Bhairathi Ranagal Review: ರಣಗಲ್ ಸಾಮ್ರಾಜ್ಯವನ್ನು ಪೂರ್ತಿಯಾಗಿ ಆವರಿಸಿಕೊಂಡ ಶಿವಣ್ಣ

ಸಿನಿಮಾ: ಭೈರತಿ ರಣಗಲ್. ನಿರ್ಮಾಣ: ಗೀತಾ ಶಿವರಾಜ್​ಕುಮಾರ್​. ನಿರ್ದೇಶನ: ನರ್ತನ್. ಪಾತ್ರವರ್ಗ: ಶಿವರಾಜ್​ಕುಮಾರ್​, ರುಕ್ಮಿಣಿ ವಸಂತ್, ಅವಿನಾಶ್, ರಾಹುಲ್ ಬೋಸ್, ಛಾಯಾ ಸಿಂಗ್, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು. ಸ್ಟಾರ್: 3/5

2017ರಲ್ಲಿ ‘ಮಫ್ತಿ’ ಸಿನಿಮಾ ಬಿಡುಗಡೆಯಾಗಿ ಹಿಟ್​ ಆಗಿತ್ತು. ಆ ಸಿನಿಮಾಗೆ ನಿರ್ದೇಶನ ಮಾಡಿದ್ದ ನರ್ತನ್ ಅವರು ಭೈರತಿ ರಣಗಲ್ ಎಂಬ ಪಾತ್ರವನ್ನು ಕಟ್ಟಿಕೊಟ್ಟ ರೀತಿ ಎಲ್ಲರಿಗೂ ಇಷ್ಟ ಆಗಿತ್ತು. ಶಿವರಾಜ್​ಕುಮಾರ್​ ಅವರು ಭೈರತಿ ರಣಗಲ್ ಪಾತ್ರದಲ್ಲಿ ಕಾಣಿಸಿಕೊಂಡ ರೀತಿಗೆ ಫ್ಯಾನ್ಸ್ ಫಿದಾ ಆಗಿದ್ದರು. ಹಾಗಾಗಿ ಆ ಪಾತ್ರವನ್ನೇ ಹೈಲೈಟ್​ ಮಾಡಿ ‘ಭೈರತಿ ರಣಗಲ್’ ಸಿನಿಮಾ ಮಾಡಿದ್ದಾರೆ ನರ್ತನ್​. ಈ ಬಾರಿ ಸಿನಿಮಾವನ್ನು ಪೂರ್ತಿಯಾಗಿ ಆ ಪಾತ್ರವೇ ಆವರಿಸಿಕೊಂಡಿದೆ. ‘ಮಫ್ತಿ’ ನೋಡಿ ಇಷ್ಟಪಟ್ಟಿದ್ದ ಪ್ರೇಕ್ಷಕರಿಗೆ ‘ಭೈರತಿ ರಣಗಲ್’ ಇಷ್ಟ ಆಗುತ್ತಾ? ಈ ವಿಮರ್ಶೆ ಓದಿ..

ಭೈರತಿ ರಣಗಲ್ ಪಾತ್ರವನ್ನು ಮಫ್ತಿ ಸಿನಿಮಾದಲ್ಲಿ ತೋರಿಸಿದ್ದ ರೀತಿ ಭಿನ್ನವಾಗಿತ್ತು. ಆರಂಭದಲ್ಲಿ ಡಾರ್ಕ್​ ಶೇಡ್ ಇದ್ದ ಆ ಪಾತ್ರ ನಂತರದಲ್ಲಿ ಬೇರೆ ರೀತಿ ಕಾಣಿಸಿಕೊಂಡಿತ್ತು. ಆದರೂ ಕೂಡ ಆ ಪಾತ್ರದ ಪೂರ್ಣ ಹಿನ್ನೆಲೆ ಏನು ಎಂಬುದು ಪ್ರೇಕ್ಷಕರಿಗೆ ತಿಳಿದಿರಲಿಲ್ಲ. ಆ ಹಿನ್ನೆಲೆಯ ಬಗ್ಗೆ ಹೇಳಬಹುದಾದ ಕಥೆ ಇನ್ನೂ ಬಾಕಿ ಇದೆ ಎಂಬ ಕಾರಣದಿಂದ ‘ಭೈರತಿ ರಣಗಲ್’ ಸಿನಿಮಾ ಸಿದ್ಧವಾಗಿದೆ.

