ತೆಲುಗಿನ ಟಾಪ್ ಟಾಕ್ ಶೋ ಮತ್ತೆ ಪ್ರಾರಂಭ: ಈ ಬಾರಿ ಅತಿಥಿಗಳ್ಯಾರು?

ತೆಲುಗು ಚಿತ್ರರಂಗದಲ್ಲಿ ಬ್ಲಾಕ್ ಬಸ್ಟರ್ ಹಿಟ್ ಆಗಿರುವ ಟಾಕ್ ಶೋ ಎಂದರೆ ಅದು ‘ಅನ್​ಸ್ಟಾಪೆಬಲ್ ವಿತ್ ಬಾಲಕೃಷ್ಣ’. ಆಹಾ ಒಟಿಟಿಯಲ್ಲಿ ಪ್ರಸಾರವಾಗುವ ಈ ಶೋ ಒಂದರಿಂದಲೇ ಒಟಿಟಿ ಲಾಭದಲ್ಲಿದೆ ಎಂದರೆ ತಪ್ಪಾಗಲಾರದು. ನಂದಮೂರಿ ಬಾಲಕೃಷ್ಣ ತಮ್ಮದೇ ಆದ ರಗಡ್ ಸ್ಟೈಲ್​ನಲ್ಲಿ ಈ ಶೋ ನಡೆಸಿಕೊಂಡು ಬರುತ್ತಿದ್ದಾರೆ. ಯಾವ ಟಿವಿ ಚಾನೆಲ್, ಯೂಟ್ಯೂಬ್ ಚಾನೆಲ್​ಗಳ ಕೈಗೂ ಸಿಕ್ಕದ ತೆಲುಗು ಚಿತ್ರರಂಗದ ಟಾಪ್ ಸ್ಟಾರ್​ಗಳು ಸಹ ಬಾಲಯ್ಯ ಕರೆದರೆ ಸಾಕು ಓಡೋಡಿ ಈ ಶೋಗೆ ಬರುತ್ತಾರೆ. ಬಾಲಯ್ಯ ಅಂತೂ ಯಾವುದೇ ಮುಲಾಜಿಲ್ಲದೆ ಪ್ರಶ್ನೆಗಳನ್ನು ಕೇಳಿ ಅತಿಥಿಗಳನ್ನು ಇಕ್ಕಟ್ಟಿಗೆ ಸಿಲುಕಿಸಿ ಉತ್ತರ ಹೊರತೆಗೆಯುತ್ತಾರೆ.

ಕಳೆದ ಸೀಸನ್​ನಲ್ಲಿ ಬಾಲಿವುಡ್ ಸ್ಟಾರ್​ ನಟ ರಣ್​ಬೀರ್ ಕಪೂರ್, ಪವನ್ ಕಲ್ಯಾಣ್, ಸಿಎಂ ಚಂದ್ರಬಾಬು ನಾಯ್ಡು, ಮಹೇಶ್ ಬಾಬು, ಅಲ್ಲು ಅರ್ಜುನ್, ನಿರ್ಮಾಪಕ ಸುರೇಶ್, ಕೀರವಾಣಿ, ಬ್ರಹ್ಮಾನಂದಂ ಇನ್ನೂ ಹಲವಾರು ಟಾಪ್ ತಾರೆಯರು ಈ ಶೋಗೆ ಆಗಮಿಸಿದ್ದರು. ಪ್ರಭಾಸ್, ಅಲ್ಲು ಅರ್ಜುನ್, ಮಹೇಶ್ ಬಾಬು ಅವರುಗಳು ದೊಡ್ಡ ದೊಡ್ಡ ಟಿವಿ ಚಾನೆಲ್​ಗಳ ಕೈಗೆ ಸಿಗುವುದಿಲ್ಲ ಆದರೆ ಬಾಲಯ್ಯ ಶೋಗೆ ಖುದ್ದಾಗಿ ಬಂದು ಸಂದರ್ಶನ ನೀಡಿದ್ದರು.

