ಕೆಬಿಸಿಯಲ್ಲಿ ಗೆದ್ದು ಲಕ್ಷಾಧಿಪತಿಯಾದ ರಾಜಸ್ಥಾನದ ಸರ್ಕಾರಿ ಶಾಲಾ ಶಿಕ್ಷಕಿ ಆಯೆಷಾ; ಪ್ರಶಸ್ತಿಯ ಮೊತ್ತವನ್ನು ಏನು ಮಾಡುತ್ತಾರಂತೆ?

Amitabh Bachchan: ರಾಜಸ್ಥಾನದ ಭರತ್​ಪುರದ ಸರ್ಕಾರಿ ಶಾಲಾ ಶಿಕ್ಷಕಿಯಾದ ಆಯೆಷಾ, ಅಮಿತಾಭ್ ನಡೆಸಿಕೊಡುವ ಕೆಬಿಸಿಯ ಹಾಟ್​ಸೀಟ್​ನಲ್ಲಿ ಕುಳಿತು ಲಕ್ಷಾಧಿಪತಿಯಾಗಿದ್ದಾರೆ. ಇದೇ ವೇಳೆ ಅವರು ತಮ್ಮ ಶಾಲೆ, ಹಳ್ಳಿ, ಮನೆಯ ಕುರಿತು ಹಲವು ಕುತೂಹಲಕರ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.

ಕೆಬಿಸಿಯಲ್ಲಿ ಗೆದ್ದು ಲಕ್ಷಾಧಿಪತಿಯಾದ ರಾಜಸ್ಥಾನದ ಸರ್ಕಾರಿ ಶಾಲಾ ಶಿಕ್ಷಕಿ ಆಯೆಷಾ; ಪ್ರಶಸ್ತಿಯ ಮೊತ್ತವನ್ನು ಏನು ಮಾಡುತ್ತಾರಂತೆ?
ಆಯೆಷಾ, ಅಮಿತಾಭ್ ಬಚ್ಚನ್

ಅಮಿತಾಭ್ ಬಚ್ಚನ್ ನಡೆಸಿಕೊಡುತ್ತಿರುವ ಕೌನ್ ಬನೇಗಾ ಕರೋಡ್​ಪತಿ ಹಲವು ಅಭೂತಪೂರ್ವ ಕ್ಷಣಗಳಿಗೆ ಸಾಕ್ಷಿಯಾಗುತ್ತದೆ. ಹಾಟ್​ಸೀಟ್​ನಲ್ಲಿ ಕುಳಿತ ಸ್ಪರ್ಧಿಗಳ ಅಸಂಖ್ಯ ಕನಸುಗಳಿಗೆ ಜೀವ ತುಂಬಿ, ಬದುಕಿನ ದಿಕ್ಕನ್ನೇ ಬದಲಿಸಿದ ಉದಾಹರಣೆಗಳು ಈ ಹಿಂದೆ ಕೆಬಿಸಿ ಇತಿಹಾಸದಲ್ಲಿ ದಾಖಲಾಗಿವೆ. ಇತ್ತೀಚಿನ ಎಪಿಸೋಡ್​ ಕೂಡ ಇಂಥದ್ದೇ ಒಂದು ಸುಂದರ ಕ್ಷಣಕ್ಕೆ ಸಾಕ್ಷಿಯಾಗಿದೆ. ರಾಜಸ್ಥಾನದ ಭರತ್​ಪುರದ ಸರ್ಕಾರಿ ಶಾಲಾ ಶಿಕ್ಷಕಿಯಾದ ಆಯೆಷಾ, ಹಾಟ್​ಸೀಟ್​ನಲ್ಲಿ ಕುಳಿತು ಲಕ್ಷಾಧಿಪತಿಯಾಗಿದ್ದಾರೆ. 

ಆಯೆಷಾ ತಮ್ಮ ಶಾಲೆಯಲ್ಲಿ ಹತ್ತನೇ ತರಗತಿಯವರೆಗಿನ ಮಕ್ಕಳಿಗೆ ಜೀವಶಾಸ್ತ್ರವನ್ನು(Biology) ಕಲಿಸುತ್ತಾರೆ. ಬಿಗ್​​ಬಿ ಹಾಟ್​ಸೀಟ್​ಗೆ ಆಯೆಷಾ ಆಯ್ಕೆಯಾಗಿರುವುದನ್ನು ತಿಳಿಸಿದಾಗ ಆಕೆ ಭಾವುಕರಾದರು. ನಂತರ ಅವರ ಊರಿನ ಸಾಮಾಜಿಕ ಪರಿಸ್ಥಿತಿಯನ್ನು ತೆರೆದಿಟ್ಟ ಅವರು, ಅಲ್ಲಿನ ಲಿಂಗಾಧಾರಿತ ತಾರತಮ್ಯವನ್ನು ವಿವರಿಸಿದರು. ಹತ್ತನೇ ತರಗತಿ ಆದ ನಂತರ ಹೆಣ್ಣು ಮಕ್ಕಳಿಗೆ ವಿಜ್ಞಾನ ವಿಷಯವನ್ನು ಆಯ್ಕೆ ಮಾಡುವ ಸ್ವಾತಂತ್ರ್ಯವೇ ಅಲ್ಲಿ ಇಲ್ಲವಂತೆ. ಅದಕ್ಕೆ ಹೆಚ್ಚು ವೆಚ್ಚವಾಗುತ್ತದೆ ಎಂಬ ಮನಸ್ಥಿತಿ ಅಲ್ಲಿ ಬೇರೂರಿರುವುದೇ ಇದಕ್ಕೆ ಕಾರಣ ಎಂದು ಬೇಸರ ವ್ಯಕ್ತಪಡಿಸಿದರು.

