ಕ್ರೈಮ್ ರಿಪೋರ್ಟರ್ ಶುಭಾ ಪೂಂಜಾ; ಬಿಗ್ ಬಾಸ್ ಬಳಿಕ ‘ರೈಮ್ಸ್’ ಹೇಳಲು ಹೊಸ ಅವತಾರ
Rhymes Kannada Movie: ಬಿಗ್ ಬಾಸ್ ಮುಗಿಸಿ ಬಂದ ಬಳಿಕ ನಟಿ ಶುಭಾ ಪೂಂಜಾ ಏನು ಮಾಡುತ್ತಿದ್ದಾರೆ. ಅವರಿಗೂ ಕ್ರೈಮ್ ರಿಪೋರ್ಟಿಂಗ್ಗೂ ಏನು ಸಂಬಂಧ? ಈ ಲೇಖನದಲ್ಲಿದೆ ಪೂರ್ತಿ ವಿವರ..
Updated on: Dec 06, 2021 | 3:27 PM
ನಟಿ ಶುಭಾ ಪೂಂಜಾ (Shubha Poonja) ಅವರು ಕ್ರೈಮ್ ರಿಪೋರ್ಟರ್ ಆಗಿದ್ದಾರೆ. ಅರೆರೆ, ಅವರೇನಾದರೂ ಸಿನಿಮಾ ಬಿಟ್ಟು ಪತ್ರಿಕೋದ್ಯಮ ಸೇರಿಕೊಂಡ್ರಾ? ಹಾಗೇನೂ ಇಲ್ಲ. ಕನ್ನಡದ ‘ರೈಮ್ಸ್’ (Rhymes Kannada Movie) ಸಿನಿಮಾದಲ್ಲಿ ಅವರು ಪತ್ರಕರ್ತೆಯ ಪಾತ್ರ ಮಾಡಿದ್ದಾರೆ. ಪತ್ರಿಕೆಯೊಂದರಲ್ಲಿ ಕೆಲಸ ಮಾಡುವ ಕ್ರೈಮ್ ವರದಿಗಾರ್ತಿಯಾಗಿ ಶುಭಾ ಪೂಂಜಾ ನಟಿಸಿದ್ದಾರೆ. ಡಿ.10ರಂದು ಈ ಸಿನಿಮಾ ಬಿಡುಗಡೆ ಆಗಲಿದೆ. ಈಗಾಗಲೇ ರಿಲೀಸ್ ಆಗಿರುವ ಟ್ರೇಲರ್ ಮೂಲಕ ಕುತೂಹಲ ಮೂಡಿಸಲಾಗಿದೆ. ಅಜಿತ್ ಕುಮಾರ್ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಹೀರೋ ಆಗಿ ಅಜಿತ್ ಜಯರಾಜ್ (Ajith Jayaraj) ಅಭಿನಯಿಸಿದ್ದಾರೆ. ಹೊಸ ನಟಿ ಸುಷ್ಮಾ ನಾಯರ್ ಅವರು ಕೂಡ ಹೀರೋಯಿನ್ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಜ್ಞಾನಶೇಖರ್, ರವಿಕುಮಾರ್, ಗಿರೀಶ್, ರಮೇಶ್ ಆರ್ಯ ಅವರು ನಿರ್ಮಾಣ ಮಾಡಿದ್ದಾರೆ.
ಕಳೆದ ಮೂರು ವರ್ಷದಿಂದ ಈ ಚಿತ್ರಕ್ಕಾಗಿ ನಿರ್ದೇಶಕ ಅಜಿತ್ ಕುಮಾರ್ ಶ್ರಮಿಸಿದ್ದಾರೆ. ‘ಟ್ರೇಲರ್ ನೋಡಿದ ಎಲ್ಲರೂ ಮೆಚ್ಚುಗೆ ಸೂಚಿಸಿದ್ದಾರೆ. ಅದು ನಮಗೆ ಖುಷಿ ನೀಡಿದೆ. ಇದು ಒಂದು ಕ್ರೈಮ್ ಥ್ರಿಲ್ಲರ್ ಸಿನಿಮಾ. ಮೂರು ವರ್ಷದಿಂದ ಈ ಚಿತ್ರಕ್ಕಾಗಿ ಕಷ್ಟಪಟ್ಟಿದ್ದೇನೆ. ಈ ಚಿತ್ರದಲ್ಲಿ ಹೀರೋಯಿಸಂ ಇಲ್ಲ. ಕಂಟೆಂಟ್ಗೆ ಹೆಚ್ಚು ಒತ್ತು ನೀಡಿದ್ದೇನೆ. ಎಲ್ಲ ಪಾತ್ರಗಳಿಗೂ ಪ್ರಾಮುಖ್ಯತೆ ಇದೆ. ಛಾಯಾಗ್ರಹಣ, ಸಂಗೀತ ಮತ್ತು ಸಂಕಲನ ಈ ಚಿತ್ರದ ಪ್ರಮುಖ ಅಂಶ’ ಎನ್ನುತ್ತಾರೆ ನಿರ್ದೇಶಕ ಅಜಿತ್ ಕುಮಾರ್.
