ಸಸ್ಪೆನ್ಸ್ ಥ್ರಿಲ್ಲರ್ ಜೊತೆ ಟ್ವಿಸ್ಟ್ ಬೆರೆತ ‘ಹಿರಣ್ಯ’: ಮಾಸ್ ಮನರಂಜನೆ ನೀಡುವ ರಾಜವರ್ಧನ್

ಸಿನಿಮಾ: ಹಿರಣ್ಯ. ನಿರ್ಮಾಣ: ವಿಘ್ನೇಶ್ವರ ಗೌಡ, ವಿಜಯ್ ಗೌಡ ಬಿದರಹಳ್ಳಿ. ನಿರ್ದೇಶನ: ಪ್ರವೀಣ್​ ಅವ್ಯುಕ್ತ್. ಪಾತ್ರವರ್ಗ: ರಾಜವರ್ಧನ್​, ದಿವ್ಯಾ ಸುರೇಶ್​, ದಿಲೀಪ್​ ಆರ್​. ಶೆಟ್ಟಿ, ಅರವಿಂದ್​ ರಾವ್, ರಿಹಾನಾ ಮುಂತಾದವರು. ಸ್ಟಾರ್​ 3/5

ನಟ ರಾಜವರ್ಧನ್​ ಅವರು ಸಂಪೂರ್ಣ ಮಾಸ್​ ಅವತಾರದಲ್ಲಿ ಕಾಣಿಸಿಕೊಂಡಿರುವ ‘ಹಿರಣ್ಯ’ ಸಿನಿಮಾ ಬಿಡುಗಡೆ ಆಗಿದೆ. ಈ ಚಿತ್ರಕ್ಕೆ ಪ್ರವೀಣ್​ ಅವ್ಯುಕ್ತ್ ಅವರು ನಿರ್ದೇಶನ ಮಾಡಿದ್ದಾರೆ. ಒಂದು ಸಸ್ಪೆನ್ಸ್​-ಥ್ರಿಲ್ಲರ್​ ಕಹಾನಿಯನ್ನು ಅವರು ಈ ಸಿನಿಮಾದಲ್ಲಿ ಹೇಳಿದ್ದಾರೆ. ಮಾಸ್​ ಪ್ರೇಕ್ಷಕರ ಜೊತೆಗೆ ಫ್ಯಾಮಿಲಿ ಮಂದಿಗೂ ಇಷ್ಟವಾಗಬಹುದಾಗ ಕಹಾನಿ ಈ ಸಿನಿಮಾದಲ್ಲಿದೆ. ಸಿನಿಮಾ ಹೇಗಿದೆ ಅಂತ ತಿಳಿಯಲು ಈ ವಿಮರ್ಶೆ ಓದಿ.

‘ಹಿರಣ್ಯ’ ಸಿನಿಮಾದಲ್ಲಿ ಒಂದು ಸಸ್ಪೆನ್ಸ್​ ಕಥೆ ಇದೆ. ಸುಪಾರಿ ಕಿಲ್ಲರ್​ ಆಗಿರುವ ವ್ಯಕ್ತಿಯೇ ಈ ಸಿನಿಮಾದ ಹೀರೋ! ಆ ಪಾತ್ರಕ್ಕೆ ರಾಜವರ್ಧನ್​ ಅವರು ಬಣ್ಣ ಹಚ್ಚಿದ್ದಾರೆ. ಡೀಲ್​ ಕೊಟ್ಟರೆ ಸಾಕು, ಮುಲಾಜಿಲ್ಲದೇ ಕೊಲೆ ಮಾಡುವುದು ಈತನ ಕಸುಬು. ಮಕ್ಕಳು, ಮಹಿಳೆಯರು ಎಂಬ ವ್ಯತ್ಯಾಸ ಇಲ್ಲದೇ ಹತ್ಯೆ ಮಾಡುತ್ತಿದ್ದ ಇಂಥ ವ್ಯಕ್ತಿಯ ಬದುಕಿನಲ್ಲಿ ಒಂದು ಮಗು ಪ್ರವೇಶ ಆಗುತ್ತದೆ. ಅದು ಆತನೇ ಕಿಡ್ಯಾಪ್​ ಮಾಡಿರುವ ಮಗು. ಆ ಮಗುವಿನ ಕಾರಣದಿಂದ ಆತನ ಜೀವನ ನಿಧಾನವಾಗಿ ಬದಲಾಗುತ್ತಾ ಸಾಗುತ್ತವೆ. ಏನೂ ಅರಿಯದ ಪುಟ್ಟ ಮಗುವನ್ನು ಕಿಡ್ಯಾಪ್​ ಮಾಡಿ ಸಾಯಿಸಲು ಸುಪಾರಿ ಕೊಟ್ಟಿದ್ದು ಯಾರು? ಮಗುವನ್ನು ಉಳಿಸಿಕೊಳ್ಳಲು ಹೀರೋ ಮಾಡುವ ಕಸರತ್ತುಗಳೇನು? ರಕ್ಷಕರ ರೂಪದಲ್ಲಿ ಇರುವ ರಾಕ್ಷಸರು ಯಾರು? ಅಂತಿಮವಾಗಿ ಮಗು ಉಳಿಯುತ್ತೋ ಇಲ್ಲವೋ ಎಂಬುದು ತಿಳಿಯಲು ಪೂರ್ತಿ ಸಿನಿಮಾ ನೋಡಬೇಕು.

