ಬೆಟ್ಟಿಂಗ್ ಆಪ್ ಪ್ರಕರಣ: ವಿಡಿಯೋ ಮೂಲಕ ಉತ್ತರ ಕೊಟ್ಟ ಪ್ರಕಾಶ್ ರೈ
Prakash Raj: ನಟರಾದ ರಾಣಾ ದಗ್ಗುಬಾಟಿ, ವಿಜಯ್ ದೇವರಕೊಂಡ, ಪ್ರಣಿತಾ ಸುಭಾಷ್, ಮಂಚು ಲಕ್ಷ್ಮಿ, ಪ್ರಕಾಶ್ ರೈ ಇನ್ನೂ ಹಲವಾರು ನಟರ ವಿರುದ್ಧ ಬೆಟ್ಟಿಂಗ್ ಆಪ್ ಪ್ರಚಾರದ ಪ್ರಕರಣ ದಾಖಲಿಸಲಾಗಿದೆ. ಇದೀಗ ನಟ ಪ್ರಕಾಶ್ ರೈ, ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದು, ಬೆಟ್ಟಿಂಗ್ ಆಪ್ ಪ್ರಚಾರ ಪ್ರಕರಣದ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ.
Updated on:Mar 20, 2025 | 7:48 PM
ತೆಲುಗು ಚಿತ್ರರಂಗದ (Tollywood) ಹಲವು ಖ್ಯಾತ ನಟ-ನಟಿಯರ ವಿರುದ್ಧ ಹೈದರಾಬಾದ್ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಬೆಟ್ಟಿಂಗ್ ಆಪ್ನ ಪ್ರಚಾರ ಮಾಡಿದ್ದಾರೆಂದು ಸುಮಾರು 25 ಸಿನಿಮಾ ಮತ್ತು ಸಾಮಾಜಿಕ ಜಾಲತಾಣ ಸೆಲೆಬ್ರಿಟಿಗಳ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಸ್ಟಾರ್ ನಟರಾದ ರಾಣಾ ದಗ್ಗುಬಾಟಿ, ವಿಜಯ್ ದೇವರಕೊಂಡ, ಪ್ರಣಿತಾ ಸುಭಾಷ್, ಮಂಚು ಲಕ್ಷ್ಮಿ ಇನ್ನೂ ಹಲವು ಜನಪ್ರಿಯ ಸಿನಿಮಾ ನಟ, ನಟಿಯರ ವಿರುದ್ಧ ಪ್ರಕರಣ ದಾಖಲಾಗಿದೆ. ನಟ ಪ್ರಕಾಶ್ ರೈ ವಿರುದ್ಧವೂ ದೂರು ದಾಖಲಾಗಿದೆ. ಇದೀಗ ಪ್ರಕಾಶ್ ರೈ, ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಹಂಚಿಕೊಂಡಿದ್ದು ಸ್ಪಷ್ಟನೆ ನೀಡಿದ್ದಾರೆ.
‘ಸಾಮಾಜಿಕ ಜಾಲತಾಣಗಳ ಮೂಲಕ ನನಗೆ ಬೆಟ್ಟಿಂಗ್ ಆಪ್ ವಿಷಯ ನನಗೆ ತಿಳಿಯಿತು. ನನಗೆ ಪೊಲೀಸರಿಂದ ಈ ವರೆಗೆ ಯಾವುದೇ ನೋಟೀಸ್ ನನಗೆ ದೊರೆತಿಲ್ಲ. ಆದರೆ ನಾನು ಎಲ್ಲರಿಗೂ ಪ್ರಶ್ನೆಗಳನ್ನು ಕೇಳುತ್ತಿರುತ್ತೇನೆ, ಹಾಗಾಗಿ ಇಂಥಹಾ ಆರೋಪಗಳು ಬಂದಾಗ ಅದಕ್ಕೆ ಉತ್ತರಿಸುವುದು ನನ್ನ ಕರ್ತವ್ಯ ಅನಿಸಿದ ಕಾರಣ ಈ ಸ್ಪಷ್ಟನೆ ನೀಡುತ್ತಿದ್ದೇನೆ’ ಎಂದು ಹೇಳಿ ವಿಷಯದ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. ‘ನಾನು 2016 ರಲ್ಲಿ ಬೆಟ್ಟಿಂಗ್ ಅಪ್ಲಿಕೇಶನ್ ಆಗಿರುವ ಜಂಗ್ಲಿ ರಮ್ಮಿ ಅವರ ಜಾಹೀರಾತಿನಲ್ಲಿ ನಟಿಸಿದ್ದೆ. ಆಗ ಅದು ಕಾನೂನು ಬದ್ಧವಾಗಿತ್ತು. ಆದರೆ ಆ ಜಾಹೀರಾತಿನಲ್ಲಿ ನಟಿಸಿದ ಕೆಲ ತಿಂಗಳ ಬಳಿಕ ನನಗೆ ನಾನು ಮಾಡಿದ್ದು ಸರಿಯಲ್ಲ ಎನಿಸಿತು’ ಎಂದಿದ್ದಾರೆ ಪ್ರಕಾಶ್ ರೈ.
