ಶಾರುಖ್ ಖಾನ್ ಪುತ್ರಿಯ ಬಗ್ಗೆ ಕರಣ್ ಜೋಹರ್ ಮಾತು

ಶಾರುಖ್ ಖಾನ್ (Shah Rukh Khan) ಪುತ್ರಿ ಸುಹಾನಾ ಖಾನ್ ಚಿತ್ರರಂಗಕ್ಕೆ ಕಾಲಿಟ್ಟಿದ್ದಾರೆ. ಸುಹಾನಾ ನಟಿಸಿರುವ ‘ದಿ ಆರ್ಚೀಸ್’ ಸಿನಿಮಾ ಡಿಸೆಂಬರ್ 7ಕ್ಕೆ ನೆಟ್​ಫ್ಲಿಕ್ಸ್​ನಲ್ಲಿ ಬಿಡುಗಡೆ ಆಗಲಿದೆ. ಸಿನಿಮಾದ ಪ್ರೀಮಿಯರ್ ಶೋ ಡಿಸೆಂಬರ್ 5ರ ರಾತ್ರಿ ಮುಂಬೈನಲ್ಲಿ ಅದ್ಧೂರಿಯಾಗಿ ನೆರವೇರಿದೆ. ಪ್ರೀಮಿಯರ್​ ಶೋಗೆ ಶಾರುಖ್ ಖಾನ್ ಕುಟುಂಬ, ಅಮಿತಾಬ್ ಬಚ್ಚನ್ ಕುಟುಂಬ ಸೇರಿದಂತೆ ಇನ್ನೂ ಹಲವು ಬಾಲಿವುಡ್ ಗಣ್ಯರು ಭಾಗವಹಿಸಿದ್ದರು. ಪ್ರೀಮಿಯರ್​ನಲ್ಲಿ ಭಾಗವಹಿಸಿದ್ದ ಕರಣ್ ಜೋಹರ್ ಸಿನಿಮಾ ನೋಡಿ, ವಿಶೇಷವಾಗಿ ಸುಹಾನಾ ಖಾನ್​ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ.

‘‘ಹವಾಮಾನ ಬದಲಾವಣೆ ಬಗ್ಗೆ ಅಲ್ಪಸಂಖ್ಯಾತರ ಬಗ್ಗೆ ದನಿ ಮತ್ತು ಅನ್ಯಾಯದ ವಿರುದ್ಧ ದಂಗೆ ಏಳುವ ವಿಷಯಗಳನ್ನು ಬಹಳ ಚೆನ್ನಾಗಿ ಆರ್ಚಿಸ್ ಸಿನಿಮಾದಲ್ಲಿ ತೋರಿಸಿದ್ದಾರೆ. ಸಿನಿಮಾದಲ್ಲಿ ಬಳಸಲಾಗಿರುವ ಜಾಜ್ ಮಾದರಿಯ ಸಂಗೀತವನ್ನು ಮೈ ಝುಮ್ಮೆನಿಸುತ್ತದೆ. ಸಿನಿಮಾ ನೋಡುತ್ತಾ-ನೋಡುತ್ತಾ ನಾನು ಚಿಕ್ಕವನಾದಂತೆ ಭಾಸವಾಯ್ತು, ಸಿನಿಮಾದ ಆ ಏಳು ಮಂದಿಯ ಜೊತೆಗೆ ಸ್ನೇಹ ಬೆಳೆಸಬೇಕು ಅನ್ನಿಸಿತು. ಸಿನಿಮಾ ನೋಡುತ್ತಾ ನೋಡುತ್ತಾ ನಾನು ಸಮಯದಲ್ಲಿ ಹಿಂದೆ ಹೋದಂತೆನಿಸಿತು. ನನ್ನ ಬಾಲ್ಯದ, ಯೌವ್ವನದ ದಿನಗಳು ನೆನಪಾದವು’’ ಎಂದರು.

