‘ಬಾಂಬ್​ಗಿಂತಲೂ ಸ್ಫೋಟಕವಾದಂತಹ ಸ್ಪರ್ಧಿಗಳು ಬರ್ತಾರೆ’: ಬಿಗ್​ ಬಾಸ್​ ಬಗ್ಗೆ ಕೌತುಕ ಹೆಚ್ಚಿಸಿದ ಸಲ್ಮಾನ್​ ಖಾನ್​

ನಟ ಸಲ್ಮಾನ್​ ಖಾನ್​ ಅವರು ಬಿಗ್​ ಬಾಸ್​ (Bigg Boss) ಹೊಸ ಆವೃತ್ತಿಯ ನಿರೂಪಣೆಗೆ ಸಜ್ಜಾಗಿದ್ದಾರೆ. ಕೆಲವೇ ದಿನಗಳಲ್ಲಿ ‘ಬಿಗ್​ ಬಾಸ್​ 17’ (Bigg Boss 17) ಶೋ ಆರಂಭ ಆಗಲಿದೆ. ಆ ಕಾರ್ಯಕ್ರಮ ಲಾಂಚ್​ ಆಗುವುದಕ್ಕೂ ಮುನ್ನ ಬಗೆಬಗೆಯ ಪ್ರೋಮೋಗಳ ಮೂಲಕ ಪ್ರೇಕ್ಷಕರ ಕುತೂಹಲ ಹೆಚ್ಚಿಸುವ ಕೆಲಸ ಆಗುತ್ತಿದೆ. ಅದಕ್ಕಾಗಿ ಇಂಟರೆಸ್ಟಿಂಗ್​ ಆದಂತಹ ಪ್ರೋಮೋಗಳನ್ನು ಮಾಡಿ ಹರಿಬಿಡಲಾಗಿದೆ. ಎಂದಿನಂತೆ ಈ ಬಾರಿ ಕೂಡ ಸಲ್ಮಾನ್​ ಖಾನ್​ (Salman Khan) ಅವರು ಸಖತ್​ ಉತ್ಸಾಹದಲ್ಲಿ ನಿರೂಪಣೆಗೆ ಸಜ್ಜಾಗಿದ್ದಾರೆ. ಹೊಸ ಸೀಸನ್​ನಲ್ಲಿ ಆಟ ಯಾವ ರೀತಿ ಇರಲಿದೆ ಮತ್ತು ಎಂಥ ಸ್ಪರ್ಧಿಗಳು ಬರುತ್ತಾರೆ ಎಂಬುದರ ಝಲಕ್​​ ತೋರಿಸಲು ಮೂರು ಪ್ರೋಮೋಗಳನ್ನು ರಿಲೀಸ್​ ಮಾಡಲಾಗಿದೆ.

ಒಂದು ಪ್ರೋಮೋದಲ್ಲಿ ಸಲ್ಮಾನ್​ ಖಾನ್​ ಅವರು ಕವಾಲಿ ಸಿಂಗರ್​ ರೀತಿ ಕಾಣಿಸಿಕೊಂಡಿದ್ದಾರೆ. ಇನ್ನೊಂದರಲ್ಲಿ ಅವರು ಡಿಟೆಕ್ಟೀವ್​ ವೇಷ ಧರಿಸಿದ್ದಾರೆ. ಮತ್ತೊಂದರಲ್ಲಿ ಬಾಂಬ್​ ನಿಷ್ಕ್ರಿಯ ದಳದ ತಂತ್ರಜ್ಞನಾಗಿ ಕಾಣಿಸಿಕೊಂಡಿದ್ದಾರೆ. ಪ್ರತಿ ಪ್ರೋಮೋದಲ್ಲೂ ಒಂದೊಂದು ಬಗೆಯ ಸುಳಿವು ನೀಡಲಾಗಿದೆ. ಈ ಮೂಲಕ ಬಿಗ್​ ಬಾಸ್​ ಬಗ್ಗೆ ಇರುವ ಕುತೂಹಲ ಹೆಚ್ಚಾಗುವಂತೆ ಮಾಡಲಾಗಿದೆ. ಈ ಬಾರಿ ಯಾವೆಲ್ಲ ಸ್ಪರ್ಧಿಗಳು ಬರಲಿದ್ದಾರೆ ಎಂಬುದನ್ನು ತಿಳಿಯಲು ಪ್ರೇಕ್ಷಕರು ಕಾದಿದ್ದಾರೆ.

