KBC 13: ₹ 7 ಕೋಟಿ ಮೊತ್ತದ ಪ್ರಶ್ನೆಗೆ ಉತ್ತರ ತಿಳಿಯದೇ ₹ 1 ಕೋಟಿಗೆ ತೃಪ್ತಿಪಟ್ಟ 19 ವರ್ಷದ ಯುವಕ; ನಿಮಗೆ ಉತ್ತರ ತಿಳಿದಿದೆಯೇ?

Sahil Ahirwar | Amitabh Bachchan: ಕೆಬಿಸಿ 13ರ ಸ್ಪರ್ಧೆಯಲ್ಲಿ ಎರಡನೇ ಕೋಟ್ಯಧಿಪತಿ ಹೊರಹೊಮ್ಮಿದ್ದಾರೆ. ಆದರೆ ಅವರಿಗೆ ₹ 7 ಕೋಟಿ ಮೊತ್ತದ ಪ್ರಶ್ನೆಗೆ ಉತ್ತರ ತಿಳಿಯಲಿಲ್ಲ. ನಿಮಗೆ ತಿಳಿದಿದೆಯೇ? ಪ್ರಶ್ನೆ ಇಲ್ಲಿದೆ.

KBC 13: ₹ 7 ಕೋಟಿ ಮೊತ್ತದ ಪ್ರಶ್ನೆಗೆ ಉತ್ತರ ತಿಳಿಯದೇ ₹ 1 ಕೋಟಿಗೆ ತೃಪ್ತಿಪಟ್ಟ 19 ವರ್ಷದ ಯುವಕ; ನಿಮಗೆ ಉತ್ತರ ತಿಳಿದಿದೆಯೇ?
ಅಮಿತಾಭ್ ಬಚ್ಚನ್ ಹಾಗೂ ಸಾಹಿಲ್ ಅಹಿರ್ವಾರ್

ಕೌನ್ ಬನೇಗಾ ಕರೋಡ್​ಪತಿ ಭರ್ಜರಿಯಾಗಿ ಮೂಡಿಬರುತ್ತಿದ್ದು, ಇತ್ತೀಚಿನ ಸಂಚಿಕೆಯಲ್ಲಿ 13 ನೇ ಸೀಸನ್​ನ ಎರಡನೇ ಕೋಟ್ಯಧಿಪತಿ ಹೊರಹೊಮ್ಮಿದ್ದಾರೆ. ಗುರುವಾರದಂದು ಪ್ರಸಾರವಾದ ಸಂಚಿಕೆಯಲ್ಲಿ ಮಧ್ಯಪ್ರದೇಶದ ಛತರ್​ಪುರ್​​ನ 19 ವರ್ಷದ ಸಾಹಿಲ್​ ಅಹಿರ್ವಾರ್ ಕೋಟ್ಯಧಿಪತಿಯ ಸಾಲಿಗೆ ಸೇರ್ಪಡೆಗೊಂಡಿದ್ದಾರೆ. ಐಎಎಸ್ ಅಧಿಕಾರಿಯಾಗಬೇಕು ಎಂಬ ಕನಸನ್ನು ಹೊಂದಿರುವ ಸಾಹಿಲ್​, ಸಂಸ್ಕೃತ ಭಾಷೆಯ ಕುರಿತಾದ ₹ 1 ಕೋಟಿ ಮೊತ್ತದ ಪ್ರಶ್ನೆಗೆ ಸರಿಯಾದ ಉತ್ತರ ನೀಡಿದರು. ಆದರೆ, ₹ 7 ಕೋಟಿ ಮೊತ್ತದ ಪ್ರಶ್ನೆ ಜೀವಶಾಸ್ತ್ರದ ಕುರಿತಾಗಿತ್ತು. ಆದರೆ ಆ ಪ್ರಶ್ನೆಗೆ ಅವರಿಗೆ ಸರಿಯಾದ ಉತ್ತರದ ಬಗ್ಗೆ ಅನುಮಾನವಿದ್ದ ಕಾರಣ, ಕ್ವಿಟ್ ಮಾಡಿದರು.

