Salman Khan: ರಾಧೆ ಚಿತ್ರಕ್ಕೆ 21 ಕಡೆ ಕತ್ತರಿ; ಸಲ್ಮಾನ್​ ಖಾನ್​ ಸಿನಿಮಾದಲ್ಲಿ ಅಂಥದ್ದೇನಿದೆ?

ಸಲ್ಮಾನ್​ ಖಾನ್​ ನಟನೆಯ ‘ರಾಧೆ: ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​’ ಸಿನಿಮಾ ಹತ್ತು ಹಲವು ಕಾರಣಗಳಿಗಾಗಿ ಸುದ್ದಿ ಮಾಡುತ್ತಿದೆ. ಇನ್ನೇನು ಕೆಲವೇ ದಿನಗಳಲ್ಲಿ, ಅಂದರೆ ಮೇ 13ರಂದು ಈ ಚಿತ್ರ ಬಿಡುಗಡೆ ಆಗಲಿದೆ. ಕೆಲವು ಚಿತ್ರಮಂದಿರ ಮತ್ತು ಓಟಿಟಿ ಪ್ಲಾಟ್​ಫಾರ್ಮ್​ಗಳಲ್ಲಿ ನೇರವಾಗಿ ರಾಧೆ ತೆರೆಕಾಣಲಿದೆ. ಬಿಡುಗಡೆಗೂ ಮುನ್ನ ಒಂದು ಅಚ್ಚರಿಯ ವಿಚಾರ ಹೊರಬಿದ್ದಿದೆ. ಚಿತ್ರಕ್ಕೆ ಸೆನ್ಸಾರ್​ ಪ್ರಕ್ರಿಯೆ ಮುಗಿದ ನಂತರವೂ ಬರೋಬ್ಬರಿ 21 ಕಡೆ ಕತ್ತರಿ ಹಾಕಲಾಗಿದೆ ಎಂಬ ಮಾಹಿತಿ ಕೇಳಿಬಂದಿದೆ.

ಸೆನ್ಸಾರ್​ ಮಂಡಳಿಯಿಂದ ಆಕ್ಷೇಪ ಎದುರಾದಾಗ ಚಿತ್ರತಂಡದವರು ತಮ್ಮ ಸಿನಿಮಾದ ದೃಶ್ಯಗಳಿಗೆ ಕತ್ತರಿ ಹಾಕುವುದು ಸಹಜ. ಆದರೆ ರಾಧೆ ವಿಚಾರದಲ್ಲಿ ಆಗಿರುವುದು ಬೇರೆ. ಸೆನ್ಸಾರ್​ನವರು ಏನೂ ಹೇಳದಿದ್ದರೂ ಕೂಡ ಚಿತ್ರತಂಡ 21 ಕಡೆಗಳಲ್ಲಿ ಕತ್ತರಿ ಪ್ರಯೋಗ ಮಾಡಿದೆ. ಈ ಬಗ್ಗೆ ತಂಡದಿಂದ ಯಾವುದೇ ಅಧಿಕೃತ ಹೇಳಿಕೆ ಹೊರಬಿದ್ದಿಲ್ಲವಾದರೂ ಬಿ-ಟೌನ್​ನಲ್ಲಿ ಸುದ್ದಿ ಹರಿದಾಡುತ್ತಿರುವುದು ನಿಜ.

ಅಷ್ಟಕ್ಕೂ ರಾಧೆ ತಂಡ ಯಾಕೆ ಇಂಥ ನಿರ್ಧಾರ ತೆಗೆದುಕೊಂಡಿದೆ? ಕಾರಣ ಇಷ್ಟೇ; ಈ ಸಿನಿಮಾ ಓಟಿಟಿ ಪ್ಲಾಟ್​ಫಾರ್ಮ್​ ಮತ್ತು ಡಿ2ಎಚ್​ ಸೇವೆಗಳ ಮೂಲಕ ಮನೆಮನೆಗೆ ತಲುಪಲಿದೆ. ಸಲ್ಮಾನ್​ ಖಾನ್​ ಅಭಿಮಾನಿಗಳು ಮನೆಯಲ್ಲಿ ಕುಟುಂಬ ಸಮೇತರಾಗಿ ಸಿನಿಮಾ ನೋಡಲಿದ್ದಾರೆ. ಅಂಥ ಪ್ರೇಕ್ಷಕರಿಗೆ ಮುಜುಗರ ಅಥವಾ ಕಿರಿಕಿರಿ ಆಗಬಾರದು ಎಂಬ ಕಾರಣಕ್ಕೆ ಹಲವು ಶಾಟ್​ಗಳನ್ನು ಕತ್ತರಿಸಲಾಗಿದೆ.

