Physiotherapy: ಯಾವ ರೀತಿಯ ಆರೋಗ್ಯ ಸಮಸ್ಯೆ ಇದ್ದರೆ ಫಿಸಿಯೋಥೆರಪಿ ಒಳ್ಳೆಯದು

ಫಿಸಿಯೋಥೆರಪಿ ಬಗ್ಗೆ ನೀವು ಕೇಳಿರಬಹುದು. ಇದು ದೇಹದ ನೋವು, ಗಾಯ ಅಥವಾ ಅನೇಕ ರೀತಿಯ ಸಮಸ್ಯೆಗಳನ್ನು ಗುಣಪಡಿಸುತ್ತದೆ. ಜನರಿಗೆ ಇದರ ಬಗ್ಗೆ ಕಡಿಮೆ ತಿಳಿದಿದ್ದರೂ ಕೂಡ, ದೇಹ ಮತ್ತು ಸ್ನಾಯುಗಳ ದೀರ್ಘಕಾಲದ ನೋವಿನಿಂದ ಹಿಡಿದು ಅನೇಕ ಸಮಸ್ಯೆಗಳನ್ನು ಫಿಸಿಯೋಥೆರಪಿಯ ಸಹಾಯದಿಂದ ಗುಣಪಡಿಸಬಹುದು ಎಂದು ತಜ್ಞರು ಹೇಳುತ್ತಾರೆ. ಹಾಗಾದರೆ ಫಿಸಿಯೋಥೆರಪಿ ಹೇಗೆ ಪ್ರಯೋಜನಕಾರಿ ಮತ್ತು ಅದರಿಂದ ಯಾವ ರೀತಿಯ ಆರೋಗ್ಯ ಸಮಸ್ಯೆಗಳನ್ನು ಗುಣಪಡಿಸಬಹುದು? ಈ ಬಗ್ಗೆ ತಜ್ಞರು ನೀಡಿರುವಂತಹ ಮಾಹಿತಿ ಇಲ್ಲಿದೆ.

ಫಿಸಿಯೋಥೆರಪಿಸ್ಟ್ ಡಾ. ಶ್ರೀವಾಸ್ತವ್ ಕೆಲವು ಮಾಹಿತಿಗಳನ್ನು ಹಂಚಿಕೊಂಡಿದ್ದು ಅವರು ಹೇಳುವ ಪ್ರಕಾರ, ಇಂದಿನ ಕಾಲದಲ್ಲಿ, ನೋವು ಕೇವಲ ಸಮಸ್ಯೆಯಲ್ಲ, ಆದರೆ ಒಂದು ಪ್ರಮುಖ ಕಾಯಿಲೆಯಾಗಿದೆ, ಇದನ್ನು ಫಿಸಿಯೋಥೆರಪಿಯಿಂದ ನಿವಾರಣೆ ಮಾಡಿಕೊಳ್ಳಬಹುದು. ಇದು ನಿಮಗೆ ಕೇವಲ ವಿಶ್ರಾಂತಿ ನೀಡುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ ಬದಲಾಗಿ ದೇಹದ ಶಕ್ತಿ ಮತ್ತು ನಮ್ಯತೆಯನ್ನು ಹೆಚ್ಚಿಸುವ ಕೆಲಸವನ್ನು ಕೂಡ ಮಾಡುತ್ತದೆ. ನಿಯಮಿತ ಫಿಸಿಯೋಥೆರಪಿಯು ರೋಗಿಗೆ ತೀವ್ರ ನೋವಿನಿಂದ ಪರಿಹಾರ ನೀಡುತ್ತದೆ.

ಏಕೆ ಫಿಸಿಯೋಥೆರಪಿ ಬಹಳ ಪ್ರಯೋಜನಕಾರಿ;

