ರಾಖಿ ಸಾವಂತ್​ಗೆ ಪಾಠ ಕಲಿಸಿ, ಪ್ರಾಮಿಸ್​ ಮಾಡಿದ್ದ ಸಲ್ಲು; ಎಲ್ಲವನ್ನೂ ಬಾಯ್ಬಿಟ್ಟ ನಟಿ

ತಮ್ಮ ನೇರ ನಡೆ-ನುಡಿಯ ಕಾರಣಕ್ಕೆ ಹೆಸರಾದವರು ನಟಿ ರಾಖಿ ಸಾವಂತ್​. ಅವರು ಮಾಡಿದ್ದು ಕೆಲವೇ ಕೆಲವು ಸಿನಿಮಾಗಳಾದರೂ ಅವರ ಖ್ಯಾತಿ ದೇಶಾದ್ಯಂತ ಹಬ್ಬಿದೆ. ಕಿರುತೆರೆ ರಿಯಾಲಿಟಿ ಶೋಗಳ ಮೂಲಕ ಅವರು ಹೆಚ್ಚು ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ರಾಖಿ ಬದುಕಿನಲ್ಲಿ ನಟ ಸಲ್ಮಾನ್​ ಖಾನ್​ ಅವರ ಪಾತ್ರ ದೊಡ್ಡದು. ಆ ಬಗ್ಗೆ ಈಗ ರಾಖಿ ಬಾಯಿ ಬಿಟ್ಟಿದ್ದಾರೆ. ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಕೆಲವು ವಿಚಾರಗಳನ್ನು ಅವರು ಹೇಳಿಕೊಂಡಿದ್ದಾರೆ. ‘ನನ್ನ ಮನೆಯವರೂ ಕಲಿಸದ ಪಾಠವನ್ನು ನನಗೆ ಸಲ್ಮಾನ್​ ಖಾನ್​ ಕಲಿಸಿದ್ದಾರೆ’ ಎಂದು ಅವರು ಹೇಳಿದ್ದಾರೆ.

‘ನಾನು ಮೊದಲು ತುಂಬ ನೇರವಾಗಿ ಮಾತನಾಡುತ್ತಿದ್ದೆ. ಬಿಗ್​ ಬಾಸ್​ಗೆ ತೆರಳಿದಾಗ ಸಲ್ಮಾನ್​ ಖಾನ್​ ನನ್ನನ್ನು ಸುಧಾರಿಸಿದರು. ಶೋನಲ್ಲಿ ಕೆಟ್ಟ ಭಾಷೆ ಬಳಸಬಾರದು ಮತ್ತು ಬಿಗ್​ ಬಾಸ್​ನಿಂದ ಹೊರಗೆ ಹೋದ ಬಳಿಕವೂ ಕೆಟ್ಟ ಪದಗಳಲ್ಲಿ ಹೇಳಿಕೆ ನೀಡಬಾರದು ಅಂತ ಹೇಳಿದ್ದರು. ಅಲ್ಲದೆ, ನನ್ನ ಎಲ್ಲ ವಿಡಿಯೋಗಳನ್ನು ತಾವು ನೋಡುವುದಾಗಿ ನನಗೆ ಅವರು ಪ್ರಾಮಿಸ್​ ಮಾಡಿದ್ದಾರೆ’ ಎಂದು ರಾಖಿ ಹೇಳಿದ್ದಾರೆ.

‘ನೀನು ಏನೇ ಮಾಡಿದರೂ ನಾನು ಗಮನಿಸುತ್ತಾ ಇರುತ್ತೇನೆ. ಬಿಗ್​ ಬಾಸ್​ನಿಂದ ಹೊರಹೋದ ಬಳಿಕ ನಿನ್ನಲ್ಲಿ ನಾನು ದೊಡ್ಡ ಬದಲಾವಣೆ ನೋಡಲು ಬಯಸುತ್ತೇನೆ. ಬರೀ ಅದು ಇದು ಮಾತನಾಡಿಕೊಂಡು ಕಾಲ ಕಳೆಯುವ ಬದಲು, ನೀನು ಚೆನ್ನಾಗಿ ಕೆಲಸ ಮಾಡುತ್ತಿರುವುದನ್ನು ನೋಡಲು ನಾನು ಇಷ್ಟಪಡುತ್ತೇನೆ’ ಎಂದು ಸಲ್ಮಾನ್​ ಖಾನ್​ ಅವರು ರಾಖಿಗೆ ಬುದ್ಧಿಹೇಳಿ ಕಳಿಸಿದ್ದರಂತೆ. ಅದಕ್ಕೆ ತಕ್ಕಂತೆಯೇ ತಾವು ನಡೆದುಕೊಳ್ಳುತ್ತಿರುವುದಾಗಿ ರಾಖಿ ಸಾವಂತ್​ ಹೇಳಿದ್ದಾರೆ.

ಬರೀ ಬಾಯಿಮಾತಿನಲ್ಲಿ ಭರವಸೆ ನೀಡಿ ಕಳಿಸದೇ, ರಾಖಿ ಸಾವಂತ್​ ಅವರ ಫ್ಯಾಮಿಲಿಗೆ ಕಷ್ಟ ಬಂದಾಗ ಸಲ್ಲು ಸಹಾಯ ಮಾಡಿದ್ದಾರೆ ಕೂಡ. ‘ಸಲ್ಮಾನ್​ ಭಾಯ್​ ನನ್ನ ತಾಯಿಯನ್ನು ಉಳಿಸಿದರು. ಈ ಜೀವನದಲ್ಲಿ ತಾಯಿ ಬಿಟ್ಟರೆ ನನಗೆ ಏನೂ ಬೇಡ’ ಎಂದು ಈ ಹಿಂದೆ ಮಾಧ್ಯಮಗಳಿಗೆ ಹೇಳಿಕೆ ನೀಡುವಾಗ ರಾಖಿ ತುಂಬಾ ಎಮೋಷನಲ್​ ಆಗಿದ್ದರು.

ಹಿಂದಿ ಬಿಗ್​ ಬಾಸ್​ 14ನೇ ಸೀಸನ್​ನಲ್ಲಿ ಚಾಲೆಂಜರ್​ ಆಗಿ ರಾಖಿ ಸಾವಂತ್​ ಅವರು ದೊಡ್ಮನೆ ಪ್ರವೇಶಿಸಿದ್ದರು. ತಮ್ಮದೇ ಆದ ಮ್ಯಾನರಿಸಂ ಮೂಲಕ ಅವರು ಅಪಾರ ಅಭಿಮಾನಿಗಳನ್ನು ಸಂಪಾದಿಸಿದ್ದರು. ಫಿನಾಲೆವರೆಗೂ ಅವರು ಇತರೆ ಸ್ಪರ್ಧಿಗಳಿಗೆ ಪೈಪೋಟಿ ನೀಡಿದ್ದರು ಎಂಬುದು ಗಮನಿಸಬೇಕಾದ ವಿಚಾರ. ಈಗ ಸೋಶಿಯಲ್​ ಮೀಡಿಯಾದಲ್ಲಿ ಅವರು ಹೆಚ್ಚು ಆ್ಯಕ್ಟೀವ್​ ಆಗಿದ್ದಾರೆ.

ಇದನ್ನೂ ಓದಿ: Rakhi Sawant: ವಿಚಿತ್ರ ಭಂಗಿ, ವಿಚಿತ್ರ ಬಟ್ಟೆ; ಹೀಗೂ ಯೋಗ ಮಾಡ್ತಾರಾ? ಟ್ರೋಲ್​ ಆದ ರಾಖಿ ಸಾವಂತ್​