ಮೈನವಿರೇಳಿಸುವ ‘ವಜ್ರಮುಷ್ಠಿ ಕಾಳಗ’ಕ್ಕೆ ಚಾಮರಾಜನಗರದ ಸತೀಶ್ ಜಟ್ಟಿ ಸಜ್ಜು

ಚಾಮರಾಜನಗರ, ಅ.20: ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಜಂಬೂ ಸವಾರಿಗೆ ದಿನಗಣನೆ ಆರಂಭವಾಗಿರುವ ಬೆನ್ನಲ್ಲೇ, ವಿಜಯದಶಮಿಯಂದು ಅಂಬಾ ವಿಲಾಸ ಅರಮನೆಯ ಕರಿಕಲ್ಲು ತೊಟ್ಟಿಯಲ್ಲಿ ನಡೆಯುವ ಸಾಂಪ್ರದಾಯಿಕ ಹಾಗೂ ಮೈನವಿರೇಳಿಸುವ ‘ವಜ್ರಮುಷ್ಠಿ ಕಾಳಗ’ಕ್ಕೆ ಸಿದ್ಧತೆಗಳು ಪೂರ್ಣಗೊಂಡಿವೆ. ಈ ಬಾರಿಯ ರೋಮಾಂಚಕಾರಿ ಕಾಳಗಕ್ಕೆ ಚಾಮರಾಜನಗರದ ಸತೀಶ್ ಜಟ್ಟಿ ಎಂಬುವವರು ಸಂಪೂರ್ಣವಾಗಿ ಸಜ್ಜಾಗಿದ್ದಾರೆ.

3 ತಿಂಗಳಿನಿಂದ ಗರಡಿಯಲ್ಲಿ ಕಠಿಣ ತರಬೇತಿ:

ಚಾಮರಾಜನಗರದ ಸತೀಶ್ ಜಟ್ಟಿ ಅವರು ಇದೇ ಮೊದಲ ಬಾರಿಗೆ ದಸರಾ ವಜ್ರಮುಷ್ಠಿ ಕಾಳಗದಲ್ಲಿ ಭಾಗವಹಿಸುತ್ತಿದ್ದಾರೆ. ಕಳೆದ ಮೂರು ತಿಂಗಳಿನಿಂದ ಚಾಮರಾಜನಗರದ ಪ್ರಸಿದ್ಧ ‘ದೊಡ್ಡ ಗರಡಿ’ಯಲ್ಲಿ ತರಬೇತುದಾರರಾದ ಪುಟ್ಟಣ್ಣ ಜಟ್ಟಿ ಅವರಿಂದ ಕಾಳಗದ ವಿವಿಧ ಪಟ್ಟು ಹಾಗೂ ನಡೆಗಳ ಕಠಿಣ ತರಬೇತಿಯನ್ನು ಪಡೆಯುತ್ತಿದ್ದಾರೆ. ದಸರಾ ಆರಂಭಕ್ಕೆ 2-3 ತಿಂಗಳು ಮುಂಚಿತವಾಗಿಯೇ ಕಾಳಗದಲ್ಲಿ ಪಾಲ್ಗೊಳ್ಳುವವರ ಪಟ್ಟಿಯನ್ನು ಮೈಸೂರು ರಾಜಮನೆತನಕ್ಕೆ ಸಲ್ಲಿಸಲಾಗುತ್ತದೆ. ಅವರ ಅನುಮೋದನೆಯ ಬಳಿಕ ಜಟ್ಟಿಗಳಿಗೆ ವಿಶೇಷ ಆહાર ಹಾಗೂ ತರಬೇತಿಯನ್ನು ನೀಡಲಾಗುತ್ತದೆ.

ಇದನ್ನೂ ಓದಿ: ಮೈಸೂರು ದಸರಾ ಗಜಪಡೆಗಳಿಗೆ ಇದು ಔತಣಕೂಟ: ಆನೆಗಳ ಪೌಷ್ಟಿಕ ಆಹಾರ ಹೇಗಿದೆ ನೋಡಿ? ; ಆದ್ರೂ ಈ ಕೂಟದಲ್ಲಿ ತಿಂಡಿಪೋತ ಭೀಮ ಮಿಸ್

ಏನಿದು ವಜ್ರಮುಷ್ಠಿ ಕಾಳಗ?

ವಿಜಯದಶಮಿಯಂದು ಜಂಬೂ ಸವಾರಿಗೂ ಮುನ್ನ ರಾಜಮನೆತನದವರ ಸಮ್ಮುಖದಲ್ಲಿ ಈ ಸಾಂಪ್ರದಾಯಿಕ ಕಾಳಗ ನಡೆಯುತ್ತದೆ. ಜಟ್ಟಿ ಜನಾಂಗಕ್ಕೆ ಸೇರಿದ ನಾಲ್ವರು ಪೈಲ್ವಾನರು ಬೆರಳಿನಲ್ಲಿ ದಂತದ ನಖ (ವಜ್ರಮುಷ್ಠಿ) ಧರಿಸಿ ಕಾದಾಡುತ್ತಾರೆ. ಈ ಹೊಡೆದಾಟದ ವೇಳೆ ಯಾರಾದರೂ ಒಬ್ಬ ಜಟ್ಟಿಯ ತಲೆಯಿಂದ ರಕ್ತ ಸುರಿಯಲು ಆರಂಭವಾದ ತಕ್ಷಣ ಕಾಳಗವನ್ನು ಮುಕ್ತಾಯಗೊಳಿಸಲಾಗುತ್ತದೆ. ಈ ಸಾಹಸ ಕಲೆಯ ಬಗ್ಗೆ ಮಾತನಾಡಿದ ಸತೀಶ್ ಜಟ್ಟಿ, “ವಜ್ರಮುಷ್ಠಿ ಕಾಳಗದಲ್ಲಿ ಭಾಗವಹಿಸುವುದು ನಮ್ಮ ಜನಾಂಗಕ್ಕೆ ಸಿಗುವ ಅತ್ಯುನ್ನತ ಗೌರವ. ನಮ್ಮ ರಕ್ತವನ್ನು ದೇವಿಗೆ ಅರ್ಪಿಸಿದರೆ ನಾಡಿಗೆ ಹಾಗೂ ರಾಜರಿಗೆ ಶ್ರೇಯಸ್ಸಾಗುತ್ತದೆ ಎಂಬ ಪವಿತ್ರ ನಂಬಿಕೆ ಇದೆ. ಶತಮಾನಗಳ ಈ ಪಾರಂಪರಿಕ ಸಮರ ಕಲೆಯನ್ನು ಉಳಿಸಿ ಬೆಳೆಸಲು ನಾವು ಸಂತೋಷದಿಂದ ಭಾಗವಹಿಸುತ್ತೇವೆ” ಎಂದಿದ್ದಾರೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