ಅಮೆಜಾನ್​ನಿಂದ ಉಚಿತ ಮೊಬೈಲ್ ಡಾಟಾ: ಭಾರತಕ್ಕೆ ಯಾವಾಗ?

ವಿಶ್ವದ ಅತ್ಯಂತ ಮೌಲ್ಯಯುತ ಸಂಸ್ಥೆಗಳಲ್ಲಿ ಒಂದು ಅಮೆಜಾನ್ (Amazon). ಪುಸ್ತಕ ಮಳಿಗೆಯಾಗಿ ಪ್ರಾರಂಭವಾದ ಅಮೆಜಾನ್ ಇಂದು ವಿಶ್ವದ ನಂಬರ್ 1 ಆನ್​ಲೈನ್ ಮಳಿಗೆ. ಜೊತೆಗೆ ಇನ್ನೂ ಹಲವು ಉದ್ದಿಮೆಗಳಲ್ಲಿ ಅಮೆಜಾನ್ ತನ್ನನ್ನು ತೊಡಗಿಸಿಕೊಂಡಿದೆ. ಅದರಲ್ಲಿ ಪ್ರಮುಖವಾದುದು ಅಮೆಜಾನ್​ನ ವಿಡಿಯೋ ಸ್ಟ್ರೀಮಿಂಗ್ ವೇದಿಕೆ. ಅಮೆಜಾನ್ ಪ್ರೈಮ್ ವಿಡಿಯೋ ಸಹ ಅಮೆಜಾನ್ ಶಾಪಿಂಗ್ ಸೈಟ್​ನಂತೆಯೇ ವಿಶ್ವದ ಹಲವು ದೇಶಗಳಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಬಹುತೇಕ ಇಂಟರ್ನೆಂಟ್ ಆಧರಿತ ಬ್ಯುಸಿನೆಸ್ ಅನ್ನೇ ಹೊಂದಿರುವ ಅಮೆಜಾನ್ ಇದೀಗ ತನ್ನ ಗ್ರಾಹಕರಿಗೆ ಉಚಿತವಾಗಿ ಇಂಟರ್ನೆಂಟ್ ಸೌಲಭ್ಯ (Internet) ಒದಗಿಸಲು ಮುಂದಾಗಿದೆ.

ಅಮೆರಿಕದಲ್ಲಿ ಮೊದಲಿಗೆ ಈ ಉಚಿತ ಅಥವಾ ಅತ್ಯಂತ ಕಡಿಮೆ ಬೆಲೆಗೆ ಇಂಟರ್ನೆಟ್ ಅನ್ನು ಒದಗಿಸಲು ಅಮೆಜಾನ್ ಮುಂದಾಗಿದೆ. ಅಮೆರಿಕದ ಜನಪ್ರಿಯ ಮೊಬೈಲ್ ನೆಟ್​ವರ್ಕ್ ಸೇವಾ ಸಂಸ್ಥೆಯಾಗಿರುವ ವೆರಿಜಾನ್ ಕಮ್ಯೂನಿಕೇಶನ್​ ಜೊತೆಗೆ ಈ ಬಗ್ಗೆ ಅಮೆಜಾನ್ ಮಾತುಕತೆ ನಡೆಸುತ್ತಿದೆ. ದೇಶದಲ್ಲಿರುವ ಎಲ್ಲ ಮೊಬೈಲ್ ಬಳಕೆದಾರರಿಗೂ ಅತ್ಯಂತ ಕಡಿಮೆ ದರದಲ್ಲಿ ಅಥವಾ ಉಚಿತವಾಗಿ ಇಂಟರ್ನೆಟ್ ಒದಗಿಸುವ ಬಗ್ಗೆ ಈ ಚರ್ಚೆ ನಡೆಯುತ್ತಿದೆ.

