ಅಂದು ರಿಜೆಕ್ಟ್​ ಆಗಿದ್ದ ಮ್ಯಾಗಜಿನ್​ನಲ್ಲೇ ಸೋನು ಸೂದ್ ಫೋಟೋ; ಇದಲ್ಲವೇ ಯಶಸ್ಸು?

ಜೀವನದಲ್ಲಿ ಯಶಸ್ಸು ಕಂಡ ಬಹುತೇಕರ ಹಿಂದೆ ಒಂದು ಏಳುಬೀಳಿನ ಕಥೆ ಇರುತ್ತದೆ. ಸಾಕಷ್ಟು ಬಾರಿ ರಿಜೆಕ್ಟ್​ ಆದೆವಲ್ಲ ಎಂಬ ಕೊರಗು ಇರುತ್ತದೆ. ಆದರೆ, ಯಶಸ್ಸು ಸಿಕ್ಕ ನಂತರ ನಮ್ಮನ್ನು ದೂರ ಇಟ್ಟವರೇ ಕರೆದು ಮಣೆ ಹಾಕುತ್ತಾರೆ. ಇದಕ್ಕೆ ತಾಜಾ ಉದಾಹರಣೆ ಸೋನು ಸೂದ್​. ಅವರು ಜೀವನದಲ್ಲಿ ನಡೆದ ಘಟನೆಯೊಂದರ ಬಗ್ಗೆ ಹೇಳಿಕೊಂಡಿದ್ದು, ಸ್ಫೂರ್ತಿದಾಯಕವಾಗಿದೆ.

1999ರಲ್ಲಿಯೇ ಚಿತ್ರರಂಗಕ್ಕೆ ಕಾಲಿಟ್ಟ ಸೋನು ಸೂದ್​ ಸಾಕಷ್ಟು ಸಿನಿಮಾಗಳಲ್ಲಿ ವಿಲನ್​ ಆಗಿ ನಟಿಸಿದ್ದಾರೆ. ಅವರು ಚಿತ್ರರಂಗಕ್ಕೆ ಬರುವುದಕ್ಕೂ ಮೊದಲು ಅವಕಾಶಕ್ಕಾಗಿ ಸಾಕಷ್ಟು ಕಷ್ಟಪಟ್ಟಿದ್ದರು. ಪ್ರತಿಷ್ಠಿತ ‘ಸ್ಟಾರ್​ಡಸ್ಟ್’​ ಮ್ಯಾಗಜಿನ್​ ಒಂದಕ್ಕೆ ಆಡಿಷನ್​ ಕೊಡಲು ಫೋಟೋ ಕಳುಹಿಸಿದ್ದರು. ಆದರೆ, ಸೋನು ಅವರನ್ನು ಮ್ಯಾಗಜಿನ್​ ತಂಡ ರಿಜೆಕ್ಟ್​ ಮಾಡಿತ್ತು.

ಕೊವಿಡ್​ ಬಂದ ನಂತರದಲ್ಲಿ ಸೋನು ಸೂದ್ ಸಾರ್ವಜನಿಕರ ಸೇವೆಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. ಟ್ವೀಟ್​ ಮಾಡಿದ ಕೆಲವೇ ಸಮಯದಲ್ಲಿ ಕಷ್ಟ ಎಂದವರಿಗೆ ಸಹಾಯ ಸಿಗುತ್ತಿದೆ. ಸೋನು ಮಾಡುತ್ತಿರುವ ಕೆಲಸ ನೋಡಿ ಸಾಕಷ್ಟು ಜನರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಅವರ ಅಭಿಮಾನಿಗಳಂತೂ ಸೋನು ಸೂದ್​ ನೋಡಿ ಮೆಚ್ಚುಗೆಯ ಮಹಾಪೂರವನ್ನೇ ಹರಿಸುತ್ತಿದ್ದಾರೆ.

