16 ವರ್ಷಗಳ ಬಳಿಕ ಒಂದಾಗಲಿದ್ದಾರೆ ಮಲಯಾಳಂ ಚಿತ್ರರಂಗದ ಸ್ಟಾರ್ ನಟರು
Malayalam: ಮಲಯಾಳಂ ಚಿತ್ರರಂಗದ ಸೂಪರ್ ಸ್ಟಾರ್ಗಳಾದ ಮೋಹನ್ಲಾಲ್ ಹಾಗೂ ಮಮ್ಮುಟಿ ಒಂದೇ ಸಿನಿಮಾದಲ್ಲಿ ಹಲವು ಭಾರಿ ನಟಿಸಿದ್ದಾರೆ. ಆದರೆ ಕಳೆದ 16 ವರ್ಷದಿಂದ ಇಬ್ಬರೂ ಒಟ್ಟಿಗೆ ನಟಿಸಿಲ್ಲ. ಈಗ ಮತ್ತೊಮ್ಮೆ ಈ ಜೋಡಿ ಒಟ್ಟಿಗೆ ತೆರೆಯ ಮೇಲೆ ಕಾಣಿಸಿಕೊಳ್ಳಲಿದೆ.
Updated on: Nov 19, 2024 | 6:27 PM
ಮಲಯಾಳಂ ಚಿತ್ರರಂಗ 1930 ರಿಂದಲೂ ಅಸ್ತಿತ್ವದಲ್ಲಿ ಇದೆ. ಆದರೆ ಕೋವಿಡ್ ಬಳಿಕ ಆ ಚಿತ್ರರಂಗದ ಚರ್ಚೆ ವಿಶ್ವಮಟ್ಟದಲ್ಲಿ ಆಗುತ್ತಿದೆ. ಪ್ರಸ್ತುತ ಸಮಯದಲ್ಲಿ ಭಾರತದಲ್ಲಿ ಅತ್ಯುತ್ತಮ ಗುಣಮಟ್ಟದ ಸಿನಿಮಾಗಳನ್ನು ನಿರ್ಮಾಣ ಮಾಡುತ್ತಿರುವುದು ಮಲಯಾಳಂ ಚಿತ್ರರಂಗ. ಸಣ್ಣ ಬಜೆಟ್ ಸಿನಿಮಾಗಳು 500-600 ಕೋಟಿ ಹಣ ಗಳಿಸುತ್ತಿವೆ. ಬಹಳ ವರ್ಷಗಳ ಹಿಂದೊಮ್ಮೆ ಅಮಿತಾಬ್ ಬಚ್ಚನ್ ಹೇಳಿದ್ದರು, ‘ನಮ್ಮ ಅದೃಷ್ಟ ಚೆನ್ನಾಗಿದೆ ಹಾಗಾಗಿ ಮಲಯಾಳಂ ಚಿತ್ರರಂಗದ ಬಗ್ಗೆ ಹೆಚ್ಚು ಜನರಿಗೆ ಗೊತ್ತಿಲ್ಲ, ಒಂದೊಮ್ಮೆ ಭಾಷೆಯ ಗಡಿ ಇಲ್ಲದೇ ಹೋಗಿದ್ದರೆ ಮೋಹನ್ಲಾಲ್, ಮಮ್ಮುಟಿ ದೇಶದ ದೊಡ್ಡ ಸ್ಟಾರ್ಗಳಾಗಿರುತ್ತಿದ್ದರು’ ಎಂದಿದ್ದರು. ಅದು ನಿಜವೂ ಹೌದು.
ರಜನೀಕಾಂತ್, ಚಿರಂಜೀವಿ ಇತರೆ ಕೆಲವರಿಗೆ ಹೋಲಿಸಿದರೆ ಮೋಹನ್ಲಾಲ್ ಹಾಗೂ ಮಮ್ಮುಟಿ ದೊಡ್ಡ ಸ್ಟಾರ್ಗಳಲ್ಲದೆ ಇರಬಹುದು ಆದರೆ ನಟನೆಯಲ್ಲಿ, ಪಾತ್ರಗಳಲ್ಲಿನ ವಿಭಿನ್ನತೆಯಲ್ಲಿ ಅವರನ್ನು ಮೀರಿಸುವವರಿಲ್ಲ. ಈ ಇಬ್ಬರು ದಶಕಗಳಿಂದಲೂ ಮಲಯಾಳಂ ಚಿತ್ರರಂಗದಲ್ಲಿ ಸ್ಟಾರ್ ನಟರಾಗಿ ಮೆರೆದಿದ್ದಾರೆ. ಮಲಯಾಳಂ ಚಿತ್ರರಂಗವನ್ನು ಜೀವಂತ ಇರಿಸುವಲ್ಲಿ ಇವರಿಬ್ಬರ ಪಾತ್ರ ಬಹಳ ಮಹತ್ವದ್ದು. ಇದೀಗ ಈ ಇಬ್ಬರು ನಟರು ಮತ್ತೊಮ್ಮೆ ತೆರೆಯ ಮೇಲೆ ಒಟ್ಟಿಗೆ ಕಾಣಿಸಿಕೊಳ್ಳಲಿದ್ದಾರೆ.
