Bigg Boss History: ಜಗತ್ತಿನಲ್ಲಿ ಈವರೆಗೂ ನಡೆದಿವೆ 508 ಬಿಗ್ ಬಾಸ್ ಸೀಸನ್ಗಳು; ಇಲ್ಲಿದೆ ದೀರ್ಘ ಇತಿಹಾಸ
‘ಬಿಗ್ ಬಾಸ್’ ಕಾರ್ಯಕ್ರಮದ ಮೂಲ ರೂಪವಾದ ‘ಬಿಗ್ ಬ್ರದರ್’ ಶೋಗೆ 24 ವರ್ಷಗಳ ಇತಿಹಾಸ ಇದೆ. ಈ ರಿಯಾಲಿಟಿ ಶೋ ಶುರುವಾಗಿದ್ದು ನೆದರ್ಲೆಂಡ್ನಲ್ಲಿ. ಬಳಿಕ ಜಗತ್ತಿನ ಬಹುತೇಕ ರಾಷ್ಟ್ರಗಳಿಗೆ ಇದು ಪಸರಿಸಿತು. ವಿಶ್ವಾದ್ಯಂತ ಈ ಶೋ ಫೇಮಸ್ ಆಗಿದೆ. ಹಲವು ಭಾಷೆಗಳಲ್ಲಿ ಇದು ಪ್ರಸಾರ ಕಾಣುತ್ತಿದೆ. ಇದರ ಇತಿಹಾಸ ಇಲ್ಲಿದೆ..
ಬಿಗ್ ಬಾಸ್ ರಿಯಾಲಿಟಿ ಶೋಗೆ ದೊಡ್ಡ ಅಭಿಮಾನಿ ಬಳಗ ಇದೆ. ಕನ್ನಡ, ಹಿಂದಿ ಮಾತ್ರವಲ್ಲದೇ ಜಗತ್ತಿನ ಅನೇಕ ಭಾಷೆಗಳಲ್ಲಿ ಈ ಕಾರ್ಯಕ್ರಮ ಆಯೋಜನೆಗೊಳ್ಳುತ್ತದೆ. ಹಲವು ದೇಶಗಳಲ್ಲಿ ಈ ರಿಯಾಲಿಟಿ ಶೋ (Bigg Boss Reality Show) ಫೇಮಸ್ ಆಗಿದೆ. ಬೇರೆ ಎಲ್ಲ ರಿಯಾಲಿಟಿ ಶೋಗಿಂತಲೂ ಬಿಗ್ ಬಾಸ್ ತುಂಬ ಭಿನ್ನವಾಗಿದೆ. ಇದರ ವ್ಯಾಪ್ತಿ ಕೂಡ ದೊಡ್ಡದು. ಇದರ ತೆರೆಹಿಂದೆ ಕೆಲಸ ಮಾಡುವ ತಂತ್ರಜ್ಞರ ಸಂಖ್ಯೆಯೂ ದೊಡ್ಡದಾಗಿ ಇರುತ್ತದೆ. ಬಿಗ್ ಬಾಸ್ ಮನೆಯೊಳಗೆ ಏನೆಲ್ಲ ನಡೆಯುತ್ತದೆ ಎಂಬುದು ಎಲ್ಲರಿಗೂ ತಿಳಿದಿದೆ. ಟಾಸ್ಕ್ ಹೇಗೆ ನೀಡಲಾಗುತ್ತದೆ? ವಿಜೇತರ ಆಯ್ಕೆ ಹೇಗೆ ನಡೆಯುತ್ತದೆ ಎಂಬುದನ್ನು ಹೊಸದಾಗಿ ಹೇಳಬೇಕಾಗಿದ್ದಿಲ್ಲ. ವಿಶೇಷ ಏನೆಂದರೆ, ಈವರೆಗೆ ಜಗತ್ತಿನಾದ್ಯಂತ 508 ಬಿಗ್ ಬಾಸ್ ಶೋಗಳು ನಡೆದಿವೆ! ಬಹುತೇಕ ಕಡೆಗಳಲ್ಲಿ ಇದನ್ನು ‘ಬಿಗ್ ಬ್ರದರ್’ (Big Brother) ಎಂದು ಕರೆಯಲಾಗುತ್ತದೆ. ಕನ್ನಡದಲ್ಲಿ 9 ಸೀಸನ್ಗಳು ಯಶಸ್ವಿಯಾಗಿ ಪೂರ್ಣಗೊಂಡಿವೆ. ‘ಬಿಗ್ ಬಾಸ್ ಕನ್ನಡ ಸೀಸನ್ 10’ ಆರಂಭ ಆಗುತ್ತಿದೆ. ಈ ಹಿನ್ನೆಲೆಯಲ್ಲಿ ಬಿಗ್ ಬಾಸ್ ರಿಯಾಲಿಟಿ ಶೋನ ಇತಿಹಾಸ (Bigg Boss History) ತಿಳಿಯೋಣ.
