ನಿರ್ದೇಶನ ಸೋತ ಬಳಿಕ ನಟನೆಗೆ ಮುಂದಾದ ವಿಜಯ್ ಪುತ್ರ ಜೇಸನ್

ತಮಿಳು ಚಿತ್ರರಂಗದ ದಳಪತಿ ವಿಜಯ್ ಅವರ ಪುತ್ರ ಜೇಸನ್ ಸಂಜಯ್ ಇತ್ತೀಚೆಗೆ ನಿರ್ದೇಶಕರಾಗಿ ಚಿತ್ರರಂಗಕ್ಕೆ ಕಾಲಿಟ್ಟಿದ್ದರು. ಅವರು ಸಂದೀಪ್ ಕಿಷನ್ ನಾಯಕನಾಗಿ ನಟಿಸಿದ ‘ಸಿಗ್ಮಾ’ ಚಿತ್ರವನ್ನು ನಿರ್ದೇಶಿಸಿದ್ದರು. ಲೈಕಾ ಪ್ರೊಡಕ್ಷನ್ಸ್ ನಿರ್ಮಿಸಿದ್ದ ಈ ಸಿನಿಮಾ ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ಬಿಡುಗಡೆಯಾಗಿತ್ತು. ಆದರೆ ಈ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ನಿರೀಕ್ಷಿತ ಯಶಸ್ಸು ಕಾಣುವಲ್ಲಿ ತೀವ್ರವಾಗಿ ವಿಫಲವಾಯಿತು.

ನಿರ್ದೇಶನದಲ್ಲಿ ಹಿನ್ನಡೆ ಅನುಭವಿಸಿದ ಬಳಿಕ ಜೇಸನ್ ಸಂಜಯ್ ಇದೀಗ ನಟನೆಯತ್ತ ಗಮನ ಹರಿಸಿದ್ದಾರೆ. ನಾಯಕ ನಟನಾಗಿ ಪ್ರೇಕ್ಷಕರ ಎದುರು ಬರಲು ಅವರು ಸಜ್ಜಾಗುತ್ತಿದ್ದಾರೆ. ಮತ್ತೆ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆಯೇ ಇವರ ಚೊಚ್ಚಲ ಅಭಿನಯದ ಚಿತ್ರವನ್ನು ನಿರ್ಮಿಸಲು ಮುಂದಾಗಿದೆ. ಈ ಸಿನಿಮಾಗಾಗಿ ಲಿಂಗುಸಾಮಿ ಸೇರಿದಂತೆ ಹಲವು ಖ್ಯಾತ ನಿರ್ದೇಶಕರ ಜೊತೆ ಮಾತುಕತೆ ನಡೆಸಲಾಗುತ್ತಿದೆ.

ವರದಿಗಳ ಪ್ರಕಾರ ಈ ಹೊಸ ಸಿನಿಮಾಗೆ ಬರೋಬ್ಬರಿ 35 ಕೋಟಿ ರೂಪಾಯಿ ಬಜೆಟ್ ಮೀಸಲಿಡಲಾಗಿದೆ. ಚೊಚ್ಚಲ ಚಿತ್ರಕ್ಕೇ ಜೇಸನ್ ಸಂಜಯ್ ಅವರಿಗೆ 10 ಕೋಟಿ ರೂಪಾಯಿ ಸಂಭಾವನೆ ನೀಡಲಾಗುತ್ತಿದೆ. ಜೇಸನ್ ಅವರ ತಾಯಿಯ ಕಡೆಯ ಕುಟುಂಬದವರು ಈ ಪ್ರಾಜೆಕ್ಟ್ ಹಿಂದೆ ನಿಂತಿದ್ದಾರೆ. ಲೈಕಾ ಸುಭಾಸ್ಕರನ್ ಜೊತೆ ಸೇರಿ ಈ ಚಿತ್ರವನ್ನು ದೊಡ್ಡ ಮಟ್ಟದಲ್ಲಿ ನಿರ್ಮಾಣ ಮಾಡಲು ಯೋಜಿಸಲಾಗಿದೆ.

ಜೇಸನ್ ಸಂಜಯ್ ತಮ್ಮ ತಂದೆಯ ಹೆಸರನ್ನು ನೇರವಾಗಿ ಬಳಸಿಕೊಳ್ಳದೆ ಚಿತ್ರರಂಗದಲ್ಲಿ ನೆಲೆ ಕಂಡುಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ತಮಿಳುನಾಡು ಚಿತ್ರರಂಗದಲ್ಲಿ ದಳಪತಿ ವಿಜಯ್ ಅವರಿಗೆ ಅಪಾರ ಅಭಿಮಾನಿ ಬಳಗವಿದೆ. ಹಾಗಾಗಿ ನಟನಾಗಿ ಪ್ರೇಕ್ಷಕರನ್ನು ತಲುಪುವುದು ಜೇಸನ್ ಅವರಿಗೆ ಅತ್ಯಂತ ದೊಡ್ಡ ಸವಾಲಾಗಲಿದೆ. ಅಪ್ಪನ ಜನಪ್ರಿಯತೆಯ ಜೊತೆ ಹೋಲಿಕೆ ಮಾಡುವುದು ಸಹಜವಾಗಿರುತ್ತದೆ.

ಇದನ್ನೂ ಓದಿ: ಸಿಗ್ಮಾ ಚಿತ್ರ ನೋಡಿ ಅಪ್ಪ ವಿಜಯ್ ಖಂಡಿತ ಹೆಮ್ಮೆಪಡುತ್ತಾರೆ’: ಮಗ ಜೇಸನ್ ಸಂಜಯ್ ವಿಶ್ವಾಸ

ಈಗಾಗಲೇ ‘ಸಿಗ್ಮಾ’ ಸಿನಿಮಾದ ಕಾರ್ಯಕಾರಿ ನಿರ್ಮಾಪಕ ಸಂಜೀವ್ ಕೂಡ ಈ ಹೊಸ ಚಿತ್ರಕ್ಕೆ ನಿರ್ದೇಶನ ಮಾಡುವ ರೇಸ್‌ನಲ್ಲಿದ್ದಾರೆ. ಶೀಘ್ರದಲ್ಲೇ ಈ ನೂತನ ಚಿತ್ರದ ಬಗ್ಗೆ ಅಧಿಕೃತ ಪ್ರಕಟಣೆ ಹೊರಬೀಳುವ ಸಾಧ್ಯತೆಯಿದೆ. ನಿರ್ದೇಶನದಲ್ಲಿ ಸೋತ ಜೇಸನ್ ಸಂಜಯ್ ಅವರಿಗೆ ನಟನಾಗಿ ಪ್ರೇಕ್ಷಕರು ಹೇಗೆ ಸ್ವೀಕರಿಸುತ್ತಾರೆ ಎಂಬುದನ್ನು ಕಾದುನೋಡಬೇಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.