ಸಾವಿರ ಗಡಿ ದಾಟಿದ ಬಿಎಂಟಿಸಿ ಎಲೆಕ್ಟ್ರಿಕ್ ಬಸ್​​ ಸಂಖ್ಯೆ: ಕಡಿಮೆಯಾದ ವಾಯು ಮಾಲಿನ್ಯ ಪ್ರಮಾಣವೆಷ್ಟು ಗೊತ್ತಾ?

ಬೆಂಗಳೂರು, ಸೆಪ್ಟೆಂಬರ್ 19: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ಬಿಎಂಟಿಸಿ ಬಳಿ ಇರುವ ಎಲೆಕ್ಟ್ರಿಕ್ ಬಸ್​ಗಳ ಸಂಖ್ಯೆ ಸಾವಿರದ ಗಡಿ ದಾಟಿವೆ. ಸದ್ಯ ಬಿಎಂಟಿಸಿ ಬಳಿ ಇರುವ ಎಲೆಕ್ಟ್ರಿಕ್ ಬಸ್​ಗಳ ಸಂಖ್ಯೆ 1,027 ತಲುಪಿದ್ದು, ಈ ಮೂಲಕ ಸಂಸ್ಥೆ ಮಹತ್ವದ ಮೈಲಿಗಲ್ಲು ಸಾಧಿಸಿದಂತಾಗಿದೆ. ಮೂಲಗಳ ಪ್ರಕಾರ, 2025 ರ ವೇಳೆಗೆ ಎಲೆಕ್ಟ್ರಿಕ್ ಬಸ್​ಗಳ ಸಂಖ್ಯೆ ಸುಮಾರು 2,000 ತಲುಪಲಿದೆ.

ಸದ್ಯ ಬಿಎಂಟಿಸಿ ಬಳಿ ಇರುವ ಒಟ್ಟು ಬಸ್​ಗಳ ಸಂಖ್ಯೆ 6,158. ಈ ಬಸ್‌ಗಳಲ್ಲಿ 1,027 ಎಲೆಕ್ಟ್ರಿಕ್ ಆಗಿವೆ. ಇವುಗಳಲ್ಲಿ 637 ಇ-ಬಸ್‌ಗಳು ಟಾಟಾ ಮೋಟಾರ್ಸ್ ಅಂಗಸಂಸ್ಥೆಯಾಗಿರುವ ‘ಟಿಎಂಎಲ್ ಸ್ಮಾರ್ಟ್ ಸಿಟಿ ಮೊಬಿಲಿಟಿ ಸೊಲ್ಯೂಷನ್ಸ್ ಲಿಮಿಟೆಡ್’ನ ಧಾರವಾಡ ಘಟಕದಲ್ಲಿ ತಯಾರಾಗಿವೆ. ಈ 12 ಮೀಟರ್ ಉದ್ದದ ಬಸ್‌ಗಳನ್ನು ಕೇಂದ್ರ ಸರ್ಕಾರದ ಫೇಮ್-II ಯೋಜನೆಯಡಿ ಪರಿಚಯಿಸಲಾಗಿದೆ.

ಫೇಮ್ ಯೋಜನೆಯಡಿ ಇನ್ನೂ 120 ಬಸ್‌ಗಳನ್ನು ಬಿಎಂಟಿಸಿ ಪಡೆದುಕೊಂಡಿದ್ದು, ಅವುಗಳನ್ನು ಕಾರ್ಯಾಚರಣೆಗೆ ಸೇರ್ಪಡೆಗೊಳಿಸಲು ಅಗತ್ಯ ಅನುಮತಿಗಳನ್ನು ಪಡೆಯುವ ಪ್ರಕ್ರಿಯೆ ಚಾಲ್ತಿಯಲ್ಲಿದೆ. ಉಳಿದ ಎಲ್ಲಾ 284 ಇ-ಬಸ್‌ಗಳನ್ನು ನವೆಂಬರ್ ಅಂತ್ಯದ ವೇಳೆಗೆ ಕ್ರಮೇಣ ಸೇವೆಗೆ ಪರಿಚಯಿಸಲಾಗುವುದು ಎಂದು ಬಿಎಂಟಿಸಿ ತಿಳಿಸಿದೆ.

ಫೇಮ್-II ಯೋಜನೆಯಡಿಯಲ್ಲಿ, ಬಿಎಂಟಿಸಿಯು ಅಶೋಕ್ ಲೇಲ್ಯಾಂಡ್ ಅಂಗಸಂಸ್ಥೆ ಸ್ವಿಚ್ ಮೊಬಿಲಿಟಿಯಿಂದ ತಯಾರಿಸಲ್ಪಟ್ಟ 12-ಮೀಟರ್ ಉದ್ದದ 300 ಇ-ಬಸ್‌ಗಳನ್ನು ಸಹ ಖರೀದಿಸಿದೆ. ಹೆಚ್ಚುವರಿಯಾಗಿ, ಇದು ಸ್ಮಾರ್ಟ್ ಸಿಟೀಸ್ ಮಿಷನ್ ಅಡಿಯಲ್ಲಿ ಜೆಬಿಎಂ ಗ್ರೂಪ್‌ನಿಂದ ತಯಾರಿಸಲ್ಪಟ್ಟ 9-ಮೀಟರ್ ಉದ್ದದ 90 ಇ-ಬಸ್‌ಗಳನ್ನೂ ಖರೀದಿಸಿ, ನಿರ್ವಹಿಸುತ್ತಿದೆ.