ಹೀರೋ ಅಜಿತ್ ಜಯರಾಜ್ ಪಾಲಿಗೆ ಇದು ವಿಶೇಷ ಸಿನಿಮಾ. ಆ ಬಗ್ಗೆ ಅವರು ಮಾತನಾಡಿದ್ದಾರೆ. ‘ಐದು ವರ್ಷ ಕಷ್ಟಪಟ್ಟು ಈಗ ಸಿಂಗಲ್ ಲೀಡ್ ಆಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ನಾನು ನಟಿಸಿರುವ ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳು ರಿಲೀಸ್ಗೆ ಸಿದ್ಧವಾಗಿವೆ. ಆದರೆ ಸಿಂಗಲ್ ಹೀರೋ ಆಗಿ ನಾನು ನಟಿಸಿದ ಮೊದಲ ಸಿನಿಮಾ ‘ರೈಮ್ಸ್’. ತಾಂತ್ರಿಕವಾಗಿ ಈ ಚಿತ್ರ ತುಂಬ ಸ್ಟ್ರಾಂಗ್ ಆಗಿದೆ. ಕೆಲಸ ಮಾಡಿರುವ ಎಲ್ಲರೂ ಯುವ ಪ್ರತಿಭೆಗಳು. ಡಿ.10ಕ್ಕೆ ಸಿನಿಮಾ ರಿಲೀಸ್ ಆಗುತ್ತಿದೆ. ಜನರು ಖರೀದಿಸುವ ಒಂದೊಂದು ಟಿಕೆಟ್ ಕೂಡ ನಮಗೆ ತುಂಬ ಮಹತ್ವದ್ದಾಗಲಿದೆ. ಜನರಿಗೆ ಈ ಚಿತ್ರ ಖಂಡಿತಾ ಇಷ್ಟ ಆಗಲಿದೆ ಎಂಬ ಭರವಸೆ ಇದೆ’ ಎಂದಿದ್ದಾರೆ ಅಜಿತ್ ಜಯರಾಜ್.
(‘ರೈಮ್ಸ್’ ಚಿತ್ರತಂಡ)
‘ರೈಮ್ಸ್’ ರಿಲೀಸ್ ಆಗುತ್ತಿರುವುದಕ್ಕೆ ನಟಿ ಸುಷ್ಮಾ ನಾಯರ್ ಖುಷಿಯಾಗಿದ್ದಾರೆ. ‘ಮೊದಲ ಸಿನಿಮಾದಲ್ಲಿಯೇ ನನಗೆ ಒಳ್ಳೆಯ ಪಾತ್ರ ಸಿಕ್ಕಿದೆ. ಅಜಿತ್ ಜಯರಾಜ್ ಅವರ ಪತ್ನಿಯ ಪಾತ್ರವನ್ನು ನಿಭಾಯಿಸಿದ್ದೇನೆ. ಕನ್ನಡದಲ್ಲಿ ಇದು ನನ್ನ ಮೊದಲ ಸಿನಿಮಾ. ಈ ಪಾತ್ರ ಚಾಲೆಂಜಿಂಗ್ ಆಗಿತ್ತು’ ಎಂದು ಸುಷ್ಮಾ ನಾಯರ್ ಹೇಳಿದ್ದಾರೆ.
ಇದನ್ನೂ ಓದಿ:
‘ಗಂಧದ ಗುಡಿ’ ನೋಡಿ ಸೆಲೆಬ್ರಿಟಿಗಳು ಫಿದಾ; ಪುನೀತ್ ಕಾರ್ಯಕ್ಕೆ ಉಘೇ ಉಘೇ ಎಂದಿದ್ದು ಯಾರೆಲ್ಲ?
