Sonu Nigam: ಭಕ್ತಿಗೀತೆಗಳ ಕುರಿತು ಅಚ್ಚರಿಯ ವಿಚಾರ ಹಂಚಿಕೊಂಡ ಸೋನು ನಿಗಮ್

Sonu Nigam: ಭಕ್ತಿಗೀತೆಗಳ ಕುರಿತು ಅಚ್ಚರಿಯ ವಿಚಾರ ಹಂಚಿಕೊಂಡ ಸೋನು ನಿಗಮ್
ಸೋನು ನಿಗಮ್

ಗಾಯಕ ಸೋನು ನಿಗಮ್ ಅವರ ಇತ್ತೀಚಿನ ಭಕ್ತಿಗೀತೆಯೊಂದು ಹಿಟ್ ಆಗಿದೆ. ಈ ಹಿನ್ನೆಲೆಯಲ್ಲಿ ಅವರು ಭಕ್ತಿಗೀತೆಯ ಕುರಿತು ತಮ್ಮ ಅಭಿಪ್ರಾಯಗಳನ್ನು, ಅಚ್ಚರಿಯ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

TV9kannada Web Team

| Edited By: shivaprasad.hs

Nov 10, 2021 | 8:41 AM


ಗಾಯಕ ಸೋನು ನಿಗಮ್ (Sonu Nigam) ಚಿತ್ರಗೀತೆಗಳೊಂದಿಗೆ ಸಂಗೀತದ ಇತರ ಪ್ರಾಕಾರಗಳಲ್ಲೂ ಸಾಕಷ್ಟು ಹೆಸರು ಮಾಡಿದವರು. ಕಳೆದ ಮೂರು ದಶಕಗಳಲ್ಲಿ ಅವರು ಎಲ್ಲಾ ಮಾದರಿಯಲ್ಲೂ ಸಂಗೀತ ಕೃಷಿ ಮಾಡಿದ್ದಾರೆ. ಇತ್ತೀಚೆಗೆ ಸೋನು ನಿಗಮ್ ಅವರ ಹೊಸ ಹಾಡು ‘ಜಯ ಛಠ್ ಮಾಯಿಯಾ’ (Jai Chhati Maiyya) ಬಿಡುಗಡೆಯಾಗಿದ್ದು, ಅದು ಒಂದು ವಾರದ ಅವಧಿಯೊಳಗೆ 17 ಮಿಲಿಯನ್ ವೀಕ್ಷಣೆ ಕಂಡಿದೆ. ಅದರ ಯಶಸ್ಸಿನ ಬೆನ್ನಲ್ಲೇ ಸೋನು ನಿಗಮ್ ಶಾಸ್ತ್ರೀಯ ಪ್ರಕಾರದ ಸಂಗೀತದ ಕುರಿತು ಮಾತನಾಡಿದ್ದಾರೆ. ಇದೇ ವೇಳೆ ಅವರು ಭಕ್ತಿಗೀತೆಗಳು ಹೇಗೆ ತಮ್ಮನ್ನು ಬಹುಮುಖಿ ಗಾಯಕನನ್ನಾಗಿಸಿದೆ ಎಂಬುದನ್ನು ಹೇಳಿಕೊಂಡಿದ್ದಾರೆ. ‘‘ಬಾಲ್ಯದಿಂದಲೂ ನನ್ನ ತಾಯಿ ಕಲ್ಪನೆ ಮತ್ತು ಬುದ್ಧಿಮತ್ತೆಗೂ ಮೀರಿದ ಒಂದು ಶಕ್ತಿಯ ಕುರಿತು ಶ್ರದ್ಧೆ ಇಡಲು ಹೇಳಿಕೊಟ್ಟಿದ್ದರು. ಅದಕ್ಕಾಗಿ ಮನೆಯಲ್ಲೇ ಪ್ರಾರ್ಥಿಸುವುದು ಜೊತೆಜೊತೆಗೆ ದೇವಾಲಯ, ಗುರುದ್ವಾರ, ಚರ್ಚ್, ದರ್ಗಾಗಳಿಗೂ ಕರೆದುಕೊಂಡು ಹೋಗುತ್ತಿದ್ದರು. ಪರಿಣಾಮವಾಗಿ ನಾನು ಎಲ್ಲಾ ಧರ್ಮಗಳ ವಿವಿಧ ಭಕ್ತಿಗೀತೆಗಳನ್ನು ಹಾಡುವುದು ಸಾಧ್ಯವಾಗಿದೆ’’ ಎಂದು ಸೋನು ನಿಗಮ್ ನುಡಿದಿದ್ದಾರೆ. ಭಕ್ತಿಗೀತೆಗಳು ತಮ್ಮ ಗಾಯನದ ಮೇಲೆ ಬೀರಿರುವ ಅಚ್ಚರಿಯ ವಿಚಾರಗಳನ್ನು ಸೋನು ನಿಗಮ್ ಇದೇ ವೇಳೆ ಹಂಚಿಕೊಂಡಿದ್ದಾರೆ.

