ಆ ಗ್ರಾಮದ ಜನರ ಒಂದು ಐಡಿಯಾದಿಂದ ಅಲ್ಲಿ ಜಲಕ್ರಾಂತಿಯಾಗಿದೆ!

ಬೀದರ್: ಈ ಗ್ರಾಮದ ಜನರು ಕೊಟ್ಟ ಒಂದೇ ಒಂದು ಐಡಿಯಾದಿಂದ ಈಗ ಅಲ್ಲಿ ಜಲಕ್ರಾಂತಿಯಾಗಿದೆ. ಒಂದು ಚಿಕ್ಕ ಬ್ಯಾರೇಜ್ ನೀರು ಹತ್ತಾರು ಹಳ್ಳಿಗಳಿಗೆ ನೀರು ಕೊಡುತ್ತಿದೆ. ಮೆಳೆಯಿಲ್ಲದೆ ಭೂಮಿಯಲ್ಲಿ ಬೆಳೆ ಬೆಳೆಯಲಾಗದ ಸ್ಥಿತಿಯಲ್ಲಿದ್ದ ರೈತರು ಭರಪೂರ ನೀರು ಕಂಡು ಸಂತಸ ಪಡುವಂತಾಗಿದೆ.

ಬೀದರ್ ಜಿಲ್ಲೆ ಭಾಲ್ಕಿ ತಾಲೂಕಿನ ಮಹಾರಾಷ್ಟ್ರ ಗಡಿಗೆ ಹೊಂದಿಕೊಂಡಿರುವ ಸಾಯೆಗಾಂವ್ ಗ್ರಾಮದ ಜನ ಕೊಟ್ಟ ಒಂದು ಐಡಿಯಾ ಗ್ರಾಮಕ್ಕೆ ಗ್ರಾಮವೇ ಹಸಿರಿನಿಂದ ಕಂಗೊಳಿಸುವಂತೆ ಮಾಡಿದೆ. ನೀರಿನಿಂದ ತುಂಬಿ ತುಳುಕುವಂತೆ ಮಾಡಿದೆ. ಆ ಗ್ರಾಮದಲ್ಲಿ ಚಿಕ್ಕ ಸೇತುವೆ ಇತ್ತು. ಪ್ರತಿ ಮಳೆಗಾಲದಲ್ಲಿ ಈ ಸೇತುವೆಗೆ ನೀರು ಜಾಸ್ತಿ ಬಂದೂ ಸೇತುವೆ ಮುಳಗಡೆಯಾಗುತ್ತಿತ್ತು.

ಹೀಗಾಗಿ, ಈ ಗ್ರಾಮದ ಜನರ ಮನವಿ ಮೇರೆಗೆ ಸರ್ಕಾರ ಈ ಗ್ರಾಮಕ್ಕೆ ದೊಡ್ಡದಾದ ಒಂದು ಸೇತುವೆ ನಿರ್ಮಾಣ ಮಾಡಲು ಗ್ರೀನ್ ಸಿಗ್ನಲ್ ಕೊಟ್ಟಿತ್ತು. ಅದರಂತೆ ಕೆಲಸವೂ ಆರಂಭವಾಯಿತು. ಆದ್ರೆ, ಇದ್ದ ಸೇತುವೆಯನ್ನ ನೆಲಸಮ ಮಾಡಲು ಒಂದು ಕೋಟಿ ರೂ ಅನುದಾನ ಮೀಸಲಿಟ್ಟು, ಸೇತುವೆ ನೆಲಸಮ ಮಾಡುವ ಕಾರ್ಯ ಆರಂಭವಾಯ್ತು.

ಆದ್ರೆ, ಇದಕ್ಕೆ ಗ್ರಾಮಸ್ಥರು ಒಪ್ಪಿಗೆ ಕೊಡಲಿಲ್ಲ . ಬ್ರಿಟಿಷರ ಕಾಲದ ಹಳೇ ಸೇತುವೆ ನೆಲ ಸಮಮಾಡುವ ಖರ್ಚಿನಲ್ಲೇ ಇದರ ಪಕ್ಕದಲ್ಲೇ ಹೊಸ ಸೇತುವೆ ಮಾಡಿ ಎಂದು ಗ್ರಾಮಸ್ಥರು ಮನವಿ ಮಾಡಿದ್ರು. ಇದ್ರಿಂದ ಇಲ್ಲಿ ಗೇಟ್ ಅಳವಡಿಸಲಾಗಿದ್ದು, ಬ್ಯಾರೇಜ್‌ನಲ್ಲಿ ಭರಪೂರ ನೀರು ನಿಲ್ಲವಂತಾಗಿದೆ.

ಗ್ರಾಮಸ್ಥರ ಈ ಐಡಿಯಾ ತಕ್ಷಣ ಒಪ್ಪಿಕೊಂಡು ಇಲ್ಲಿನ ಅಧಿಕಾರಿಗಳು ಹಳೇ ಸೇತುವೆಗೆ 25 ಗೇಟ್ ಗಳನ್ನ ಅಳವಡಿಸಿದ್ದಾರೆ. ಹೀಗಾಗಿ, ಬ್ಯಾರೇಜ್ ನಲ್ಲಿ ಸುಮಾರು ನಾಲ್ಕು ಕಿಲೋಮೀಟರ್ ಗಟ್ಟಲೇ ನೀರು ನಿಂತಿದ್ದು, ಗ್ರಾಮಸ್ಥರಿಗೆ ರೈತರಿಗೆ ಪ್ರಾಣಿ ಪಕ್ಷಿಗಳಿ ನೀರಿನ ಸಮಸ್ಯೆ ಇಲ್ಲದಂತಾಗಿದೆ.

Published On - 7:29 am, Wed, 20 November 19