ಶ್ರೇಯಾ ಘೋಷಾಲ್ ಕಾನ್ಸರ್ಟ್ ವೇಳೆ ಕಾಲ್ತುಳಿತ; ಪೊಲೀಸರಿಂದ ಲಾಠಿ ಪ್ರಹಾರ

ಗುರುವಾರ ಸಂಜೆ ಒಡಿಶಾದ ಕಟಕ್‌ನ ಐತಿಹಾಸಿಕ ಬಾಲಿ ಯಾತ್ರಾ ಮೈದಾನದಲ್ಲಿ ಗಾಯಕಿ ಶ್ರೇಯಾ ಘೋಷಾಲ್ (Shreya Ghosal) ಅವರ ಲೈವ್ ಕನ್ಸರ್ಟ್‌ನಲ್ಲಿ ಕಾಲ್ತುಳಿತ ಸಂಭವಿಸಿದೆ. ಶ್ರೇಯಾ ಘೋಷಾಲ್ ಅವರ ಮಧುರ ಧ್ವನಿಯನ್ನು ಕೇಳಲು ಸಾವಿರಾರು ಅಭಿಮಾನಿಗಳು ಸೇರಿದ್ದರು. ಈ ವೇಳೆ ಕಾಲ್ತುಳಿತ ಉಂಟಾಗಿದೆ. ಇದರಲ್ಲಿ 3 ಜನರು ಪ್ರಜ್ಞಾಹೀನರಾದರು. ಜನಪ್ರಿಯ ಬಾಲಿವುಡ್ ಗಾಯಕಿ ಶ್ರೇಯಾ ಅವರನ್ನು ನೋಡಲು ದೊಡ್ಡ ಜನಸಮೂಹ ಸೇರಿದ್ದ ವೇದಿಕೆಯ ಬ್ಯಾರಿಕೇಡ್ ಬಳಿ ಈ ಘಟನೆ ನಡೆದಿದೆ. ಭಾರಿ ಜನಸಮೂಹವು ಗೊಂದಲವನ್ನು ಸೃಷ್ಟಿಸಿತು ಮತ್ತು ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತರಲು ಪೊಲೀಸರು ಲಘು ಲಾಠಿ ಪ್ರಹಾರ ಮಾಡಬೇಕಾಯಿತು.

ವರದಿಗಳ ಪ್ರಕಾರ, ಗುರುವಾರ ಶ್ರೇಯಾ ಘೋಷಾಲ್ ಕಾನ್ಸರ್ಟ್ ಆರಂಭ ಆದಾಗ ವೇದಿಕೆಯ ಸುತ್ತಲೂ ಅಭಿಮಾನಿಗಳ ದೊಡ್ಡ ಗುಂಪು ಜಮಾಯಿಸಿತು. ಜನಸಂದಣಿ ತುಂಬಾ ದೊಡ್ಡದಾಗಿತ್ತು. ಪರಿಸ್ಥಿತಿ ಕೈ ಮೀರಿತು. ವೇದಿಕೆಯ ಬಳಿಯಿದ್ದ ಬ್ಯಾರಿಕೇಡ್‌ಗಳು ಸಹ ಮುರಿದುಹೋದವು. ತಳ್ಳಾಟ ಮತ್ತು ಹೊಡೆದಾಟ ಪ್ರಾರಂಭವಾಯಿತು. ಶ್ರೇಯಾ ಅವರನ್ನು ಹತ್ತಿರದಿಂದ ನೋಡಲು ಜನಸಮೂಹ ನೂಕುನುಗ್ಗಲು ಉಂಟಾಯಿತು.

ಇದನ್ನೂ ಓದಿ:ಖ್ಯಾತ ಗಾಯಕಿ ಶ್ರೆಯಾ ಘೋಷಾಲ್ ಪತಿ ಯಾರು ಗೊತ್ತೆ? ಆಸ್ತಿ ಮೌಲ್ಯ ಎಷ್ಟು?

ಈ ಕಾಲ್ತುಳಿತವು ಅನೇಕ ಜನರಲ್ಲಿ ಭಯದ ವಾತಾವರಣವನ್ನು ಸೃಷ್ಟಿಸಿತು. ಕಾಲ್ತುಳಿತದಲ್ಲಿ ಮೂವರು ಜನರು ಪ್ರಜ್ಞೆ ತಪ್ಪಿದರು. ಪರಿಸ್ಥಿತಿ ಹದಗೆಡುತ್ತಿರುವುದನ್ನು ಗಮನಿಸಿದ ಭದ್ರತಾ ಸಿಬ್ಬಂದಿ ಮತ್ತು ಪೊಲೀಸ್ ಅಧಿಕಾರಿಗಳು ಕ್ರಮ ಕೈಗೊಂಡರು. ಗದ್ದಲವನ್ನು ಹತ್ತಿಕ್ಕಲು ಅವರು ಲಘು ಲಾಠಿ ಪ್ರಹಾರ ನಡೆಸಿದರು.

ಪ್ರಜ್ಞಾಹೀನ ಜನರಿಗೆ ತಕ್ಷಣವೇ ಚಿಕಿತ್ಸೆ ನೀಡಲಾಯಿತು.. ವೈದ್ಯರ ತಂಡವೂ ತಕ್ಷಣ ಸ್ಥಳಕ್ಕೆ ತಲುಪಿ ಅವರನ್ನು ಪರೀಕ್ಷಿಸಿದೆ. ಎಲ್ಲಕ್ಕಿಂತ ಮುಖ್ಯವಾಗಿ, ಘಟನೆಗಳ ಸಮಯದಲ್ಲಿ ಯಾವುದೇ ಪ್ರಮುಖ ಘಟನೆಗಳು ನಡೆದಿಲ್ಲ. ಜನರು ಭಯಭೀತರಾಗದಂತೆ ಮತ್ತು ಸುವ್ಯವಸ್ಥೆಯನ್ನು ಕಾಪಾಡಿಕೊಳ್ಳುವಂತೆ ಪೊಲೀಸರು ಮನವಿ ಮಾಡಿದರು.

ಈಗ ಜನರನ್ನು ಸೇರಿಸುವುದೇ ಒಂದು ದೊಡ್ಡ ಭಯದ ಕೆಲಸ ಆಗಿದೆ. ಈ ಮೊದಲು ಆರ್​ಸಿಬಿ ವಿನ್ನಿಂಗ್ ಸೆಲೆಬ್ರೇಷನ್ ವೇಳೆ ಜನರು ಸೇರಿದ್ದರಿಂದ ಹಲವರು ಮೃತಪಟ್ಟರು. ಈಗ ರಾಜಮೌಳಿ ಅವರು ತಮ್ಮ ಮುಂದಿನ ಸಿನಿಮಾಗಾಗಿ ಕಾರ್ಯಕ್ರಮ ಏರ್ಪಡಿಸಿದ್ದು ದೊಡ್ಡ ಸಂಖ್ಯೆಯಲ್ಲಿ ಜನರು ಸೇರುತ್ತಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಯಾವುದೇ ತೊಂದರೆ ಆಗದಿರಲಿ ಎಂಬುದು ಫ್ಯಾನ್ಸ್ ಕೋರಿಕೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