ಶುರುವಾಯ್ತು ಮರಾಠಿ ಬಿಗ್ಬಾಸ್ 5, ಸುದೀಪ್ ಆಪ್ತ ನಿರೂಪಕ
Bigg Boss Marathi: ಮರಾಠಿ ಬಿಗ್ಬಾಸ್ ಸೀಸನ್ 5 ಪ್ರಾರಂಭವಾಗುತ್ತಿದೆ. ಕಿಚ್ಚ ಸುದೀಪ್ರ ಆಪ್ತ ಗೆಳೆಯ ರಿತೇಶ್ ಈ ಬಾರಿ ಶೋ ನಿರೂಪಣೆ ಮಾಡಲಿದ್ದಾರೆ. ಬಿಗ್ಬಾಸ್ ಮರಾಠಿ ಶೋಗೆ ಈ ಬಾರಿ ತುಸು ಗ್ಲಾಮರ್ ತುಂಬಲಾಗಿದೆ.
Updated on: Jul 28, 2024 | 7:42 AM
ಮತ್ತೆ ಬಿಗ್ಬಾಸ್ ಋತು ಪ್ರಾರಂಭವಾಗುತ್ತಿದೆ. ಈಗಾಗಲೇ ಹಿಂದಿಯಲ್ಲಿ ಬಿಗ್ಬಾಸ್ ಒಟಿಟಿ ಪ್ರಾರಂಭವಾಗಿದೆ. ಇನ್ನು ಕೆಲವು ಭಾಷೆಗಳಲ್ಲಿ ಬಿಗ್ಬಾಸ್ ಟಿವಿ ಸೀಸನ್ ಪ್ರಾರಂಭವಾಗುತ್ತಿದೆ. ತೆಲುಗು ಬಿಗ್ಬಾಸ್ ಇನ್ನೇನು ಕೆಲವು ದಿನಗಳಲ್ಲಿ ಆರಂಭವಾಗಲಿದೆ. ಹಿಂದಿ ಬಿಗ್ಬಾಸ್ಗೆ ಸಿದ್ಧತೆ ನಡೆಯುತ್ತಿದೆ. ಕನ್ನಡದಲ್ಲಿಯೂ ಸಿದ್ಧತೆ ಆರಂಭವಾಗಿದೆ. ಇದರ ನಡುವೆ ಮರಾಠಿ ಬಿಗ್ಬಾಸ್ ಇಂದಿನಿಂದ ಆರಂಭವಾಗುತ್ತಿದೆ.
ಮರಾಠಿ ಬಿಗ್ಬಾಸ್ ಸೀಸನ್ 5 ಇಂದು (ಜುಲೈ 28) ಆರಂಭವಾಗುತ್ತಿದ್ದು, ಕಾರ್ಯಕ್ರಮದ ಪ್ರೋಮೋಗಳು, ಸ್ಪರ್ಧಿಗಳ ಪಟ್ಟಿ ಈಗಾಗಲೇ ವೈರಲ್ ಆಗುತ್ತಿದೆ. ವಿಶೇಷವೆಂದರೆ ಮರಾಠಿ ಬಿಗ್ಬಾಸ್ ಆರಂಭವಾದಾಗಿನಿಂದಲೂ ಇದೇ ಮೊದಲ ಬಾರಿಗೆ ಶೋನ ನಿರೂಪಕರು ಬದಲಾಗಿದ್ದು, ಕಿಚ್ಚ ಸುದೀಪ್ರ ಆಪ್ತ ಗೆಳೆಯ ರಿತೇಶ್ ದೇಶ್ಮುಖ್ ಈ ಬಾರಿ ಕಾರ್ಯಕ್ರಮ ನಿರೂಪಣೆ ಮಾಡಲಿದ್ದಾರೆ.
