ಬೆಂಗಳೂರಿನಲ್ಲಿ ಹೆಚ್ಚಾದ ಹೊಟೇಲ್ ಕೊಠಡಿಗಳಿಗೆ ಬೇಡಿಕೆ, ಬಹುತೇಕ ಕೊಠಡಿಗಳು ಫುಲ್, ಬೆಲೆಯೂ ಏರಿಕೆ

ಬೆಂಗಳೂರು: ಇಂಡಿಯಾ ಎನರ್ಜಿ ವೀಕ್ (India Energy Week), ಜಿ 20 ಸಭೆ ಮತ್ತು ಏರೋ ಇಂಡಿಯಾ (Aero India Show) ಪ್ರದರ್ಶನದಂತಹ ಕಾರ್ಯಕ್ರಮಗಳಿಗಾಗಿ ನಗರಕ್ಕೆ ಬರುವ ಅತಿಥಿಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ಪರಿಣಾಮ ನಗರದಲ್ಲಿನ ಹೊಟೇಲ್ ಕೊಠಡಿಗಳಿಗೆ ಇದ್ದ ಬೇಡಿಕೆ ಹೆಚ್ಚಾಗಿದೆ. ಬೆಂಗಳೂರಿನಲ್ಲಿ 50,000 ಕ್ಕೂ ಹೆಚ್ಚು ಹೋಟೆಲ್ ಕೊಠಡಿಗಳು (Bengaluru Hotel Rooms) ಫುಲ್ ಆಗಿವೆ. ನಗರದಲ್ಲಿರುವ ಫೈಸ್ಟಾರ್ ಮತ್ತು ಅದಕ್ಕಿಂತ ಹೆಚ್ಚಿನ ಹೊಟೇಲ್​ಗಳು ಸಂಪೂರ್ಣ ಬುಕ್ ಮಾಡಲಾಗಿದೆ. ತ್ರಿ-ಸ್ಟಾರ್ ಹೊಟೇಲ್​ಗಳಲ್ಲಿ ಕೆಲವು ಕೊಠಡಿಗಳು ಲಭ್ಯವಿರಬಹುದು. ಆದರೆ ಇದರ ಬೆಲೆಯೂ ಹೆಚ್ಚಾಗಬಹುದು ಎಂದು ಬೆಂಗಳೂರು ಹೊಟೇಲ್ ಸಂಘದ (BBHA) ಅಧ್ಯಕ್ಷ ಪಿಸಿ ರಾವ್ ಹೇಳಿರುವುದಾಗಿ ಸುದ್ದಿಸಂಸ್ಥೆ ಡೆಕ್ಕರ್ ಹೆರಾಲ್ಡ್ ವರದಿ ಮಾಡಿದೆ.

ಭಾರೀ ಬೇಡಿಕೆ ವ್ಯಕ್ತವಾದ ಹಿನ್ನಲೆ ಹೋಟೆಲ್ ಕೊಠಡಿಗಳ ಬೆಲೆ ಏರಿಕೆ ಕಂಡರೂ ಇದು ತಾತ್ಕಾಲಿಕವಾಗಿದೆ ಎಂದು ಪಂಚತಾರಾ ಹೋಟೆಲ್‌ನ ಮೂಲಗಳು ತಿಳಿಸಿವೆ. “ನಗರದಲ್ಲಿನ ಹೆಚ್ಚಿನ ಹೋಟೆಲ್‌ಗಳು ಡೈನಾಮಿಕ್ ಬೆಲೆ ತಂತ್ರವನ್ನು ಅನುಸರಿಸುತ್ತವೆ. ಹಾಗಾಗಿ ಬೇಡಿಕೆ ಹೆಚ್ಚಾದರೆ ಅದಕ್ಕೆ ಅನುಗುಣವಾಗಿ ಬೆಲೆಗಳು ಹೆಚ್ಚಾಗುತ್ತವೆ” ಎಂದು ಮೂಲವೊಂದು ಹೇಳಿದೆ. ಆ ದರಗಳು ಆದಾಯ ಮತ್ತು ದಾಸ್ತಾನು ನಿರ್ವಹಣೆಯನ್ನು ಆಧರಿಸಿವೆ, ಇದು ಆಕ್ಯುಪೆನ್ಸಿ ದರಗಳಿಗಿಂತ ಆದ್ಯತೆಯನ್ನು ತೆಗೆದುಕೊಳ್ಳುತ್ತದೆ.