ಅಮೆರಿಕದ ಮೊಬೈಲ್ ಬಳಕೆದಾರರಿಗೆ ಕೇವಲ 10 ಡಾಲರ್ ಪ್ರತಿತಿಂಗಳ ಬೆಲೆಗೆ ಅಥವಾ ಸಂಪೂರ್ಣ ಉಚಿತವಾಗಿ ಮೊಬೈಲ್ ನೆಟ್​ವರ್ಕ್ ಸೇವೆಗಳನ್ನು ಒದಗಿಸುವುದು ಅಮೆಜಾನ್ ಗುರಿಯಾಗಿದೆ. ಪ್ರಸ್ತುತ ಅಮೆರಿಕದಲ್ಲಿ ಮೊಬೈಲ್ ನೆಟ್​ವರ್ಕ್ ಸೇವೆಗಳ ಶುಲ್ಕ ತಿಂಗಳಿಗೆ 50 ಡಾಲರ್​ನಿಂದ ಪ್ರಾರಂಭವಾಗುತ್ತವೆ, 100 ಡಾಲರ್ ವರೆಗೆ ಹೋಗುತ್ತವೆ. ಅಮೆಜಾನ್ ಈಗ ಮಾತುಕತೆ ನಡೆಸುತ್ತಿರುವ ವೆರಿಜಾನ್ ಕಮ್ಯೂನಿಕೇಶನ್​ ಬಳಕೆದಾರರು ತಿಂಗಳಿಗೆ 70 ಡಾಲರ್ ವ್ಯಯಿಸಿ ನೆಟ್​ವರ್ಕ್ ಸೇವೆಗಳನ್ನು ಪಡೆಯುತ್ತಿದ್ದಾರೆ.

ಅಮೆಜಾನ್​ಗೆ ಭಾರತದಲ್ಲಿಯೂ ದೊಡ್ಡ ಸಂಖ್ಯೆಯ ಗ್ರಾಹಕರಿದ್ದಾರೆ. ಒಂದೊಮ್ಮೆ ಅಮೆರಿಕದಲ್ಲಿ ಅಮೆಜಾನ್​ನ ಉಚಿತ ನೆಟ್​ವರ್ಕ್ ಸೇವೆ ಸಫಲವಾದರೆ ಭಾರತದಲ್ಲಿಯೂ ಅದನ್ನು ಪ್ರಯೋಗಿಸುವುದು ಪಕ್ಕಾ. ಒಂದೊಮ್ಮೆ ಉಚಿತವಾಗಿ ಮೊಬೈಲ್ ಸೇವೆಗಳನ್ನು ಅಮೆಜಾನ್ ನೀಡಿದ್ದೇ ಆದಲ್ಲಿ, ಅದರ ಲಾಭವೂ ಅಮೆಜಾನ್ ಶಾಪಿಂಗ್ ಕಾರ್ಟ್ ಹಾಗೂ ಅಮೆಜಾನ್ ಪ್ರೈಂ ವಿಡಿಯೋಗೆ ಆಗಲಿದೆ. ಆದರೆ ಮೊಬೈಲ್ ಡಾಟಾ ಉಚಿತವಾಗಿ ಕೊಟ್ಟು ಅಮೆಜಾನ್​ನಲ್ಲಿ ಸಿನಿಮಾ ನೋಡಲು ಹೆಚ್ಚಿನ ಮೊತ್ತವನ್ನು ವಸೂಲಿ ಮಾಡುವ ಸಾಧ್ಯತೆ ಇದೆ.

ಈಗಾಗಲೇ ಅಮೆಜಾನ್​ನಲ್ಲಿ ಕೆಲವು ಸಿನಿಮಾಗಳನ್ನು ಹೆಚ್ಚುವರಿ ಹಣ ಕೊಟ್ಟು ನೋಡಬೇಕಿದೆ. ಹೆಚ್ಚುವರಿ ಹಣ ಕೊಡದೇ ಸಿನಿಮಾ ನೋಡಬೇಕೆಂದರೆ ಅದಕ್ಕೆ ಹೆಚ್ಚುವರಿ ಹಣವನ್ನು ನೀಡಬೇಕಾಗುತ್ತದೆ. ಅದರ ಜೊತೆಗೆ ಅಮೆಜಾನ್​ ಪ್ರೈಂನ ವಾರ್ಷಿಕ ಚಂದಾದಾರಿಕೆ ಪಡೆಯಲು ಭಾರತದಲ್ಲಿ 1500 ರುಪಾಯಿ ಕೊಡಬೇಕಿದೆ. ಇನ್ನು ಮುಂದೆ ಈ ವೆಚ್ಚ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