ಭಕ್ತಿಗೀತೆ ಹಾಡುವುದರ ಕುರಿತು ಮತ್ತಷ್ಟು ವಿವರಿಸಿರುವ ಸೋನು ನಿಗಮ್, ‘‘ಭಕ್ತಿಗೀತೆಗಳನ್ನು ಹಾಡಲು ಹಲವು ಅಂಶಗಳಿವೆ. ಒಂದು, ಅದನ್ನು ನಮ್ಮ ಹೃದಯದಿಂದ ಧ್ವನಿಸಬೇಕು. ಎರಡನೆಯದಾಗಿ, ಎಲ್ಲಾ ಧರ್ಮಗಳ ಹೆಚ್ಚಿನ ಭಕ್ತಿಗೀತೆಗಳು ತರಬೇತಿ ಪಡೆದ ಧ್ವನಿಯ ಅಗತ್ಯ ಹೊಂದಿದೆ. ಕಳೆದ 30 ವರ್ಷಗಳಲ್ಲಿ ಭಕ್ತಿಗೀತೆಗಳ ಕಾರಣದಿಂದಾಗಿ, ನನ್ನ ಗಾಯನವು ಬಹುಮುಖಿಯಾಗಿದೆ (Versatile). ಇದು ಚಲನಚಿತ್ರ ಮತ್ತು ಪಾಪ್ ಹಾಡುಗಳಲ್ಲದೇ ಕೇಳುಗರ ಹೃದಯದಲ್ಲಿ ಬಲವಾದ ಸ್ವತಂತ್ರ ಸ್ಥಾನ ಪಡೆಯಲು ಕಾರಣವಾಗಿದೆ’’ ಎಂದಿದ್ದಾರೆ.

ಈ ಹಿಂದೆ ಮುಂಬೈನಲ್ಲಿ ಛಟ್ ಹಬ್ಬಗಳಲ್ಲಿ ಸಾಕಷ್ಟು ಹಾಡಿದ್ದೇನೆ. ಆದರೆ ಛಟ್ ಮಾಯಿಯಾ ಕುರಿತ ಹಾಡಿಗೆ ಇಷ್ಟು ದೊಡ್ಡಪ್ರತಿಕ್ರಿಯೆ ವ್ಯಕ್ತವಾಗಿರುವುದು ಅಚ್ಚರಿ ಹಾಗೂ ಸಂತಸ ಮೂಡಿಸಿದೆ ಎಂದು ಸೋನು ನಿಗಮ್ ಹೇಳಿದ್ದಾರೆ. ಭಕ್ತಿಗೀತೆಗಳನ್ನು ಹಾಡುವುದನ್ನು ತಾನು ಬಹಳ ಆನಂದಿಸುತ್ತೇನೆ. ಆದರೆ ಅವುಗಳನ್ನು ಹಾಡುವಾಗ ದೊಡ್ಡ ಜವಾಬ್ದಾರಿಯೂ ನಮ್ಮ ಮೇಲಿರುತ್ತದೆ ಎಂದು ಸೋನು ನಿಗಮ್ ಹೇಳಿದ್ದಾರೆ.