ಇದನ್ನೂ ಓದಿ: India Energy Week: ಇಂಡಿಯಾ ಎನರ್ಜಿ ವೀಕ್​ನಲ್ಲಿ ಗಮನ ಸೆಳೆದ ಒಲೆಕ್ಟ್ರಾ ಎಲೆಕ್ಟ್ರಿಕ್ ಟಿಪ್ಪರ್

BBHA ಹಂಚಿಕೊಂಡ ಮಾಹಿತಿಯ ಪ್ರಕಾರ, ಫೆಬ್ರವರಿಯಲ್ಲಿ ಮೂರು ಅವಧಿಗಳನ್ನು ಬ್ಲ್ಯಾಕ್‌ಔಟ್ ದಿನಾಂಕಗಳೆಂದು ಪರಿಗಣಿಸಲಾಗಿದೆ. ಅವುಗಳೆಂದರೆ, ಫೆಬ್ರವರಿ 6 ರಿಂದ 8 ರವರೆಗೆ ಇಂಡಿಯಾ ಎನರ್ಜಿ ವೀಕ್, ಫೆಬ್ರವರಿ 13 ರಿಂದ 17 ರವರೆಗೆ ಏರೋ ಇಂಡಿಯಾ ಮತ್ತು ಫೆಬ್ರವರಿ 15 ರಿಂದ 18 ಸ್ಟೋನಾ 2023 (ಗ್ರಾನೈಟ್ ಮತ್ತು ಕಲ್ಲಿನ ಮೇಳ)

ಈ ದಿನಾಂಕಗಳಲ್ಲಿ ಕೊಠಡಿಗಳು ಬಹುತೇಕ ಭರ್ತಿಗೊಳ್ಳುತ್ತಿದ್ದಂತೆ ಕೆಲವು ಹೋಟೆಲ್‌ಗಳಲ್ಲಿ ಲಭ್ಯವಿರುವ ಕೊಠಡಿಗಳ ದರಗಳು ರ್ಯಾಕ್ ದರದಿಂದ ಶೇಕಡಾ 10 ಮತ್ತು ಶೇಕಡಾ 30ರ ನಡುವೆ ಹೆಚ್ಚಾಗಲಿದೆ. ಕೆಲವು ಹೋಟೆಲ್​ಗಳು ಕೊನೆಯ ಕ್ಷಣದ ವಿಐಪಿಗಳು ಅಥವಾ ನಿಯಮಿತ ಗ್ರಾಹಕರಿಗಾಗಿ ಕೆಲವು ಕೊಠಡಿಗಳನ್ನು ಖಾಲಿ ಇಡುತ್ತವೆ. ಆದರೆ ಅವುಗಳನ್ನು ಸಹ ತ್ವರಿತವಾಗಿ ಬುಕ್ ಮಾಡಿಕೊಳ್ಳಲಾಗುತ್ತಿದೆ ರಾವ್ ಹೇಳಿದ್ದಾರೆ. “ಈ ಸ್ಥಿತಿ ಕನಿಷ್ಠ ಫೆಬ್ರವರಿ 20 ರವರೆಗೆ ಮುಂದುವರಿಯುವ ನಿರೀಕ್ಷೆಯಿದೆ” ಎಂದಿದ್ದಾರೆ.