ಸಾಹಿಲ್ ಅವರಿಗೆ ಅಮಿತಾಭ್ ಕೇಳಿದ ₹ 7 ಕೋಟಿ ಮೊತ್ತದ ಪ್ರಶ್ನೆ ಇದು. ‘ಎಲೆಗಳು ಮತ್ತು ಮೊಗ್ಗುಗಳನ್ನು ಪ್ರತ್ಯೇಕವಾಗಿ ತಿನ್ನಲು ಅನುವು ಮಾಡಿಕೊಡುವ, ಗೋವಿನಂತೆ ಜೀರ್ಣಾಂಗ ವ್ಯವಸ್ಥೆಯನ್ನು ಹೊಂದಿರುವ ಏಕೈಕ ಹಕ್ಕಿ ಯಾವುದು?’ (Which is the only bird with a digestive system that ferments vegetation as a bovine does, which enables it to eat leaves and buds exclusively?)

ಈ ಪ್ರಶ್ನೆಗೆ ಶೋಬಿಲ್ ಸ್ಟಾರ್ಕ್ (Shoebill stork), ಹೋಟ್​ಜಿನ್ (Hoatzin), ಶೋವೆಲರ್(Shoveler) ಹಾಗೂ ಗ್ಯಾಲಪಗೋಸ್ ಕೊರ್ಮೊರಂಟ್(Galapagos cormorant) ಎಂಬ ನಾಲ್ಕು ಆಯ್ಕೆಗಳಿದ್ದವು. ಸರಿಯಾದ ಉತ್ತರ ಹೋಟ್​ಜಿನ್ ಆಗಿತ್ತು. ಆದರೆ ಸಾಹಿಲ್​ ಅವರಿಗೆ ಉತ್ತರ ತಿಳಿಯದ ಕಾರಣ, ಕ್ವಿಟ್ ಮಾಡಿದ್ದರು.

19 ವರ್ಷದ ಸಾಹಿಲ್ ₹ 7 ಕೋಟಿ ಮೊತ್ತದ ಪ್ರಶ್ನೆ ಕ್ವಿಟ್ ಮಾಡಿದರೂ ಕೂಡ ₹ 1 ಕೋಟಿಯ ಒಡೆಯರಾದರು. ಈ ಚೆಕ್​ನೊಂದಿಗೆ ಅವರಿಗೆ ಒಂದು ಕಾರು ಕೂಡ ಸಿಕ್ಕಿತು. ಈ ಎಲ್ಲಾ ಬಹುಮಾನಗಳೊಂದಿಗೆ ಅವರು ಸ್ಪರ್ಧೆಯಿಂದ ನಿರ್ಗಮಿಸಿದರು. ಸಾಹಿಲ್ ಈ ಎಲ್ಲಾ ಮೊತ್ತವನ್ನು ಏನು ಮಾಡುತ್ತಾರೆ ಎಂಬ ಕುತೂಹಲ ಎಲ್ಲರಿಗೂ ಇತ್ತು. ಲೀಡಿಂಗ್ ಡೈಲಿ ಈ ಕುರಿತು ವರದಿ ಮಾಡಿದ್ದು, ಸಾಹಿಲ್ ಮಾತನಾಡಿರುವುದನ್ನು ಉಲ್ಲೇಖಿಸಿದೆ.

