Shamonda Virus: ಶಮೊಂಡಾ ವೈರಸ್ ಹೇಗೆ ಹರಡುತ್ತದೆ? ರೋಗಲಕ್ಷಣ, ಮುನ್ನೆಚ್ಚರಿಕೆಗಳ ಸಂಪೂರ್ಣ ಮಾಹಿತಿ
ಫ್ರಾನ್ಸ್‌ನಲ್ಲಿ ಶಮೊಂಡಾ ವೈರಸ್‌ನಿಂದ ಮಾನವನಿಗೆ ಸೋಂಕು ತಗುಲಿದ ಮೊದಲ ಪ್ರಕರಣ ವರದಿಯಾಗಿದೆ. ಸಾಮಾನ್ಯವಾಗಿ ಜಾನುವಾರುಗಳಲ್ಲಿ ಕಂಡುಬರುವ ಈ ವೈರಸ್, ತೀವ್ರವಾಗಿ ರೋಗನಿರೋಧಕ ಶಕ್ತಿ ಕುಂದಿದ ವ್ಯಕ್ತಿಯಲ್ಲಿ ಪತ್ತೆಯಾಗಿದೆ. ಹಾಗಾಗಿ ವೈರಸ್ ಹರಡುವಿಕೆ, ಲಕ್ಷಣಗಳು ಮತ್ತು ಸಾರ್ವಜನಿಕರ ಆರೋಗ್ಯದ ಅಪಾಯಗಳ ಕುರಿತು ತಿಳಿಯಬೇಕಾದ ಪ್ರಮುಖ ಮಾಹಿತಿಗಳು ಇಲ್ಲಿವೆ.
ಫ್ರಾನ್ಸ್‌ನಲ್ಲಿ ಶಮೊಂಡಾ ವೈರಸ್‌ನಿಂದ ಮಾನವನಿಗೆ ಸೋಂಕು ತಗುಲಿದ ಮೊದಲ ಪ್ರಕರಣ ವರದಿಯಾಗಿದೆ. ಸಾಮಾನ್ಯವಾಗಿ ಜಾನುವಾರುಗಳಲ್ಲಿ ಕಾಣಿಸಿಕೊಳ್ಳುವ ಈ ವೈರಸ್, ತೀವ್ರವಾಗಿ ರೋಗನಿರೋಧಕ ಶಕ್ತಿ ಕುಂದಿದ ಕಡಿಮೆ ಇರುವ ವ್ಯಕ್ತಿಯಲ್ಲಿ ಪತ್ತೆಯಾಗಿದೆ. ಈ ವ್ಯಕ್ತಿ ಅಕ್ಟೋಬರ್‌ನಲ್ಲಿ ಮೃತಪಟ್ಟಿದ್ದು, ಪ್ರಾಥಮಿಕ ತನಿಖೆಯ ಪ್ರಕಾರ ವೈರಸ್ ಸೋಂಕು ಮತ್ತು ಅವರಲ್ಲಿ ಕಾಣಿಸಿಕೊಂಡ ನರಮಂಡಲದ ತೊಂದರೆಗಳ ನಡುವೆ ಸಂಬಂಧವಿರುವ ಸಾಧ್ಯತೆಯಿದೆ ಎಂದು ಫ್ರಾನ್ಸ್‌ನ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ, ಈ ಪ್ರಕರಣದಿಂದ ಸಾರ್ವಜನಿಕರಿಗೆ ಆರೋಗ್ಯದ ಅಪಾಯವಿದೆ ಎಂಬುದಕ್ಕೆ ಸದ್ಯಕ್ಕೆ ಯಾವುದೇ ಪುರಾವೆ ಪತ್ತೆಯಾಗಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಸೋಂಕಿನ ಮೂಲ ಮತ್ತು ಅದರ ಪರಿಣಾಮಗಳ ಕುರಿತು ತನಿಖೆ ಮುಂದುವರಿದಿದೆ.
ಶಮೊಂಡಾ ವೈರಸ್ ಎಂದರೇನು?