ಈ ಸಿನಿಮಾದಲ್ಲಿ ಡ್ರಗ್ಸ್​ ಪಿಡುಗಿನ ಕುರಿತು ಹೇಳಲಾಗಿದೆ. ಚಿಕ್ಕ ಹುಡುಗರು ಮಾದಕ ವಸ್ತು ಸೇವಿಸುತ್ತಿರುವ ಶಾಟ್​ಗೆ ಕತ್ತರಿ ಹಾಕಲಾಗಿದೆ. ಯಾಕೆಂದರೆ, ಈ ದೃಶ್ಯಗಳಿಂದ ಯುವ ಜನತೆ ಪ್ರೇರೇಪಿತರಾಗಬಾರದು ಎಂಬುದು ರಾಧೆ ತಂಡದ ಉದ್ದೇಶ. ಅಲ್ಲದೆ, ಕೆಲವು ಆ್ಯಕ್ಷನ್​ ದೃಶ್ಯಗಳನ್ನೂ ಕಟ್​ ಮಾಡಲಾಗಿದೆ. ಫ್ಯಾಮಿಲಿ ಪ್ರೇಕ್ಷಕರಿಗೆ ಅವುಗಳನ್ನು ನೋಡಲು ತುಂಬ ಕ್ರೂರ ಎನಿಸಬಹುದು ಎಂಬುದು ಚಿತ್ರತಂಡ ಅಭಿಪ್ರಾಯ. ಹಾಗಾಗಿ ಅವುಗಳನ್ನು ತೆಗೆಯಲಾಗಿದೆ.

ಈ ಎಲ್ಲ ಕತ್ತರಿ ಪ್ರಯೋಗ ಮಾಡಿದ ಮೇಲೆ ಚಿತ್ರದ ಅವಧಿ 114 ನಿಮಿಷ ಆಗಿದೆಯಂತೆ. ಆ ಮೂಲಕ ಇದು ಸಲ್ಮಾನ್​ ಖಾನ್ ವೃತ್ತಿಜೀವನದ ಇತಿಹಾಸದಲ್ಲೇ ಅತಿ ಚಿಕ್ಕ ಸಿನಿಮಾ ಎನಿಸಿಕೊಳ್ಳುತ್ತಿದೆ. ಇದರಲ್ಲಿ ಸಲ್ಲುಗೆ ಜೋಡಿಯಾಗಿ ದಿಶಾ ಪಠಾಣಿ ಅಭಿನಯಿಸಿದ್ದಾರೆ. ಪ್ರಭುದೇವ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ಜಾಕಿ ಶ್ರಾಫ್​, ರಣದೀಪ್​ ಹೂಡ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಇದನ್ನೂ ಓದಿ:

 Salman Khan: ಟೈಗರ್​ ಶ್ರಾಫ್​ ಪ್ರೇಯಸಿ ದಿಶಾಗೆ ಸಲ್ಮಾನ್​ ಕಿಸ್​ ಮಾಡಿದ್ದು ನಿಜ; ಆದರೆ ಇಲ್ಲಿದೆ ಟ್ವಿಸ್ಟ್​

Salman Khan: ಸಲ್ಮಾನ್​ ಖಾನ್​ ವಿರುದ್ಧ ತಿರುಗಿ ಬಿದ್ದ ಸುಶಾಂತ್ ಫ್ಯಾನ್ಸ್​; ‘ರಾಧೆ’ ಬಹಿಷ್ಕಾರ ಮಾಡಲು ಶಪಥ