ಸಾಹಿಲ್​ಗೆ ತಾವು ಗೆದ್ದಿರುವ ₹ 1 ಕೋಟಿ ಮೊತ್ತ ಬಹಳ ದೊಡ್ಡದಂತೆ. ‘‘ಅಮಿತಾಭ್ ಬಚ್ಚನ್ ತನ್ನನ್ನು ಕೋಟ್ಯಧಿಪತಿ ಎಂದು ಘೋಷಿಸಿದಾಗ, ಅಸಾಮಾನ್ಯ ಕನಸೊಂದು ನನಸಾದಂತಾಯಿತು. ಈ ಹಣದಲ್ಲಿ ತಾಯಿಗೆ ಒಂದು ಮನೆಯನ್ನು ಉಡುಗೊರೆ ನೀಡಬೇಕು. ಸಣ್ಣ ಸಹೋದರನಿಗೆ ಕ್ರಿಕೆಟ್ ಸೆಟ್ ಕೊಡಿಸಬೇಕು. ಉಳಿದ ಹಣವನ್ನು ನನ್ನ ಐಎಎಸ್ ಅಧಿಕಾರಿಯಾಗುವ ಕನಸಿಗೆ ಮುಡಿಪಾಗಿಡುತ್ತೇನೆ’’ ಎಂದು ಸಾಹಿಲ್ ನುಡಿದಿದ್ದಾರೆ.

ಸಾಹಿಲ್ ಕಾರ್ಯಕ್ರಮದಲ್ಲಿ ಅಮಿತಾಭ್​ರೊಂದಿಗೆ ನಟಿ ತಾಪ್ಸೀ ಪನ್ನು ವಿಚಾರವಾಗಿ ಬಹಳಷ್ಟು ಪ್ರಶ್ನಿಸುತ್ತಿದ್ದರು. ಕೆಲವೊಮ್ಮೆ ಸಾಹಿಲ್ ಪ್ರಶ್ನೆಗಳಿಗೆ ಅಮಿತಾಭ್​ಗೆ ಉತ್ತರ ತೋಚದ ಸಂದರ್ಭವೂ ನಡೆಯಿತು. ಆದರೆ ಈ ಕಾರ್ಯಕ್ರಮ ವೀಕ್ಷಿಸಿದ ತಾಪ್ಸಿ, ಸಾಹಿಲ್ ಅವರನ್ನು ಉದ್ದೇಶಿಸಿ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ. ಜೊತೆಗೆ ಸಾಹಿಲ್ ತಾಪ್ಸಿಯ ಇಷ್ಟದ ತಿನಿಸೇನು ಎಂದು ಅಮಿತಾಭ್​ರಲ್ಲಿ ಪ್ರಶ್ನಿಸಿದ್ದರು. ಇದಕ್ಕೆ ಸ್ವತಃ ತಾಪ್ಸಿ ಉತ್ತರಿಸಿದ್ದು, ಛೋಲೆ ಭಟೂರ್ ಬಹಳ ಇಷ್ಟ ಎಂದು ಬರೆದುಕೊಂಡಿದ್ದಾರೆ. ಮುಂದೆ ನಾವು ಎಂದಾದರೂ ಭೇಟಿಯಾದರೆ ಖಂಡಿತವಾಗಿ ಅದನ್ನು ಜೊತೆಯಾಗಿ ಸವಿಯೋಣ ಎಂದೂ ತಾಪ್ಸಿ ಬರೆದಿದ್ದಾರೆ. ಈ ಮೂಲಕ 19 ನೇ ವರ್ಷದಲ್ಲಿಯೇ ಸಾಹಿಲ್ ಅವರ ಎರಡು ಅಸಾಮಾನ್ಯ ಕನಸುಗಳು ಸಾಕಾರವಾಗಿವೆ.

ಇದನ್ನೂ ಓದಿ:

ದುನಿಯಾ ವಿಜಯ್ ನಿರ್ದೇಶನದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ ಶಿವರಾಜ್​ಕುಮಾರ್

ಅಮಿತ್​ ಶಾಗೆ ಬರ್ತ್​ಡೇ ವಿಶ್​ ಮಾಡಿ ಟ್ರೋಲ್​ ಆದ ಸಾರಾ ಅಲಿ ಖಾನ್​; ಇದರ ಹಿಂದಿದೆ ಡ್ರಗ್​ ವಿಚಾರ

Click on your DTH Provider to Add TV9 Kannada