‘ಬಿಗ್ ಬ್ರದರ್’ ಶೋಗೆ 24 ವರ್ಷಗಳ ಇತಿಹಾಸ ಇದೆ. ಇದು ನೆದರ್ಲೆಂಡ್ ಮೂಲದ ಬನಿಜೆ (Banijay) ಕಂಪನಿಯ ಪ್ರಾಡಕ್ಟ್. ಭಾರತದಲ್ಲಿ ‘ಎಂಡಮೋಲ್ ಶೈನ್ ಗ್ರೂಪ್’ ಈ ರಿಯಾಲಿಟಿ ಶೋನ ಫ್ರಾಂಚೈಸ್ ಹೊಂದಿದೆ. ಬೇರೆ ಬೇರೆ ದೇಶಗಳಲ್ಲಿ 63 ಫ್ರಾಂಚೈಸ್ನಲ್ಲಿ ಈ ಕಾರ್ಯಕ್ರಮ ನಡೆದಿದೆ. ಪ್ರತಿ ಸೀಸನ್ನಲ್ಲೂ ಹೊಸ ಹೊಸ ಅಂಶಗಳನ್ನು ಸೇರಿಸಲಾಗುತ್ತದೆ. ಪ್ರದೇಶಕ್ಕೆ ಅನುಗುಣವಾಗಿ ಕಾರ್ಯಕ್ರಮದ ಸ್ವರೂಪದಲ್ಲಿ ಮಾರ್ಪಾಡು ಮಾಡಲಾಗುತ್ತಾ ಬರಲಾಗಿದೆ. ಬಿಗ್ ಬಾಸ್ ಅಥವಾ ಬಿಗ್ ಬ್ರದರ್ನ ವಿಸ್ತಾರ ಜಗದಗಲ ಹರಡಿಕೊಂಡಿದೆ. ವರ್ಷದಿಂದ ವರ್ಷಕ್ಕೆ ಹೊಸ ಹೊಸ ದೇಶಗಳು ಇದರ ಪ್ರಸಾರ ಆರಂಭಿಸುತ್ತಿವೆ.
ಮೊದಲ ಶೋ ನಡೆದಿದ್ದು 1999ರಲ್ಲಿ:
ನೆದರ್ಲೆಂಡ್ನಲ್ಲಿ ಮೊದಲ ಬಾರಿಗೆ 1999ರಲ್ಲಿ ‘ಬಿಗ್ ಬ್ರದರ್’ ಕಾರ್ಯಕ್ರಮ ನಡೆಯಿತು. ಡಚ್ ಭಾಷೆಯ ‘ವೆರೋನಿಕಾ’ ವಾಹಿನಿಯಲ್ಲಿ ಅದು ಪ್ರಸಾರ ಆಯಿತು. ಬಳಿಕ ಆ ರಿಯಾಲಿಟಿ ಶೋ ಅಮೆರಿಕಕ್ಕೆ ಕಾಲಿಟ್ಟಿತು. ಆರಂಭದ ಸೀಸನ್ನಲ್ಲಿ ಬಿಗ್ ಬ್ರದರ್ ಮನೆಯ ಸ್ವರೂಪ ತುಂಬ ಸರಳವಾಗಿತ್ತು. ಬರುಬರುತ್ತಾ ಸಾಕಷ್ಟು ಬದಲಾವಣೆಗಳು ಆದವು. ವರ್ಷಗಳು ಕಳೆದಂತೆ ಬಿಗ್ ಬ್ರದರ್ ತುಂಬ ಫೇಮಸ್ ಆಯಿತು. ಬೇರೆ ಬೇರೆ ದೇಶಗಳಿಗೆ ಇದು ಕಾಲಿಟ್ಟಿತು. ಹಲವು ಭಾಷೆಗಳಲ್ಲಿ ಪ್ರಸಾರ ಆರಂಭಿಸಿತು.