ಸಾವಿರಾರು ಜನರ ಪಾಲಿಗೆ ದೇವರಾಗಿರುವ ಭೈರತಿ ರಣಗಲ್ ಈ ಮೊದಲು ಏನಾಗಿದ್ದ? ಆತನ ಬಾಲ್ಯ ಹೇಗಿತ್ತು? ಡಾನ್​ ರೀತಿ ಆತ ಬೆಳೆದು ನಿಂತಿದ್ದು ಹೇಗೆ? ಅವನ ಪರ್ಸನಲ್ ಲೈಫ್ ಯಾವ ರೀತಿ ಇತ್ತು ಎಂಬಿತ್ಯಾದಿ ವಿವರಗಳನ್ನು ‘ಭೈರತಿ ರಣಗಲ್’ ಸಿನಿಮಾದಲ್ಲಿ ಪೂರ್ತಿಯಾಗಿ ತೋರಿಸಲಾಗಿದೆ. ‘ಮಫ್ತಿ’ ಸಿನಿಮಾದ ಪ್ರೀಕ್ವೆಲ್​ ಆಗಿ ಮೂಡಿಬಂದಿರುವ ‘ಭೈರತಿ ರಣಗಲ್’ ಚಿತ್ರದಲ್ಲಿ ‘ಮಫ್ತಿ’ಯ ಫ್ಲೇವರ್​ ಕಾಣಿಸುವುದು ದ್ವಿತೀಯಾರ್ಧದಲ್ಲಿ ಮಾತ್ರ. ಮೊದಲಾರ್ಧದ ಬಹುಭಾಗ ಶಿವರಾಜ್​ಕುಮಾರ್​ ಅವರು ಲಾಯರ್​ ಗೆಟಪ್​ನಲ್ಲಿ ಕಾಣಿಸಿಕೊಂಡಿದ್ದಾರೆ.

ಮಫ್ತಿ ಸಿನಿಮಾದಲ್ಲಿ ಅಂಡರ್​ವರ್ಲ್ಡ್​ ಕಥೆಯ ಜೊತೆಗೆ ಅಣ್ಣ-ತಂಗಿ ಸೆಂಟಿಮೆಂಟ್​ ಕೂಡ ಹೈಲೈಟ್ ಆಗಿತ್ತು. ಆದರೆ ‘ಭೈರತಿ ರಣಗಲ್’ ಚಿತ್ರದಲ್ಲಿ ತಂಗಿ ಪಾತ್ರ (ಛಾಯಾ ಸಿಂಗ್) ಕಾಣಿಸಿಕೊಳ್ಳುವುದು ಕೆಲವು ದೃಶ್ಯಗಳಲ್ಲಿ ಮಾತ್ರ. ಅದೇ ರೀತಿ, ಹೀರೋಯಿನ್ (ರುಕ್ಮಿಣಿ ವಸಂತ್) ಪಾತ್ರಕ್ಕೂ ಕಡಿಮೆ ಸ್ಕ್ರೀನ್​ಸ್ಪೇಸ್​ ಸಿಕ್ಕಿದೆ. ಮಧು ಗುರುಸ್ವಾಮಿ ಅವರಂತಹ ನಟರಿಂದ ಪ್ರೇಕ್ಷಕರು ಹೆಚ್ಚು ನಿರೀಕ್ಷಿಸುತ್ತಾರೆ. ಆದರೆ ಅವರು ಸಹ ಹೆಚ್ಚು ಮುನ್ನೆಲೆಗೆ ಬಂದಿಲ್ಲ. ತಮಗೆ ಸಿಕ್ಕ ಪಾತ್ರವನ್ನು ಗೋಪಾಲಕೃಷ್ಣ ದೇಶಪಾಂಡೆ ಚೆನ್ನಾಗಿ ಉಪಯೋಗಿಸಿಕೊಂಡಿದ್ದಾರೆ.

