‘ಟಾಕ್ಸಿಕ್’ ಎದುರು ಒಂದು ದಿನವೂ ನಿಲ್ಲಲ್ಲ ಅಂದ್ಕೊಂಡಿದ್ವಿ’; ‘ಹನುಮಾನ್ ಅಂಶ’ ನಿರ್ಮಾಪಕಿ ಮಾತು

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬೃಹತ್ ಬಜೆಟ್‌ನ ‘ಟಾಕ್ಸಿಕ್’ ಸಿನಿಮಾ ಎದುರು ಪೈಪೋಟಿ ನಡೆಸಿ ‘ಹನುಮಾನ್ ಅಂಶ್’ ಸಿನಿಮಾ ಅಭೂತಪೂರ್ವ ಗೆಲುವು ಸಾಧಿಸಿದೆ. ವಿಶಾಲ್ ಚತುರ್ವೇದಿ ನಿರ್ದೇಶನದ ಈ ಸಣ್ಣ ಬಜೆಟ್ ಚಿತ್ರವು ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಾ ಭಾರಿ ಕಲೆಕ್ಷನ್ ಮಾಡುತ್ತಿದೆ. ಪ್ರೇಕ್ಷಕರ ಅಪಾರ ಬೆಂಬಲದೊಂದಿಗೆ ಬಾಕ್ಸ್ ಆಫೀಸ್ ಸೂಪರ್ ಹಿಟ್ ಆಗಿ ಹೊರಹೊಮ್ಮಿದೆ. ಈ ಅದ್ಭುತ ಗೆಲುವಿನ ಬಗ್ಗೆ ನಿರ್ಮಾಪಕಿ ರಾಗಿಣಿ ಸೋನಾ ಮಾತನಾಡಿದ್ದಾರೆ.

ಚಿತ್ರ ಬಿಡುಗಡೆಯಾದ ಆರಂಭದಲ್ಲಿ ಪ್ರದರ್ಶನಗಳ ಸಂಖ್ಯೆ ತೀವ್ರವಾಗಿ ಕುಸಿದಿತ್ತು. ‘ಟಾಕ್ಸಿಕ್’ ಹಾಗೂ ‘ಆವಾರಪನ್ 2’ ಸಿನಿಮಾಗಳ ಬಿಡುಗಡೆಯಿಂದಾಗಿ ಚಿತ್ರಮಂದಿರಗಳ ಸಂಖ್ಯೆ 350 ರಿಂದ 25ಕ್ಕೆ ಇಳಿದಿತ್ತು. ಆದರೂ ಸಿನಿಮಾ ಕಲೆಕ್ಷನ್ ಮಾತ್ರ ಎಲ್ಲೂ ಕುಗ್ಗಿರಲಿಲ್ಲ. ಇದು ಚಿತ್ರತಂಡಕ್ಕೆ ದೊಡ್ಡ ಭರವಸೆಯ ಬೆಳಕಾಗಿ ಕಾಣಿಸಿಕೊಂಡಿತು’ ಎಂದಿದ್ದಾರೆ ಅವರು.

‘ಸಿನಿಮಾ ಥಿಯೇಟರ್‌ಗಳಿಂದ ಬಹುತೇಕ ಹೊರಹೋಗುವ ಹಂತ ತಲುಪಿತ್ತು. ಆ ಸಮಯದಲ್ಲಿ ನಿರ್ದೇಶಕ ವಿಶಾಲ್ ಹಾಗೂ ನಿರ್ಮಾಪಕಿ ರಾಗಿಣಿ ಧೈರ್ಯ ಮಾಡಿ ವಿತರಕರ ಜೊತೆ ಮಾತನಾಡಿದರು. ಮತ್ತಷ್ಟು ಚಿತ್ರಮಂದಿರಗಳನ್ನು ಪಡೆದು ಪ್ರದರ್ಶನ ಮುಂದುವರಿಸಲು ನಿರ್ಧರಿಸಿದರು. ಅವರ ಈ ಸಾಹಸದ ನಿರ್ಧಾರಕ್ಕೆ ಈಗ ದೊಡ್ಡ ಮಟ್ಟದ ಪ್ರತಿಫಲ ಸಿಕ್ಕಿದೆ’ ಎಂದಿದ್ದಾರೆ ರಾಗಿಣಿ.

‘ಟಾಕ್ಸಿಕ್’ ನಂತಹ ದೊಡ್ಡ ಸಿನಿಮಾದ ಎದುರು ನಮ್ಮ ಚಿತ್ರ ಒಂದು ದಿನವೂ ತಡೆಯಲಾರದು ಎಂದು ನಾವು ಭಾವಿಸಿದ್ದೆವು. ಮಾಧ್ಯಮಗಳು ಹಾಗೂ ಜನರು ಇವೆರಡು ಸಿನಿಮಾಗಳ ನಡುವೆ ಸ್ಪರ್ಧೆ ಸೃಷ್ಟಿಸಿದ್ದರು. ಆದರೆ ನಾವು ಯಾವುದೇ ಭೀತಿಯಿಲ್ಲದೆ ಹನುಮಂತನ ಮೇಲೆ ಸಂಪೂರ್ಣ ಭಾರ ಹಾಕಿ ಮುನ್ನಡೆದೆವು’ ಎಂದು ನಿರ್ಮಾಪಕಿ ಹೇಳಿದ್ದಾರೆ.

ಇದನ್ನೂ ಓದಿ: ನಿಮ್ಮ ಬುದ್ಧಿ ಉಪಯೋಗಿಸಿ ಸಿನಿಮಾ ನೋಡಿ;ಟಾಕ್ಸಿಕ್ ನೆಗೆಟಿವ್ ವಿಮರ್ಶೆಗೆ ಯಶ್ ಸಹನಟ ಖಡಕ್ ಉತ್ತರ

ಆಗಸ್ಟ್ 7 ರಂದು ಬಿಡುಗಡೆಯಾದ ‘ಹನುಮಾನ್ ಅಂಶ’ ಸಿನಿಮಾ ಜಾಗತಿಕವಾಗಿ 316.30 ಕೋಟಿ ರೂಪಾಯಿ ಗಳಿಸಿದೆ. ಶೋಭಿನವ್ ಸತ್ಯಾ ಮುಖ್ಯಭೂಮಿಕೆಯಲ್ಲಿರುವ ಈ ಚಿತ್ರವು ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ಸಂಪೂರ್ಣ ಯಶಸ್ವಿಯಾಗಿದೆ. ಸಣ್ಣ ಬಜೆಟ್‌ನಲ್ಲಿದ್ದರೂ ಕಂಟೆಂಟ್ ಆಧಾರಿತ ಸಿನಿಮಾಗಳು ಗೆಲ್ಲುತ್ತವೆ ಎಂಬುದನ್ನು ಈ ಚಿತ್ರ ಮತ್ತೊಮ್ಮೆ ಸಾಬೀತುಪಡಿಸಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.