ಇದನ್ನೂ ಓದಿ: ‘ಜಿಯೋ ಸಿನಿಮಾ’ದಲ್ಲಿ 24 ಗಂಟೆಯೂ ಬಿಗ್ ಬಾಸ್ ಉಚಿತ ಪ್ರಸಾರ; ವೀಕ್ಷಕರಿಗೂ ಬಹುಮಾನ ಗೆಲ್ಲುವ ಅವಕಾಶ
2006ರಲ್ಲಿ ಭಾರತಕ್ಕೆ ಎಂಟ್ರಿ
‘ಬಿಗ್ ಬ್ರದರ್’ ಶೋ 2006ರಲ್ಲಿ ಭಾರತಕ್ಕೆ ಕಾಲಿಟ್ಟಿತು. ಇಲ್ಲಿನ ನೇಟಿವಿಟಿಗೆ ಅನುಗುಣವಾಗಿ ಇದರ ಹೆಸರನ್ನು ‘ಬಿಗ್ ಬಾಸ್’ ಎಂದು ಬದಲಾಯಿಸಿಕೊಳ್ಳಲಾಯಿತು. ಹಿಂದಿಯ ಮೊದಲ ಬಿಗ್ ಬಾಸ್ ಶೋ 2006-07ರಲ್ಲಿ ಪ್ರಸಾರ ಆಯಿತು. ಅಲ್ಲಿಂದ ಇಂದಿನ ತನಕ 16 ಸೀಸನ್ಗಳು ಯಶಸ್ವಿಯಾಗಿ ಮುಗಿದಿವೆ. 17ನೇ ಸೀಸನ್ ಶೀಘ್ರದಲ್ಲೇ ಆರಂಭ ಆಗಲಿದೆ. ಕನ್ನಡದಲ್ಲಿ 2013ರಲ್ಲಿ ಬಿಗ್ ಬಾಸ್ ಆರಂಭ ಆಯಿತು. ಈವರೆಗೆ 9 ಸೀಸನ್ ಪೂರ್ಣಗೊಂಡಿದ್ದು ಅಕ್ಟೋಬರ್ 8ರಂದು 10ನೇ ಸೀಸನ್ಗೆ ಅದ್ದೂರಿ ಚಾಲನೆ ಸಿಗಲಿದೆ. ಫ್ರಾನ್ಸ್ನಲ್ಲಿ ‘ಲಾಫ್ಟ್ ಸ್ಟೋರಿ’ ಮತ್ತು ‘ಸೀಕ್ರೆಟ್ ಸ್ಟೋರಿ’ ಎಂಬ ಹೆಸರಲ್ಲಿ ಬಿಗ್ ಬ್ರದರ್ ಶೋ ನಡೆಯುತ್ತದೆ. ಹಾಗೆಯೇ ಬೇರೆ ಬೇರೆ ಪ್ರದೇಶಗಳಲ್ಲಿ ಈ ಶೋಗೆ ಭಿನ್ನವಾದ ಹೆಸರುಗಳು ಇವೆ.
‘ಬಿಗ್ ಬ್ರದರ್’ ಹೆಸರು ಬಂದಿದ್ದು ಹೇಗೆ?
ಇಂಗ್ಲಿಷ್ನ ಖ್ಯಾತ ಲೇಖಕ ಜಾರ್ಜ್ ಆರ್ವೆಲ್ ಬರೆದ ‘1984’ ಕಾಂದಬರಿಯಲ್ಲಿನ ಒಂದು ಪಾತ್ರದ ಹೆಸರು ಬಿಗ್ ಬ್ರದರ್. ಅದನ್ನೇ ಸ್ಫೂರ್ತಿಯಾಗಿ ಇಟ್ಟುಕೊಂಡು ಈ ರಿಯಾಲಿಟಿ ಶೋಗೆ ‘ಬಿಗ್ ಬ್ರದರ್’ ಎಂದು ನಾಮಕರಣ ಮಾಡಲಾಯಿತು. ಈ ಕಾದಂಬರಿ ಪ್ರಕಟ ಆಗಿದ್ದು 1949ರಲ್ಲಿ. ಎಲ್ಲರ ಮೇಲೆ ಕಣ್ಣು ಇಡುವುದು ಈ ಬಿಗ್ ಬ್ರದರ್ ಪಾತ್ರದ ಗುಣ. ಆ ಕಾರಣದಿಂದಲೇ ಈ ಹೆಸರು ಸೂಕ್ತವಾಗಿ ಹೊಂದಿಕೊಂಡಿತು. ಭಾರತದಲ್ಲಿ ಇದನ್ನು ‘ಬಿಗ್ ಬಾಸ್’ ಎಂದು ಬದಲಾಯಿಸಿಕೊಳ್ಳಲಾಯಿತು. ಕನ್ನಡ, ಹಿಂದಿ, ತೆಲುಗು, ಮಲಯಾಳಂ, ತಮಿಳು, ಬೆಂಗಾಲಿ ಮತ್ತು ಮರಾಠಿ ಭಾಷೆಯಲ್ಲೂ ‘ಬಿಗ್ ಬಾಸ್’ ಎಂದೇ ಈ ಶೋ ಪ್ರಸಿದ್ಧಿ ಪಡೆದಿದೆ.
