Rashmika Mandanna: ವಿಜಯ್​ ದೇವರಕೊಂಡಗೆ ಆ ಒಂದು ಪದ ಬಳಸಿ ವಿಶ್​ ಮಾಡಿದ ರಶ್ಮಿಕಾ; ನೆಟ್ಟಿಗರಿಂದ ಹಿಗ್ಗಾಮುಗ್ಗಾ ಟ್ರೋಲ್​

ನಟಿ ರಶ್ಮಿಕಾ ಮಂದಣ್ಣ ಮತ್ತು ನಟ ವಿಜಯ್​ ದೇವರಕೊಂಡ ನಡುವೆ ಎಂಥ ಆಪ್ತತೆ ಇದೆ ಎಂಬುದನ್ನು ಹೊಸದಾಗಿ ಹೇಳಬೇಕಾದ ಅನಿವಾರ್ಯತೆ ಇಲ್ಲ. ಗೀತಾ ಗೋವಿಂದಂ ಮತ್ತು ಡಿಯರ್​ ಕಾಮ್ರೇಡ್ ಸಿನಿಮಾಗಳಲ್ಲಿ ಜೊತೆಯಾಗಿ ನಟಿಸಿದ ಬಳಿಕ ಇಬ್ಬರ ನಡುವಿನ ಒಡನಾಟ ಜೋರಾಯಿತು. ಮೇ 9ರಂದು ವಿಜಯ್​ ದೇವರಕೊಂಡ ಬರ್ತ್​ಡೇ. ಆದರೆ ಸರಿಯಾದ ಸಮಯಕ್ಕೆ ವಿಶ್​ ಮಾಡಲು ರಶ್ಮಿಕಾ ಮರೆತರು. ಕೊಂಚ ತಡವಾಗಿ ಟ್ವಿಟರ್ ಮೂಲಕ ಶುಭ ಕೋರಿದ ಅವರು ಒಂದು ತಪ್ಪು ಮಾಡಿದ್ದಾರೆ.

‘ಕ್ಷಮೆ ಇರಲಿ. ನಾನು ತಡ ಮಾಡಿದ್ದೇನೆ. ಹುಟ್ಟುಹಬ್ಬದ ಶುಭಾಶಯಗಳು ಸೂಪರ್​ ಸ್ಟಾರ್​ ವಿಜಯ್​ ದೇವರಕೊಂಡ’ ಎಂದು ರಶ್ಮಿಕಾ ಟ್ವೀಟ್​ ಮಾಡಿದ್ದಾರೆ. ಈ ಟ್ವೀಟ್​ನಲ್ಲಿ ಸೂಪರ್​ ಸ್ಟಾರ್​ ಎಂಬ ಪದ ಬಳಸಿರುವುದು ಹಲವರ ಕೋಪಕ್ಕೆ ಕಾರಣ ಆಗಿದೆ. ನಿನ್ನೆ ಮೊನ್ನೆ ಯಶಸ್ಸು ಕಂಡಿರುವ ವಿಜಯ್​ ದೇವರಕೊಂಡ ಅವರನ್ನು ಸೂಪರ್​ ಸ್ಟಾರ್​ ಎಂದು ಕರೆದಿರುವುದಕ್ಕೆ ಅನೇಕರು ವಿರೋಧ ವ್ಯಕ್ತಪಡಿಸಿದ್ದಾರೆ. ಸಿಕ್ಕ ಸಿಕ್ಕವರಿಗೆಲ್ಲ ಸೂಪರ್​ ಸ್ಟಾರ್​ ಎಂಬ ಪಟ್ಟ ನೀಡಲು ಅದೇನು ಸುಲಭಕ್ಕೆ ಸಿಗುವ ಟ್ಯಾಗ್​ ಅಲ್ಲ ಎಂದು ಜನರು ಕಮೆಂಟ್​ ಮಾಡಿದ್ದಾರೆ.