ಶಮೊಂಡಾ ವೈರಸ್ (Shamonda virus) ಆರ್ಥೋಬುನ್ಯಾವೈರಸ್ (Orthobunyavirus) ಗುಂಪಿಗೆ ಸೇರಿದ ವೈರಸ್ ಆಗಿದೆ. ಇದೇ ಗುಂಪಿನಲ್ಲಿ ಪ್ರಾಣಿಗಳಲ್ಲಿ ಕಾಣಿಸಿಕೊಳ್ಳುವ ಸ್ಕ್ಮಾಲೆನ್‌ಬರ್ಗ್ ವೈರಸ್ ಕೂಡ ಸೇರಿದೆ. ಶಮೊಂಡಾ ವೈರಸ್ ಮುಖ್ಯವಾಗಿ ದನಗಳಲ್ಲಿ ಕಾಣಿಸಿಕೊಳ್ಳುತ್ತದೆ. ಕುರಿ, ಮೇಕೆ ಮತ್ತು ಕುದುರೆಗಳಂತಹ ಪ್ರಾಣಿಗಳಲ್ಲಿಯೂ ಈ ವೈರಸ್ ಪತ್ತೆಯಾಗಿರುವ ವರದಿಗಳಿವೆ. ಈ ವೈರಸ್ ಅನ್ನು 1960ರ ದಶಕದ ಮಧ್ಯಭಾಗದಲ್ಲಿ ನೈಜೀರಿಯಾದಲ್ಲಿ ಮೊದಲ ಬಾರಿಗೆ ಗುರುತಿಸಲಾಗಿತ್ತು. ನಂತರ ಆಫ್ರಿಕಾ ಮತ್ತು ಏಷ್ಯಾದ ಕೆಲವು ಪ್ರದೇಶಗಳಲ್ಲಿ ಪ್ರಾಣಿಗಳಲ್ಲಿ ಇದರ ಇರುವಿಕೆ ಪತ್ತೆಯಾಗಿತ್ತು.
ಶಮೊಂಡಾ ವೈರಸ್ ಹೇಗೆ ಹರಡುತ್ತದೆ?
ಈ ವೈರಸ್ ಸಾಮಾನ್ಯವಾಗಿ ಸಣ್ಣ ಕಚ್ಚುವ ಕೀಟಗಳ ಮೂಲಕ ಪ್ರಾಣಿಗಳಿಗೆ ಹರಡುತ್ತದೆ. ಮಿಡ್ಜ್‌ಗಳು (biting midges) ಎಂದು ಕರೆಯಲಾಗುವ ಸಣ್ಣ ಕೀಟಗಳು ವೈರಸ್ ಹರಡುವಿಕೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಫ್ರಾನ್ಸ್‌ನಲ್ಲಿ ಸೋಂಕಿಗೆ ಒಳಗಾದ ವ್ಯಕ್ತಿಗೆ ಪೂರ್ವ ಫ್ರಾನ್ಸ್‌ನಲ್ಲಿ ಮಿಡ್ಜ್ ಕಚ್ಚಿದ ಪರಿಣಾಮ ವೈರಸ್ ತಗುಲಿರಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆ ಪ್ರದೇಶದಲ್ಲಿ ಬೇಸಿಗೆಯ ಅವಧಿಯಲ್ಲಿ ಪ್ರಾಣಿಗಳಲ್ಲಿ ವೈರಸ್ ಹರಡಿತ್ತು ಎನ್ನಲಾಗಿದೆ. ಆದರೆ, ಮಾನವರಲ್ಲಿ ಈ ವೈರಸ್ ಹೇಗೆ ರಿಯಾಕ್ಟ್ ಮಾಡುತ್ತದೆ ಮತ್ತು ಇತರರಿಗೆ ಹರಡುವ ಸಾಧ್ಯತೆ ಇದೆಯೇ ಎಂಬುದರ ಕುರಿತು ಹೆಚ್ಚಿನ ಅಧ್ಯಯನ ಅಗತ್ಯವಿದೆ.