ಬಹುತೇಕ ಒಂದೇ ನಿಯಮ:
ಜಗತ್ತಿನಾದ್ಯಂತ ನಡೆಯುವ ಈ ರಿಯಾಲಿಟಿ ಶೋನ ಗುಣಲಕ್ಷಣ ಬಹುತೇಕ ಒಂದೇ ರೀತಿ ಇದೆ. ಸಾಮಾನ್ಯವಾಗಿ 16ರಿಂದ 20 ಸ್ಪರ್ಧಿಗಳು ಬಿಗ್ ಬಾಸ್ ಮನೆಯೊಳಗೆ ಎಂಟ್ರಿ ನೀಡುತ್ತಾರೆ. ಕೆಲವು ಕಡೆಗಳಲ್ಲಿ ಕೇವಲ 10 ಮಂದಿ ಭಾಗವಹಿಸಿದ್ದೂ ಉಂಟು. ಪ್ರತಿ ವಾರ ಒಬ್ಬರ ಎಲಿಮಿನೇಷನ್ ನಡೆಯುತ್ತದೆ. ಕೊನೆಯಲ್ಲಿ ಉಳಿಯುವ ಸ್ಪರ್ಧಿಯನ್ನು ವಿನ್ನರ್ ಎಂದು ಘೋಷಣೆ ಮಾಡಲಾಗುತ್ತಿದೆ. ಸಾಮಾನ್ಯವಾಗಿ ಈ ಶೋ 3 ತಿಂಗಳ ಕಾಲ ನಡೆಯುತ್ತದೆ. ಈ ಬೇಸಿಕ್ ನಿಯಮಗಳನ್ನು ಇಟ್ಟುಕೊಂಡು, ಪ್ರಾದೇಶಿಕತೆಗೆ ಅನುಗುಣವಾಗಿ ಒಂದಷ್ಟು ಬದಲಾವಣೆಗಳನ್ನು ಮಾಡಿಕೊಂಡು ಕಾರ್ಯಕ್ರಮ ನಡೆಸಲಾಗುತ್ತಿದೆ.
ಇದನ್ನೂ ಓದಿ: ಟ್ರೋಲ್ ಆದ ಬಿಗ್ ಬಾಸ್ ಸ್ಪರ್ಧಿಗಳ ಬಗ್ಗೆ ಪ್ರಶ್ನೆ: ಸುದ್ದಿಗೋಷ್ಠಿಯಲ್ಲಿ ಕಿಚ್ಚ ಸುದೀಪ್ ಗರಂ
ಸ್ಪಿನ್ ಆಫ್ ಸೀಸನ್ಗಳು:
ಸಮಯಕ್ಕೆ ತಕ್ಕಂತೆ ಬಿಗ್ ಬ್ರದರ್ನ ಸ್ಪಿನ್ ಆಫ್ಗಳು ಕೂಡ ಬಂದಿವೆ. ಯುನೈಟೆಡ್ ಕಿಂಗ್ಡಮ್ನಲ್ಲಿ ‘ಬಿಗ್ ಬ್ರದರ್: ಸೆಲೆಬ್ರಿಟಿ ಹೈಜಾಕ್’ ಎಂಬ ಕಾರ್ಯಕ್ರಮ ಮಾಡಲಾಯಿತು. ಕೆಲವು ದೇಶಗಳಲ್ಲಿ ‘ಬಿಗ್ ಬ್ರದರ್ ವಿಐಪಿ’ ಶೋ ನಡೆದಿದೆ. 2006ರಲ್ಲಿ ನೆದರ್ಲೆಂಡ್ನಲ್ಲಿ ‘ಹೋಟೆಲ್ ಬಿಗ್ ಬ್ರದರ್’ ಶೋ ಮಾಡಿ, ಅದರಿಂದ ಬಂದ ಹಣವನ್ನು ಚಾರಿಟಿಗೆ ಬಳಸಲಾಯಿತು. ಕನ್ನಡದಲ್ಲಿ ಬಿಗ್ ಬಾಸ್ ಮಿನಿ ಸೀಸನ್ ಕೂಡ ಪ್ರಸಾರ ಆಯಿತು. ಅದರಲ್ಲಿ ಸೀರಿಯಲ್ ಸೆಲೆಬ್ರಿಟಿಗಳು ಮಾತ್ರ ಭಾಗಿ ಆಗಿದ್ದರು. ಇನ್ನು, ಒಟಿಟಿ ಫೇಮಸ್ ಆದ ಬಳಿಕ ‘ಬಿಗ್ ಬಾಸ್ ಒಟಿಟಿ’ ಸೀಸನ್ ಕೂಡ ಆರಂಭ ಆಯಿತು. ಹಿಂದಿ, ಕನ್ನಡದಲ್ಲೂ ಈ ಪ್ರಯೋಗ ನಡೆದಿದೆ.
