ಉಳಿದ ನಾಲ್ವರಲ್ಲಿ ಯಾರಾಗಲಿದ್ದಾರೆ ಬಿಗ್​ಬಾಸ್ ಮನೆಯ ಮುಂದಿನ ನಾಯಕ?

ಬಿಗ್​ಬಾಸ್ (Bigg Boss) ಮನೆಯಲ್ಲಿ ಈ ವಾರ ಟಾಸ್ಕ್​ಗಳ ಅಬ್ಬರ ಜೋರಾಗಿತ್ತು. ಹಲವು ಭಿನ್ನ-ಭಿನ್ನ ಟಾಸ್ಕ್​ಗಳನ್ನು ಸ್ಪರ್ಧಿಗಳಿಗೆ ಬಿಗ್​ಬಾಸ್ ನೀಡಿದ್ದರು. ಶಕ್ತಿ, ಯುಕ್ತಿ, ಒಗ್ಗಟ್ಟು, ಚತುರತೆ ಬೇಡುವ ಹಲವು ಟಾಸ್ಕ್​ಗಳಲ್ಲಿ ಎರಡು ಗುಂಪುಗಳಾಗಿ ಮನೆಯ ಸದಸ್ಯರು ಆಡಿದರು. ಯಾರ ತಂಡ ಹೆಚ್ಚು ಟಾಸ್ಕ್​ಗಳಲ್ಲಿ ಗೆದ್ದು ವಿಜಯಿಯಾಗುತ್ತದೆಯೋ ಆ ತಂಡದ ಸದಸ್ಯರು ನಾಯಕತ್ವದ ಟಾಸ್ಕ್​ಗೆ ಆಯ್ಕೆ ಆಗುತ್ತಾರೆ ಹಾಗೂ ಲಕ್ಷುರಿ ಟಾಸ್ಕ್​ಗೂ ಅರ್ಹತೆ ಪಡೆಯುತ್ತಾರೆ ಎಂದಿತ್ತು. ಹಾಗಾಗಿ ಎರಡೂ ತಂಡದ ಸದಸ್ಯರು ಶಕ್ತಿಮೀರಿ ಆಟಗಳನ್ನು ಆಡಿದರು.

ಭಜರಂಗಿ ಹಾಗೂ ಉಗ್ರಂ ಎಂಬ ಎರಡು ತಂಡಗಳನ್ನಾಗಿ ಮಾಡಿ ಅದಕ್ಕೆ ಮಹಿಳೆಯರ ನಾಯಕತ್ವವನ್ನು ವಹಿಸಲಾಗಿತ್ತು. ಎರಡೂ ತಂಡಗಳು ಪ್ರತಿಯೊಂದು ಟಾಸ್ಕ್​ನಲ್ಲಿಯೂ ಜಿದ್ದಾಜಿದ್ದಿನ ಸ್ಪರ್ಧೆಯನ್ನು ನೀಡಿದವು. ಕೆಲವನ್ನು ತನಿಷಾ ತಂಡ ಗೆದ್ದರೆ ಇನ್ನು ಕೆಲವನ್ನು ನಮ್ರತಾ ಗೌಡರ ತಂಡ ಗೆದ್ದು ಕೊಂಡಿತು. ಆದರೆ ಗುರುವಾರ ನಡೆದ ವಾರದ ಕೊನೆಯ ಟಾಸ್ಕ್​ಗಳಲ್ಲಿ ಹೆಚ್ಚಿನ ಪಾಲನ್ನು ಗೆದ್ದಿದ್ದು ತನಿಷಾರ ತಂಡ.