ರಾಷ್ಟ್ರಪ್ರಶಸ್ತಿ ವಿಜೇತ ಮಲಯಾಳಂ ಸಿನಿಮಾ ‘ಟೇಕ್ ಆಫ್’, ಕೋವಿಡ್ ಸಮಯದಲ್ಲಿ ಬಿಡುಗಡೆ ಆದ ಅದ್ಭುತ ಸಿನಿಮಾ ‘ಸಿ ಯು ಸೂನ್’, ‘ನಾಯಟ್ಟು’ ಇನ್ನಿತರೆ ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ಮಹೇಶ್ ನಾರಾಯಣನ್ ‘ಮೆಗಾಸ್ಟಾರ್ 429’ ಸಿನಿಮಾ ಕೈಗೆತ್ತಿಕೊಂಡಿದ್ದು, ಈ ಸಿನಿಮಾದಲ್ಲಿ ಮೋಹನ್ಲಾಲ್ ಮತ್ತು ಮಮ್ಮುಟಿ ಇಬ್ಬರೂ ಒಟ್ಟಿಗೆ ನಟಿಸಲಿದ್ದಾರೆ. ಈ ಇಬ್ಬರು ಹಲವು ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಆದರೆ ಕಳೆದ 16 ವರ್ಷಗಳಿಂದಲೂ ಒಟ್ಟಿಗೆ ನಟಿಸಿರಲಿಲ್ಲ, ಈಗ ಮತ್ತೊಮ್ಮೆ ಈ ಜೋಡಿ ಒಂದಾಗಿದೆ.
ಇದನ್ನೂ ಓದಿ:ಹೇಮಾ ವರದಿ ಬಗ್ಗೆ ದನಿ, ನಟಿ ಸಂದ್ರಾ ಥಾಮಸ್ಗೆ ಮಲಯಾಳಂ ಚಿತ್ರರಂಗದಿಂದ ನಿಷೇಧ
2008 ರಲ್ಲಿ ಬಿಡುಗಡೆ ಆಗಿದ್ದ 20:20 ಸಿನಿಮಾದಲ್ಲಿ ಮೋಹನ್ಲಾಲ್ ಮತ್ತು ಮಮ್ಮುಟಿ ಒಟ್ಟಿಗೆ ನಟಿಸಿದ್ದರು. ಅದಾದ ಬಳಿಕ ಈಗ ‘ಮೆಗಾಸ್ಟಾರ್ 429’ ಸಿನಿಮಾಕ್ಕಾಗಿ ಈ ಜೋಡಿ ಒಂದಾಗುತ್ತಿದೆ. ಮೋಹನ್ಲಾಲ್ ಮತ್ತು ಮಮ್ಮುಟಿ ಪ್ರತಿಸ್ಪರ್ಧಿಗಳೇ ಆದರು ಆತ್ಮೀಯ ಗೆಳೆಯರೂ ಸಹ ಹೌದು. ದಶಕಗಳಿಂದಲೂ ಈ ಇಬ್ಬರು ಒಟ್ಟಿಗೆ ಒಂದೇ ಸಿನಿಮಾದಲ್ಲಿ ನಟಿಸುತ್ತಾ ಬಂದಿದ್ದಾರೆ. ಪರಸ್ಪರರ ಸಿನಿಮಾಗಳಲ್ಲಿ ಅತಿಥಿ ಪಾತ್ರಗಳಲ್ಲಿಯೂ ನಟಿಸಿದ್ದಾರೆ. ಈಗ ಮತ್ತೊಮ್ಮೆ ಒಂದೇ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.
ಸಂತೋಷ್ ನಾರಾಯಣನ್ ನಿರ್ದೇಶನ ಮಾಡುತ್ತಿರುವ ಈ ಸಿನಿಮಾದಲ್ಲಿ ಮೋಹನ್ಲಾಲ್, ಮಮ್ಮುಟಿ ಜೊತೆಗೆ ಕುಂಚಿಕ್ಕೊ ಬೋಬನ್ ಸಹ ನಟಿಸಲಿದ್ದಾರೆ. ಇದೇ ಸಿನಿಮಾದ ಪೋಷಕ ಪಾತ್ರದಲ್ಲಿ ಫಹಾದ್ ಫಾಸಿಲ್ ಸಹ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಆದರೆ ಅದು ಇನ್ನೂ ಖಾತ್ರಿ ಆಗಬೇಕಿದೆ. ಮಮ್ಮುಟಿ, ಮೋಹನ್ಲಾಲ್ ಹಾಗೂ ಕುಂಚಿಕ್ಕೊ ಬೋಬನ್ ಅವರುಗಳು ಒಟ್ಟಿಗಿರುವ ಚಿತ್ರವನ್ನು ಸ್ವತಃ ಮಮ್ಮುಟಿ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
