Big Daddy Teaser: ಹತ್ತಾರು ಗನ್ನು ವರ್ಸಸ್​ ಶಿವಣ್ಣನ ಕಣ್ಣು: ‘ಬಿಗ್​ ಡ್ಯಾಡಿ’ ನೋಡಿ ಉಘೇ ಉಘೇ ಎಂದ ಫ್ಯಾನ್ಸ್​

ನಟ ಶಿವರಾಜ್​ಕುಮಾರ್​ (Shivarajkumar) ಅವರು ಹಲವು ಸಿನಿಮಾಗಳಲ್ಲಿ ಬ್ಯುಸಿ ಆಗಿದ್ದಾರೆ. ಇಂದು (ಜುಲೈ 12) ಅವರ ಜನ್ಮದಿನದ ಪ್ರಯುಕ್ತ ಆ ಎಲ್ಲ ಸಿನಿಮಾಗಳಿಂದ ಅಪ್​ಡೇಟ್​ ಲಭ್ಯವಾಗಿದೆ. ಅದರಲ್ಲೂ ‘ಘೋಸ್ಟ್​’ ಸಿನಿಮಾದಿಂದ ಬಿಡುಗಡೆ ಆಗಿರುವ ‘ಬಿಗ್​ ಡ್ಯಾಡಿ’ ಟೀಸರ್​ (Big Daddy Teaser) ಹೆಚ್ಚಿನ ಹವಾ ಸೃಷ್ಟಿ ಮಾಡಿದೆ. ಈ ಟೀಸರ್​ಗಾಗಿ ಅಭಿಮಾನಿಗಳು ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದರು. ಆ ನಿರೀಕ್ಷೆಗೆ ತಕ್ಕಂತೆಯೇ ನಿರ್ದೇಶಕ ಶ್ರೀನಿ ಅವರು ಈ ಟೀಸರ್​ ಕಟ್ಟಿಕೊಟ್ಟಿದ್ದಾರೆ. ಹತ್ತಾರು ಗನ್​ ಹಿಡಿದು ಬರುವ ಗುಂಪನ್ನು ಶಿವಣ್ಣ ಕಣ್ಣಿನಲ್ಲೇ ಹೆದರಿಸುತ್ತಾರೆ. ಆಗ ಅವರು ಹೇಳುವ ಡೈಲಾಗ್​ ಕೂಡ ಖಡಕ್​ ಆಗಿದೆ. ಸದ್ಯ ಯೂಟ್ಯೂಬ್​ನಲ್ಲಿ ‘ಘೋಸ್ಟ್​’ ಸಿನಿಮಾದ (Ghost Kannada Movie) ‘ಬಿಗ್​ ಡ್ಯಾಡಿ’ ಟೀಸರ್​ ಧೂಳೆಬ್ಬಿಸುತ್ತಿದೆ.

ಅಂಡರ್​ವರ್ಲ್ಡ್​ ಕಥೆಯುಳ್ಳ ಸಿನಿಮಾಗಳು ಶಿವರಾಜ್​ಕುಮಾರ್​ ಅವರಿಗೆ ಹೊಸದೇನೂ ಅಲ್ಲ. ಆ ರೀತಿಯ ಹಲವು ಸಿನಿಮಾಗಳಲ್ಲಿ ಅವರು ನಟಿಸಿ ಯಶಸ್ಸು ಕಂಡಿದ್ದಾರೆ. ಹಾಗಿದ್ದರೂ ‘ಘೋಸ್ಟ್​’ ಸಿನಿಮಾ ವಿಶೇಷ ಎನಿಸಿಕೊಳ್ಳುತ್ತಿದೆ. ಈ ಚಿತ್ರದಲ್ಲಿ ಶಿವರಾಜ್​ಕುಮಾರ್​ ಅವರು ಗ್ಯಾಂಗ್​ಸ್ಟರ್​ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರ ಲುಕ್​ ಗಮನ ಸೆಳೆಯುತ್ತಿದೆ. ತುಂಬ ರಗಡ್​ ಆಗಿ ಅವರು ಎಂಟ್ರಿ ನೀಡಿದ್ದಾರೆ. ಶಿವರಾಜ್​ಕುಮಾರ್​ ಅವರ ಅಭಿಮಾನಿಗಳಿಗೆ ‘ಬಿಗ್​ ಡ್ಯಾಡಿ’ ಟೀಸರ್​ ಸಖತ್​ ಇಷ್ಟ ಆಗಿದೆ.

