ಕಮ್ಮಿ ಆಯ್ತು ‘ದೇವರ’ ಹವಾ; ಈ ವಾರ ‘ಭೈರಾದೇವಿ’ ಜತೆ ಪೈಪೋಟಿಗೆ ಇಳಿದಿದ್ದು ಯಾರು?

ಕಳೆದ ವಾರ (ಸೆ.27) ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ‘ದೇವರ’ ಸಿನಿಮಾ ಬಿಡುಗಡೆ ಆಗಿತ್ತು. ಜೂನಿಯರ್​ ಎನ್​ಟಿಆರ್​, ಜಾನ್ವಿ ಕಪೂರ್​ ನಟನೆಯ ಈ ಸಿನಿಮಾ ಆರಂಭದಲ್ಲಿ ಅಬ್ಬರಿಸಿತಾದರೂ ಮೂರು ದಿನ ಕಳೆದ ಬಳಿಕ ಹವಾ ಕಡಿಮೆ ಆಯಿತು. ಪರಿಣಾಮವಾಗಿ ಹೊಸ ಸಿನಿಮಾಗಳ ಕಡೆಗೆ ಜನರು ಗಮನ ಹರಿಸುವಂತಾಗಿದೆ. ಈ ವಾರ ರಾಧಿಕಾ ಕುಮಾರಸ್ವಾಮಿ ನಟನೆಯ ‘ಭೈರಾದೇವಿ’ ಜೊತೆ ಹೊಸಬರ ಸಿನಿಮಾಗಳು ಕೂಡ ರಿಲೀಸ್​ ಆಗುತ್ತಿವೆ. ಅವುಗಳ ಬಗ್ಗೆ ಇಲ್ಲಿದೆ ಮಾಹಿತಿ..

ರಾಧಿಕಾ ಕುಮಾರಸ್ವಾಮಿ ಅವರು ‘ಭೈರಾದೇವಿ’ ಸಿನಿಮಾದಲ್ಲಿ ಡಿಫರೆಂಟ್​ ಆದಂತಹ ಪಾತ್ರ ಮಾಡಿದ್ದಾರೆ. ಸೂಪರ್​ ನ್ಯಾಚುರಲ್​ ಕಹಾನಿ ಇರುವ ಈ ಸಿನಿಮಾದಲ್ಲಿ ರಮೇಶ್ ಅರವಿಂದ್​ ಕೂಡ ನಟಿಸಿದ್ದಾರೆ. ಸ್ವತಃ ರಾಧಿಕಾ ಕುಮಾರಸ್ವಾಮಿ ಅವರು ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಅಕ್ಟೋಬರ್​ 3ರಂದು ಈ ಸಿನಿಮಾ ಬಿಡುಗಡೆ ಆಗಿದೆ. ಶ್ರೀ ಜೈ ಅವರು ಈ ಸಿನಿಮಾಗೆ ನಿರ್ದೇಶನ ಮಾಡಿದ್ದಾರೆ. ಟ್ರೇಲರ್​ನಲ್ಲಿ ರಾಧಿಕಾ ಕುಮಾರಸ್ವಾಮಿ ಅವರ ಗೆಟಪ್​ ಗಮನ ಸೆಳೆದಿದೆ. ಆ ಕಾರಣದಿಂದ ಅವರ ಅಭಿಮಾನಿಗಳ ವಯಲದಲ್ಲಿ ಈ ಸಿನಿಮಾ ಬಗ್ಗೆ ಹೈಪ್​ ಕ್ರಿಯೇಟ್​ ಆಯಿತು.