ನಟ ರಾಜವರ್ಧನ್​ ಅವರಿಗೆ ಈ ಸಿನಿಮಾ ಹೇಳಿ ಮಾಡಿಸಿದಂತಿದೆ. ಹೊಡೆಬಡಿ ದೃಶ್ಯಗಳಲ್ಲಿ ಅವರು ಮಿಂಚಿದ್ದಾರೆ. ಅಗತ್ಯಕ್ಕೆ ತಕ್ಕಷ್ಟು ಮಾಸ್​ ಡೈಲಾಗ್​ಗಳನ್ನು ಹೊಡೆಯುತ್ತಾ, ಇನ್ನುಳಿದ ದೃಶ್ಯಗಳಲ್ಲಿ ಮೌನವಾಗಿಯೇ ನಟಿಸುತ್ತಾ ಅವರು ಇಡೀ ಸಿನಿಮಾದಲ್ಲಿ ಹೆಚ್ಚಿನ ಸ್ಕ್ರೀನ್​ ಸ್ಪೇಸ್​ ಪಡೆದುಕೊಂಡಿದ್ದಾರೆ. ನೆಗೆಟಿವ್​ ಶೇಡ್​ ಇರುವ ಹೀರೋ ಪಾತ್ರವನ್ನು ಅವರು ಚೆನ್ನಾಗಿ ನಿಭಾಯಿಸಿದ್ದಾರೆ.

‘ಬಿಗ್​ ಬಾಸ್​’ ಖ್ಯಾತಿಯ ನಟಿ ದಿವ್ಯಾ ಸುರೇಶ್ ಅವರು ‘ಹಿರಣ್ಯ’ ಸಿನಿಮಾದಲ್ಲಿ ರಾಜವರ್ಧನ್​ಗೆ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಐಟಂ ಡ್ಯಾನ್ಸ್​ ಮೂಲಕ ಅವರ ಎಂಟ್ರಿ ಆಗುತ್ತದೆ. ಒಂದು ಬೋಲ್ಡ್​ ಪಾತ್ರವನ್ನೇ ಅವರು ನಿಭಾಯಿಸಿದ್ದಾರೆ. ಕೆಲವೇ ಹೊತ್ತುಗಳ ಕಾಲ ಅವರು ತೆರೆ ಮೇಲೆ ಕಾಣಿಸಿಕೊಂಡರೂ ಕೂಡ ಕಥೆಗೆ ಒಂದು ಟ್ವಿಸ್ಟ್​ ನೀಡುವಂತಹ ಪಾತ್ರವೇ ಅವರಿಗೆ ಸಿಕ್ಕಿದೆ. ನಟಿ ರಿಹಾನಾ ಕೂಡ ಗಮನಾರ್ಹವಾಗಿ ನಟಿಸಿದ್ದಾರೆ. ಕಾಲೇಜು ಹುಡುಗಿಯ ಪಾತ್ರದಲ್ಲಿ ಲವಲವಿಕೆಯಿಂದ ಕಾಣಿಸಿಕೊಂಡ ರಿಹಾನಾ ಅವರು ನಂತರ, ಮಗುವನ್ನು ಕಳೆದುಕೊಂಡ ತಾಯಿಯಾಗಿ ಗಮನ ಸೆಳೆಯುತ್ತಾರೆ.