ಕಾನೂನಿನ ಕಿರಿಕ್:
ಏಪ್ರಿಲ್ 2000ರಲ್ಲಿ ಕಾಸ್ಟವೇ ಕಂಪನಿಯೂ ಎಂಡಮೋಲ್ ಕಂಪನಿ ವಿರುದ್ಧ ಕೇಸ್ ದಾಖಲಿಸಿತ್ತು. ತನ್ನ ‘ಸರ್ವೈವ್’ ರಿಯಾಲಿಟಿ ಶೋನ ಪರಿಕಲ್ಪನೆಯನ್ನು ಕದ್ದು ಎಂಡಮೋಲ್ ಕಂಪನಿಯು ‘ಬಿಗ್ ಬ್ರದರ್’ ಶೋ ತಯಾರಿಸಿದೆ ಎಂದು ಕಾಸ್ಟವೇ ಕಂಪನಿ ದೂರು ನೀಡಿತ್ತು. ಆದರೆ ಆ ಕೇಸ್ನಲ್ಲಿ ಎಂಡಮೋಲ್ ಕಂಪನಿಗೆ ಜಯವಾಯಿತು. ಈ ಮೊದಲೇ ಹೇಳಿದಂತೆ ಜಾರ್ಜ್ ಆರ್ವೆಲ್ ಬರೆದ ‘1984’ ಕಾದಂಬರಿಯ ‘ಬಿಗ್ ಬ್ರದರ್’ ಪಾತ್ರದಿಂದಲೇ ಈ ಶೋನ ಹೆಸರು ಮತ್ತು ಕಾನ್ಸೆಪ್ಟ್ ಮೂಡಿಬಂದಿದೆ. ಹಾಗಾಗಿ 2000ನೇ ಇಸವಿಯಲ್ಲಿ ಜಾರ್ಜ್ ಆರ್ವೆಲ್ ಫೌಂಡೇಷನ್ ಮೂಲಕ ಸಿಬಿಎಸ್ ಟಿಲಿವಿಷನ್ ಮತ್ತು ಎಂಡಮೋಲ್ ಕಂಪನಿ ವಿರುದ್ಧ ಕಾಪಿರೈಟ್ ಉಲ್ಲಂಘನೆಯ ದೂರು ದಾಖಲಾಯಿತು. ಹಲವು ಬಾರಿ ನಡೆದ ವಾದ ಸರಣಿಯಲ್ಲಿ ಸಿಬಿಎಸ್ ಟಿಲಿವಿಷನ್ ಮತ್ತು ಎಂಡಮೋಲ್ ಕಂಪನಿಗೆ ಹಿನ್ನಡೆ ಆಯಿತು. ಬಳಿಕ ಬಹಿರಂಗಪಡಿಸದ ಒಂದು ಮೊತ್ತಕ್ಕೆ ಕೇಸ್ ರಾಜಿ ಮಾಡಿಕೊಳ್ಳಲಾಯಿತು.
ಇದನ್ನೂ ಓದಿ: ‘ಬಿಗ್ ಬಾಸ್ ಕನ್ನಡ ಸೀಸನ್ 10’ ಸುದ್ದಿಗೋಷ್ಠಿ: ಹೊಸ ಸೀಸನ್ ಬಗ್ಗೆ ಕಿಚ್ಚ ಸುದೀಪ್ ಹೇಳೋದೇನು?
ಹಲವು ದೇಶದಲ್ಲಿ ಬಿಗ್ ಬ್ರದರ್:
ನೆದರ್ಲೆಂಡ್, ಅಮೆರಿಕ, ಯುನೈಟೆಡ್ ಕಿಂಗ್ಡಮ್, ಭಾರತ, ಆಫ್ರಿಕಾ, ಅರ್ಜೆಂಟೈನಾ, ಆಸ್ಪ್ರೇಲಿಯಾ, ಬೆಲ್ಜಿಯಂ, ಬ್ರೆಸಿಲ್, ಬಲ್ಗೇರಿಯಾ, ಕೆನಡ, ಚಿಲಿ, ಚೀನಾ, ಕೊಲಂಬಿಯಾ, ಡೆನ್ಮಾರ್ಕ್, ಫಿನ್ಲೆಂಡ್, ಫ್ರಾನ್ಸ್, ಜರ್ಮನಿ, ಗ್ರೀಸ್, ಹಂಗೇರಿಯಾ, ಇಂಡೋನೇಷಿಯಾ, ಇಸ್ರೇಲ್, ಇಟಲಿ, ಮೆಕ್ಸಿಕೋ, ಮಂಗೋಲಿಯಾ, ನೈಜೀರಿಯಾ, ನಾರ್ವೆ, ಪಾಕಿಸ್ತಾನ, ಪನಾಮಾ, ಪೆರು, ಫಿಲಿಪಿಯನ್ಸ್, ಪೋಲೆಂಡ್, ಪೋರ್ಚುಗಲ್, ರೊಮೇನಿಯಾ, ರಷ್ಯಾ, ಸ್ಲೊವೆನಿಯಾ, ದಕ್ಷಿಣ ಆಫ್ರಿಕಾ, ಸ್ಪೇನ್, ಸ್ವೀಡನ್, ಸಿಡ್ಜರ್ಲೆಂಡ್, ಥೈಲೆಂಡ್, ಟರ್ಕಿ, ಉಕ್ರೇನ್, ವಿಯಾಟ್ನಾಂ ಸೇರಿದಂತೆ ಇನ್ನೂ ಅನೇಕ ದೇಶಗಳಲ್ಲಿ ಬಿಗ್ ಬ್ರದರ್ ರಿಯಾಲಿಟಿ ಶೋ ನಡೆಸಲಾಗುತ್ತದೆ. ಕೆಲವು ಕಡೆಗಳಲ್ಲಿ ಶೋ ನಿಲ್ಲಿಸಲಾಗಿದೆ.
