ಮತ್ತೆ ಕೈಜೋಡಿಸುತ್ತಿರುವ ಸೂರ್ಯ-ಸುಧಾ ಕೊಂಗರಾ, ಮಲಯಾಳಿ ಚೆಲುವೆ ನಾಯಕಿ

ತಮಿಳು ಸ್ಟಾರ್ ನಟ ಸೂರ್ಯ (Suriya), ತಮ್ಮ ಸಹವರ್ತಿ ನಟರಾದ ವಿಜಯ್ (Vijay), ಅಜಿತ್ ಇನ್ನಿತರೆಯವರಂತೆ ಬ್ರೇನ್​ಲೆಸ್ ಮಸಾಲೆ ಸಿನಿಮಾಗಳ ಹಿಂದೆ ಹೋಗದೆ ಭಿನ್ನ ಹಾದಿ ತುಳಿದಿದ್ದಾರೆ. ಇದೇ ಕಾರಣಕ್ಕೆ ‘ಜೈ ಭೀಮ್’, ‘ಸೂರರೈ ಪೊಟ್ರು’ ಅಂಥಹಾ ಹೀರೋಯಿಸಮ್ ರಹಿತ ಸಮಾಜ ಪರವಾದ ಸಿನಿಮಾಗಳನ್ನು ಮಾಡುತ್ತಿದ್ದಾರೆ. ಇದೀಗ ಅಂಥಹುದೇ ಇನ್ನೊಂದು ಸಿನಿಮಾಕ್ಕೆ ಸೂರ್ಯಾ ಕೈ ಹಾಕಿದ್ದಾರೆ. ಈ ಹಿಂದೆ ತಮ್ಮೊಟ್ಟಿಗೆ ಸೂಪರ್ ಹಿಟ್ ಸಿನಿಮಾ ಕೊಟ್ಟ ನಿರ್ದೇಶಕಿಯೊಟ್ಟಿಗೆ ಮತ್ತೊಮ್ಮೆ ಕೈ ಜೋಡಿಸಿದ್ದಾರೆ.

‘ಸೂರರೈ ಪೊಟ್ರು’ ಸಿನಿಮಾ ನಿರ್ದೇಶನ ಮಾಡಿದ್ದ ಸುಧಾ ಕೊಂಗರಾ ಅವರು ಇದೀಗ ಸೂರ್ಯಾಗಾಗಿ ಮತ್ತೊಂದು ಸಿನಿಮಾ ನಿರ್ದೇಶನ ಮಾಡಲು ಮುಂದಾಗಿದ್ದಾರೆ. ಸುಧಾರ ಈ ಹಿಂದಿನ ಸಿನಿಮಾದಂತೆ ಬಯೋಪಿಕ್ ಸಿನಿಮಾ ಆಗಿರದೆ ಕಾಲ್ಪನಿಕ ಕತೆಯನ್ನು ಸಿನಿಮಾ ಒಳಗೊಂಡಿರಲಿದೆ ಎನ್ನಲಾಗಿದೆ. ಸಿನಿಮಾಕ್ಕೆ ನಾಯಕಿಯಾಗಿ ಮಲಯಾಳಂ ಮೂಲದ ಚೆಲುವೆ ನಾಜರಿಯಾ ನಟಿಸುತ್ತಿದ್ದಾರೆ. ಪ್ಯಾನ್ ಇಂಡಿಯಾ ಸ್ಟಾರ್ ಆಗಿರುವ ಫಹಾದ್ ಫಾಸಿಲ್ ಪತ್ನಿ ಇವರು.

ಇದನ್ನೂ ಓದಿ:Aditya L1 Mission: ಎರಡನೇ ಕಕ್ಷೆಯನ್ನು ಪ್ರವೇಶಿಸಿದ ಆದಿತ್ಯ, ಸೂರ್ಯನತ್ತ ಮುಂದುವರೆದ ನೌಕೆಯ ಪ್ರಯಾಣ