ಆಯೆಷಾ, ಪ್ರೀತಿಸಿ ಮದುವೆಯಾದ ತಮ್ಮ ದಾಂಪತ್ಯದ ಕುರಿತು ಇದೇ ಸಂದರ್ಭದಲ್ಲಿ ತಿಳಿಸಿದರು. 2003ರಲ್ಲಿ ಕೋಚಿಂಗ್ ಸಂದರ್ಭದಲ್ಲಿ ಭೇಟಿಯಾದ ನೀರಜ್​ರನ್ನು ಕಳೆದ ವರ್ಷದಲ್ಲಿ ಆಯೆಷಾ ಮದುವೆಯಾದರು. ಪ್ರೀತಿಸಿದರೂ ಮದುವೆಯಾಗಲು 17 ವರ್ಷಗಳ ಕಾಲ ಕಾಯಬೇಕಾದ ಕಾರಣವನ್ನು ತಿಳಿಸಿದ ಅವರು, ತಾವು ಮುಸ್ಲಿಂ ಕುಟುಂಬಕ್ಕೆ ಸೇರಿದ್ದು, ಪತಿ ಹಿಂದೂವಾಗಿದ್ದಾರೆ. ಆದ್ದರಿಂದ ವಿವಾಹವಾಗಲು ಇಷ್ಟು ಸಮಯ ಬೇಕಾಯಿತು ಎಂದಿದ್ಧಾರೆ.

ಕೆಬಿಸಿಯ ಪ್ರಶ್ನೋತ್ತರವನ್ನು ಬಹಳ ಆತ್ಮವಿಶ್ವಾಸದಿಂದ ಆಯೆಷಾ ಎದುರಿಸಿದರು. ಮೊದಲ ಏಳು ಪ್ರಶ್ನೆಗಳಿಗೆ ಸರಿ ಉತ್ತರವನ್ನು ನೀಡಿ ಆಯೆಷಾ ₹ 1.6 ಲಕ್ಷ ಗಳಿಸಿದರು. ಆದರೆ ಈ ವೇಳೆಗೆ ಅವರ ಎಲ್ಲಾ ಲೈಫ್ ಲೈನ್ ಖಾಲಿಯಾಗಿತ್ತು. ನಂತರದ ಪ್ರಶ್ನೆಗಳಿಗೆ ಸ್ವತಃ ಉತ್ತರಿಸಿದ ಆಯೆಷಾ, ₹ 6.4 ಲಕ್ಷ ಗಳಿಸಿದರು. ಆದರೆ, ₹ 12.5 ಲಕ್ಷದ ಹತ್ತನೇ ಪ್ರಶ್ನೆಗೆ ಅವರಿಗೆ ಉತ್ತರ ಖಚಿತವಾಗಿ ಗೊತ್ತಿರದ ಕಾರಣ, ಕ್ವಿಟ್ ಮಾಡಿದರು. ನಂತರ ನೋಡಿದಾಗ, ಅವರು ಊಹಿಸಿದ ಉತ್ತರ ಸರಿಯಾಗಿತ್ತು. ಅಂತಿಮವಾಗಿ ಆಯೆಷಾ ಖಾತೆಗೆ ₹ 6.4 ಲಕ್ಷ ಸಂದಾಯವಾಯಿತು.

ಪ್ರಶಸ್ತಿ ಗೆದ್ದ ಹಣವನ್ನು ಏನು ಮಾಡುತ್ತೀರಿ ಎಂದು ಅಮಿತಾಭ್ ಕೇಳಿದಾಗ, ತಮ್ಮ ಶಾಲೆಗೆ ಹಾಗೂ ಕೊವಿಡ್ 19 ನಿಧಿಗೆ ಒಂದಷ್ಟು ಮೊತ್ತವನ್ನು ನೀಡುತ್ತೇನೆ. ಒಂದು ವೇಳೆ ಹಣ ಉಳಿದರೆ, ಪತಿಯೊಂದಿಗೆ ಹನಿಮೂನ್​ ತೆರಳುವುದಾಗಿ ಆಯೆಷಾ ನಕ್ಕರು.

ಕೆಬಿಸಿಯಲ್ಲಿ ಇಂದು ಬಿಗ್​ಬಿಯೊಂದಿಗೆ ವೀರೇಂದ್ರ ಸೆಹ್ವಾಗ್ ಹಾಗೂ ಸೌರವ್ ಗಂಗೂಲಿ ಭಾಗವಹಿಸಿದ್ದ ಕಾರ್ಯಕ್ರಮ ಪ್ರಸಾರವಾಗಲಿದೆ.

ಇದನ್ನೂ ಓದಿ:

ಪ್ರೇಯಸಿ ಮಡಿಲಲ್ಲೇ ಪ್ರಾಣ ಬಿಟ್ರಾ ಸಿದ್ದಾರ್ಥ್​? ಹೃದಯಾಘಾತ ಆಗೋದಕ್ಕೂ ಮುನ್ನ ನಡೆದಿದ್ದೇನು? ಇಲ್ಲಿದೆ ವಿವರ

ಸಿದ್ದಾರ್ಥ್​ ಶುಕ್ಲಾ ಅನುಮಾನಾಸ್ಪದ ಸಾವು: ಗೆಳತಿ ಫೋನ್​ ಆಫ್​; ಮರಣೋತ್ತರ ಪರೀಕ್ಷೆ ವರದಿ ಮೇಲೆ ಎಲ್ಲರ ಕಣ್ಣು

(A government school teacher Ayesha from Rajasthan won Rs 6 4L in KBC 13)

Published On - 10:00 am, Fri, 3 September 21

Click on your DTH Provider to Add TV9 Kannada