ಸಿನಿಮಾದಲ್ಲಿ ನಟಿಸಿರುವ ಸ್ಟಾರ್ ಕಿಡ್​ಗಳ ಬಗ್ಗೆ ಮಾತನಾಡಿದ ಕರಣ್ ‘‘ಬಚ್ಚನ್ ಮೊಮ್ಮಗ ಅಗಸ್ತ್ಯ ನಂದ ಅದ್ಭುತವಾಗಿ ನಟಿಸಿದ್ದಾರೆ. ಆತನನ್ನು ತೆರೆಯ ಮೇಲೆ ನೋಡಿದ ಕೂಡಲೇ ಇಷ್ಟವಾಗಿ ಹೋದ. ಸಂಕೀರ್ಣವಾದ ಪಾತ್ರದಲ್ಲಿ ಸಹ ಆತನ ನಟನೆ ಇಷ್ಟವಾಗುತ್ತದೆ. ಮಿಹಿರ್ ಅಹುಜಾ ಕಾಮಿಕ್ ಟೈಮಿಂಗ್ ಅತ್ಯದ್ಭುತ. ಖುಷಿ ಕಪೂರ್ ನಟನೆಯಂತೂ ನನ್ನ ಹೃದಯವನ್ನೇ ಒಡೆಯುವಂತೆ ಮಾಡಿತು’’ ಎಂದಿದ್ದಾರೆ.

ಇದನ್ನೂ ಓದಿ:‘ಡಂಕಿ’ ಎಂದರೇನು? ಅರ್ಥ ತಿಳಿಸಿದ ಶಾರುಖ್ ಖಾನ್

ಇನ್ನು ಶಾರುಖ್ ಖಾನ್ ಪುತ್ರಿ ಸುಹಾನಾ ಖಾನ್​ ಬಗ್ಗೆ ಮಾತನಾಡಿದ ಕರಣ್, ‘‘ವೆರೊನಿಕಾ ಪಾತ್ರದಲ್ಲಿ ನಟಿಸಿರುವ ಸುಹಾನಾ ನಟನೆ ಅತ್ಯದ್ಭುತ. ಹಲವು ಭಾವನೆಗಳನ್ನು ಅವರು ಸುಲಭವಾಗಿ ಹೊಮ್ಮಿಸಿದ್ದಾರೆ. ಅನುಭವಿ ನಟಿಯಂತೆ ಸುಹಾನಾ ನಟಿಸಿದ್ದಾರೆ. ಡ್ಯಾನ್ಸ್ ಇರಲಿ, ಕಾಮಿಡಿ, ಸ್ಟೈಲ್, ನಟನೆ, ಭಾವುಕ ಸನ್ನಿವೇಶ ಎಲ್ಲದರಲ್ಲೂ ಸುಹಾನಾ ಅದ್ಭುತವಾಗಿ ನಟಿಸಿದ್ದಾರೆ. ಆಕೆ ಬಾಲಿವುಡ್​ಗೆ ಬಂದಿರುವುದು ಸುಮ್ಮನೆ ಇರಲು ಅಲ್ಲ, ಬಾಲಿವುಡ್ ಅನ್ನು ಆಳಲು’’ ಎಂದಿದ್ದಾರೆ ಕರಣ್ ಜೋಹರ್.

‘ದಿ ಆರ್ಚೀಸ್’ ಸಿನಿಮಾವು ‘ಆರ್ಚೀಸ್’ ಕಾಮಿಕ್ ಪುಸ್ತಕವನ್ನು ಆಧರಿಸಿ ಮಾಡಿರುವ ಸಿನಿಮಾ ಆಗಿದೆ. ಸಿನಿಮಾವನ್ನು ಬಾಲಿವುಡ್​ನ ಪ್ರತಿಭಾವಂತ ನಿರ್ದೇಶಕಿ ಝೋಯಾ ಅಖ್ತರ್ ನಿರ್ದೇಶನ ಮಾಡಿದ್ದಾರೆ. ಸಿನಿಮಾದಲ್ಲಿ ಬಾಲಿವುಡ್​ನ ಸ್ಟಾರ್ ನಟರ ಮಕ್ಕಳು, ಮೊಮ್ಮಕಳು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅಮಿತಾಬ್ ಬಚ್ಚನ್ ಮೊಮ್ಮಗ ಅಗಸ್ತ್ಯ ನಂದ, ಶಾರುಖ್ ಖಾನ್ ಪುತ್ರಿ ಸುಹಾನಾ ಖಾನ್, ಬೋನಿ ಕಪೂರ್-ಶ್ರೀದೇವಿ ಎರಡನೇ ಪುತ್ರಿ ಖುಷಿ ಕಪೂರ್ ಇನ್ನೂ ಕೆಲವರು ನಟಿಸಿದ್ದಾರೆ. ಸಿನಿಮಾ ಡಿಸೆಂಬರ್ 7ಕ್ಕೆ ನೆಟ್​ಫ್ಲಿಕ್ಸ್​ನಲ್ಲಿ ನೇರವಾಗಿ ಬಿಡುಗಡೆ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