‘ಒಂದು ದಿನ ನಾನೂ ಬೆಳೆಯುತ್ತೇನೆ, ಅಂದು ಇದೇ ಜನರು ಮಾತನಾಡಿಸುತ್ತಾರೆ’; ಯಶ್ ಹಳೆಯ ವಿಡಿಯೋ ವೈರಲ್

ಕನ್ನಡದ ‘ರಾಕಿಂಗ್ ಸ್ಟಾರ್’ ಯಶ್ (Yash) ಸೀರಿಯಲ್ ನಟನಾಗಿ ಚಿತ್ರರಂಗಕ್ಕೆ ಕಾಲಿಟ್ಟು, ಇಂದು ಜಾಗತಿಕ ಮಟ್ಟದಲ್ಲಿ ಅಬ್ಬರಿಸುತ್ತಿದ್ದಾರೆ. ಇದು ಅವರ ಪರಿಶ್ರಮ ಮತ್ತು ಆತ್ಮವಿಶ್ವಾಸಕ್ಕೆ ಅತ್ಯುತ್ತಮ ಉದಾಹರಣೆ. ಆರಂಭದ ದಿನಗಳಲ್ಲಿ ಯಾವುದೇ ಮಾಧ್ಯಮಗಳು ತಮ್ಮನ್ನು ಗಂಭೀರವಾಗಿ ಪರಿಗಣಿಸದಿದ್ದಾಗಲೂ, ತಮ್ಮ ಪ್ರತಿಭೆಯಿಂದಲೇ ಜಗತ್ತು ತಿರುಗಿ ನೋಡುವಂತೆ ಮಾಡುವುದಾಗಿ ಸ್ವತಃ ಯಶ್ ಅವರೇ ಅಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದರು.

ಯಶ್ ಅವರ ಆರಂಭಿಕ ದಿನಗಳ ಸಂದರ್ಶನವೊಂದರ ವೀಡಿಯೋ ತುಣುಕು ಈಗ ವೈರಲ್ ಆಗಿದ್ದು, ಅದರಲ್ಲಿ ಅವರು ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ. ಸೀರಿಯಲ್‌ಗಳಲ್ಲಿ ನಟಿಸುತ್ತಿದ್ದಾಗ ವಾಹಿನಿಯೊಂದರ ತಂಡವು ಸಂದರ್ಶನ ಮಾಡಲು ಬಂದಿತ್ತು. ಆದರೆ, ಇತರ ಎಲ್ಲ ಕಲಾವಿದರನ್ನು ಮಾತಾಡಿಸಿದ ಆ ತಂಡ ಯಶ್ ಅವರನ್ನು ಮಾತ್ರ ಮಾತಾಡಿಸಿರಲಿಲ್ಲ. ‘ಒಂದು ದಿನ ನಾನೂ ಬೆಳೆಯುತ್ತೇನೆ, ಅಂದು ಇದೇ ಜನರು ಬಂದು ನನ್ನನ್ನು ಮಾತಾಡಿಸುತ್ತಾರೆ’ ಎಂದು ಅಂದೇ ಯಶ್ ದೃಢವಾಗಿ ಅಂದುಕೊಂಡಿದ್ದರು.

ಅಂದು ಯಶ್ ಕಂಡ ಆ ಕನಸು ಇಂದು ಅಕ್ಷರಶಃ ಸತ್ಯವಾಗಿದೆ. ಭಾರತೀಯ ಚಿತ್ರರಂಗದ ಖ್ಯಾತ ನಿರೂಪಕ ರಜತ್ ಶರ್ಮಾ ಅವರ ‘ಆಪ್ ಕಿ ಅದಾಲತ್’ ನಂತಹ ರಾಷ್ಟ್ರೀಯ ಮಟ್ಟದ ದೊಡ್ಡ ಪ್ರದರ್ಶನಗಳಲ್ಲಿ ಯಶ್‌ಗೆ ಅದ್ಧೂರಿ ಗೌರವ ಹಾಗೂ ಸ್ವಾಗತ ಸಿಕ್ಕಿದೆ. ಸಾಮಾನ್ಯ ಸೀರಿಯಲ್ ನಟನಾಗಿದ್ದ ಯಶ್, ತಮ್ಮ ಕಠಿಣ ಪರಿಶ್ರಮ ಮತ್ತು ಬದ್ಧತೆಯಿಂದ ಭಾರತೀಯ ಚಲನಚಿತ್ರ ರಂಗದ ಅತ್ಯಂತ ಪ್ರಭಾವಿ ನಟರಲ್ಲಿ ಒಬ್ಬರಾಗಿ ಹೊರಹೊಮ್ಮಿದ್ದಾರೆ.

‘ಕೆಜಿಎಫ್’ ಸರಣಿಯ ಮೂಲಕ ಭಾರತೀಯ ಚಿತ್ರರಂಗದ ಬಾಕ್ಸ್ ಆಫೀಸ್ ದಾಖಲೆಗಳನ್ನು ಉಡೀಸ್ ಮಾಡಿದ್ದ ಯಶ್, ಇದೀಗ ‘ಟಾಕ್ಸಿಕ್ ಸಿನಿಮಾದ ಮೂಲಕ ಪ್ಯಾನ್ ಇಂಡಿಯಾ ಗಡಿಯನ್ನೂ దాಟಿ ಜಾಗತಿಕ ಮಟ್ಟಕ್ಕೆ ಲಗ್ಗೆ ಇಟ್ಟಿದ್ದಾರೆ. ಈ ಚಿತ್ರದಲ್ಲಿ ಅವರ ಮಾಸ್ ಅವತಾರ ಹಾಗೂ ವಿಭಿನ್ನ ಪಾತ್ರ ನಿರ್ವಹಣೆ ಯಶ್ ಅವರ ನಟನಾ ರಂಗದ ಎತ್ತರವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ.

ಇದನ್ನೂ ಓದಿ: ಮೊದಲ ದಿನವೇ 140 ಕೋಟಿ ರೂ. ಗಳಿಸಿದ ‘ಟಾಕ್ಸಿಕ್’; ಕನ್ನಡಕ್ಕಿಂತ ಹಿಂದಿಯಲ್ಲಿ ಡಬಲ್ ಗಳಿಕೆ

ಅಂದು ತಮ್ಮನ್ನು ಕಡೆಗಣಿಸಿದ ಅದೇ ಮಾಧ್ಯಮಗಳು ಹಾಗೂ ಇಡೀ ಚಿತ್ರರಂಗವೇ ಇಂದು ಯಶ್ ಅವರ ಮುಂದಿನ ನಡೆ ಏನು ಎಂಬುದನ್ನು ಕಾತುರದಿಂದ ಕಾಯುವಂತೆ ಮಾಡಿದ್ದಾರೆ. ಸಣ್ಣ ಮಟ್ಟದಿಂದ ಆರಂಭಿಸಿ ಜಾಗತಿಕ ಸೂಪರ್‌ಸ್ಟಾರ್ ಆಗಿ ಬೆಳೆದ ಯಶ್ ಅವರ ಈ ಯಶಸ್ಸಿನ ಪಯಣ ಪ್ರತಿಯೊಬ್ಬರಿಗೂ ದೊಡ್ಡ ಸ್ಪೂರ್ತಿಯಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.