ಸುದೀಪ್ ಇಲ್ಲದ ಬಿಗ್ ಬಾಸ್ ಊಹಿಸಿಕೊಳ್ಳಲು ಸಾಧ್ಯವೇ? ಹೇಗಿರತ್ತೆ ನೋಡಿ ಸ್ಪರ್ಧಿಗಳ ಪರಿಸ್ಥಿತಿ
‘ಕಾರಣಾಂತರಗಳಿಂದ ಸುದೀಪ್ ಅವರು ಕೇವಲ ದೂರವಾಣಿ ಮೂಲಕ ಮಾತ್ರ ಈ ಕಾರ್ಯಕ್ರಮಕ್ಕೆ ಬರುತ್ತಾರೆ’ ಎಂದು ಅಕುಲ್ ಬಾಲಾಜಿ ಹೇಳುತ್ತಿದ್ದಂತೆಯೇ ದೊಡ್ಮನೆಯ ಸದಸ್ಯರ ಮುಖ ಬಾಡಿಹೋಯಿತು.
ಕನ್ನಡ ಬಿಗ್ ಬಾಸ್ ಈವರೆಗೂ 8 ಸೀಸನ್ಗಳನ್ನು ಯಶಸ್ವಿಯಾಗಿ ಮುಗಿಸಿದೆ. ಪ್ರತಿ ಸೀಸನ್ನಲ್ಲೂ ಕಿಚ್ಚ ಸುದೀಪ್ ಅವರು ನಿರೂಪಣೆಯ ಜವಾಬ್ದಾರಿಯನ್ನು ನಿಭಾಯಿಸಿದ್ದಾರೆ. ಅವರ ನಿರೂಪಣೆ ಎಂದರೆ ಅಭಿಮಾನಿಗಳಿಗೆ ಸಖತ್ ಇಷ್ಟ. ಆ ಕಾರಣಕ್ಕಾಗಿಯೇ ವೀಕೆಂಡ್ನಲ್ಲಿ ಬಿಗ್ ಬಾಸ್ ನೋಡುವವರ ಸಂಖ್ಯೆ ದೊಡ್ಡದಿದೆ. ವೀಕ್ಷಕರಿಗೆ ಮಾತ್ರವಲ್ಲದೆ, ಬಿಗ್ ಬಾಸ್ ಸ್ಪರ್ಧಿಗಳಿಗೂ ಕೂಡ ಸುದೀಪ್ ಇದ್ದರೆ ಉತ್ಸಾಹ ಗರಿಗೆದರುತ್ತದೆ. ಒಂದು ವೇಳೆ ಈ ಶೋನಲ್ಲಿ ಸುದೀಪ್ ಇಲ್ಲದಿದ್ದರೆ ಪರಿಸ್ಥಿತಿ ಹೇಗಿರುತ್ತದೆ? ಬಿಗ್ ಬಾಸ್ ಮಿನಿ ಸೀಸನ್ನ ವೇದಿಕೆಯಲ್ಲಿ ಇಂಥದ್ದೊಂದು ಪ್ರಶ್ನೆ ಹುಟ್ಟಿಕೊಂಡಿತು.
‘ಬಿಗ್ ಬಾಸ್ ಕನ್ನಡ ಸೀಸನ್ 8’ ಮುಗಿದ ಕೂಡಲೇ ಬಿಗ್ ಬಾಸ್ ಮಿನಿ ಸೀಸನ್ ಆರಂಭ ಆಗಿತ್ತು. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುವ ಧಾರಾವಾಹಿಗಳ 15 ಸೆಲೆಬ್ರಿಟಿಗಳಿಗೆ ದೊಡ್ಮನೆ ಪ್ರವೇಶಿಸುವ ಅವಕಾಶ ಸಿಕ್ಕಿತ್ತು. 6 ದಿನಗಳ ಕಾಲ ಅವರೆಲ್ಲ ಬಿಗ್ ಬಾಸ್ ಮನೆಯಲ್ಲಿ ಕಾಲ ಕಳೆದಿದ್ದಾರೆ. ಅದರ ಫಿನಾಲೆ ಶೋಗೆ ಸುದೀಪ್ ಅವರು ನಿರೂಪಣೆ ಮಾಡುತ್ತಾರೆ ಎಂದು ಮೊದಲೇ ತಿಳಿಸಲಾಗಿತ್ತು. ಆದರೆ ಕೊನೇ ಕ್ಷಣದಲ್ಲಿ ಒಂದು ಚಮಕ್ ನೀಡಲಾಯಿತು.