ಅತ್ಯಾಚಾರದ ಶಾಕಿಂಗ್ ಘಟನೆ:
ಬಿಗ್ ಬಾಸ್ ಎಂದರೆ ವಿವಾದಗಳು ಇದ್ದೇ ಇರುತ್ತವೆ. ಆದರೆ ಎಲ್ಲದಕ್ಕೂ ಒಂದು ಮಿತಿ ಇರಬೇಕು. ಕೆಲವೊಮ್ಮೆ ಬಿಗ್ ಬಾಸ್ ಮನೆಯೊಳಗೆ ಅತ್ಯಾಚಾರ ನಡೆಯುವ ಹಂತಕ್ಕೂ ಪರಿಸ್ಥಿತಿ ಕೈಮೀರಿ ಹೋದ ಉದಾಹರಣೆ ಇದೆ. ದಕ್ಷಿಣ ಆಫ್ರಿಕಾದ ಬಿಗ್ ಬಾಸ್ ಶೋನಲ್ಲಿ ಈ ಘಟನೆ ನಡೆದಿತ್ತು. ಮಹಿಳೆ ಮತ್ತು ಪುರುಷ ಸ್ಪರ್ಧಿಗಳು ರಾತ್ರಿ ಮಲಗುವುದಕ್ಕೂ ಮುನ್ನ ತುಂಬ ಆಪ್ತವಾಗಿ ನಡೆದುಕೊಂಡಿದ್ದರು. ಆಕೆಯೊಂದಿಗೆ ತಾನು ಲೈಂಗಿಕ ಕ್ರಿಯೆ ನಡೆಸಿದ್ದಾಗಿ ಪುರುಷ ಸ್ಪರ್ಧಿಯು ಮರುದಿನ ಹೇಳಿಕೊಂಡ. ಅದರಿಂದ ಆಕೆಗೆ ಶಾಕ್ ಆಯಿತು. ಅದಕ್ಕೆ ತಮ್ಮ ಅನುಮತಿ ಇರಲಿಲ್ಲ ಎಂದು ಆಕೆ ಹೇಳಿದರು. ಒಪ್ಪಿಗೆ ಇಲ್ಲದೆ ಲೈಂಗಿಕ ಕ್ರಿಯೆ ನಡೆಸಿದ ಆರೋಪದಲ್ಲಿ ಆ ಪುರುಷ ಸ್ಪರ್ಧಿಯನ್ನು ಮನೆಯಿಂದ ಹೊರಗೆ ಕಳಿಸಿ ಅರೆಸ್ಟ್ ಮಾಡಿಸಲಾಯಿತು. ರಕ್ಷಣೆ ಮತ್ತು ಕೌನ್ಸಲಿಂಗ್ ಸಲುವಾಗಿ ಮಹಿಳಾ ಸ್ಪರ್ಧಿಯನ್ನೂ ಮನೆಯಿಂದ ಹೊರಗೆ ಕಳಿಸಲಾಯಿತು. ಬಳಿಕ ಯಾವುದೇ ಸ್ಪರ್ಧಿಗಳು ಇಂತಹ ಅಶ್ಲೀಲ ಕೆಲಸ ಮಾಡಬಾರದು ಎಂದು ಕಟ್ಟುನಿಟ್ಟಾಗಿ ಆದೇಶಿಸಲಾಯಿತು.
ಇದನ್ನೂ ಓದಿ: ‘ಬಾಂಬ್ಗಿಂತಲೂ ಸ್ಫೋಟಕವಾದಂತಹ ಸ್ಪರ್ಧಿಗಳು ಬರ್ತಾರೆ’: ಬಿಗ್ ಬಾಸ್ ಬಗ್ಗೆ ಕೌತುಕ ಹೆಚ್ಚಿಸಿದ ಸಲ್ಮಾನ್ ಖಾನ್
‘ಬಿಗ್ ಬಾಸ್ ಬ್ರೆಜಿಲ್’ನಲ್ಲಿಯೂ ಕೂಡ ಪುರುಷ ಸ್ಪರ್ಧಿಯೊಬ್ಬನು ಅತ್ಯಾಚಾರಕ್ಕೆ ಪ್ರಯತ್ನಿಸಿದನ್ನು ವೀಕ್ಷಕರು ಗಮನಿಸಿದರು. ಬಳಿಕ ಪೊಲೀಸರು ಬಿಗ್ ಬಾಸ್ ಮನೆಗೆ ಬಂದು ಆ ವ್ಯಕ್ತಿಯನ್ನು ಬಂಧಿಸಿದರು. ಆ ವ್ಯಕ್ತಿಯನ್ನು ಟಿವಿ ಶೋನಿಂದ ಬ್ಯಾನ್ ಮಾಡಲಾಯಿತು. 2006ರಲ್ಲಿ ನಡೆದ ಆಸ್ಟ್ರೇಲಿಯಾದ ಬಿಗ್ ಬ್ರದರ್ ಕಾರ್ಯಕ್ರಮದಲ್ಲೂ ಇಬ್ಬರು ಪುರುಷ ಸ್ಪರ್ಧಿಗಳು ಮಹಿಳಾ ಸ್ಪರ್ಧಿಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ್ದರು. ಆ ದೃಶ್ಯವನ್ನು ತಡರಾತ್ರಿ ‘ಬಿಗ್ ಬಾಸ್: ವಯಸ್ಕರಿಗೆ ಮಾತ್ರ’ ಎಂಬ ಸಂಚಿಕೆಯಲ್ಲಿ ಪ್ರಸಾರ ಮಾಡಲಾಯಿತು. ಬಳಿಕ ಆ ಶೋ ರದ್ದು ಮಾಡಲಾಯಿತು. ಲೈಂಗಿಕ ಕಿರುಕುಳ ನೀಡಿದ ಆ ಇಬ್ಬರು ಪುರುಷರನ್ನು ಬಿಗ್ ಬಾಸ್ ಮನೆಯಿಂದ ಹೊರಗೆ ಕಳಿಸಲಾಯಿತು.