ಸಕ್ರಿಯ ಫಿಸಿಯೋಥೆರಪಿಯಲ್ಲಿ, ರೋಗಿಗೆ ವ್ಯಾಯಾಮ ಮಾಡಲು ಮತ್ತು ಸರಿಯಾದ ಭಂಗಿಯನ್ನು ಅಳವಡಿಸಿಕೊಳ್ಳಲು ಪ್ರೋತ್ಸಾಹಿಸಲಾಗುತ್ತದೆ, ಇದು ಭವಿಷ್ಯದಲ್ಲಿ ನೋವು ಮತ್ತು ಗಾಯಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ. ಅದಲ್ಲದೆ ಸೊಂಟ, ಕುತ್ತಿಗೆ ಮತ್ತು ಕೀಲುಗಳಲ್ಲಿನ ನೋವಿಗೆ ಫಿಸಿಯೋಥೆರಪಿ ಬಹಳ ಪ್ರಯೋಜನಕಾರಿ. ಗಂಭೀರ ಗಾಯವಾದಾಗ ಫಿಸಿಯೋಥೆರಪಿ ಪಡೆದುಕೊಳ್ಳುವುದರಿಂದ, ದೇಹದ ನೋವು, ವಿಶೇಷವಾಗಿ ಸ್ನಾಯು ಮತ್ತು ಕೀಲು ನೋವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಫಿಸಿಯೋಥೆರಪಿ ದೇಹದ ಸಮತೋಲನ ಮತ್ತು ಸಮನ್ವಯವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಇದು ನಿಮಗೆ ದೈಹಿಕ ಪ್ರಯೋಜನಗಳನ್ನು ಮಾತ್ರವಲ್ಲದೆ ಮಾನಸಿಕ ಪ್ರಯೋಜನಗಳನ್ನು ಸಹ ಒದಗಿಸುತ್ತದೆ. ಹಾಗಾಗಿ ಒತ್ತಡ ಮತ್ತು ಆತಂಕವನ್ನು ಕಡಿಮೆ ಮಾಡುತ್ತದೆ, ಇದು ಮಾನಸಿಕ ಆರೋಗ್ಯವನ್ನು ಸುಧಾರಿಸುತ್ತದೆ. ನಿಯಮಿತ ಫಿಸಿಯೋಥೆರಪಿಯು ನಿಮ್ಮ ದಿನನಿತ್ಯದ ನಿದ್ರೆ ಸರಿಯಾಗಿ ಆಗುವಂತೆ ಮಾಡಲು ಸಹಾಯ ಮಾಡುತ್ತದೆ.

ಇದನ್ನೂ ಓದಿ: ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಬಿಲ್ವಪತ್ರೆ ತಿಂದರೆ ಏನಾಗುತ್ತೆ ತಿಳಿದುಕೊಳ್ಳಿ

ಯಾವ ಸಮಸ್ಯೆಗೆ ಫಿಸಿಯೋಥೆರಪಿ ಪ್ರಯೋಜನಕಾರಿ?

ಸಂಧಿವಾತದ ರೋಗಲಕ್ಷಣಗಳನ್ನು ಕಡಿಮೆ ಮಾಡಲು ಫಿಸಿಯೋಥೆರಪಿ ಸಹಾಯ ಮಾಡುತ್ತದೆ ಎಂದು ತಜ್ಞರು ಹೇಳುತ್ತಾರೆ. ಇನ್ನು, ಟೆಂಡಿನಿಟಿಸ್ ನ ರೋಗಲಕ್ಷಣಗಳಾದ ನೋವು, ಊತವನ್ನು ಕಡಿಮೆ ಮಾಡುವಲ್ಲಿ ಪ್ರಯೋಜನಕಾರಿಯಾಗಿದೆ ಮತ್ತು ಗಾಯಗಳಿಂದ ಚೇತರಿಸಿಕೊಳ್ಳಲು ಫಿಸಿಯೋಥೆರಪಿಯನ್ನು ಸಹ ಮಾಡಿಸಿಕೊಳ್ಳಬಹುದು. ಪಾರ್ಶ್ವವಾಯು ಜೊತೆಗೆ ನರಕ್ಕೆ ಸಂಬಂಧಿಸಿದ ಕಾಯಿಲೆಗಳಲ್ಲಿ ಇದು ಪ್ರಯೋಜನಕಾರಿಯಾಗಿದೆ. ವೈದ್ಯರ ಸಲಹೆಯ ಮೇರೆಗೆ, ಈ ಆರೋಗ್ಯ ಸಮಸ್ಯೆಗಳಿಗೆ ನೀವು ಫಿಸಿಯೋಥೆರಪಿ ಪಡೆಯಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