ಹಿಂದಿ, ಕನ್ನಡ, ತೆಲುಗು, ತಮಿಳಿಗೆ ಹೋಲಿಸಿದರೆ ಮರಾಠಿ ಬಿಗ್ಬಾಸ್ ಹೆಚ್ಚು ಯಶಸ್ಸು ಕಂಡಿರಲಿಲ್ಲ. ಆದರೆ ಕಳೆದೆರಡು ಸೀಸನ್ಗಳಿಂದ ತುಸು ಚೇತರಿಕೆ ಕಂಡಿದೆ. ಅದೇ ಕಾರಣಕ್ಕೆ ಈ ಬಾರಿ ನಿರೂಪಕರನ್ನು ಬದಲಾಯಿಸಿದ್ದು, ಶೋಗೆ ಇನ್ನಷ್ಟು ಮಾದಕತೆ, ಗ್ಲಾಮರ್ ತುಂಬುವ ಪ್ರಯತ್ನ ಮಾಡಲಾಗುತ್ತಿದೆ. ಇದೇ ಕಾರಣಕ್ಕೆ ರಿತೇಶ್ ದೇಶ್ಮುಖ್ ಅವರನ್ನು ನಿರೂಪಕರನ್ನಾಗಿ ಆಯ್ಕೆ ಮಾಡಲಾಗಿದ್ದು, ಗ್ಲಾಮರಸ್ ಬ್ಯೂಟಿ ನಿಕ್ಕಿ ತಾಂಬೋಲಿ ಸೇರಿದಂತೆ ಇನ್ನೂ ಕೆಲವು ಯುವ ನಟ-ನಟಿಯರನ್ನು ಸ್ಪರ್ಧಿಗಳನ್ನಾಗಿ ಆಯ್ಕೆ ಮಾಡಲಾಗಿದೆ. ಈ ಹಿಂದೆ ಮರಾಠಿ ಬಿಗ್ಬಾಸ್ ಶೋ ಅನ್ನು ಹಿರಿಯ ನಟ, ನಿರ್ದೇಶಕ ಮಹೇಶ್ ಮಾಂಜ್ರೆಕರ್ ನಿರೂಪಣೆ ಮಾಡುತ್ತಿದ್ದರು.
ಇದನ್ನೂ ಓದಿ:ಬಿಗ್ ಬಾಸ್ ಮನೆಯ ಸೆ* ವಿಡಿಯೋ ವೈರಲ್; ತಪ್ಪು ಮಾಡಿದ ಪತಿಯನ್ನು ವಹಿಸಿಕೊಂಡು ಬಂದ ಪತ್ನಿ
ರಿತೇಶ್ ದೇಶ್ಮುಖ್ ಮತ್ತು ಕಿಚ್ಚ ಸುದೀಪ್ ಅತ್ಯಾಪ್ತ ಗೆಳೆಯರು. ಸುದೀಪ್ ನಟಿಸಿದ ಮೊದಲ ಹಿಂದಿ ಸಿನಿಮಾ ‘ರಣ್’ನಲ್ಲಿ ರಿತೇಶ್ ದೇಶ್ಮುಖ್ ಸಹ ನಾಯಕನಾಗಿ ನಟಿಸಿದ್ದರು. ಆ ಸಿನಿಮಾದಲ್ಲಿ ಅಮಿತಾಬ್ ಬಚ್ಚನ್ ಸಹ ನಟಿಸಿದ್ದರು. ಆ ಸಿನಿಮಾದಿಂದ ಈವರೆಗೆ ರಿತೇಶ್ ಹಾಗೂ ಸುದೀಪ್ ಆಪ್ತ ಗೆಳೆಯರು. ರಿತೇಶ್ರ ಪತ್ನಿ ಜೆನಿಲಿಯಾ ದೇಶ್ಮುಖ್ ಸಹ ಸುದೀಪ್ರ ಆಪ್ತ ಗೆಳತಿ. ಇದೀಗ ಬಿಡುಗಡೆ ಆಗಿರುವ ಮರಾಠಿ ಪ್ರೋಮೋನಲ್ಲಿ ಸಹ ರಿತೇಶ್ ದೇಶ್ಮುಖ್, ಸುದೀಪ್ರ ಸ್ಟೈಲ್ ಅನ್ನೇ ಕಾಪಿ ಮಾಡಿದ್ದಾರೆ.
ಬಿಗ್ಬಾಸ್ ಒಟಿಟಿ ಪ್ರಸ್ತುತ ಚಾಲ್ತಿಯಲ್ಲಿದ್ದು, ನಟ ಅನಿಲ್ ಕಪೂರ್ ಆ ಶೋ ನಿರೂಪಣೆ ಮಾಡುತ್ತಿದ್ದಾರೆ. ತೆಲುಗು ಬಿಗ್ಬಾಸ್ಗೆ ಸಿದ್ಧತೆ ಆರಂಭವಾಗಿದ್ದು ಕೆಲವು ಸ್ಪರ್ಧಿಗಳು ಖಾತ್ರಿ ಆಗಿದ್ದಾರೆ. ಹೋಟೆಲ್ ಆಂಟಿ, ಅಮೃತಾ ಪ್ರಣಯ್ ಸೇರಿದಂತೆ ಕೆಲವು ಜನಪ್ರಿಯ ಸ್ಪರ್ಧಿಗಳು ಶೋನಲ್ಲಿ ಭಾಗಿಯಾಗಲಿದ್ದಾರೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