ಬಿಗ್ ಬ್ರದರ್ ಗೇಮ್:
ಎಲ್ಲ ಜನಪ್ರಿಯ ಸಿನಿಮಾ, ಕಾದಂಬರಿಯನ್ನು ಆಧರಿಸಿ ಮೊಬೈಲ್ ಗೇಮ್ಗಳು ಬಂದಿವೆ. ಅದೇ ರೀತಿ ಬಿಗ್ ಬ್ರದರ್ ಕಾರ್ಯಕ್ರಮದ ಮೊಬೈಲ್ ಗೇಮ್ ಕೂಡ ಇದೆ. 2020ರ ಮೇ ತಿಂಗಳಲ್ಲಿ ಇದನ್ನು ಅನೌನ್ಸ್ ಮಾಡಲಾಯಿತು. 2020ರ ಅಕ್ಟೋಬರ್ 15ರಂದು ಆ್ಯಪಲ್ ಮತ್ತು ಆ್ಯಂಡ್ರಾಯ್ಡ್ನಲ್ಲಿ ಅಧಿಕೃತವಾಗಿ ಈ ಗೇಮ್ ಲಾಂಚ್ ಆಯಿತು. 2021ರ ಜುಲೈ 29ರಂದು ಇದರ ಮೊದಲ ಸೀಸನ್ ಮುಕ್ತಾಯ ಆಯಿತು. ಅದರ ವಿನ್ನರ್ಗೆ 33,270 ಡಾಲರ್ ಬಹುಮಾನದ ಹಣ ಸಿಕ್ಕಿತು.
ಸ್ಪರ್ಧಿಗಳ ಭವಿಷ್ಯ ಬದಲು:
ಬಿಗ್ ಬಾಸ್ ಕಾರ್ಯಕ್ರಮದಲ್ಲಿ ವಿವಾದಗಳು ಇವೆ ಎಂಬುದು ನಿಜ. ಆದರೆ ಈ ಶೋನಲ್ಲಿ ಭಾಗವಹಿಸಿದ ಅನೇಕ ಸ್ಪರ್ಧಿಗಳಿಗೆ ಹೊಸ ಬದುಕು ಸಿಕ್ಕಿದೆ. ಜನಸಾಮಾನ್ಯರ ವಲಯದಿಂದ ಬಂದ ಸ್ಪರ್ಧಿಗಳು ಈ ಶೋನಲ್ಲಿ ಗಮನ ಸೆಳೆದು, ಸೆಲೆಬ್ರಿಟಿ ಪಟ್ಟ ಪಡೆದ ಉದಾಹರಣೆಗಳೂ ಇವೆ. ಈ ಶೋನಲ್ಲಿ ಭಾಗವಹಿಸಿದವರಿಗೆ ಸಿನಿಮಾಗಳಲ್ಲಿ ಹೇರಳ ಅವಕಾಶ ಸಿಕ್ಕಿದ್ದುಂಟು. 2011ರಲ್ಲಿ ಮಾಜಿ ನೀಲಿ ತಾರೆ ಸನ್ನಿ ಲಿಯೋನ್ ಅವರು ‘ಬಿಗ್ ಬಾಸ್ ಹಿಂದಿ ಸೀಸನ್ 5’ರಲ್ಲಿ ಭಾಗವಹಿಸಿದರು. ಅದರಿಂದ ಭಾರತದಲ್ಲಿ ಅವರಿಗೆ ಸಿಕ್ಕಾಪಟ್ಟೆ ಜನಪ್ರಿಯತೆ ಸಿಕ್ಕಿತು. ಅಶ್ಲೀಲ ಸಿನಿಮಾಗಳ ಹಿನ್ನೆಲೆ ಇರುವ ಅವರನ್ನು ಈ ಕಾರ್ಯಕ್ರಮಕ್ಕೆ ಕರೆತಂದಿದ್ದರಿಂದ ಅನೇಕರು ವಿರೋಧ ಕೂಡ ವ್ಯಕ್ತಪಡಿಸಿದ್ದರು. ಮಾಹಿತಿ ಮತ್ತು ಪ್ರಸಾರ ಸಚಿವಾಲಯಕ್ಕೆ ದೂರು ಕೂಡ ನೀಡಲಾಯಿತು. ಸನ್ನಿ ಲಿಯೋನ್ ಬಿಗ್ ಬಾಸ್ನಲ್ಲಿ ಇದ್ದಾಗಲೇ ನಿರ್ಮಾಪಕ, ನಿರ್ದೇಶಕ ಮಹೇಶ್ ಭಟ್ ಅವರು ‘ಜಿಸ್ಮ್ 2’ ಸಿನಿಮಾದ ಅವಕಾಶ ನೀಡಿದರು. ಅದರಿಂದಾಗಿ ಸನ್ನಿ ಲಿಯೋನ್ ಅವರಿಗೆ ಬಾಲಿವುಡ್ಗೆ ಎಂಟ್ರಿ ನೀಡುವ ಅವಕಾಶ ಸಿಕ್ಕಿತು. ಆ ಬಳಿಕ ಅವರ ಇಮೇಜ್ ಬದಲಾಯಿತು. ಇಂಥ ಹಲವು ಉದಾಹರಣೆಗಳು ಬಿಗ್ ಬಾಸ್ ಮನೆಯಲ್ಲಿ ಸಿಗುತ್ತವೆ.