ಮೊದಲಿಗೆ ನಡೆದ ಡ್ರಮ್ ಮೇಲೆ ನಿಂತು ಆಡುವ ಜೂಟಾಟದಲ್ಲಿ ತನಿಷಾ ಹಾಗೂ ನಮ್ರತಾ ಪರಸ್ಪರ ಸ್ಪರ್ಧಿಸಿದರು. ಆ ಆಟದಲ್ಲಿ ತನಿಷಾ ವಿಜಯಿಯಾದರು. ಆ ಬಳಿಕ ನಡೆದ ಬಕೆಟ್​ ನಲ್ಲಿ ಒದ್ದೆ ಚೆಂಡು ಎಸೆಯುವ ಟಾಸ್ಕ್​ನಲ್ಲಿಯೂ ತನಿಷಾ ತಂಡವೇ ಗೆದ್ದಿತು. ಆ ಟಾಸ್ಕ್​ ಬಳಿಕ ತನಿಷಾರ ತಂಡವು ತಮ್ಮ ಅಧಿಕಾರ ಬಳಸಿ ವಿನಯ್ ಅವರನ್ನು ಮುಂದಿನ ವಾರ ಎಲ್ಲ ಟಾಸ್ಕ್​ನಿಂದ ಹೊರಗಿಟ್ಟರು. ಅದರ ಬಳಿಕ ಆಡಲಾದ ಕಾಲಿನಿಂದ ಮರದ ಸಣ್ಣ ಆಕೃತಿಗಳನ್ನು ಜೋಡಿಸುವ ಟಾಸ್ಕ್​ನಲ್ಲಿಯೂ ತನಿಷಾರ ತಂಡವೇ ಗೆದ್ದಿತು. ಮೈಖಲ್ ಅದ್ಭುತವಾಗಿ ಆಡಿ ಕಾರ್ತಿಕ್​ರನ್ನು ಸೋಲಿಸಿದರು.

ಇದನ್ನೂ ಓದಿ:ಬಿಗ್​ಬಾಸ್ ಮನೆಗೆ ಹಬ್ಬ ತಂದ ತಾರಾ, ಅಂತರಂಗ ತೆರೆದಿಟ್ಟ ಡ್ರೋನ್ ಪ್ರತಾಪ್

ಎಲ್ಲ ಟಾಸ್ಕ್ ಗೆದ್ದ ತನಿಷಾರ ತಂಡದ ಸದಸ್ಯರಿಗೆ ನಾಯಕತ್ವದಲ್ಲಿ ಭಾಗಿಯಾಗುವ ಅವಕಾಶ ದೊರೆಯಿತು. ಜೊತೆಗೆ ಲಕ್ಷುರಿ ಟಾಸ್ಕ್​ನಲ್ಲಿ ಭಾಗಿಯಾಗುವ ಅವಕಾಶವೂ ಸಹ ಲಭಿಸಿತು. ಆದರೆ ಇದರಲ್ಲಿ ಸಣ್ಣ ಟ್ವಿಸ್ಟ್ ಕೊಟ್ಟ ಬಿಗ್​ಬಾಸ್, ನಾಯಕನ ಆಯ್ಕೆಯ ಟಾಸ್ಕ್​ಗೆ ನಾಲ್ಕು ಮಂದಿ ಮಾತ್ರವೇ ಬೇಕಿದ್ದು, ನಿಮ್ಮ ತಂಡದಿಂದ ಮೂವರನ್ನು ಟಾಸ್ಕ್​ ನಿಂದ ಹೊರಗಿಡಿ ಎಂದರು. ಆಗ ತನಿಷಾ, ಡ್ರೋನ್ ಪ್ರತಾಪ್, ಇಶಾನಿ ಹಾಗೂ ಮೊದಲ ವಾರ ಕ್ಯಾಪ್ಟನ್ ಆಗಿದ್ದ ಸ್ನೇಹಿತ್​ರನ್ನು ಟಾಸ್ಕ್​ನಿಂದ ಹೊರಗಿಟ್ಟರು. ಇದೀಗ ತನಿಷಾ, ತುಕಾಲಿ ಸಂತು, ನೀತು ಹಾಗೂ ಮೈಖಲ್ ಅವರುಗಳು ನಾಯಕನ ಟಾಸ್ಕ್​ನಲ್ಲಿ ಉಳಿದುಕೊಂಡಿದ್ದಾರೆ. ಇವರಲ್ಲಿ ಯಾರು ಮನೆಯ ಕ್ಯಾಪ್ಟನ್ ಆಗಲಿದ್ದಾರೆ ಎಂಬುದು ಶುಕ್ರವಾರದ ಎಪಿಸೋಡ್​ನಲ್ಲಿ ಗೊತ್ತಾಗಲಿದೆ. ಬಿಗ್​ಬಾಸ್ ಕನ್ನಡ ಸೀಸನ್10 ಕಲರ್ಸ್ ವಾಹಿನಿಯಲ್ಲಿ ಪ್ರತಿದಿನ ರಾತ್ರಿ 9:30ಕ್ಕೆ ಹಾಗೂ ಜಿಯೋ ಸಿನಿಮಾಸ್​ನಲ್ಲಿ ಪ್ರತಿದಿನ ಲೈವ್ ಪ್ರಸಾರವಾಗುತ್ತಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