‘ಪುಳು’ ಸಿನಿಮಾ ಬ್ರಾಹ್ಮಣ ವಿರೋಧಿ ಎಂದು ಮಮ್ಮುಟ್ಟಿ ಮೇಲೆ ಬಲಪಂಥೀಯರು ಗರಂ
ಸ್ಟಾರ್ ನಟ ಮಮ್ಮುಟ್ಟಿ ಅವರು ‘ಟರ್ಬೋ’ ಸಿನಿಮಾದ ಬಿಡುಗಡೆಗೆ ಸಿದ್ಧತೆ ಮಾಡಿಕೊಂಡಿದ್ದಾರೆ. ಆದರೆ ಅವರನ್ನು ಅನಗತ್ಯವಾಗಿ ವಿವಾದಕ್ಕೆ ಸಿಲುಕಿಸುವ ಪ್ರಯತ್ನ ನಡೆದಿದೆ. 2022ರಲ್ಲಿ ತೆರೆಕಂಡ ‘ಪುಳು’ ಸಿನಿಮಾವನ್ನು ನೆಪವಾಗಿ ಇಟ್ಟುಕೊಂಡು ಮಮ್ಮುಟ್ಟಿ ವಿರುದ್ಧ ಕೆಲವರು ಕಿಡಿಕಾರುತ್ತಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಚರ್ಚೆ ಆಗುತ್ತದೆ.
Updated on: May 15, 2024 | 5:19 PM
ಮಲಯಾಳಂ ಚಿತ್ರರಂಗದ ಹಿರಿಯ ನಟ ಮಮ್ಮುಟ್ಟಿ (Mammootty) ವಿರುದ್ಧ ಕೆಲವು ಬಲಪಂಥೀಯರು ಗರಂ ಆಗಿದ್ದಾರೆ. ಅದಕ್ಕೆ ಕಾರಣ ಆಗಿರುವುದು 2 ವರ್ಷಗಳ ಹಿಂದೆ ಬಿಡುಗಡೆ ಆಗಿದ್ದ ‘ಪುಳು’ ಸಿನಿಮಾ! ಹೌದು, 2022ರಲ್ಲಿ ಬಿಡುಗಡೆ ಆಗಿದ್ದ ‘ಪುಳು’ ಸಿನಿಮಾ (Puzhu Movie) ಇಟ್ಟುಕೊಂಡು ಈಗ ವಿವಾದ ಎಬ್ಬಿಸಲಾಗಿದೆ. ಈ ಸಿನಿಮಾದಲ್ಲಿ ಬ್ರಾಹ್ಮಣ ವಿರೋಧಿ (Anti-Brahminical) ಅಂಶಗಳು ಇವೆ ಎಂಬ ಆರೋಪ ಹೊರಿಸಲಾಗಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ಮಮ್ಮುಟ್ಟಿ ಅವರನ್ನು ಟಾರ್ಗೆಟ್ ಮಾಡಲಾಗುತ್ತಿದೆ. ಆದರೆ ಕೇರಳದಲ್ಲಿ ಅನೇಕ ಸೆಲೆಬ್ರಿಟಿಗಳು, ಅಭಿಮಾನಿಗಳು ಹಾಗೂ ರಾಜಕೀಯ ಗಣ್ಯರು ಮಮ್ಮುಟ್ಟಿ ಪರವಾಗಿ ನಿಂತಿದ್ದಾರೆ.