ಸೂರ್ಯಾರ 43ನೇ ಸಿನಿಮಾ ಇದಾಗಿರಲಿದ್ದು, ನಾಜರಿಯಾ ಸಹ ವರ್ಷಗಳ ಬಳಿಕ ಮತ್ತೆ ತಮಿಳು ಚಿತ್ರರಂಗಕ್ಕೆ ಎಂಟ್ರಿ ನೀಡುತ್ತಿದ್ದಾರೆ. ಈ ಸಿನಿಮಾದಲ್ಲಿ ನಾಜರಿಯಾ ಮಾತ್ರವೇ ಅಲ್ಲದೆ ಮಲಯಾಳಂ ಸ್ಟಾರ್ ನಟ ದುಲ್ಕರ್ ಸಲ್ಮಾನ್ ಸಹ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ. ಆ ಬಗ್ಗೆ ಇನ್ನಷ್ಟೆ ಖಚಿತ ಸುದ್ದಿ ಹೊರಬೀಳಬೇಕಿದೆ. ದುಲ್ಕರ್ ಹಾಗೂ ಸೂರ್ಯಾರಿಗೆ ಇದು ಮೊದಲ ಕಾಂಬಿನೇಷನ್ ಸಿನಿಮಾ ಆಗಲಿದೆ.

ತಮ್ಮ ಮುಂದಿನ ಸಿನಿಮಾ ಬಗ್ಗೆ ಈ ಹಿಂದೆ ಮಾತನಾಡಿದ್ದ ನಿರ್ದೇಶಕಿ ಸುಧಾ ಕೊಂಗರಾ, ”ಸೂರರೈ ಪೋಟ್ರು’ ಸಿನಿಮಾಕ್ಕೆ ಹೋಲಿಸಿದರೆ ನನ್ನ ಮುಂದಿನ ಸಿನಿಮಾ ಬಹಳ ಚಾಲೆಂಜಿಂಗ್ ಆಗಿರಲಿದೆ. ಈ ಸಿನಿಮಾ ಬಯೋಪಿಕ್ ಅಲ್ಲ ಆದರೆ ಎಲ್ಲರಿಗೂ ಇಷ್ಟವಾಗುವ ಕತೆಯನ್ನು ಒಳಗೊಂಡಿದೆ. ಇದು ಭಾರಿ ಬಜೆಟ್ ಸಿನಿಮಾ ಆಗಿರಲಿದ್ದು, ಹೆಚ್ಚಿನ ಶ್ರಮವನ್ನು ಬೇಡುವ ಸಿನಿಮಾ ಆಗಿರಲಿದೆ” ಎಂದಿದ್ದಾರೆ. ಈ ಸಿನಿಮಾವನ್ನು ಕರ್ನಾಟಕದ ಹೊಂಬಾಳೆ ಫಿಲಮ್ಸ್ ನಿರ್ಮಾಣ ಮಾಡುವ ಸಾಧ್ಯತೆ ಇದೆ.

ಸೂರ್ಯಾ ಪ್ರಸ್ತುತ ‘ಕನಗುವ’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅದಾದ ಬಳಿಕ ವೆಟ್ರಿಮಾರನ್ ನಿರ್ದೇಶನದ ‘ವಡಿವಾಸಲ್’ ಸಿನಿಮಾದಲ್ಲಿ ನಟಿಸಲಿದ್ದಾರೆ. ಈ ಎರಡೂ ಸಿನಿಮಾಗಳ ಬಳಿಕ ಸುಧಾ ಕೊಂಗರ ಜೊತೆಗಿನ ಸಿನಿಮಾ ಪ್ರಾರಂಭವಾಗಲಿದೆ. ಸುಧಾ ಕೊಂಗರಾ ನಿರ್ದೇಶಿಸಿದ್ದ ‘ಸೂರರೈ ಪೋಟ್ರು’ ಸಿನಿಮಾದ ಮೂಲಕವೇ ಸೂರ್ಯಾಗೆ ರಾಷ್ಟ್ರ ಪ್ರಶಸ್ತಿ ಬಂದಿತ್ತು. ಈಗ ಮತ್ತೊಮ್ಮೆ ಈ ಜೋಡಿ ಒಂದಾಗುತ್ತಿದ್ದು ಅಭಿಮಾನಿಗಳಲ್ಲಿ ಸಹಜವಾಗಿಯೇ ಕುತೂಹಲ ಕೆರಳಿಸಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 8:21 pm, Thu, 7 September 23