ಬಿಗ್​​ಬಾಸ್ ಮನೆಗೆ ಹೋಗಲು ಇಲ್ಲಿದೆ ಅವಕಾಶ, ಮಾಡಬೇಕಾಗಿದ್ದು ಇಷ್ಟೆ

ಬಿಗ್​​ಬಾಸ್ ಕನ್ನಡ ಸೀಸನ್ 12 (Bigg Boss Kannada season 12) ಕೆಲವೇ ದಿನಗಳಲ್ಲಿ ಆರಂಭ ಆಗಲಿದೆ. ನಟ ಸುದೀಪ್ ಅವರು ಈಗಾಗಲೇ ಬಿಗ್​​ಬಾಸ್ ಆರಂಭದ ದಿನಾಂಕ ಘೋಷಣೆ ಮಾಡಿದ್ದಾರೆ. ಸೆಪ್ಟೆಂಬರ್ 28 ರಂದು ಬಿಗ್​​ಬಾಸ್ ಕನ್ನಡ ಸೀಸನ್ 12ರ ಗ್ರ್ಯಾಂಡ್ ಓಪನಿಂಗ್ ಆಗಲಿದೆ. ಈ ಬಾರಿಯ ಬಿಗ್​​ಬಾಸ್ ಸೀಸನ್ 12 ರಲ್ಲಿ ಭಾಗಿ ಆಗುವ ಸ್ಪರ್ಧಿಗಳು ಸಹ ಅಂತಿಮಗೊಂಡಿದ್ದಾರೆ. ಆದರೆ ಇದೀಗ ಬಿಗ್​​ಬಾಸ್ ಮನೆಗೆ ಹೋಗಲು ಸಾಮಾನ್ಯರಿಗೆ ಸಹ ಅವಕಾಶ ಕಲ್ಪಿಸಲಾಗಿದೆ.

ಬಿಗ್​​ಬಾಸ್ ಮನೆಗೆ ಜನ ಸಾಮಾನ್ಯರು ಈ ಹಿಂದೆ ಸ್ಪರ್ಧಿಗಳಾಗಿ ಹೋಗಿದ್ದರು. ಆದರೆ ಈ ಬಾರಿ ಸ್ಪರ್ಧಿಯಾಗಿ ಮಾತ್ರವಲ್ಲದೆ ಅತಿಥಿಯಾಗಿ ಸಹ ಹೋಗುವ ಅವಕಾಶ ನೀಡಲಾಗಿದೆ. ಆದರೆ ಅತಿಥಿಯಾಗಿ ಹೋಗಬೇಕೆಂದರೆ ವೀಕ್ಷಕರು ಸಣ್ಣ ಪರೀಕ್ಷೆಯೊಂದನ್ನು ಪಾಸು ಮಾಡಬೇಕಿದೆ. ಈ ಬಗ್ಗೆ ಬಿಗ್​​ಬಾಸ್ ಪ್ರೊಮೋ ಹೊರಡಿಸಿದ್ದು, ಸ್ವತಃ ಸುದೀಪ್ ಅವರು ಪ್ರೇಕ್ಷಕರನ್ನು ಬಿಗ್​​ಬಾಸ್ ಮನೆಗೆ ಸ್ವಾಗತಿಸಿದ್ದಾರೆ.

