ರಜನಿಕಾಂತ್ ಸಿನಿಮಾಗೆ ಹಾಡಬೇಕಿತ್ತು ಮೈಕೆಲ್ ಜಾಕ್ಸನ್; ಅಚ್ಚರಿಯ ವಿಷಯ ರಿವೀಲ್

ಭಾರತೀಯ ಚಿತ್ರರಂಗದ ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ಸಿನಿಮಾಗೆ ಪಾಪ್ ದಂತಕಥೆ ಮೈಕೆಲ್ ಜಾಕ್ಸನ್ ಹಾಡಬೇಕಿತ್ತು ಎಂಬ ಕುತೂಹಲಕಾರಿ ವಿಷಯ ಈಗ ಬಹಿರಂಗವಾಗಿದೆ. ಸಂಗೀತ ನಿರ್ದೇಶಕ ಎಸ್. ತಮನ್ ಈ ಅಪರೂಪದ ವಿಚಾರವನ್ನು ಹಂಚಿಕೊಂಡಿದ್ದಾರೆ. ಭಾರತೀಯ ಚಿತ್ರರಂಗದ ಆಸ್ಕರ್ ವಿಜೇತ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ಮತ್ತು ಮೈಕೆಲ್ ಜಾಕ್ಸನ್ ಒಂದಾಗಿ ಈ ಸಿನಿಮಾಗಾಗಿ ಹಾಡು ಮಾಡಲು ಒಪ್ಪಂದ ಮಾಡಿಕೊಂಡಿದ್ದರು ಎಂಬ ಸತ್ಯವನ್ನು ಅವರು ಬಿಚ್ಚಿಟ್ಟಿದ್ದಾರೆ.

ಪ್ರಸಿದ್ಧ ಸಂದರ್ಶನವೊಂದರಲ್ಲಿ ಮಾತನಾಡಿದ ತಮನ್, ‘ಬಿಗಿ ಡಾಗ್ಸ್’ ಖ್ಯಾತಿಯ ರ್ಯಾಪರ್ ಹನುಮಾನ್‌ಕೈಂಡ್ ಜೊತೆ ಹೊಸ ಸಿನಿಮಾಗಾಗಿ ಮಾತುಕತೆ ನಡೆಸುತ್ತಿರುವುದಾಗಿ ತಿಳಿಸಿದರು. ಇದೇ ವೇಳೆ ಅವರು ಎ.ಆರ್. ರೆಹಮಾನ್ ಹಾಗೂ ಮೈಕೆಲ್ ಜಾಕ್ಸನ್ ಕಾಂಬಿನೇಷನ್‌ನಲ್ಲಿ ಬರಬೇಕಿದ್ದ ಸೂಪರ್ ಹಿಟ್ ಹಾಡಿನ ನೆನಪನ್ನು ಮೆಲಕು ಹಾಕಿದರು. ರಜನಿಕಾಂತ್ ಅಭಿನಯದ ‘ಎಂಧಿರನ್’ (ರೋಬೋಟ್) ಸಿನಿಮಾಗಾಗಿ ಈ ಮಹಾನ್ ಕಲಾವಿದರು ಒಂದಾಗಲು ನಿರ್ಧರಿಸಿದ್ದರು ಎಂದು ಸ್ಪಷ್ಟಪಡಿಸಿದರು.