My response 🙏🏿🙏🏿🙏🏿 #SayNoToBettingAps #justasking pic.twitter.com/TErKkUb6ls
— Prakash Raj (@prakashraaj) March 20, 2025
‘ಆ ಬಳಿಕ ಆ ಕಂಪೆನಿಯವರು ನನ್ನ ಕಾಂಟ್ರಾಕ್ಟ್ ರಿನೀವಲ್ ಮಾಡಿಸಲು ಬಂದಾಗ ನಾನು ಸ್ಪಷ್ಟವಾಗಿ ನಿರಾಕರಿಸಿದೆ ಮಾತ್ರವಲ್ಲದೆ, ನನಗೆ ಇದು ಸರಿಬರುತ್ತಿಲ್ಲ. ಇಂಥಹಾ ಜಾಹೀರಾತುಗಳಲ್ಲಿ ನಾನು ನಟಿಸುವುದಿಲ್ಲ ಎಂದಿದ್ದೆ. ಆದರೆ 2021 ರಲ್ಲಿ ಬಹುಷಃ ಆ ಕಂಪೆನಿಯನ್ನು ಬೇರೊಬ್ಬರು ಖರೀದಿ ಮಾಡಿದರು. ಹೊಸ ಮಾಲೀಕರು ನಾನು ನಟಿಸಿದ್ದ ಜಾಹೀರಾತನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಬಳಸಿದ್ದನ್ನು ಗಮನಿಸಿ ಅವರಿಗೆ ನೊಟೀಸ್ ಸಹ ಕಳಿಸಿದ್ದೆ. ಆ ನಂತರ ಅವರು ಅದನ್ನು ಹಿಂಪಡೆದುಕೊಂಡಿದ್ದರು’ ಎಂದಿದ್ದಾರೆ ಪ್ರಕಾಶ್ ರೈ.
ಒಂಬತ್ತು ವರ್ಷಗಳ ಹಿಂದೆ ಬೆಟ್ಟಿಂಗ್ ಜಾಹೀರಾತಿನಲ್ಲಿ ನಟಿಸಿದ್ದ ನಾನು ಆ ನಂತರ ಪ್ರಜ್ಞಾಪೂರ್ವಕವಾಗಿ ಅಂಥಹಾ ಜಾಹೀರಾತುಗಳಲ್ಲಿ ನಟಿಸಿಲ್ಲ. ಆ ಬಳಿಕವೂ ಅಂಥಹವೇ ಹಲವು ಜಾಹೀರಾತುಗಳು ನನಗೆ ಬಂದಿದ್ದವು ಆದರೆ ನಾನು ಅವುಗಳಿಂದ ದೂರವೇ ಉಳಿದಿದ್ದೆ. ಕಾನೂನು ಬದ್ಧ ಆಗಿರಲಿ, ಆಗದೇ ಇರಲಿ ಜೂಜು ಸರಿಯಲ್ಲ. ಯುವಕರು ಇಂಥಹಾ ದುಷ್ಚಟಗಳಿಗೆ ಬಲಿ ಆಗಬಾರದು ಎಂಬುದೇ ನನ್ನ ಮನವಿ. ನಾನು ಒಂಬತ್ತು ವರ್ಷಗಳ ಹಿಂದೆ ಮಾಡಿದ್ದ ತಪ್ಪನ್ನು ಕ್ಷಮಿಸುತ್ತೀರೆಂದು ನಂಬುತ್ತೇನೆ, ಕ್ಷಮೆ ಇರಲಿ’ ಎಂದಿದ್ದಾರೆ ಪ್ರಕಾಶ್ ರೈ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:47 pm, Thu, 20 March 25