ಅಕ್ಟೋಬರ್​ 4ರಂದು ಕನ್ನಡದ ‘ಗೋಪಿಲೋಲ’ ಸಿನಿಮಾ ಬಿಡುಗಡೆ ಆಗುತ್ತಿದೆ. ಈ ಸಿನಿಮಾದಲ್ಲಿ ಮಂಜುನಾಥ್ ಅರಸು, ನಿಮಿಷಾ, ಎಸ್​. ನಾರಾಯಣ್, ಪದ್ಮಾ ವಾಸಂತಿ, ಡಿಂಗ್ರಿ ನಾಗರಾಜ್​ ಮುಂತಾದವರು ನಟಿಸಿದ್ದಾರೆ. ಆರ್​. ರವೀಂದ್ರ ಅವರು ನಿರ್ದೇಶನ ಮಾಡಿದ್ದಾರೆ. ಇದರೊಂದಿಗೆ ‘ಜನಕ’ ಸಿನಿಮಾ ಕೂಡ ಅ.4ಕ್ಕೆ ತೆರೆಕಾಣುತ್ತಿದೆ. ಹೊಸ ನಟ ರಕ್ಷಿತ್ ಮನೋಜ್​ ಅವರು ಈ ಸಿನಿಮಾದಲ್ಲಿ ಹೀರೋ ಆಗಿ ಅಭಿನಯಿಸಿದ್ದಾರೆ. ನಿರ್ದೇಶನ ಕೂಡ ಅವರದ್ದೇ.

ಇದನ್ನೂ ಓದಿ: ಕಾಳಿ ವೇಷ ಧರಿಸುತ್ತಿದ್ದಂತೆ ಏನಾಗುತ್ತಿತ್ತು, ವಿವರಿಸಿದ ನಟಿ ರಾಧಿಕಾ ಕುಮಾರಸ್ವಾಮಿ

ಡಾ. ರಾಜ್​ಕುಮಾರ್​ ಅವರ ಸಹೋದರ ವರದಪ್ಪ ಅವರ ಮೊಮ್ಮಗ ಪೃಥ್ವಿರಾಜ್​ ಹಾಗೂ ಪ್ರೀತಂ ಅವರು ‘ಮಿಂಚುಹುಳ’ ಸಿನಿಮಾದಲ್ಲಿ ಪ್ರಮುಖ ಪಾತ್ರ ಮಾಡಿದ್ದಾರೆ. ಈ ಸಿನಿಮಾಗೆ ಮಹೇಶ್​ ಕುಮಾರ್​ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ಈ ಚಿತ್ರ ಕೂಡ ಅಕ್ಟೋಬರ್​ 4ಕ್ಕೆ ತೆರೆಗೆ ಬರುತ್ತಿವೆ. ತೆಲುಗಿನಲ್ಲಿ ‘ಸ್ವ್ಯಾಗ್’, ತಮಿಳಿನಲ್ಲಿ ‘ಅರಗನ್’ ಚಿತ್ರಗಳು ಕೂಡ ಈ ವಾರ ಪೈಪೋಟಿಗೆ ಇಳಿಯುತ್ತಿವೆ.

ಮುಂದಿನ ವಾರ ಕೆಲವು ಬಹುನಿರೀಕ್ಷಿಯ ಸಿನಿಮಾಗಳು ರಿಲೀಸ್​ ಆಗಲಿವೆ. ರಜನಿಕಾಂತ್​ ಅಭಿನಯದ ‘ವೆಟ್ಟಯ್ಯನ್’ ಸಿನಿಮಾ ಅಕ್ಟೋಬರ್​ 10ಕ್ಕೆ ಬಿಡುಗಡೆ ಆಗಲಿದೆ. ಧ್ರುವ ಸರ್ಜಾ ನಟನೆಯ ‘ಮಾರ್ಟಿನ್​’ ಸಿನಿಮಾ ಅಕ್ಟೋಬರ್​ 11ಕ್ಕೆ ತೆರೆಕಾಣಲಿದೆ. ಅದೇ ದಿನ ಆಲಿಯಾ ಭಟ್​ ನಟನೆಯ ‘ಜಿಗ್ರಾ’ ರಿಲೀಸ್​ ಆಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.