ಇದನ್ನೂ ಓದಿ:ನಂದಮೂರಿ ಬಾಲಕೃಷ್ಣಗೆ ಇಲ್ಲ ಸಚಿವ ಸ್ಥಾನ, ಅಭಿಮಾನಿಗಳ ಬೇಸರ

ಈಗ ಅನ್​ಸ್ಟಾಪಬಲ್ ವಿತ್ ಬಾಲಯ್ಯ ಸೀಸನ್ 4 ಪ್ರಾರಂಭ ಆಗಲಿದೆ. ಆಹಾ ಒಟಿಟಿ ಈಗಾಗಲೇ ಮೊದಲ ಪ್ರೋಮೋ ಬಿಡುಗಡೆ ಮಾಡಿದೆ. ಆದರೆ ಇದರಲ್ಲಿ ಅತಿಥಿಗಳ ಬಗ್ಗೆ ಯಾವುದೇ ಮಾಹಿತಿ ಬಿಟ್ಟುಕೊಡಲಾಗಿಲ್ಲ. ಆದರೆ ಮೂಲಗಳ ಪ್ರಕಾರ, ಈ ಬಾರಿಯ ಸೀಸನ್​ನ ಮೊದಲ ಅತಿಥಿ ಮೆಗಾಸ್ಟಾರ್ ಚಿರಂಜೀವಿ ಆಗಿರಲಿದ್ದಾರೆ ಎನ್ನಲಾಗುತ್ತಿದೆ. ಚಿರಂಜೀವಿ ಹಾಗೂ ಬಾಲಯ್ಯ ನಡುವೆ ದಶಕಗಳ ಕಾಲ ಸ್ಪರ್ಧೆ-ಪ್ರತಿಸ್ಪರ್ಧೆ ಇದ್ದರೂ ಸಹ ಇಬ್ಬರೂ ಒಳ್ಳೆಯ ಗೆಳೆಯರೇ ಹಾಗಾಗಿ ಗೆಳೆಯನನ್ನು ಮೊದಲ ಸೀಸನ್​ಗೆ ಕರೆತರಲು ಬಾಲಯ್ಯ ಸಜ್ಜಾಗಿದ್ದಾರೆ.

ಮಾತ್ರವೇ ಅಲ್ಲದೆ ಈ ಬಾರಿ ‘ಪುಷ್ಪ 2’ ಬಿಡುಗಡೆ ಸಹ ಇರುವ ಕಾರಣ, ಅಲ್ಲು ಅರ್ಜುನ್ ಮತ್ತು ಸುಕುಮಾರ್ ಸಹ ಬರಲಿದ್ದಾರಂತೆ. ಹಾಗೆಯೇ ರಾಜಮೌಳಿ-ಮಹೇಶ್ ಬಾಬು, ಸಮಂತಾ ಈ ವರೆಗೂ ಅನ್​ಸ್ಟಾಪೆಬಲ್ ಶೋಗೆ ಬಂದಿಲ್ಲ ಹಾಗಾಗಿ ಸಮಂತಾ ಬರುವ ಸಾಧ್ಯತೆ ಇದೆ. ಶ್ರೀಲೀಲಾ ಸಹ ಬರಲಿದ್ದಾರೆ. ಇನ್ನೊಂದು ವಿಶೇಷವೆಂದರೆ ಹೀರೋ ಆಗಲು ಮುಂದಾಗಿರುವ ಬಾಲಯ್ಯ ಅವರ ಪುತ್ರ ಮೋಕ್ಷಜ್ಞ ಸಹ ಟಾಕ್ ಶೋಗೆ ಬರಲಿದ್ದಾರೆ. ಇನ್ನೂ ಕೆಲವು ಬಾಲಿವುಡ್ ತಾರೆಯರು ಸಹ ಈ ಶೋಗೆ ಆಗಮಿಸಲಿದ್ದಾರೆ ಎನ್ನಲಾಗುತ್ತಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