ರಜನಿಕಾಂತ್​ ಅವರಿಗೆ ಸೂಪರ್​ ಸ್ಟಾರ್​ ಎಂದು ಅಭಿಮಾನಿಗಳು ಪ್ರೀತಿಯಿಂದ ಕರೆಯುತ್ತಾರೆ. ಅದಕ್ಕೂ ಮುನ್ನ ಮಹೇಶ್​ ಬಾಬು ತಂದೆ ಕೃಷ್ಣ ಅವರಿಗೂ ಸೂಪರ್​ ಸ್ಟಾರ್​ ಎಂಬ ಬಿರುದು ಇತ್ತು. ಬಳಿಕ ಮಹೇಶ್​ ಬಾಬು ಅವರನ್ನು ಕೂಡ ಅಭಿಮಾನಿಗಳು ಸೂಪರ್​ ಸ್ಟಾರ್​ ಎಂದು ಕರೆಯಲು ಆರಂಭಿಸಿದರು. ಮಹೇಶ್​ ಬಾಬು ಸಿನಿಮಾಗಳು ತಮಿಳಿಗೆ ಡಬ್​ ಆದಾಗ ಅದರಲ್ಲಿ ಮಹೇಶ್​ ಬಾಬು ಅವರನ್ನು ಸೂಪರ್​ ಸ್ಟಾರ್​ ಎಂದು ಕರೆದಿದ್ದಕ್ಕೆ ರಜನಿಕಾಂತ್​ ಅಭಿಮಾನಿಗಳು ತೀವ್ರ ವಿರೋಧ ವ್ಯಕ್ತಪಡಿಸಿದ ಉದಾಹರಣೆ ಇದೆ. ಈಗ ವಿಜಯ್​ ದೇವರಕೊಂಡಗೆ ಸೂಪರ್​ಸ್ಟಾರ್​ ಎಂದಿರುವ ರಶ್ಮಿಕಾ ಕೂಡ ನೆಟ್ಟಿಗರ ಟ್ರೋಲ್​ಗೆ ಗುರಿ ಆಗುತ್ತಿದ್ದಾರೆ.

​ಸದ್ಯ ಈ ಬಗ್ಗೆ ರಶ್ಮಿಕಾ ಮಂದಣ್ಣ ಯಾವುದೇ ಪ್ರತಿಕ್ರಿಯೆ ನೀಡುವ ಗೋಜಿಗೆ ಕೈ ಹಾಕಿಲ್ಲ. ಬಹುಭಾಷೆಯ ಸಿನಿಮಾಗಳಲ್ಲಿ ಅವರು ಬ್ಯುಸಿ ಆಗಿದ್ದಾರೆ. ತೆಲುಗಿನಲ್ಲಿ ಪುಷ್ಪ, ಹಿಂದಿಯಲ್ಲಿ ಮಿಷನ್​ ಮಜ್ನು, ಗುಡ್​ ಬೈ ಸೇರಿದಂತೆ ಅನೇಕ ಸಿನಿಮಾಗಳು ಅವರ ಕೈಯಲ್ಲಿವೆ. ವಿಜಯ್​ ದೇವರಕೊಂಡ ಕೂಡ ಲೈಗರ್​ ಸಿನಿಮಾ ಮೂಲಕ ಬಾಲಿವುಡ್​ಗೆ ಕಾಲಿಡುತ್ತಿದ್ದಾರೆ.

ಇದನ್ನೂ ಓದಿ:

Rashmika Mandanna: ವಿಜಯ್​ ದೇವರಕೊಂಡ ಅಲ್ಲ; ಉಂಗುರ ತೋರಿಸಿ ಬಾಯ್​ಫ್ರೆಂಡ್​ ಯಾರು ಅಂತ ಹೇಳಿದ ರಶ್ಮಿಕಾ

Rashmika Mandanna: ಬಾಲಿವುಡ್​ ಸ್ಟಾರ್​ ನಟನ ಸಿನಿಮಾಗೆ ನೋ ಎಂದ ರಶ್ಮಿಕಾ; ಸ್ಪಷ್ಟನೆ ನೀಡಿದ ನಟಿ