ಎ.ಆರ್. ರೆಹಮಾನ್ ಮತ್ತು ಮೈಕೆಲ್ ಜಾಕ್ಸನ್ ಇಬ್ಬರೂ ಭೇಟಿಯಾಗಿ ರಜನಿಕಾಂತ್ ಸಿನಿಮಾಗಾಗಿ ವಿಶೇಷ ಹಾಡೊಂದನ್ನು ಸಂಯೋಜಿಸಲು ಯೋಜನೆ ರೂಪಿಸಿದ್ದರು. 2009ರ ಮೇ ತಿಂಗಳಿನಲ್ಲಿ ಮೈಕೆಲ್ ಜಾಕ್ಸನ್ ಈ ಒಪ್ಪಂದಕ್ಕೆ ಸಹಿ ಕೂಡ ಮಾಡಿದ್ದರು. ಆದರೆ ದುರದೃಷ್ಟವಶಾತ್ ಅದೇ ವರ್ಷದ ಜೂನ್ ತಿಂಗಳಿನಲ್ಲಿ ಮೈಕೆಲ್ ಜಾಕ್ಸನ್ ಹಠಾತ್ತನೆ ನಿಧನರಾದರು. ಇದರಿಂದಾಗಿ ಈ ಐತಿಹಾಸಿಕ ಜುಗಲ್ಬಂದಿ ಹಾಡು ಹೊರಬರಲು ಸಾಧ್ಯವಾಗಲಿಲ್ಲ.

ಶಂಕರ್ ನಿರ್ದೇಶನದ ‘ಎಂಧಿರನ್’ ಸಿನಿಮಾ 2010ರಲ್ಲಿ ಬಿಡುಗಡೆಯಾಗಿ ದೇಶಾದ್ಯಂತ ಧೂಳೆಬ್ಬಿಸಿತ್ತು. ಆ ನಂತರ ತಮನ್ ತಮ್ಮ ನಿರ್ದೇಶನದ ರಾಮ್ ಚರಣ್ ಅಭಿನಯದ ‘ಗೇಮ್ ಚೇಂಜರ್’ ಸಿನಿಮಾದ ಬಗ್ಗೆಯೂ ಮಾತನಾಡಿದರು. ಈ ಚಿತ್ರದ ‘ಡೋಪ್’ ಹಾಡಿಗಾಗಿ ಅಂತಾರಾಷ್ಟ್ರೀಯ ಪಾಪ್ ಗಾಯಕಿ ಬ್ರಿಟ್ನಿ ಸ್ಪಿಯರ್ಸ್ ಅವರನ್ನು ಕರೆತರಲು ದೊಡ್ಡ ಮಟ್ಟದ ಪ್ರಯತ್ನ ನಡೆಸಲಾಗಿತ್ತು. ಇಂಗ್ಲಿಷ್‌ನಲ್ಲಿ ಈ ಹಾಡನ್ನು ಗ್ಲೋಬಲ್ ಸಿಂಗಲ್ ಆಗಿ ರಿಲೀಸ್ ಮಾಡುವ ಯೋಜನೆ ಇತ್ತು.

ಇದನ್ನೂ ಓದಿ: ‘ಜೈಲರ್ 2’ ಚಿತ್ರದ ಬಗ್ಗೆ ದೊಡ್ಡ ಅಪ್​ಡೇಟ್ ಕೊಟ್ಟ ರಜನಿಕಾಂತ್

ಆದರೆ ‘ಗೇಮ್ ಚೇಂಜರ್’ ಚಿತ್ರದ ಚಿತ್ರೀಕರಣ ಮತ್ತು ಬಿಡುಗಡೆ ತಡವಾದ ಕಾರಣ ಆ ಸುವರ್ಣ ಅವಕಾಶ ಕೈತಪ್ಪಿಹೋಯಿತು ಎಂದು ತಮನ್ ಬೇಸರ ವ್ಯಕ್ತಪಡಿಸಿದರು. ರಾಮ್ ಚರಣ್ ಹಾಗೂ ಶಂಕರ್ ಕಾಂಬಿನೇಷನ್‌ನ ಈ ಬಹುನಿರೀಕ್ಷಿತ ಸಿನಿಮಾ ಹಲವು ಬಾರಿ ಮುಂದೂಡಲ್ಪಟ್ಟು ಕೊನೆಗೆ 2025ರ ಜನವರಿಯಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಯಿತು. ಹೀಗಾಗಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹಾಡನ್ನು ತಲುಪಿಸುವ ಯೋಜನೆ ಅರ್ಧಕ್ಕೆ ನಿಂತುಹೋಯಿತು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.