ಇದನ್ನೂ ಓದಿ: Review: ಸೂಪರ್ ಹೀರೋ ಆದ ಶ್ರೀಮುರಳಿ; ‘ಬಘೀರ’ ಚಿತ್ರದಲ್ಲಿ ಬ್ಯಾಟ್​ಮ್ಯಾನ್ ರೀತಿಯ ಕಥೆ

ಸಿನಿಮಾದ ಕಥೆ ತುಂಬ ನಿಧಾನವಾಗಿ ತೆರೆದುಕೊಳ್ಳುತ್ತದೆ. ಕಥೆ ಮುಂದೆ ಸಾಗುವುದು ಕೂಡ ನಿಧಾನಗತಿಯಲ್ಲಿ. ಹಾಗಾಗಿ ಕೊಂಚ ತಾಳ್ಮೆಯಿಂದ ಈ ಸಿನಿಮಾವನ್ನು ನೋಡಬೇಕು. ಒಟ್ಟಾರೆ ಕಥೆಯಲ್ಲಿ ತುಂಬ ಹೊಸತನ ಕಾಣಿಸದು. ಬಡವರ ಮೇಲೆ ಶ್ರೀಮಂತ ವಿಲನ್ ದಬ್ಬಾಳಿಕೆ ಮಾಡುತ್ತಾನೆ. ಬಡವರಿಗೆ ನ್ಯಾಯ ಕೊಡಿಸಲು ಹೀರೋ ಫೈಟ್ ಮಾಡುತ್ತಾನೆ. ಇಷ್ಟು ಸಿಂಪಲ್ ಆದಂತಹ ಕಥೆ ಈ ಸಿನಿಮಾದಲ್ಲಿ ಇದೆ. ಒಂದಷ್ಟು ಖಡಕ್ ಡೈಲಾಗ್​ಗಳು, ಶಿವರಾಜ್​ಕುಮಾರ್​ ಅವರ ಉತ್ತಮವಾದ ನಟನೆ, ಶಬೀರ್, ರಾಹುಲ್ ಬೋಸ್ ಅವರಂತಹ ಖಳನಟರ ಕಾಂಬಿನೇಷನ್​ನಿಂದಾಗಿ ಈ ಚಿತ್ರಕ್ಕೆ ಒಂದು ಫೋರ್ಸ್​ ಬಂದಿದೆ. ಆ್ಯಕ್ಷನ್​ ಬಯಸುವವರಿಗೆ ಈ ಸಿನಿಮಾದಲ್ಲಿ ಮನರಂಜನೆ ಇದೆ.

ಇದನ್ನೂ ಓದಿ: ಅದ್ದೂರಿಯಾಗಿ ರಿಲೀಸ್ ಆಯ್ತು ‘ಭೈರತಿ ರಣಗಲ್’; ಫಸ್ಟ್ ಹಾಫ್​ನಲ್ಲಿ ಏನೆಲ್ಲ ಇದೆ?

ನರ್ತನ್​ ಅವರು ಈ ಸಿನಿಮಾವನ್ನು ಅದ್ದೂರಿಯಾಗಿ ಕಟ್ಟಿಕೊಟ್ಟಿದ್ದಾರೆ. ತಾಂತ್ರಿಕವಾಗಿ ಎಲ್ಲಿಯೂ ಅವರು ರಾಜಿ ಆಗಿಲ್ಲ. ‘ಕಾವಲಿಗ..’, ‘ಭೈರತಿ ರಣಗಲ್..’ ಹಾಡುಗಳು ಹಾಗೂ ಹಿನ್ನೆಲೆ ಸಂಗೀತದ ಮೂಲಕ ರವಿ ಬಸ್ರೂರು ಅವರು ಚಿತ್ರದ ಬಲ ಹೆಚ್ಚಿಸಿದ್ದಾರೆ. ನವೀನ್ ಕುಮಾರ್​ ಅವರ ಛಾಯಾಗ್ರಹಣ ಕೂಡ ಚೆನ್ನಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.