Twitter CEO: ಮತ್ತೊಮ್ಮೆ ಭಾರತೀಯ ಮೂಲದ ವ್ಯಕ್ತಿಗೆ ಟ್ವಿಟರ್ ಸಿಇಒ ಹುದ್ದೆ? ನಿಭಾಯಿಸಲು ಸಿದ್ಧ ಎಂದ ಶಿವ ಅಯ್ಯದೊರೆ

ನವದೆಹಲಿ: ಮೈಕ್ರೋ ಬ್ಲಾಗಿಂಗ್ ತಾಣ ಟ್ವಿಟರ್​ (Twitter) ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (CEO) ಹುದ್ದೆ ತ್ಯಜಿಸಲು ಸಿದ್ಧ ಎಂದು ಮಾಲೀಕ ಎಲಾನ್ ಮಸ್ಕ್ (Elon Musk) ಇತ್ತೀಚೆಗೆ ಹೇಳಿದ್ದು, ಹೊಸ ಸಿಇಒ ಹುಡುಕಾಟದಲ್ಲಿರುವ ಬಗ್ಗೆ ವರದಿಯಾಗಿತ್ತು. ಇದರ ಬೆನ್ನಲ್ಲೇ, ಇದೀಗ ಮತ್ತೆ ಭಾರತೀಯ ಮೂಲದ ವ್ಯಕ್ತಿಯೇ ಟ್ವಿಟರ್​ಗೆ ಸಿಇಒ ಆಗಿ ನೇಮಕಗೊಳ್ಳಲಿದ್ದಾರೆಯೇ ಎಂಬ ಕುತೂಹಲ ಮೂಡಿದೆ. ಇದಕ್ಕೆ ಕಾರಣವಿದೆ. ಭಾರತೀಯ ಮೂಲದವರಾದ, ಮ್ಯಾಸಚೂಸೆಟ್ಸ್ ಇನ್ಸ್​ಟಿಟ್ಯೂಟ್ ಆಫ್ ಟೆಕ್ನಾಲಜಿ (MIT) ವಿದ್ವಾಂಸ ಡಾ. ಶಿವ ಅಯ್ಯದೊರೆ ಎಂಬವರು ಟ್ವಿಟರ್​​ ಸಿಇಒ ಹುದ್ದೆ ನಿಭಾಯಿಸಲು ಉತ್ಸುಕರಾಗಿರುವುದಾಗಿ ಟ್ವೀಟ್ ಮಾಡಿದ್ದಾರೆ. ಒಂದು ವೇಳೆ ಎಲಾನ್ ಮಸ್ಕ್ ಒಪ್ಪಿದರೆ ಮತ್ತೆ ಭಾರತೀಯ ಮೂಲದವರೇ ಟ್ವಿಟರ್​​ನ ಉನ್ನತ ಹುದ್ದೆಗೇರಲಿದ್ದಾರೆ. ಈ ಹಿಂದೆ ಭಾರತೀಯ ಮೂಲದ ಪರಾಗ್ ಅಗರ್​ವಾಲ್ ಟ್ವಿಟರ್​ ಸಿಇಒ ಆಗಿದ್ದರು. ಮಸ್ಕ್ ಮಾಲೀಕತ್ವ ವಹಿಸಿಕೊಂಡ ಬೆನ್ನಲ್ಲೇ ಅವರನ್ನು ವಜಾಗೊಳಿಸಲಾಗಿತ್ತು.