‘ಹಿರಣ್ಯ’ ಚಿತ್ರದಲ್ಲಿ ರಾಜವರ್ಧನ್, ರಿಹಾನಾ, ದಿವ್ಯಾ ಸುರೇಶ್ ಜೊತೆ ದಿಲೀಪ್​ ಆರ್​. ಶೆಟ್ಟಿ ಅವರು ಕೂಡ ಹೈಲೈಟ್​ ಆಗಿದ್ದಾರೆ. ಅವರ ನಟನೆಗೆ ಈ ಸಿನಿಮಾದಲ್ಲಿ ಸಾಕಷ್ಟು ಸ್ಕೋಪ್​ ಸಿಕ್ಕಿದೆ. ಮೂರು ಶೇಡ್​ ಇರುವ ಪಾತ್ರವನ್ನು ಅವರು ಉತ್ತಮವಾಗಿ ನಿಭಾಯಿಸಿದ್ದಾರೆ. ಆರಂಭದಲ್ಲಿ ಎಲೆಮರೆಯ ಕಾಯಿಯಂತೆ ಇರುವ ಅವರ ಪಾತ್ರಕ್ಕೆ ದ್ವಿತೀಯಾರ್ಥದಲ್ಲಿ ಪ್ರಾಮುಖ್ಯತೆ ದೊರಕಿದೆ.

ಇದನ್ನೂ ಓದಿ: ಶ್ರೀಮಂತರ ಮಕ್ಕಳ ಕಾಟ, ಚಂದನ್​ ಶೆಟ್ಟಿ ಪಾಠ: ಇದು ಟಾಸ್ಕ್​ಗಳ ಸುಳಿಗೆ ಸಿಕ್ಕ ಸಿನಿಮಾ

ಅಪಹರಣಕ್ಕೆ ಒಳಗಾದ ಮಗು ಕೂಡ ಇಡೀ ಸಿನಿಮಾದಲ್ಲಿ ಒಂದು ಮುಖ್ಯ ಪಾತ್ರದ ರೀತಿ ಸಾಗುತ್ತದೆ. ಆ ಸೆಂಟಿಮೆಂಟ್​ನ ಕಾರಣಕ್ಕೆ ಫ್ಯಾಮಿಲಿ ಪ್ರೇಕ್ಷಕರಿಗೆ ಈ ಸಿನಿಮಾ ಹಿಡಿಸುತ್ತದೆ. ಆ್ಯಕ್ಷನ್​ ಬಯಸುವ ಮಾಸ್​ ಪ್ರೇಕ್ಷಕರನ್ನು ಕೂಡ ‘ಹಿರಣ್ಯ’ ಚಿತ್ರ ರಂಜಿಸುತ್ತದೆ. ಆದರೆ ಸಿನಿಮಾದಲ್ಲಿನ ಕೆಲವು ಸನ್ನಿವೇಶಗಳಲ್ಲಿ ಲಾಜಿಕ್​ ಮಾಯವಾಗಿದೆ. ಒಟ್ಟಾರೆ ಕಥೆ ಅಷ್ಟೇನೂ ಹೊಸದಾಗಿಲ್ಲ. ಇಂಥ ಕೆಲವು ಮೈನಸ್​ ಅಂಶಗಳ ನಡುವೆಯೂ ನೋಡಿಸಿಕೊಂಡು ಹೋಗುವ ಗುಣ ಈ ಚಿತ್ರಕ್ಕಿದೆ. ಕಾಮಿಡಿ ದೃಶ್ಯಗಳಿಂದ ಈ ಸಿನಿಮಾಗೆ ಹೆಚ್ಚೇನೂ ಉಪಯೋಗ ಆಗಿಲ್ಲ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