ಒಟಿಟಿಗೆ ಬಂತು ‘ಸಿಂಗಂ ಅಗೇನ್’; ಚಂದಾದಾರರೂ ದುಡ್ಡು ಕೊಟ್ಟು ನೋಡಬೇಕು

ವರ್ಷಾಂತ್ಯ ಸಮೀಪಿಸಿದೆ. ಅನೇಕರು ಕ್ರಿಸ್​ಮಸ್​ ರಜೆಯನ್ನು ಸವಿಯಲು ಆರಂಭಿಸಿದ್ದಾರೆ. ಜೊತೆಗೆ ವೀಕೆಂಡ್​ ಕೂಡ ಇರುವುದರಿಂದ ಮನರಂಜನೆಗೆ ಏನಾದರೂ ಬೇಕೇಬೇಕು. ಮನೆಯಲ್ಲೇ ಮನರಂಜನೆ ಬೇಕು ಎನ್ನುವವರಿಗೆ ಒಟಿಟಿಯೇ ಮೊದಲ ಆಯ್ಕೆ. ಒಟಿಟಿಯಲ್ಲಿ ಹೊಸದಾಗಿ ಏನು ನೋಡೋದು ಎಂಬ ಪ್ರಶ್ನೆಗೆ ಉತ್ತರ ‘ಸಿಂಗಂ ಅಗೇನ್’ ಸಿನಿಮಾ. ಅಜಯ್ ದೇವಗನ್, ಕರೀನಾ ಕಪೂರ್​ ಮುಂತಾದವರು ನಟಿಸಿದ ಈ ಸಿನಿಮಾ ಈಗ ಒಟಿಟಿಯಲ್ಲಿ ವೀಕ್ಷಣೆಗೆ ಲಭ್ಯವಾಗಿದೆ. ರೋಹಿತ್ ಶೆಟ್ಟಿ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ರೆಂಟ್​ ಪಡೆಯುವ ಮೂಲಕ ಈ ಸಿನಿಮಾವನ್ನು ‘ಅಮೇಜಾನ್ ಪ್ರೈಂ ವಿಡಿಯೋ’ದಲ್ಲಿ ನೋಡಬಹುದು.

‘ಸಿಂಗಂ ಅಗೇನ್’ ಸಿನಿಮಾ ಬಿಡುಗಡೆ ಆಗಿದ್ದು ನವೆಂಬರ್​ 1ರಂದು. ಭಾರತದ ಬಾಕ್ಸ್ ಆಫೀಸ್​ನಲ್ಲಿ ಈ ಸಿನಿಮಾ 268 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಈ ಸಿನಿಮಾದಲ್ಲಿ ಬಹುತಾರಾಗಣ ಇದೆ. ಅಜಯ್ ದೇವಗನ್, ಕರೀನಾ ಕಪೂರ್​, ದೀಪಿಕಾ ಪಡುಕೋಣೆ, ಅರ್ಜುನ್ ಕಪೂರ್​, ಟೈಗರ್​ ಶ್ರಾಫ್​, ಅಕ್ಷಯ್​ ಕುಮಾರ್​, ರಣವೀರ್​ ಸಿಂಗ್ ಮುಂತಾದವರು ನಟಿಸಿದ್ದಾರೆ.

ತಾರಾಗಣಕ್ಕೆ ಹೋಲಿಸಿದರೆ ‘ಸಿಂಗಂ ಅಗೇನ್’ ಮಾಡಿದ ಕಲೆಕ್ಷನ್​ ತೀರಾ ಕಡಿಮೆ ಎನ್ನಬಹುದು. ಮಾಮೂಲಿ ಕಮರ್ಷಿಯಲ್ ಸಿನಿಮಾದ ಸಿದ್ಧ ಸೂತ್ರಗಳನ್ನು ಬಳಸಿ ನಿರ್ದೇಶಕ ರೋಹಿತ್ ಶೆಟ್ಟಿ ಅವರು ಈ ಸಿನಿಮಾ ಮಾಡಿದ್ದಾರೆ ಎಂಬ ಕಾರಣದಿಂದ ಅನೇಕರು ಚಿತ್ರಮಂದಿರದಲ್ಲಿ ಇದನ್ನು ನೋಡಲು ಇಷ್ಟಪಡಲಿಲ್ಲ. ಈಗ ಒಟಿಟಿಯಲ್ಲಿ ಪ್ರೇಕ್ಷಕರು ಯಾವ ರೀತಿ ಪ್ರತಿಕ್ರಿಯೆ ನೀಡುತ್ತಾರೆ ಎಂಬುದನ್ನು ನೋಡಬೇಕು.

ಇದನ್ನೂ ಓದಿ: ‘ಭೂಲ್​ ಭುಲಯ್ಯ 3’ vs ‘ಸಿಂಗಂ ಅಗೇನ್’; ಎರಡೂ ಚಿತ್ರಕ್ಕೆ ಮೊದಲ ದಿನ ಅಬ್ಬರದ ಗಳಿಕೆ

‘ಸಿಂಗಂ ಅಗೇನ್’ ಸಿನಿಮಾದ ಒಟಿಟಿ ಪ್ರಸಾರ ಹಕ್ಕುಗಳನ್ನು ‘ಅಮೇಜಾನ್ ಪ್ರೈಂ ವಿಡಿಯೋ’ ಪಡೆದುಕೊಂಡಿದೆ. ಚಂದಾದಾರರು ಕೂಡ ಸದ್ಯಕ್ಕೆ 499 ರೂಪಾಯಿಗೆ ರೆಂಟ್ ಪಡೆಯುವ ಮೂಲಕ ಸಿನಿಮಾ ವೀಕ್ಷಿಸಬಹುದು. ಅರ್ಜುನ್ ಕಪೂರ್​ ಅವರು ಈ ಚಿತ್ರದಲ್ಲಿ ವಿಲನ್ ಆಗಿ ಕಾಣಿಸಿಕೊಂಡಿದ್ದಾರೆ. ರಾಮಾಯಣದ ಥೀಮ್​ನಲ್ಲಿ ‘ಸಿಂಗಂ ಅಗೇನ್’ ಕಥೆಯನ್ನು ಹೇಳಲಾಗಿದೆ. ಈ ಸಿನಿಮಾದ ಮೇಲೆ ನಿರೀಕ್ಷೆ ಜಾಸ್ತಿ ಇತ್ತು. ಆದರೆ ಬಾಕ್ಸ್ ಆಫೀಸ್​ನಲ್ಲಿ ನಿರೀಕ್ಷಿತ ಪ್ರಮಾಣದ ಕಲೆಕ್ಷನ್ ಆಗಲಿಲ್ಲ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.