‘ನಯನತಾರಾಗೆ ಮಗು ಕೂಡ ಜನಿಸಿತು, ಮದುವೆ ವಿಡಿಯೋ ಎಲ್ಲಿ?’ ನೆಟ್ಫ್ಲಿಕ್ಸ್ಗೆ ನೆಟ್ಟಿಗರ ಪ್ರಶ್ನೆ
ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮೊದಲೇ ಫೋಟೋ ಪೋಸ್ಟ್ ಮಾಡಿದ್ದರಿಂದ ಡೀಲ್ ಕ್ಯಾನ್ಸಲ್ ಆಗಿದೆ ಎಂದು ಸುದ್ದಿ ಹರಿದಾಡಿತ್ತು. ಇದಕ್ಕೆ ನೆಟ್ಫ್ಲಿಕ್ಸ್ ಈ ಬಗ್ಗೆ ಸ್ಪಷ್ಟನೆ ನೀಡಿತ್ತು.
Updated on: Oct 12, 2022 | 2:42 PM
ನಟಿ ನಯನತಾರಾ (Nayanthara) ಹಾಗೂ ನಿರ್ದೇಶಕ ವಿಘ್ನೇಶ್ ಶಿವನ್ ಜೂನ್ ತಿಂಗಳಲ್ಲಿ ಮದುವೆ ಆದರು. ಮದುವೆ ಆಗಿ ನಾಲ್ಕು ತಿಂಗಳಿಗೆ ಈ ದಂಪತಿ ಬಾಡಿಗೆ ತಾಯ್ತನದ ಮೂಲಕ ಮಗು ಪಡೆದರು. ಈ ವಿಚಾರ ಫ್ಯಾನ್ಸ್ಗೆ ಖುಷಿ ನೀಡಿದೆ. ನಟಿ ನಯನತಾರಾ ಮಕ್ಕಳ ಫೋಟೋ ನೋಡಲು ಫ್ಯಾನ್ಸ್ ಕಾದಿದ್ದಾರೆ. ಈ ಮಧ್ಯೆ ‘ನೆಟ್ಫ್ಲಿಕ್ಸ್ ಇಂಡಿಯಾ’ಗೆ ನಯನತಾರಾ ಅಭಿಮಾನಿಗಳು ಪ್ರಶ್ನೆ ಒಂದನ್ನು ಇಟ್ಟಿದ್ದಾರೆ. ‘ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮದುವೆ ವಿಡಿಯೋ ಎಲ್ಲಿ?’. ಇಬ್ಬರೂ ಮದುವೆ ಆಗಿ ಮಗು ಪಡೆದರೂ ನೆಟ್ಫ್ಲಿಕ್ಸ್ ಅವರು ವಿವಾಹದ ವಿಡಿಯೋ ರಿಲೀಸ್ ಮಾಡಿಲ್ಲ. ಈ ವಿಚಾರದಲ್ಲಿ ಫ್ಯಾನ್ಸ್ ಅಪ್ಡೇಟ್ ಕೇಳುತ್ತಿದ್ದಾರೆ.
ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಜೂನ್ ತಿಂಗಳಲ್ಲಿ ಮದುವೆ ಆದರು. ತಿರುಪತಿಯಲ್ಲಿ ಮದುವೆ ಆಗಬೇಕು ಎಂಬುದು ಇವರ ಆಸೆ ಆಗಿತ್ತು. ಆದರೆ, ಇದಕ್ಕೆ ಅವಕಾಶ ಸಿಕ್ಕಿರಲಿಲ್ಲ. ಈ ಕಾರಣಕ್ಕೆ ಈ ಜೋಡಿ ತಮಿಳುನಾಡಿನ ಮಹಾಬಲಿಪುರಂನಲ್ಲಿ ವಿವಾಹ ಮಾಡಿಕೊಂಡಿತ್ತು. ಇವರ ಮದುವೆಯ ಸುಂದರ ಕ್ಷಣಗಳನ್ನು ನೆಟ್ಫ್ಲಿಕ್ಸ್ ಸೆರೆ ಹಿಡಿದಿದೆ. ಮದುವೆ ವಿಡಿಯೋ ಶೂಟ್ ಮಾಡಲು ನೆಟ್ಫ್ಲಿಕ್ಸ್ ಹಲವು ಅರೇಂಜ್ಮೆಂಟ್ಸ್ ಮಾಡಿತ್ತು. ಈಗ ಮದುವೆ ಆಗಿ ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮಗು ಕೂಡ ಪಡೆದಿದ್ದಾರೆ. ಆದರೆ, ವಿವಾಹದ ವಿಡಿಯೋ ಮಾತ್ರ ಪ್ರಸಾರ ಕಂಡಿಲ್ಲ.
ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಮೊದಲೇ ಫೋಟೋ ಪೋಸ್ಟ್ ಮಾಡಿದ್ದರಿಂದ ಡೀಲ್ ಕ್ಯಾನ್ಸಲ್ ಆಗಿದೆ ಎಂದು ಸುದ್ದಿ ಹರಿದಾಡಿತ್ತು. ಇದಕ್ಕೆ ನೆಟ್ಫ್ಲಿಕ್ಸ್ ಈ ಬಗ್ಗೆ ಸ್ಪಷ್ಟನೆ ನೀಡಿತ್ತು. ಸ್ಟಾರ್ ದಂಪತಿಯ ವಿವಾಹದ ಟೀಸರ್ ಹಂಚಿಕೊಂಡಿತ್ತು. ಈ ಮೂಲಕ ಮದುವೆ ವಿಡಿಯೋ ಬರಲಿದೆ ಎಂಬುದನ್ನು ಒಟಿಟಿ ಸಂಸ್ಥೆ ಫ್ಯಾನ್ಸ್ಗೆ ತಿಳಿಸಿತ್ತು. ಆದರೆ, ಈ ಘೋಷಣೆ ಆಗಿ ಹಲವು ಸಮಯ ಕಳೆದರೂ ವಿಡಿಯೋ ಮಾತ್ರ ಹೊರ ಬಿದ್ದಿಲ್ಲ.
ಇದನ್ನೂ ಓದಿ: ಬಾಡಿಗೆ ತಾಯ್ತನದ ಮೂಲಕ ಮಗು ಪಡೆದು ಸಂಕಷ್ಟಕ್ಕೆ ಸಿಲುಕಿದ ನಟಿ ನಯನತಾರಾ-ವಿಘ್ನೇಶ್
ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ನಡುವಿನ ಲವ್ ಸ್ಟೋರಿ ಬಗ್ಗೆ ಹೆಚ್ಚಿನ ವಿಷಯ ತಿಳಿಯುವ ಹಂಬಲ ಕೂಡ ಅಭಿಮಾನಿಗಳಿಗೆ ಇದೆ. ಆ ಬಗ್ಗೆಯೂ ನೆಟ್ಫ್ಲಿಕ್ಸ್ ವಿಡಿಯೋದಲ್ಲಿ ಮಾಹಿತಿ ಇರಲಿದೆ ಎಂದು ಹೇಳಲಾಗಿತ್ತು. ತಮ್ಮ ಮದುವೆ ಬಗ್ಗೆ ಸ್ವತಃ ನಯನತಾರಾ, ವಿಘ್ನೇಶ್ ಶಿವನ್ ಏನು ಹೇಳಿದ್ದಾರೆ? ಒಟ್ಟಾರೆ ಮದುವೆಯ ವಾತಾವರಣ ಯಾವ ರೀತಿ ಇತ್ತು? ಅತಿಥಿಗಳ ಸಂಗಮ ಹೇಗಿತ್ತು ಎಂಬುದನ್ನೆಲ್ಲ ಅಭಿಮಾನಿಗಳಿಗೆ ತೋರಿಸಲು ನೆಟ್ಫ್ಲಿಕ್ಸ್ ಸಕಲ ಸಿದ್ಧತೆ ಮಾಡಿಕೊಂಡಿದೆ. ಆದರೆ, ವಿಡಿಯೋ ಮಾತ್ರ ಹೊರಬಿದ್ದಿಲ್ಲ.