ಶಮೊಂಡಾ ವೈರಸ್‌ನ ಲಕ್ಷಣಗಳೇನು?
ಪ್ರಾಣಿಗಳಲ್ಲಿ ಈ ವೈರಸ್ ಕಾಣಿಸಿಕೊಂಡಾಗ ಜ್ವರ, ಅತಿಸಾರ, ಆಯಾಸ ಕಂಡುಬರಬಹುದು. ಆದರೆ, ಮಾನವರಲ್ಲಿ ಸೋಂಕಿನ ಲಕ್ಷಣಗಳ ಕುರಿತು ಪ್ರಸ್ತುತ ಲಭ್ಯವಿರುವ ಮಾಹಿತಿ ಬಹಳ ಸೀಮಿತವಾಗಿದೆ. ಫ್ರಾನ್ಸ್‌ನಲ್ಲಿ ಸೋಂಕಿಗೆ ಒಳಗಾದ ವ್ಯಕ್ತಿಯಲ್ಲಿ ನರಮಂಡಲಕ್ಕೆ ಸಂಬಂಧಿಸಿದ ತೊಂದರೆಗಳು ಕಾಣಿಸಿಕೊಂಡಿದ್ದವು. ಈ ತೊಂದರೆಗಳಿಗೆ ವೈರಸ್ ಕಾರಣವಾಗಿರಬಹುದು ಎಂದು ಪ್ರಾಥಮಿಕ ವರದಿಗಳು ಸೂಚಿಸಿವೆ.
ಸಾರ್ವಜನಿಕರು ಆತಂಕಪಡಬೇಕೇ?
ಯುರೋಪ್‌ನಲ್ಲಿ ವೈರಸ್ ಇರುವುದು ಮತ್ತು ಮಾನವನಲ್ಲಿ ಪತ್ತೆಯಾದ ಅಪರೂಪದ ಪ್ರಕರಣದ ಹಿನ್ನೆಲೆಯಲ್ಲಿ ಯುರೋಪಿಯನ್ ಸೆಂಟರ್ ಫಾರ್ ಡಿಸೀಸ್ ಪ್ರಿವೆನ್ಷನ್ ಆಂಡ್ ಕಂಟ್ರೋಲ್ (ECDC) ಪರಿಸ್ಥಿತಿಯನ್ನು ಗಮನಿಸುತ್ತಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಸದ್ಯದ ಮಾಹಿತಿಯ ಪ್ರಕಾರ, ಸಾರ್ವಜನಿಕರಿಗೆ ವ್ಯಾಪಕ ಆರೋಗ್ಯದ ಅಪಾಯವಿದೆ ಎಂದು ಹೇಳಲು ಸಾಕಷ್ಟು ಆಧಾರವಿಲ್ಲ. ಆದರೂ, ಕೀಟಗಳ ಕಡಿತವನ್ನು ತಪ್ಪಿಸುವುದು ಮತ್ತು ಪ್ರಾಣಿಗಳಲ್ಲಿ ಅಸಾಮಾನ್ಯ ಕಾಯಿಲೆಯ ಲಕ್ಷಣಗಳು ಕಂಡುಬಂದರೆ ಪಶುವೈದ್ಯರ ಸಲಹೆ ಪಡೆಯುವುದು ಸೂಕ್ತ. ಒಟ್ಟಿನಲ್ಲಿ, ಶಮೊಂಡಾ ವೈರಸ್‌ನ ಈ ಮಾನವ ಪ್ರಕರಣ ಅಪರೂಪದ್ದಾಗಿದ್ದು, ಅದರ ನೈಜ ಆರೋಗ್ಯ ಪರಿಣಾಮಗಳನ್ನು ಅರ್ಥಮಾಡಿಕೊಳ್ಳಲು ಹೆಚ್ಚಿನ ವೈಜ್ಞಾನಿಕ ಮಾಹಿತಿ ಅಗತ್ಯವಾಗಿದೆ.
ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