ಸೋನು  ನಿಗಮ್​ಗೆ ಬಾಲಿವುಡ್​ ಹಾಡುಗಳು ತಂದುಕೊಟ್ಟಷ್ಟೇ ಜನಪ್ರಿಯತೆ ಪ್ರಾದೇಶಿಕ ಭಾಷೆಗಳಲ್ಲಿ ಹಾಡಿದಾಗಲೂ ಲಭ್ಯವಾಗಿದೆ. ಕನ್ನಡದಲ್ಲೂ ಅವರ ಧ್ವನಿಗೆ ಚಿತ್ರಪ್ರೇಮಿಗಳ ಹೃದಯದಲ್ಲಿ ವಿಶೇಷ ಸ್ಥಾನವಿದೆ. ಅಂತೆಯೇ ಅವರ ನೂತನ ಆಲ್ಬಂ ಸಾಂಗ್ ಕೂಡ ಪ್ರಾದೇಶಿಕ ಭಾಷೆಯಲ್ಲೇ ಇದೆ. ಈ ಕುರಿತು ಮಾತನಾಡಿರುವ ಸೋನು ನಿಗಮ್, ‘‘ಪ್ರಾದೇಶಿಕ ಭಾಷೆಗಳ ಹಲವು ಖ್ಯಾತ ಸಂಗೀತ ನಿರ್ದೇಶಕರು, ಸಾಹಿತಿಗಳು ಹಾಗೂ ಗಾಯಕರೊಂದಿಗೆ ಕೆಲಸ ಮಾಡಿದ್ದೇನೆ. ಈ ಬಾರಿ ಪವನ್ ಸಿಂಗ್ ಅವರೊಂದಿಗೆ ಕೆಲಸ ಮಾಡಿರುವುದು ಖುಷಿ ತಂದಿದೆ. ಕೇವಲ ನಾಲ್ಕು ದಿನದಲ್ಲಿ ಚಿತ್ರದ ಚಿತ್ರೀಕರಣವನ್ನೂ ಪೂರ್ತಿಗೊಳಿಸಲು ನಮಗೆ ಸಾಧ್ಯವಾಗಿತ್ತು’’ ಎಂದು ಸೋನಿ ನಿಗಮ್ ಹೇಳಿದ್ದಾರೆ.

ಸೋನು ನಿಗಮ್ ಹೊಸ ಹಾಡು ಇಲ್ಲಿದೆ:

ಸೋನು ನಿಗಮ್ ಹಾಡಿರುವ ಈ ಹಾಡಿಗೆ ಉತ್ತಮ ಪ್ರತಿಕ್ರಿಯೆ ಲಭ್ಯವಾಗಿದೆ. ಈಗಾಗಲೇ ಸುಮಾರು 17 ಮಿಲಿಯನ್​ಗೂ ಅಧಿಕ ವೀಕ್ಷಣೆಯನ್ನು ಈ ಹಾಡು ಕಂಡಿದೆ. ಈ ಹಾಡಿನಲ್ಲಿ ಕನ್ನಡತಿ ಹರ್ಷಿಕಾ ಪೂಣಚ್ಚ ತೆರೆ ಮೇಲೆ ಕಾಣಿಸಿಕೊಂಡಿರುವುದು ವಿಶೇಷ.

ಇದನ್ನೂ ಓದಿ:

ಸುದೀಪ್​ ಅನಾರೋಗ್ಯದ ವೇಳೆ ಮಾಡಿಕೊಂಡಿದ್ದ ಹರಕೆ ತೀರಿಸಿದ ಫ್ಯಾನ್ಸ್​; ಮಲೆ ಮಹದೇಶ್ವರನ ಬೆಟ್ಟದಲ್ಲಿ ಉರುಳು ಸೇವೆ

ಅಭಿಮಾನಿಗಳಿಗೆ ಊಟ ಮಾಡಿಸುವುದು ಅಪ್ಪುನ ಆಸೆಯಾಗಿತ್ತು, ಅವನಾಸೆಯಂತೆ ಊಟದ ಏರ್ಪಾಟು ಮಾಡಲಾಗಿದೆ: ರಾಘವೇಂದ್ರ ರಾಜಕುಮಾರ್

Follow us on

Related Stories

Most Read Stories

Click on your DTH Provider to Add TV9 Kannada