಿನಿಮಾ ಕೆಲವೇ ದಿನಗಳಲ್ಲಿ ತೆರೆಗೆ ಬರಲಿದೆ.