‘ನೀವು ಗನ್​ನಲ್ಲಿ ಎಷ್ಟು ಜನರನ್ನು ಹೆದರಿಸಿದ್ದೀರೋ ಅದಕ್ಕಿಂತ ಜಾಸ್ತಿ ಜನರನ್ನ ನಾನು ಬರೀ ಕಣ್ಣಲ್ಲಿ ಹೆದರಿಸಿದ್ದೀನಿ. ಅವರು ನನ್ನ ಒ.ಜಿ. ಅಂತಾರೆ. ಒರಿಜಿನಲ್​ ಗ್ಯಾಂಗ್​ಸ್ಟರ್​’ ಎಂದು ಶಿವರಾಜ್​ಕುಮಾರ್​ ಅವರು ಭರ್ಜರಿಯಾಗಿ ಡೈಲಾಗ್ ಹೊಡೆದಿದ್ದಾರೆ. ಈ ಪಾತ್ರದಲ್ಲಿ ಅವರನ್ನು ದೊಡ್ಡ ಪರದೆ ಮೇಲೆ ನೋಡಲು ಅಭಿಮಾನಿಗಳು ಕಾದಿದ್ದಾರೆ. ಈ ವರ್ಷ ದಸರಾ ವೇಳೆಗೆ ‘ಘೋಸ್ಟ್​’ ಸಿನಿಮಾ ರಿಲೀಸ್​ ಆಗುವ ಸಾಧ್ಯತೆ ಇದೆ.

ಇದನ್ನೂ ಓದಿ: ‘ಅಭಿಮಾನಿಗಳ ಶಿಳ್ಳೆ, ಚಪ್ಪಾಳೆ’; ಹೇಗಿತ್ತು ನೋಡಿ ಶಿವರಾಜ್​ಕುಮಾರ್ ಮನೆ ಎದುರು ಬರ್ತ್​​ಡೇ ಸಂಭ್ರಮ

ಶಿವರಾಜ್​ಕುಮಾರ್​ ಅವರ ಹುಟ್ಟುಹಬ್ಬಕ್ಕೆ ಪರ್ಫೆಕ್ಟ್​ ಗಿಫ್ಟ್ ಆಗಿ ‘ಘೋಸ್ಟ್​’ ಸಿನಿಮಾದ ‘ಬಿಗ್​ ಡ್ಯಾಡಿ’ ಟೀಸರ್​ ಬಿಡುಗಡೆ ಆಗಿದೆ. ಈ ಟೀಸರ್​ನಲ್ಲಿ ಶಿವರಾಜ್​ಕುಮಾರ್​ ಅವರನ್ನು ನೋಡಿದ ಅಭಿಮಾನಿಗಳಿಗೆ ‘ಓಂ’ ಸಿನಿಮಾ ನೆನಪಾಗಿದೆ. ಒಟ್ಟಾರೆಯಾಗಿ ‘ಘೋಸ್ಟ್​’ ಚಿತ್ರ ಕೌತುಕ ಮೂಡಿಸಿದೆ. ‘ಸಂದೇಶ್ ಪ್ರೊಡಕ್ಷನ್ಸ್’ ಮೂಲಕ ಸಂದೇಶ್​ ಎನ್​. ಅವರು ಅದ್ದೂರಿ ಬಜೆಟ್​ನಲ್ಲಿ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ದತ್ತಣ್ಣ, ಅನುಪಮ್ ಖೇರ್, ಸತ್ಯಪ್ರಕಾಶ್, ಪ್ರಶಾಂತ್ ನಾರಾಯಣನ್, ಅಭಿಜಿತ್, ಜಯರಾಂ ಮುಂತಾದ ಕಲಾವಿದರು ಈ ಸಿನಿಮಾದಲ್ಲಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.