ಸರಿಯಾಗಿ ಎರಡು ವರ್ಷಗಳ ಹಿಂದೆ, ಅಂದರೆ 2022ರ ಮೇ 13ರಂದು ‘ಪುಳು’ ಸಿನಿಮಾ ತೆರೆಕಂಡಿತ್ತು. ಆ ಸಿನಿಮಾದಲ್ಲಿ ಮಮ್ಮುಟ್ಟಿ, ಪಾರ್ವತಿ ತಿರುವತ್ತು ಅವರು ಮುಖ್ಯ ಭೂಮಿಕೆ ನಿಭಾಯಿಸಿದ್ದರು. ಈ ಸಿನಿಮಾ ಕುರಿತಂತೆ ಈಗ ಸೋಶಿಯಲ್ ಮೀಡಿಯಾದಲ್ಲಿ ತಕರಾರು ತೆಗೆಯಲಾಗಿದೆ. ಈ ಸಿನಿಮಾದಲ್ಲಿ ಬ್ರಾಹ್ಮಣ ವಿರೋಧಿ ಕಥೆ ಇದೆ ಹಾಗೂ ಅದರಲ್ಲಿ ನಟಿಸಿದ್ದು ಮಮ್ಮುಟ್ಟಿ ಅವರ ತಪ್ಪು ಎಂದು ಕೆಲವರು ವಿವಾದ ಶುರು ಮಾಡಿದ್ದಾರೆ.
ದೇಶದಲ್ಲಿ ಲೋಕಸಭಾ ಚುನಾವಣೆ ನಡೆಯುತ್ತಿದೆ. ಈ ಸಂದರ್ಭದಲ್ಲಿ ಜಾತಿ-ಧರ್ಮದ ವಿಚಾರ ಇಟ್ಟುಕೊಂಡು ಜನರ ಗಮನವನ್ನು ಬೇರೆಡೆಗೆ ಸೆಳೆಯುವ ತಂತ್ರ ನಡೆಯುತ್ತಿದೆ. ಸದ್ಯ ‘ಪುಳು’ ಸಿನಿಮಾದ ಕಾಂಟ್ರವರ್ಸಿ ಹಿಂದೆ ಕೂಡ ಇದೇ ಉದ್ದೇಶ ಇರಬಹುದು ಎಂದು ನೆಟ್ಟಿಗರು ಅಭಿಪ್ರಾಯಪಟ್ಟಿದ್ದಾರೆ. ಬಲಪಂಥೀಯ ಟ್ರೋಲ್ಗಳಿಗೆ ಕೇರಳದ ಮಂದಿ ಸೊಪ್ಪು ಹಾಕಿಲ್ಲ.
ಇದನ್ನೂ ಓದಿ: ಮಲಯಾಳಂನಲ್ಲಿ ರಾಜ್ ಶೆಟ್ಟಿ ಪವರ್ಫುಲ್ ಮ್ಯಾನ್; ಗಮನ ಸೆಳೆದ ಮಮ್ಮೂಟಿ ನಟನೆಯ ‘ಟರ್ಬೋ’ ಟ್ರೇಲರ್
ಸಚಿವರಾದ ವಿ. ಶಿವನ್ ಕುಟ್ಟಿ, ಕೆ. ರಾಜನ್, ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ ಮುಂತಾದವರು ಮಮ್ಮುಟ್ಟಿ ಪರವಾಗಿ ಬ್ಯಾಟ್ ಬೀಸಿದ್ದಾರೆ. ‘ಮಮ್ಮುಟ್ಟಿ ಅವರು ಮಲಯಾಳಿಗಳ ಹೆಮ್ಮೆ. ಅವರಿಗೆ ಆ ಗೌರವ ಇದ್ದೇ ಇರುತ್ತದೆ. ಮಮ್ಮುಟ್ಟಿ ಅವರನ್ನು ಮೊಹಮ್ಮದ್ ಕುಟ್ಟಿ ಎನ್ನುವ, ಕಮಲ್ ಅವರನ್ನು ಕಮಲುದ್ದೀನ್ ಎನ್ನುವ, ವಿಜಯ್ ಅವರನ್ನು ಜೋಸೆಫ್ ವಿಜಯ್ ಎನ್ನುವ ಸಂಘಿ ರಾಜಕೀಯ ಇಲ್ಲಿ ನಡೆಯುವುದಿಲ್ಲ. ಇದು ಕೇರಳ’ ಎಂದು ಕೆ. ರಾಜನ್ ಪೋಸ್ಟ್ ಮಾಡಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