ಕಲರ್ಸ್​​ ವಾಹಿನಿಯಲ್ಲಿ ಪ್ರಸಾರವಾಗುವ ‘ದೃಷ್ಟಿಬೊಟ್ಟು’, ‘ಪ್ರೇಮಕಾವ್ಯ’, ‘ಭಾಗ್ಯಲಕ್ಷ್ಮಿ’, ‘ಮುದ್ದುಸೊಸೆ’, ‘ನಿನಗಾಗಿ’, ‘ಭಾರ್ಗವಿ’, ‘ನಂದಗೋಕುಲ’, ‘ಯಜಮಾನ, ‘ರಾಮಚಾರಿ’ ಧಾರಾವಾಹಿಗಳನ್ನು ಪ್ರತಿದಿನವೂ ನೋಡಿ, ಆ ಧಾರಾವಾಹಿಗಳ ಎಪಿಸೋಡ್​​ಗಳು ಮುಗಿದ ಬಳಿಕ ಅವುಗಳ ಬಗ್ಗೆ ಕೇಳಲಾಗುವ ಪ್ರಶ್ನೆಗಳಿಗೆ ಜಿಯೋ ಹಾಟ್​​ಸ್ಟಾರ್ ಬಳಕೆ ಮಾಡಿ ಉತ್ತರ ನೀಡಬೇಕಿದೆ. ಹೀಗೆ ಪ್ರತಿಬಾರಿ ಸರಿ ಉತ್ತರ ಕೊಟ್ಟು ಆಯ್ಕೆ ಆಗುವ ಅದೃಷ್ಟಶಾಲಿಗಳನ್ನು ಬಿಗ್​​ಬಾಸ್​​ ಇನ್ಯಾಗುರೇಷನ್​​​ಗೆ ಅತಿಥಿಗಳಾಗಿ ಆಹ್ವಾನಿಸಲಾಗುತ್ತದೆ.

ಇದನ್ನೂ ಓದಿ:ಬಿಗ್​ಬಾಸ್ ಗೌತಮಿ, ರಿಷಿ ನಟನೆಯ ಹೊಸ ಸಿನಿಮಾ ಮುಹೂರ್ತ: ವಿಡಿಯೋ

ಅತಿಥಿಗಳಾಗಿ ಕೇವಲ ಒಬ್ಬರನ್ನು ಮಾತ್ರವಲ್ಲ, ಹಲವರನ್ನು ಆಯ್ಕೆ ಮಾಡುವ ಸಾಧ್ಯತೆ ಇದೆ. ಬಿಗ್​​ಬಾಸ್ ಸೆಪ್ಟೆಂಬರ್ 28ಕ್ಕೆ ಆರಂಭ ಆಗಲಿದೆ. ಅದೇ ದಿನದಂದು ಆಯ್ಕೆ ಆದವರು ಬಿಗ್​​ಬಾಸ್ ಮನೆಗೆ ಅತಿಥಿಗಳಾಗಿ ಎಂಟ್ರಿ ನೀಡಲಿದ್ದಾರೆ. ಜೊತೆಗೆ ನೇರವಾಗಿ ಬಿಗ್​​ಬಾಸ್ ಇನ್ಯಾಗುರೇಷನ್ ಕಾರ್ಯಕ್ರಮ ನೋಡುವ ಅವಕಾಶವನ್ನೂ ಸಹ ಪಡೆಯಲಿದ್ದಾರೆ.

View this post on Instagram

A post shared by Colors Kannada Official (@colorskannadaofficial)

ಬಿಗ್​​ಬಾಸ್ 12 ಹಲವು ಕಾರಣಗಳಿಗೆ ವಿಶೇಷ ಮತ್ತು ಭಿನ್ನವಾಗಿರಲಿದೆ ಎಂದು ಈ ಹಿಂದೆಯೇ ಆಯೋಜಕರು ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ. ಕಳೆದ ಬಾರಿ ಬೆಂಗಳೂರಿನ ಹೊರವಲಯದಲ್ಲಿ ಜಾಗ ಪಡೆದು ಬಿಗ್​ಬಾಸ್ ಮನೆ ನಿರ್ಮಾಣ ಮಾಡಲಾಗಿತ್ತು. ಆದರೆ ಆ ಜಾಗದ ಬಗ್ಗೆ ಸಾಕಷ್ಟು ವಿವಾದಗಳು ಕೇಳಿ ಬಂದವು. ಹಾಗಾಗಿ ಈ ಬಾರಿ ಇನ್ನೋವೇಟಿವ್ ಫಿಲಂ ಸಿಟಿಯಲ್ಲಿ ಬಿಗ್​​ಬಾಸ್ ಮನೆಯನ್ನು ನಿರ್ಮಾಣ ಮಾಡಲಾಗಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 6:37 pm, Sat, 6 September 25