‘ಕಾರಣಾಂತರಗಳಿಂದ ಸುದೀಪ್ ಅವರು ಕೇವಲ ದೂರವಾಣಿ ಮೂಲಕ ಮಾತ್ರ ಈ ಕಾರ್ಯಕ್ರಮಕ್ಕೆ ಬರುತ್ತಾರೆ’ ಎಂದು ಅಕುಲ್ ಬಾಲಾಜಿ ಹೇಳುತ್ತಿದ್ದಂತೆಯೇ ದೊಡ್ಮನೆಯ ಸದಸ್ಯರ ಮುಖ ಬಾಡಿಹೋಯಿತು. ಫಿನಾಲೆ ವೇದಿಕೆಯಲ್ಲಿ ಸುದೀಪ್ ಅವರನ್ನು ನೋಡಬೇಕು, ಅವರೊಂದಿಗೆ ಮಾತನಾಡಬೇಕು ಎಂದುಕೊಂಡಿದ್ದ ಎಲ್ಲ ಸ್ಪರ್ಧಿಗಳಿಗೂ ತೀವ್ರ ನಿರಾಸೆ ಆಯಿತು. ಆದರೆ ಅದು ಸ್ವಲ್ಪ ಹೊತ್ತು ಮಾತ್ರ. ಸುಮ್ಮನೆ ಪ್ರ್ಯಾಂಕ್ ಮಾಡಲು ಹೀಗೆ ಹೇಳಲಾಗಿತ್ತು ಎಂಬುದನ್ನು ನಂತರ ತಿಳಿಸಲಾಯಿತು. ಆಗ ಬಿಗ್ ಬಾಸ್ ಸ್ಪರ್ಧಿಗಳ ಮುಖ ಅರಳಿತು.
ಬಿಗ್ ಬಾಸ್ ಮಿನಿ ಸೀಸನ್ನ ಫಿನಾಲೆ ಎಪಿಸೋಡ್ಗಳು ಶನಿವಾರ (ಸೆಪ್ಟೆಂಬರ್ 4) ಮತ್ತು ಭಾನುವಾರ (ಸೆಪ್ಟೆಂಬರ್ 5) ಮಧ್ಯಾಹ್ನ 3 ಗಂಟೆಗೆ ಪ್ರಸಾರ ಆಗುತ್ತಿವೆ. ಕಿರಣ್ ರಾಜ್, ಕೌಸ್ತುಭ, ಗಗನ್ ಚಿನ್ನಪ್ಪ, ವೈಷ್ಣವಿ, ನಿರಂಜನ್ ದೇಶಪಾಂಡೆ, ಅಕುಲ್ ಬಾಲಾಜಿ, ರಮೋಲಾ ಸೇರಿದಂತೆ ಅನೇಕರು ಈ ಮಿನಿ ಸೀಸನ್ನಲ್ಲಿ ಪಾಲ್ಗೊಂಡಿದ್ದಾರೆ. ಅದ್ದೂರಿ ವೇದಿಕೆಯಲ್ಲಿ ಫಿನಾಲೆ ಕಾರ್ಯಕ್ರಮ ನಡೆದಿದೆ. ಸೀಸನ್ 8ರ ಸ್ಪರ್ಧಿಗಳು ಈ ಸಂಚಿಕೆಯಲ್ಲಿ ಡ್ಯಾನ್ಸ್, ಹಾಡಿನ ಮೂಲಕ ಭರ್ಜರಿ ಮನರಂಜನೆ ನೀಡಿದ್ದಾರೆ.
ಇದನ್ನೂ ಓದಿ:
ತಾಯಿ ಚಾಮುಂಡೇಶ್ವರಿ ಆಶೀರ್ವಾದ ಪಡೆದ ಸುದೀಪ್; ಕಿಚ್ಚನ ದರ್ಶನಕ್ಕೆ ಮುಗಿಬಿದ್ದ ಫ್ಯಾನ್ಸ್
ಕಿಚ್ಚ ಸುದೀಪ್ ಜನ್ಮದಿನ: ಬರಬೇಡಿ ಎಂದರೂ ಮನೆ ಬಾಗಿಲಿಗೆ ಬಂದು ಕಾದ ಫ್ಯಾನ್ಸ್