ಈ ಸಮಯದಲ್ಲಿ ಹೋಟೆಲ್ ಕಾಯ್ದಿರಿಸುವಿಕೆಗಳು ಪ್ರತಿ ವರ್ಷವೂ ಏರುವುದು ಸಾಮಾನ್ಯವಾಗಿದೆ. ಆದರೆ ಈ ಬಾರಿ ಏರ್ ಶೋ ಮತ್ತು ಇತರ ಕಾರ್ಯಕ್ರಮಗಳು ಏಕಕಾಲದಲ್ಲಿ ನಡೆಯುತ್ತಿರುವುದರಿಂದ ಈ ಬಾರಿ ಕೊಠಡಿಗಳ ಬೇಡಿಕೆ ಉಲ್ಬಣಗೊಂಡಿದೆ ಎಂದು ರಾವ್ ಹೇಳಿದ್ದಾರೆ.

ಇದನ್ನು ಓದಿ: Aero India Show: ಬಿಇಎಲ್​ನ ಕ್ಷಿಪಣಿ ವ್ಯವಸ್ಥೆ ಸೇರಿ ವಿವಿಧ ಉತ್ಪನ್ನಗಳು ಏರೋ ಇಂಡಿಯಾದಲ್ಲಿ ಅನಾವರಣ

ಪಂಚತಾರಾ ಹೋಟೆಲ್‌ನ ಪ್ರತಿನಿಧಿಯೊಬ್ಬರು ತಮ್ಮ ಹೋಟೆಲ್‌ನಲ್ಲಿ ಯಾವುದೇ ಕೊಠಡಿಗಳಿಲ್ಲ ಎಂದು ಹೇಳಿಕೊಂಡಿದ್ದಾರೆ. ಜಿ 20 ಸಭೆ ಮತ್ತು ಇಂಡಿಯಾ ಎನರ್ಜಿ ವೀಕ್‌ನ ನೇರ ಪರಿಣಾಮವು ಉತ್ತರ ಬೆಂಗಳೂರಿನ ಹೋಟೆಲ್‌ಗಳಲ್ಲಿ ಕಂಡುಬರುತ್ತದೆ. ಆದ್ದರಿಂದ, ಮಧ್ಯ ಮತ್ತು ದಕ್ಷಿಣ ಬೆಂಗಳೂರಿನ ಹೋಟೆಲ್‌ಗಳು ಕಾರ್ಪೊರೇಟ್ ಜನಸಮೂಹದಿಂದ ಹೆಚ್ಚಿನ ಬುಕಿಂಗ್‌ಗಳನ್ನು ಹೊಂದಿವೆ ಮತ್ತು ಹೀಗಾಗಿ ಮಾರಾಟವಾಗಿವೆ ಎಂದು ಹೇಳಿದ್ದಾರೆ.

ಈ ಹಿಂದೆ ಕ್ರಿಸ್​ಮಸ್ ಹಾಗೂ ಹೊಸವರ್ಷದ ಸಂದರ್ಭದಲ್ಲಿ ನಗರದಲ್ಲಿರುವ ಹೊಟೇಲ್​ಗಳ ಕೊಠಡಿಗಳಿಗೆ ಭಾರೀ ಬೇಡಿಕೆ ವ್ಯಕ್ತವಾಗಿತ್ತು. ರಜೆ ಮತ್ತು ಇತರ ಕಾರಣಗಳಿಗಾಗಿ ಅನಿವಾಸಿ ಭಾರತೀಯರು ತವರಿನತ್ತ ಆಗಮಿಸಲಿದ್ದ ಹಿನ್ನಲೆ ತಂಗಲು ಹೊಟೇಲ್​ಗಳನ್ನು ಕಾಯ್ದಿರಿಸುತ್ತಿದ್ದರು. ಅದರಂತೆ ಬೆಂಗಳೂರಿನ ಶೇಕಡ 90ರಷ್ಟು ಹೋಟೆಲ್​​ಗಳು ಭರ್ತಿಗೊಂಡಿತ್ತು. ಆ ಸಂದರ್ಭಗಳಲ್ಲಿ ಸುಮಾರು 55 ಸಾವಿರ ರೂಮ್​​ಗಳು ಮುಂಚಿತವಾಗಿ ಕಾಯ್ದಿರಿಸಲಾಗಿತ್ತು.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:09 am, Tue, 7 February 23