ಇದನ್ನೂ ಓದಿ: ದಿನದಿನಕ್ಕೂ ಹೆಚ್ಚುತ್ತಿದೆ ಬಿಗ್ ಬಾಸ್ ಬೆಡಗಿ ಸೋನು ಗೌಡ ಗ್ಲಾಮರ್
ಕನ್ನಡದಲ್ಲಿ ಈವರೆಗೆ ವಿನ್ ಆದ ಸ್ಪರ್ಧಿಗಳು:
ಮೊದಲ ಸೀಸನ್: ವಿಜಯ್ ರಾಘವೇಂದ್ರ. ಎರಡನೇ ಸೀಸನ್: ಅಕುಲ್ ಬಾಲಾಜಿ. ಮೂರನೇ ಸೀಸನ್: ಶ್ರುತಿ. ನಾಲ್ಕನೇ ಸೀಸನ್: ಪ್ರಥಮ್. ಐದನೇ ಸೀಸನ್: ಚಂದನ್ ಶೆಟ್ಟಿ. ಆರನೇ ಸೀಸನ್: ಶಶಿ ಕುಮಾರ್. ಏಳನೇ ಸೀಸನ್: ಶೈನ್ ಶೆಟ್ಟಿ. ಎಂಟನೇ ಸೀಸನ್: ಮಂಜು ಪಾವಗಡ. ಒಂಭತ್ತನೇ ಸೀಸನ್: ರೂಪೇಶ್ ಶೆಟ್ಟಿ.
ಕನ್ನಡದಲ್ಲಿ ಎಲ್ಲ 9 ಸೀಸನ್ಗಳನ್ನು ನಟ ಕಿಚ್ಚ ಸುದೀಪ್ ಅವರು ನಿರೂಪಣೆ ಮಾಡಿದ್ದಾರೆ. ಈಗ ಅವರು 10ನೇ ಸೀಸನ್ ನಡೆಸಿಕೊಡಲು ಸಜ್ಜಾಗಿದ್ದಾರೆ. ಹಿಂದಿಯಲ್ಲಿ ಸಲ್ಮಾನ್ ಖಾನ್, ಮಲಯಾಳಂನಲ್ಲಿ ಮೋಹನ್ಲಾಲ್, ತಮಿಳಿನಲ್ಲಿ ಕಮಲ್ ಹಾಸನ್, ತೆಲುಗಿನಲ್ಲಿ ಅಕ್ಕಿನೇನಿ ನಾಗಾರ್ಜುನ ಅವರು ಈ ಶೋ ನಡೆಸಿಕೊಡುತ್ತಿದ್ದಾರೆ. ಭಾರತದಲ್ಲಿ ಬಿಗ್ ಬಾಸ್ ಕಾರ್ಯಕ್ರಮ ಸಖತ್ ಫೇಮಸ್ ಆಗಿದೆ. ದಿನದಿಂದ ದಿನಕ್ಕೆ ಇದರ ಬಿಸ್ನೆಸ್ ಹೆಚ್ಚುತ್ತಿದೆ. ಸಾಕಷ್ಟು ಅದ್ದೂರಿಯಾಗಿ ಕಾರ್ಯಕ್ರಮ ಮೂಡಿಬರುತ್ತಿದೆ. ಕೋಟ್ಯಂತರ ರೂಪಾಯಿ ಬಜೆಟ್ನಲ್ಲಿ ಇದು ನಿರ್ಮಾಣ ಆಗುತ್ತದೆ. ಈ ಬಾರಿ ಕನ್ನಡದಲ್ಲಿ ಹೊಸದಾಗಿ ಬಿಗ್ ಬಾಸ್ ಮನೆ ನಿರ್ಮಾಣ ಆಗಿದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 1:45 pm, Wed, 4 October 23