ಒಂದು ಕಾಲದಲ್ಲಿ ಇವರನ್ನು ರಿಜೆಕ್ಟ್​ ಮಾಡಿದ ಸ್ಟಾರ್​ಡಸ್ಟ್​ ಮ್ಯಾಗಜಿನ್​ ಅವರೇ ಇಂದು ಸೋನು ಸೂದ್​ ಅವರ ಫೋಟೋವನ್ನು ಏಪ್ರಿಲ್​ ತಿಂಗಳ ಸಂಚಿಕೆಯಲ್ಲಿ ಕವರ್ ಫೋಟೋವಾಗಿ ಮುದ್ರಿಸಿದ್ದಾರೆ. ಇದನ್ನು ನೋಡಿದ ಸೋನು ಸೂದ್​ಗೆ ಸಾಕಷ್ಟು ಆನಂದವಾಗಿದೆ.

ಈ ಬಗ್ಗೆ ಟ್ವಿಟರ್​ನಲ್ಲಿ ಬರೆದುಕೊಂಡಿರುವ ಸೋನು ಸೂದ್, ಸ್ಟಾರ್​ಡಸ್ಟ್​ ಆಡಿಷನ್​ಗಾಗಿ ನಾನು ಪಂಜಾಬ್​ನಿಂದ ನನ್ನ ಫೋಟೋ ಕಳುಹಿಸಿ, ಅದು ರಿಜೆಕ್ಟ್​ ಆಗುತ್ತಿದ್ದ ದಿನಗಳಿದ್ದವು. ಆದರೆ, ಈಗ ಅದೆ ಸ್ಟಾರ್​ಡಸ್ಟ್​ ಮ್ಯಾಗಜಿನ್​ನಲ್ಲಿ ಇಷ್ಟೊಂದು ಅದ್ಭುತವಾಗಿ ನನ್ನ ಕವರ್​ ಫೋಟೋ ಹಾಕಿರುವುದಕ್ಕೆ ಧನ್ಯವಾದ ಅರ್ಪಿಸುತ್ತಿದ್ದೇನೆ ಎಂದು ಸೋನು ಸೂದ್ ಬರೆದುಕೊಂಡಿದ್ದಾರೆ. ಈ ಘಟನೆಯನ್ನು ಕೇಳಿದ ಅವರ ಅಭಿಮಾನಿಗಳು ಸ್ಫೂರ್ತಿ ಪಡೆದುಕೊಂಡಿದ್ದಾರೆ. ಅಲ್ಲದೆ, ಸೋನು ಸೂದ್​ ಸಾಧನೆಗೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

There was a day when I had sent my pictures from Punjab for an audition of Stardust, but got rejected. Today want to thank Stardust for this lovely cover. Humbled ❣️? @sumita11 @Stardust_Magna @vedishnaidu @ashok_dhamankar pic.twitter.com/lQj6CLgxg3

— sonu sood (@SonuSood) May 30, 2021

ಸೋನು ಸೂದ್​ ಅವರು ಮಾಡುತ್ತಿರುವ ಸಹಾಯದಿಂದ ಅನೇಕರ ಪ್ರಾಣ ಉಳಿದಿದೆ. ಹೀಗಾಗಿ, ಸಾಕಷ್ಟು ಮಂದಿ ಸೋನು ಸೂದ್​ ಅವರನ್ನು ದೇವರ ರೀತಿಯಲ್ಲಿ ಕಾಣುತ್ತಿದ್ದಾರೆ. ಕೆಲವರು ಸೋನು ಸೂದ್​ ಫೋಟೋಗೆ ಹಾಲಿನ ಅಭಿಷೇಕ ಮಾಡಿದರೆ, ಇನ್ನೂ ಕೆಲವರು ಅವರ ಫೋಟೋವನ್ನು ದೇವರ ಮನೆಯಲ್ಲಿ ಇಟ್ಟು ಪೂಜಿಸುತ್ತಿದ್ದಾರೆ. ಈ ಫೋಟೋಗಳನ್ನು ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಇದನ್ನು ನೋಡಿದ ಸೋನು ಸೂದ್​ ಧನ್ಯವಾದ ಹೇಳಿದ್ದರು.

ಇದನ್ನೂ ಓದಿ: ಸೋನು ಸೂದ್​ ಮಾತ್ರವಲ್ಲ, ಕರುನಾಡಿಗೆ ಕೊವಿಡ್ ಕಷ್ಟದಲ್ಲಿ ನೆರವಾದ ಇನ್ನಿಬ್ಬರು ಬಾಲಿವುಡ್​ ಸ್ಟಾರ್​ಗಳು

Published On - 4:34 pm, Sun, 30 May 21