ವಾಯು ಮಾಲಿನ್ಯ ಕಡಿಮೆ: ವಿವರ ನೀಡಿದ ಬಿಎಂಟಿಸಿ

ಬೆಂಗಳೂರಿನಲ್ಲಿ ವಾಯು ಮಾಲಿನ್ಯ ಕಡಿಮೆ ಮಾಡಲು ಮತ್ತು ಪರಿಣಾಮಕಾರಿಯಾಗಿ ಸಾರ್ವಜನಿಕ ಸಾರಿಗೆ ಸೇವೆಯನ್ನು ಒದಗಿಸಲು ಇ-ಬಸ್‌ಗಳನ್ನು ಪರಿಚಯಿಸಲಾಗುತ್ತಿದೆ. 1,000 ಇ-ಬಸ್‌ಗಳ ಮೂಲಕ 51,000 ಲೀಟರ್ ಡೀಸೆಲ್ ಅನ್ನು ಉಳಿಸಲಾಗುತ್ತಿದೆ. ಈ ಬಸ್​​ಗಳಿಂದಾಗಿ ಪ್ರತಿದಿನ 1.38 ಲಕ್ಷ ಕೆಜಿ ಇಂಗಾಲದ ಡೈಆಕ್ಸೈಡ್ ಹೊರಸೂಸುವಿಕೆ ತಡೆಯಲಾಗಿದೆ ಎಂದು ಎಂದು ಬಿಎಂಟಿಸಿ ಹೇಳಿದೆ.

ಇ-ಬಸ್‌ಗಳು ಹಾನಿಕಾರಕ ಅನಿಲಗಳು ಅಥವಾ ಹೊಗೆಯನ್ನು ಗಾಳಿಯಲ್ಲಿ ಹೊರಸೂಸುವುದಿಲ್ಲ, ಸಲ್ಫರ್ ಆಕ್ಸೈಡ್, ನೈಟ್ರೋಜನ್ ಮಾನಾಕ್ಸೈಡ್, ಹೈಡ್ರೋಕಾರ್ಬನ್ ಮತ್ತು ಪರ್ಟಿಕ್ಯುಲೇಟ್ ಮ್ಯಾಟರ್​​ನಂತಹ ಮಾಲಿನ್ಯಕಾರಕಗಳ ಹೊರಸೂಸುವಿಕೆಯ ಮಟ್ಟವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ. ಡೀಸೆಲ್ ವಾಹನಗಳಿಗೆ ಹೋಲಿಸಿದರೆ ಇ-ಬಸ್​ಗಳಿಂದ ಶಬ್ದ ಮಾಲಿನ್ಯವೂ ಕಡಿಮೆ ಎಂದು ಬಿಎಂಟಿಸಿ ಹೇಳಿದೆ.

ಬರಲಿವೆ ಇನ್ನಷ್ಟು ಇ-ಬಸ್

ಮುಂದಿನ ದಿನಗಳಲ್ಲಿ 760 ಇ-ಬಸ್‌ಗಳನ್ನು ಖರೀದಿಸ ಕಾರ್ಯಾಚರಣೆಗಿಳಿಸಲು ಬಿಎಂಟಿಸಿ ಯೋಜಿಸಿದೆ. ಇವುಗಳಲ್ಲಿ 320 ಎಸಿ ಮತ್ತು 148 ನಾನ್-ಎಸಿ 12-ಮೀಟರ್ ಉದ್ದದ ಬಸ್‌ಗಳು ಸೇರಿವೆ. 320 ಎಸಿ ಬಸ್‌ಗಳು ಹಳೆಯ ವೋಲ್ವೋ ಬಸ್ಸುಗಳಿಗೆ ಬದಲಾಗಿ ಕಾರ್ಯಾಚರಣೆ ಶುರು ಮಾಡಲಿವೆ.

ಇದನ್ನೂ ಓದಿ: ಡೆಡ್​​ಲೈನ್​ ಮುಗಿದ್ರೂ ಬಗೆಹರಿಯದ ರಸ್ತೆ ಗುಂಡಿ: ಜೇಬು ತುಂಬಿಸಿಕೊಂಡ್ರಾ ಎಂದ ಬಿಜೆಪಿ ಎಂಪಿ

ಕಳೆದ ವರ್ಷದಿಂದ ಬಿಎಂಟಿಸಿಯ ದೈನಂದಿನ ಪ್ರಯಾಣಿಕರ ಸಂಖ್ಯೆ 27.4 ಲಕ್ಷದಿಂದ 40 ಲಕ್ಷಕ್ಕೆ ಏರಿದ್ದರೆ, ಬಸ್​​ಗಳ ಸಂಖ್ಯೆ 6,888 ರಿಂದ 6,158 ಕ್ಕೆ ಇಳಿದಿದೆ. ಸರಾಸರಿಯಾಗಿ, ಬಿಎಂಟಿಸಿ ಪ್ರತಿದಿನ 5,725 ಬಸ್‌ಗಳನ್ನು ಕಾರ್ಯಾಚರಿಸುತ್ತಿದ್ದರೆ, 59,709 ಟ್ರಿಪ್‌ಗಳನ್ನು ನಿರ್ವಹಿಸುತ್ತದೆ. ಬಿಎಂಟಿಸಿ ಬಸ್​ಗಳು ಪ್ರತಿ ದಿನ ಒಟ್ಟು 11.73 ಲಕ್ಷ ಕಿಲೋಮೀಟರ್‌ಗಳನ್ನು ಕ್ರಮಿಸುತ್ತವೆ ಎಂದು ಮೂಲಗಳು ತಿಳಿಸಿವೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