‘ನಾನು ಟ್ವಿಟರ್​​ನ ಸಿಇಒ ಹುದ್ದೆ ನಿರ್ವಹಿಸಲು ಆಸಕ್ತಿ ಹೊಂದಿದ್ದೇನೆ. ಎಂಐಟಿಯಿಂದ ನಾಲ್ಕು ಪದವಿ ಪಡೆದಿದ್ದು, 7 ಹೈಟೆಕ್ ಸಾಫ್ಟ್​ವೇರ್ ಕಂಪನಿಗಳನ್ನು ಯಶಸ್ವಿಯಾಗಿ ನಿಭಾಯಿಸಿದ್ದೇನೆ. ಅರ್ಜಿ ಸಲ್ಲಿಸುವ ವಿಧಾನದ ಬಗ್ಗೆ ಸಲಹೆ ನೀಡಿ. ವಿಧೇಯತೆಯಿಂದ ಡಾ. ಶಿವ ಅಯ್ಯದೊರೆ, ಎಂಐಟಿ ಪಿಎಚ್​ಡಿ, ಇ-ಮೇಲ್ ಅನ್ವೇಷಕ’ ಎಂದು ಅಯ್ಯದೊರೆ ಇತ್ತೀಚೆಗೆ ಟ್ವೀಟ್ ಮಾಡಿದ್ದರು.

ಇದನ್ನೂ ಓದಿ: ಎಲಾನ್ ಮಸ್ಕ್ ತಮ್ಮ ಹುದ್ದೆಯಿಂದ ಕೆಳಗಿಳಿಯಬೇಕಂದ ಶೇ. 57ರಷ್ಟು ಜನ, ಈ ಟ್ವಿಟ್ಟರ್ ಸಮೀಕ್ಷೆಯ ಒಳ ಮರ್ಮವೇನು?

ನಂತರ, ‘ನಿಮ್ಮ ಬೆಂಬಲಕ್ಕೆ ಧನ್ಯವಾದಗಳು ಎಲಾನ್ ಮಸ್ಕ್. ಈ ಜವಾಬ್ದಾರಿ ವಹಿಸಿಕೊಳ್ಳಲಿರುವವರು ಪಾರದರ್ಶಕವಾಗಿರಬೇಕು ಮತ್ತು ತಮ್ಮ ಅರ್ಹತೆಗಳನ್ನು ಬಹಿರಂಗವಾಗಿ ಘೋಷಿಸಬೇಕು ಎಂದು ನಾನು ಬಯಸುತ್ತೇನೆ. 14ನೇ ವರ್ಷದಲ್ಲಿ ಇ-ಮೇಲ್ ಅಭಿವೃದ್ಧಿಪಡಿಸುವುದರೊಂದಿಗೆ ನನ್ನ ವೃತ್ತಿ ಅನುಭವ ಆರಂಭಗೊಂಡಿದೆ’ ಎಂದು ಮತ್ತೊಂದು ಟ್ವೀಟ್​ನಲ್ಲಿ ಅವರು ಉಲ್ಲೇಖಿಸಿದ್ದಾರೆ.

ಇದನ್ನೂ ಓದಿ: Elon Musk: ಟ್ವಿಟರ್​ಗೆ ಹೊಸ ಸಿಇಒ ಹುಡುಕಾಟದಲ್ಲಿದ್ದಾರೆ ಎಲಾನ್​ ಮಸ್ಕ್

ಡಾ. ಶಿವ ಅಯ್ಯದೊರೆ ತಮಿಳುನಾಡು ಮೂಲದವರಾಗಿದ್ದಾರೆ. ಈ ಕುರಿತು ಇನ್​ವೆಂಟರ್ ಆಫ್​ ಇ-ಮೇಲ್ ವೆಬ್​​ಸೈಟ್​ನಲ್ಲಿ ಮಾಹಿತಿ ಇದೆ. ಟ್ವಿಟರ್​ ಸಿಇಒ ಸ್ಥಾನಕ್ಕೆ ಬೇರೊಬ್ಬರು ಸಿಕ್ಕಿದ ಕೂಡಲೇ ಸದ್ಯದಲ್ಲೇ ರಾಜೀನಾಮೆ ನೀಡಲಿದ್ದೇನೆ. ಆ ನಂತರ ಸಾಫ್ಟ್​ವೇರ್ ಹಾಗೂ ಸರ್ವರ್​​ ತಂಡಗಳನ್ನಷ್ಟೇ ನೋಡಿಕೊಳ್ಳಲಿದ್ದೇನೆ ಎಂದು ಮಸ್ಕ್ ಟ್ವೀಟ್ ಮಾಡಿದ್ದರು.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