ಇದನ್ನೂ ಓದಿ: ಒಂದೆಡೆ ಸುದೀಪ್​, ಇನ್ನೊಂದೆಡೆ ಸಲ್ಮಾನ್​; ಒಟ್ಟಿಗೆ ಅನೌನ್ಸ್​ ಆಯ್ತು ಕನ್ನಡ-ಹಿಂದಿ ಬಿಗ್​ ಬಾಸ್​

ಟೈಮ್​ ಬಾಂಬ್​ ನಿಷ್ಕ್ರಿಯಗೊಳಿಸಲು ಸಲ್ಮಾನ್​ ಖಾನ್​ ಬರುತ್ತಾರೆ. ಅಲ್ಲಿರುವ ಬಾಂಬ್​ ನೋಡಿ, ‘ಇದೆಂಥಾ ಬಾಂಬ್​.. ಇದಕ್ಕಿಂತಲೂ ಸ್ಫೋಟಕವಾದಂತಹ ಸ್ಪರ್ಧಿಗಳು ಬರ್ತಾರೆ. ಅಲ್ವಾ ಬಿಗ್​ ಬಾಸ್​’ ಎಂದು ಸಲ್ಲು ಕೇಳ್ತಾರೆ. ‘ಯಾರಿಗೆ ಗುಂಡಿಗೆಯಲ್ಲಿ ಧೈರ್ಯ ಇದೆಯೋ ಅಂಥವರಿಗೆ ಬಿಗ್​ ಬಾಸ್​ ಮನೆಯೊಳಗೆ ಸ್ವಾಗತ’ ಎಂದು ಬಿಗ್​ ಬಾಸ್​ ಹೇಳುತ್ತಾರೆ. ‘ಈ ಬಾರಿ ಹೃದಯ, ಬುದ್ಧಿ ಮತ್ತು ಶಕ್ತಿಯ ಆಟ ನಡೆಯುತ್ತದೆ’ ಎಂಬ ಕ್ಯಾಪ್ಷನ್​ ಗಮನ ಸೆಳೆಯುತ್ತಿದೆ. ಒಂದಷ್ಟು ಹೊಸ ಟ್ವಿಸ್ಟ್​ಗಳನ್ನು ಹೊಸ ಸೀಸನ್​ನಲ್ಲಿ ಪರಿಚಯಿಸಲಾಗುತ್ತಿದೆ.

ಹಲವು ವರ್ಷಗಳಿಂದ ಸಲ್ಮಾನ್​ ಖಾನ್ ಅವರು ಬಿಗ್​ ಬಾಸ್​ ಶೋ ನಿರೂಪಣೆ ಮಾಡುತ್ತಾ ಬಂದಿದ್ದಾರೆ. ಅವರಿಗೆ ದೊಡ್ಡ ಅಭಿಮಾನಿ ಬಳಗ ಇದೆ. ಪ್ರತಿ ವೀಕೆಂಡ್​ನಲ್ಲಿ ಅವರು ನಡೆಸಿಕೊಡುವ ಎಪಿಸೋಡ್​ಗಳನ್ನು ನೋಡಲು ಫ್ಯಾನ್ಸ್​ ಕಾಯುತ್ತಿದ್ದಾರೆ. ಇದರ ಜೊತೆಗೆ ‘ಟೈಗರ್​ 3’ ಸಿನಿಮಾದ ಕೆಲಸಗಳಲ್ಲೂ ಸಲ್ಲು ಬ್ಯುಸಿ ಆಗಿದ್ದಾರೆ. ಈ ವರ್ಷ ದೀಪಾವಳಿ ಹಬ್ಬದ ಸಮಯದಲ್ಲಿ ಆ ಚಿತ್ರ ಬಿಡುಗಡೆ ಆಗಲಿದೆ. ಶೀಘ್ರದಲ್ಲೇ ಟೀಸರ್​ ಬರಲಿದ್ದು, ಆ ಬಳಿಕ ಟ್ರೇಲರ್​ ರಿಲೀಸ್​ ಆಗಲಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.